প্রেরিত্ 14 - Chakma Bibleইকনিয় শঅরত্ 1 ইকনিয় শঅরত্ পৌল আর বার্ণবা তারার্ সুদোম মজিম যিহূদীগুনোর সমাজ-ঘরত্ গেলাক্। সিধু তারা এমন্ গুরি কধা কলাক্ যে, যিহূদী আর অযিহূদী ভালোক্ জনে বিশ্বেজ্ গুরিলাক্। 2 মাত্তর্ যে যিহূদীগুনে বিশ্বেজ্ ন-গরন তারা অযিহূদীগুনোরে ভেজেই দিইনে তারার্ মনানি বিশ্বেজি ভেইয়ুনো বিরুদ্ধে রাগেই তুলিলাক্। 3 পৌল আর বার্ণবা সেই শঅরত্ বেশ্ কয়েক দিন থেলাক্ আর সাহচ্ গুরিনে প্রভুর কধানি কুয়ো ধুরিলাক্। প্রভুর দোয়্যে পৌইদ্যেনে তারা যিয়েনি ফগদাং গোজ্জ্যন্ সেই কধানি যে বিশ্বেজ্ গুরিবার প্রভু সিয়েনি প্রমাণ গুরিবাত্যে পৌল আর বার্ণবারে আমক্ আমক্ কাম্ গুরিবার খেমতা দিলো। 4 ইয়েন্দোই শঅর মানুচ্চুনে ভাগ্ ওই গেলাক্; কেঅ কেঅ যিহূদীগুনো পক্ষে, আরঅ কেঅ কেঅ দিপাধেয়্যেগুনো পক্ষে গেলাক্। 5 সেক্কে অযিহূদী আর যিহূদী এ দ্বি'দলে তারার্ নেতাগুনো সমারে মিলিনে পৌল আর বার্ণবারে অত্যেচার্ গুরিবার আর পাত্তর্ মারিবাত্যে কুজুরোমি গুরিলাক্। 6 মাত্তর্ পৌল আর বার্ণবা সিয়েন কোই পারিনে লুকায়নিয়া রেজ্য ভিদিরে লুস্ত্রা আর দর্বী শঅরত্ আর তার্ কায়-কুরে জাগানিত্ ধেই ধেই বেড়া ধুরিলাক্। 7 সেই বেক্ জাগানিত্ তারা খ্রীষ্ট পৌইদ্যেনে গম্ হবর্ ফগদাং গরা ধুরিলাক্। লুস্ত্রা আর দর্বী শঅরত্ 8 লুস্ত্রা শঅরত্ এক্কো লেং মানুচ্ বৈই থেদঅ। তে জর্মত্তুন্ ধুরি লেং এলঅ আর কনদিন্অ ন-আঢে। 9-10 তে পৌল কধা শুনের্। সেক্কে পৌলে সোজা তা ইন্দি রিনি চেলঅ আর গম্ অবাত্তে তা বিশ্বেজ্চান আঘে দেগিনে তারে দাঙর্ গুরি ডাগিনে কলঅ, “তঅ ঠেঙানিত্ ভর্ দিইনে থিয়্যে।” সেক্কে মানুচ্চো ফাল্ মারি উদিনে আঢি বেড়া ধোল্ল্য। 11 পৌলে যিয়েনি গুরিলো সিয়েনি দেগিনে মানুচ্চুনে লুকায়নীয় ভাষায় রঅ ছাড়িনে কলাক্, “দেবেদাগুনে মানুচ্ ওইনে আমা ইধু লামি এচ্চ্যন্।” 12 সেনত্তে মানুচ্চুনে বার্ণবা নাঙান্ দিলাক্ জেউস আর পৌলে কধা কোইয়্যে বিলিনে তা নাঙান্ দিলাক্ হের্মেস। 13 জেউস দেবেদার মন্দির্বো এলঅ শঅরর্ বারেদি। শঅরর্ গেদো ইধু জেউস দেবেদার্ ধর্মগুরুবো বলদ্ আর মালা আনিলো, কিয়া সেই ধর্মগুরুবো আর বেক্ মানুচ্চুনে পৌল আহ্ বার্ণবা ইধু য়েমান উৎসর্ব গুরিবাত্তে চেলাক্। 14 বার্ণবা আর পৌলে সে কধাগান শুনিনে নিজো কাবড়ানি ফাদিনে ধাবা দিইনে মানুচ্চুনো ইধু গেলাক্ আর রঅ ছাড়িনে কলাক্, 15 “সমাজ্যেগুন, তুমি কিত্তে ইয়েনি গরর্? আমি দঅ বানা মানুচ্, তমা ধোক্ক্যেন স্বভাব। আমি তমা ইধু গম্ হবরান্ ফগদাং গুরির্ যেন তুমি এ বেক্ বাজে জিনিচ্চানি ছাড়িনে জেদা গোজেন ইন্দি ফিরো। তেয়ই আগাজ্, পিত্থিমী, সাগর আর সিয়েনি ভিদিরে যেদক্কানি আঘে বেক্কানি বানেয়্যে। 