প্রেরিত্ 12 - Chakma Bibleপিতরর্ উদ্ধোর্ পানা 1 সে অক্তত্ রাজা হেরোদে অত্যেচার্ গুরিবাত্যে খ্রীষ্টীয় মন্ডলীর কয়েক্কো মান্জ্যরে ধুরি আনিলো। 2 তে যোহন ভেই যাকোবরে ছুরিলোই খুন্ গোরেয়্যে। 3 যেক্কে তে দেগিলো যিহূদীগুনে সিয়েন্দোই হুজী ওইয়োন্ সেক্কে তে পিতররেয়ো ধুরিবাত্যে গেলঅ। এ ঘটনাগান সদানেইয়্যে রুটি পরবর্ সময়োত্ ওইয়্যে। 4 তে পিতররে ধুরিনে জেলোত্ দিলো। চের্জন চের্জন গুরি চের্ দল সৈন্য উগুরে পিতররে চুগি দিবার ভারান্ দিয়্যে অলঅ। হেরোদে ঠিগ্ গুরিলো, উদ্ধোর্-পরবর্ পরেদি বিচের্ গুরিবাত্যে পিতররে মানুচ্চুনো ইধু নিগিলেই আনিবো। 5 ইয়েনত্যে পিতররে জেলখানাত্ আক্সোই রাগা অলঅ। মাত্তর্ মন্ডলী মানুচ্চুনে গোজেন ইধু পিতরত্যে কোজোলী গুরিনে তবনা গত্তন্। 6 যেদিন্ন্যে হেরোদে বিচেরত্যে পিতররে নিগিলেই আনিবো তা আগ রেদোত্ দ্বিজন সৈন্যর্ সংমধ্যে পিতরে ঘুম যার্। তারে দ্বিআন্ শিগোল্লোই বানি থুয়ো ওইয়্যে আর চুগিদারুনে দুয়োরত্ চুগি দেদন্। 7 এমন্ সময়োত্ আদিক্ক্যেগুরি প্রভুর এক্কো দূত্ সিয়েনত্ এইনে থিয়েল। সেক্কে জেল্খানাত্ সেই ঘরান্ পহ্রে জ্বোল্জোল্যে ওই উদিলো। স্বর্গদূত্তো পিতর কিয়্যেত্ জোরে ঠেলা দিইনে তারে জাগেইনে কলঅ, “যাদিমাদি উদো।” ইয়েন্দোই পিতর দ্বি আঢত্তুন্ শিগোলান্ খুয়োই পড়ি গেলঅ। 8 সেক্কে স্বর্গদূত্তো পিতররে কলঅ, “তঅ ফার্বোত্ কমর্-বিজোনিগান লাগা, টেঙত্ জদা পিন্।” পিতরে সিয়েন গুরিলো। স্বর্ঘদূত্তো তারে কলঅ, “তঅ কাবড়ান্ কিয়্যেত্ বেড়েইনে মঅ পিজে পিজে আয়।” 9 পিতরে তা পিজে পিজে জেল্খানাত্তুন্ বারেদি এলঅ, মাত্তর্ স্বর্গদূত্তো যিয়েন্ গোজ্জ্যে সিয়েন যে ঘেচ্চ্যেক্ গুরি ঘোট্যে সিয়েনর্ কিচ্চু তে বুঝি ন-পারিলো। তে মনে গুরিলোদে দর্শন দেগের্। 10 তারা পত্তম্ আর দ্বি-লম্বর্ চুগিদারুনোর দল্লো পার্ ওইনে শঅরত্ সুমিবার্ লুয়োর্ গেদ্টো ইধু লুমিলাক্। গেদ্টো তারাত্তে নিজে নিজেই খুলি গেলঅ আর তারা সিবের্ সংমধ্যেদি নিগিলি গেলাক্। তারা এক্কান্ পধ্ ধুরিনে আঢি যাদন্ এমন সময় স্বর্গদূত্তো আদিক্ক্যে গুরি পিতররে ফেলেইনে গেলগোই। 11 সেক্কে পিতরে যেন চেতনা ফিরি পেলঅ আর কলঅ, “ইক্কিনে মুই ঘেচ্চ্যেক্ গুরি বুঝিলুং যে, প্রভু তা দূত্তোরে পাধেইনে হেরোদ্অ আঢত্তুন্ আর যিহূদীগুনে যিয়েন গুরিবাত্যে কুজুরোমি গোজ্জ্যন্ সিয়েনিত্তুন্ মরে রোক্ষ্যে গুরিলো।” 12 এ কধাগান বুঝি পারিনে তে যোহনর মা মরিয়ম ঘরত্ গেলঅ। এই যোহনরে মার্ক বিলিনেয়ো ডাগা অদঅ। সেই ঘরত্ ভালোকজনে এক সমারে এগত্তর্ ওইনে তবনা গত্তন্। 