৩ যোহন 1 - Chakma Bible

যোহনর্ তিন লম্বর চিধি

¹ গোজেনর্ সত্যর্ কারনে মুই যিবেরে কোচ্‌পাং মর্ সেই পরাণর্ সমাজ্জ্যে গাইয় ইধু সেই বুড়ো নেতাবো মুই এ চিধিগান লেগঙর্।

² পরাণর্ সমাজ্জ্যেবো, মুই তবনা গরং যেন তর্ বেক্কানি গমেডালে চলে আর আত্মার ইন্দিত্তুন্ তুই যেধোক্ক্যেন গমেডালে চলর্ ঠিগ্ তর্ কিয়্যেগানঅ যেন গমেডালে চলে।

³ মুই ভারী হুজী অলুং যেক্কে কয়েক্কো বিশ্বেজি ভেই এইনে তঅ পৌইদ্যেনে এ সাক্ষিগান দিলাক্, গোজেন সত্যগান উগুরে তুই বিশ্বেজি আঘচ্ আর তা সমারে চলর্।

⁴ মর্ পুয়ো-ছাগুনে যে গোজেনর্ সত্যর্ পধেদি চলদন্, এ কধাগান শুনোনাত্তুন্ বেশ্ গুরি হুজি অনা আর নেই।

⁵ পরাণর্ সমাজ্জ্যেগুন, ন-চিনিনেয়ো বিশ্বেজি ভেইয়ুনোত্যে তুই যিয়েনি গরর্ সিয়েনি বিশ্বেজ্ গুরিনে গরর্।

⁶ মন্ডলীর বেক্কুনো মুজুঙোত্ তারা তর্ কোচ্‌পানার কধা কোইয়োন। গোজেনে যেনে হুজি অয় সেবাবোত্যেগুরি তুমি তারার্ যানার্ বেবস্থা গুরি দিলে গম অবঅ।

⁷ তারা খ্রীষ্টত্যে নিগিল্ল্যন্ আর অবিশ্বেজিগুনোত্তুন্ কনঅ কিচ্চু ন-লন্।

⁸ সেনত্যে এবাবোত্যে মানুচ্চুনোরে এজাল্ দেনা আমার উচিত, যেন গোজেনর্ সত্যগানত্যে আমিয়ো তারার্ কামঅ সমাজ্জ্যে ওই।

⁹ মুই মন্ডলী ইধু এক্কান চিধি লেক্ক্যং, মাত্তর্ দিয়ত্রিফেস্‌ মন্ডলী ভিদিরে আজল্লো অবার্ চায় বিলিনে আমা কধা ন-মানে।

¹⁰ সেনত্যে তে যিয়েনি গরের্ মুই এযানার্ পরেদি সিয়েনি বেক্কুনোরে জানেম। তে আমা বিরুদ্ধে ইংসে গুরিনে বোউত্ মিজে কধা কোইয়্যে। সিয়েনিলোইও সুগি ন-ওইনে তে নিজেয়ো ভেইয়ুনোরে মানি ন-লয় আর যিগুনে তারারে মানি লবাত্যে চাদন্ তারারেয়ো মানা গরের্ আহ্ মন্ডলীত্তুন্ নিগিলেই দের্।

¹¹ পরাণর্ সমাজ্জ্যেগুন, ভান্ন্যেয়র্ পিজেদি ন-যেইনে বরং গমঅ পিজেদি আঢঅ। যে গম কাম গরে তে গোজেনর্ মানুচ্‌; আর যে ভান্ন্যেই কাম গরে তে গোজেনরে ন-দেগে।

¹² বেক্কুনে দীমীত্রিয়রে নাঙ্ গিনোদন্; এন্‌ কি, গোজেনর্ সত্যগানেয়ো সিয়েন গরের্। আমিয়ো তারে নাঙ্ গিনির্। তুই দঅ কোই পারচ্ আমি যিয়েন কোই সিয়েন সত্য।

¹³ মর্ ভালোক্কানি কধা তরে লিগিবার্ এলঅ, মাত্তর্ কালি-কলমে সিয়েন মুই লিগিবার্ ন-চাং।

¹⁴ আজা গরং যাদিমাদি তরে দেগিম্, আর সেক্কে মুজুঙোমুজুঙি ওইনে আমি কধা কোই পারিবোং।

¹⁵ তর্ শান্তি ওক্‌। তর্ সমাজ্জ্যেগুনে তরে পাত্তুরু তুরু জানাদন্। সিধুগোর্ সমাজ্জ্যে পত্তিজনরে যুদো যুদো গুরি আমা পাত্তুরু তুরু জানেয়ো।