16 আগ দিনোত্ বেক্ জাদ্তুনোরে তে তারার্ আওজ্ মজিম চলিবাত্তে দিয়্যে, 17 মাত্তর্ তো তে নিত্য নিজো পৌইদ্যেনে সাক্ষি দিয়্যে। তে আগাজত্তুন্ ঝড় দিইনে আর সময় মজিম ফসল দান গুরিনে তার্ দোয়্যে তমারে দেগেয়্যে। তে ভালোক্কানি হানা দান গুরিনে তমা মনানিরে হুজিয়্যে ভর্পুনোং গোজ্যে।” 18 এই বেক্ কধানি কলেয়ো তারা ইধু য়েমান উৎসর্ব গরানাত্তুন্ মানুচ্চুনোরে থামাদে তারার্ অমকদ দুঘ্ অলঅ। 19 পরেদি আন্তিয়খিয়া আর ইকনিয়ত্তুন্ কয়েক্কো যিহূদী এইনে পৌল আর বার্ণবা বিরুদ্ধে মানুচ্চুনোরে ভেজেই দিলাক্। সেক্কে মানুচ্চুনে পৌলরে পাত্তর্ মারিলাক্ আর তে মুরি যেইয়্যে মনে গুরিনে শঅরর্ বারেদি তারে টানি নেযেলাক্। 20 মাত্তর্ যেরেদি খ্রীষ্ট বিশ্বেজিগুনে তা চেরোকিত্ত্যে এগত্তর্ অলে পরেদি তে উদিনে শঅরত্ ফিরি গেলাক্। তার্ কেল্যে তে আর বার্ণবা দর্বী শঅরত্ গেলাক্কোই। 21-22 দর্বী শঅরত্ গম্ হবর্ ফগদাং গুরিনে পৌল আর বার্ণবা ভালোকজনরে শিচ্চ্য গুরিলাক্। সে পরেদি তারা লুস্ত্রা, ইকনিয় আর পিষিদিয়া রেজ্যর্ আন্তিয়খিয়াত্ ফিরি যেইনে সিধুগো শিচ্চ্যগুনোর্ বিশ্বেজ্ বাড়েইনে তারারে খেমতাবলা গুরিলাক্ আর বিশ্বেজে থির্ থেবাত্তে উচ্চোমি তুলি দিলাক্। তারা কলাক্, “গোজেন রেজ্যত্ সুমিবার্ আগেদি আমাত্তুন্ বোউত্ দুঘ্ সোজ্য গরানা দরকার।” 23 তারা পত্তি মন্ডলীত্ আজল্ নেতাগুনোরে কামত্ অদে অদে লাগেলাক্ আর যে প্রভু উগুরে তারা বিশ্বেজ্ গোজ্জ্যন্, তবনা গুরিনে আর উবোচ্ থেইনে সেই প্রভু আঢত্ মন্ডলী মানুচ্চুনোরে তুলি দিলাক্। সিরিয়া দেজর্ আন্তিয়খিয়াত্ ফিরি যানা 24 যেরেদি পৌল আর বার্ণবা পিষিদিয়া রেজ্যর্ ভিদিরেদি পাম্ফুলিয়া রেজ্যত্ লুমিলাক্। 25 তারা পর্গা শঅরত্ গোজেনর্ কধা ফগদাং গুরিনে অত্তালিয়া বন্দরত্ গেলাক্। 26 পরেদি অত্তালিয়াত্তুন্ জাহাজত্ গুরি সিরিয়া দেজর্ আন্তিয়খিয়াত্ ফিরি এলাক্। যে কামান্ তারা ইক্কিনে থুম্ গুরিলাক্ সেই কামানত্যে এই আন্তিয়খিয়াত্ গোজেনর্ দোয়্যের্ আঢত্ তারারে তুলি দিয়্যে ওইয়্যে। 27 আন্তিয়খিয়াত্ লুমিনে মন্ডলীর বেক্কুনোরে তারা এক জাগাত্ থুবেলাক্ আর গোজেনে তারা মাধ্যমে যিয়েনি গোজ্জ্যে সিয়েনি বেক্কানি কলাক্। গোজেনে কেধোক্ক্যেন্ গুরি অযিহূদীগুনোরে সুযোগ গুরি দিয়্যে যাতে তারা খ্রীষ্ট উগুরে বিশ্বেজ্ গুরি পারন্ সিয়েনিয়ো কলাক্। 28 সে পরেদি পৌল আর বার্ণবা শিচ্চ্যগুনো সমারে সিধু ভালোক্ দিন থেলাক্। |
Copyright © 2021 Bangladesh Bible Society
Bangladesh Bible Society