13 পিতরে বারেদি দুয়োরানত্ বাজ্জ্যেলে পরেদি রোদা নাঙে এক্কো চাগরানি দুয়োরান্ খুলিবাত্তে এলঅ। 14 পিতর রবুয়ো চিনি পারিনে তে এদ্ক্ হুজী অলঅ যে, দুয়োরান্ ন-খুলিনে দাবা যেইনে ভিদিরে হবর্ দিলো, “পিতরে দুয়োরান্ কুরে থিয়্যেই আঘে।” 15 সেক্কে শিচ্চ্যগুনে সেই মিলেবোরে কলাক্, “তর্ মাধা খারাব্ ওইয়্যে।” মাত্তর্ তে বার্ বার্ জোর্ গুরিনে কনায় তারা কলাক্, “ইবে পিতরর্ রোক্ষ্যে গুরিয়্যে দূত্।” 16 ইন্দি পিতরে দুয়োরানত্ বাজ্জে ধুরিলো। সেক্কে শিচ্চ্যগুনে দুয়োরান্ খুলিনে পিতররে দেগিনে আমক্ ওই গেলাক্। 17 পিতরে তারারে জুরো অবাত্যে আঢ্তোই ইজিরে দিলো আর জেলখানাত্তুন্ প্রভু তারে কেধোক্ক্যেন্ গুরি নিগিলেই আন্ন্যে সিয়েন জানেল। যেরেদি তে কলঅ, “এ হবরান্ যাকোব আর অন্য ভেইয়ুনোরেয়ো দুয়ো।” এ কধাগান কোইনে তে নিগিলিনে অন্য জাগাত্ গেলগোই। 18 বেন্ন্যে পহ্র অলে পরেদি পিতরে কুধু গেলঅ সিয়েন্দোই সৈন্যগুনো ভিদিরে হিজেহিচ্চ্যে পড়ি গেলঅ। 19 হেরোদে অমকদ গমেদালে তারে তোগেল, মাত্তর্ তারে ন-পেইনে চুগিদারুনোরে জেরা গুরিলো আর যেরেদি সেই চুগিদারুনোরে মারে ফেলেবার উগুম দিলো। ইয়েনর্ পরেদি হেরোদে যিহূদিয়াত্তুন্ কৈসরিয়াত্ গেলঅ আর সিধু কয়েক্ দিন থেলঅ। হেরোদর মরাণা 20 সে সময়োত্ হেরোদে সোর আর সীদোন শঅর মানুচ্চুনো উগুরে রাগে আগুন অলঅ। সেক্কে সিধুগো মানুচ্চুনে এক সমারে মিলিনে হেরোদ লগে দেগা গুরিবাত্যে গেলাক্। বাস্ত নাঙে রাজার্ ঘুমাইদ্যে ঘরর্ বিশ্বেজি চাগর্বোরে নিজোর্ পক্ষে আনিনে তারা রাজা লগে এক্কান মিট্মাট গুরিবাত্তে চেলাক্, কিয়া রাজা হেরোদ দেজত্তুন্ তারার্ দেজত্ হানা এদঅ। 21 সেক্কে হেরোদে এক্কো দিন ঠিগ্ গুরিলো। তে সেদিন্ন্যে রাজপোশাক্ পিনিইনে সিংহাসনত্ বৈইনে সেই মানুচ্চুনো ইধু কধা কুয়ো ধুরিলো। 22 তা কধানি শুনিনে তারা রঅ ছাড়িনে কলাক্, “ইয়েনি দেবেদার্ কধা, মান্জ্যর্ কধা নয়।” 23 হেরোদে গোজেনর বাঈনী ন-গরে বিলি সেক্কে প্রভুর্ এক্কো দূত্ তারে আঘাত্ গুরিলো, আর চিরোর্ জালায় তে মুরি গেলঅ। 24 মাত্তর্ গোজেনর্ কধানি ছিদি পড়িলো আর ভালোক্কুন্ মান্জ্যে সিয়েন বিশ্বেজ্ গরা ধুরিলাক্। 25 ইন্দি বার্ণবা আর শৌলর কামান্ থুম্ অনায় তারা যোহনরে সমারে লোইনে যিরূশালেমত্ ফিরি গেলাক্। এ যোহনরে মার্ক নাঙেয়ো ডাগা অদঅ। |
Copyright © 2021 Bangladesh Bible Society
Bangladesh Bible Society