২ তীমথিয় 4 - Chakma Bible1 খ্রীষ্টর্ ফিরি এজানা আর তা রেজ্য পৌইদ্যেনে মনত্ রাগেইনে গোজেন মুজুঙোত্ আর যিবে জেদা আর মরাগুনোর্ বিচের্ গুরিবো সেই খ্রীষ্ট যীশুর্ মুজুঙোত্ মুই তরে এ উগুমান দুয়োঙর্- 2 গোজেনর্ কধানি ফগদাং গরঅ; সময়োত্ ওক্ বা অসময়ত্ ওক্, আমিযে ফগদাঙত্যে যুক্কোল্ থাগঅ; ভারী ধৈজ্জ্য ধুরি শিক্ষ্যে দিইনে মানুচ্চুনোরে দুষ্ দেগেই দে, তারারে উজিয়ার্ গরঅ আর উপদেচ্ দুয়ো। 3 এন্ অক্ত এবঅ যেক্কে সত্য শিক্ষ্যেনি মান্জ্যর সোজ্জ্য ন-অবঅ, বরং নিজো আওজ্চান পূরোণ গুরিবাত্যে তারা ভালোক্কুন্ মাষ্টর্ তুবেবাক্ যিগুনে তারারে হুজি গরেদে ধোক্ক্যেন শিক্ষ্যে দিবাক্। 4 তারা গোজেনর্ সত্যগান পৌইদ্যেনে ন-শুনিনে হিত্য-কধা শুনিবাত্যে চেবাক্। 5 মাত্তর্ তুই বেক্কানিত্ নিজোরে দোঙেই রাগা, দুঘ্ সোজ্জ্য গর্ আর খ্রীষ্ট পৌইদ্যেনে গম হবর্ প্রচার গরানাত্ থাক্, আর গোজেনে তরে যে কাম গুরিবাত্যে দিয়্যে সিয়েন থুম্ সং গর্। 6 মরে ইক্কিনে উৎসর্ব ইজেবে ঢালি দিয়্যে অর্; মর্ মরণর্ সময় এচ্চ্যে। 7 খ্রীষ্টর্ পক্ষে মুই মনে-পরাণে যুদ্ধ গোজ্জ্যং, মত্যে ঠিগ্ গোজ্জ্যে পধ্তানর্ থুম্ সং ধাবা দুয়োং আর খ্রীষ্টীয় ধর্ম-বিশ্বেজ্চানরে ধুরি রাগেয়োং। 8 সেনত্যে মত্যে সৎ জিংকানির বক্শিজ্ তুলো আঘে। বিচের-দিনোত্ ন্যায় বিচেরক প্রভু মরে সেই বক্শিজ্ ইজেবে জিদেনার্ মালাবো দান গুরিবো। মাত্তর্ তে যে বানা মরে দান গুরিবো সিয়েন নয়, যিগুনে তার্ ফিরি এযানাত্যে আওজ্ গুরি বাজ্জেই আঘন্ তারারে বেক্কুনোরে দান গুরিবো। নিজোর্ কধা 9 তুই ভারী গুরি চেষ্টা গর্ যেনে মইধু যাদিমাদি এই পারচ্, 10 কিয়া দীমা ইধুগোর্ জগদ্তানরে কোচ্পেইনে মরে ফেলেইনে থিষলনীকীত্ যেয়্যেগোই। ইয়েনবাদে ক্রীষ্কেন্ত গালাতিয়াত্ আর তীতে দালমাতিয়াত্ যেয়্যে; 11 বানা লুকে মঅ কায়কুরে আঘে। তুই মার্করে সমারে গুরি আনিচ্, কিয়া মঅ কামত্ তারে ভারী দরকার। 12 মুই তুখিকরে ইফিষোত্ পাধেয়োং। 13 ত্রোয়াত কার্পর ইধু মুই যে কিয়্যের্ কাবড়ান ফেলেই এচ্চ্যং, এবার্ সময়োত্ তুই সিয়েন আনিচ্। সিয়েনিবাদে গুচ্চ্যেয়ে বোইয়ুন, বিশেষগুরি যিগুন চাম উগুরে লেখ্যে, সিগুন লগে আনিচ্। 14 যে আলেক্সান্দরে তামা কাম গরে তে মরে বোউত ক্ষতি গোজ্জ্যে। তে যিয়েন গোজ্জ্যে সিয়েনর হেনা প্রভু শুজিবো। 15 তুইয়ো তা পৌইদ্যেনে উজিয়ার্ থাগ্, কিয়া তে আমা প্রচারর্ বিরুদ্ধে দরমর গুরি লাক্ক্যে। 16 পত্তম্বার যেক্কে মর্ বিচের ওইয়্যে সেক্কে কেঅ মরে এজাল ন-দুয়োন্, বরং বেক্কুনে মরে ফেলেই যেইয়োন; মাত্তর্ ইয়েন যেন তারা বিরুদ্ধে ধরা ন-অয়। 17 মাত্তর্ প্রভু মঅ সমারে এলঅ আর মরে খেমতা দান গোজ্জ্যে। সিয়েনর্ ফলে মুই পুরোপুরি গুরিনে গম হবর্ প্রচার গুরি পাজ্জ্যং আর অযিহূদীগুনে বেক্কুনে সিয়েন শুন্ন্যন্। 18 প্রভু মরে বেক্ ভান্ন্যেই কামত্তুন্ রোক্ষ্যে গুরিবো আর গমেডালে তার্ স্বর্গীয় রেজ্যত্ নেযেব। যুগে যুগে উমরত্যে তার্ বাঈনী ওক্। আমেন। শেচ্ কধা 19 প্রিষ্কিল্লা আহ্ আকিলা আর অনীষিফর পরিবাররে মর্ ভালেদি জানেচ্। 20 ইরাস্ত করিন্থত্ থেইয়্যে আর ত্রফিমরে মুই পিড়েল্ল্যে অবস্থায় মিলীতত্ থোই এচ্চ্যং। 21 তুই যদবদে চেষ্ট্যা গর্ যেনে ঝার্ পড়িবার আগেদি ইধু এই পারচ্। উবুল, পুদেন্ত, লীন, ক্লৌদিয়া আর বেক্ ভেইয়ুনে তরে ভালেদি জানাদন্। 22 প্রভু তঅ সমারে সমারে থোক্। গোজেনর্ দোয়্যেগান তমা রিবেঙত্ থোক্। |
Copyright © 2021 Bangladesh Bible Society
Bangladesh Bible Society