২ তীমথিয় 3 - Chakma Bible

শেজ্ কালর্ দিনুন্

¹ এ কধাগান ইদোত্ রাগেস, শেজ্ কালত্ দর্‌গরেপারা সময় লুমিবো।

² মান্‌জ্যে বানা নিজোরে কোচ্‌পেবাক্, টেঙার্ লুভি অবাক্, বাড়্ গুরিবাক্, বেক্কুনোরে থেঝেরা মারিবাক্, বেক্কুনোরে বদ্‌নাঙ্ গুরিবাক্, আর মা-বাবর্ অবাধ্য অবাক্। তারা অকৃতজ্ঞ আর ভোক্তি নেইয়্যে অবাক্,

³ তারা ইধু কোচ্‌পানা জিনিস্‌চান ন-থেবঅ, আর তারা কোল্-কোজ্জ্যে গুরিনে মিলেমিলি ন-অবাক্। তারা পররে বন্নাং গুরিবাক্, নিজোরে দোঙেই ন-পারিবাক্, চিৎ-নপুজ্জ্যে অবাক্, আর যিয়েন গম্ সিয়েন ঘিনেবাক্।

⁴ তারা বেঈমান, একগোঙ্যে আর বাড়্‌‌বো অবাক্। গোজনরে কোচ্‌ ন-পেইনে তারা সংসারর্ সুগ্‌‌কানরে কোচ্‌পেবাক্।

⁵ বারেদি চেঙারাগান দেগিনে মনে অবঅ যেন গোজেনরে তারা কত্তমান ভোক্তি গরন, মাত্তর্ আজলে গোজেন ভোক্তির্ খেমতাগানরে তারা অস্বিগের্ গরন্। এবাবোত্যে মানুচ্চুনোত্তুন্ দূরোত্ থেইস্।

⁶ এবাবোত্যে মানুচ্চুনো ভিদিরে কেঅ কেঅ ঘরে ঘরে সমেইনে চিদে-বিদে মিলেগুনোরে ভান্ন্যেই পধেদি নেযান। এ মিলেগুনো উগুরে পাপ বুক্ক্যে আঘে; তারা নানান্ কামনা-বাসনালোই চলন্।

⁷ তারা নিত্য শিক্ষ্যের্ কধানি শুনোদন্, মাত্তর্ কনদিন্‌অ গোজেনর্ সত্যগানরে মূড়োত্ পুড়িনে বুঝি ন-পাত্তন্।

⁸ যেধোক্ক্যেন গুরি যান্নি আর যাম্ব্রি মোশি বিরুদ্ধে থিয়্যেয়োন্ ঠিগ্ সেবাবোত্যে গুরি এ মানুচ্চুনেয়ো সেই সত্যগানর্ বিরুদ্ধে থিয়্যেয়োন্। ইগুনোর্ মনানি কুজুরো আর খ্রীষ্টীয় ধর্ম-বিশ্বেজর্ কনঅ প্রমাণ তারা ইধু পাহ্ ন-যায়।

⁹ মাত্তর্ তারা আর উজেই যেই ন-পারিবাক্, কিয়া যান্নি আর যান্ব্রির অঘা কামানি যেবাবোত্যে গুরি বেক্কুনো ইধু ভাযি উঠ্যে ঠিগ্ সেবাবোত্যে গুরি তারার্ অঘা কামানিয়ো বেক্কুনো মুজুঙোত্ ভাযি উদিবো।

তীমথিয় ইধু নিদ্দেচ্‌

¹⁰ তুই মর্ শিক্ষ্যে, চালচলন্, উদ্দেচ্চ্য, বিশ্বেজ্, সোজ্জ্যগুণ, কোচ্‌পানা আর ধৈজ্জ্য পৌইদ্যেনে গমেডালে খিয়েল্ গোজ্জ্যস্।

¹¹ ইয়েনিবাদে আন্তিয়খিয়াত, ইকনিয়ত আর লুস্ত্রাত মুই যেদক্কানি অত্যেচার আর দুঘ্ পেইয়োং সেই বেক্‌ অত্যেচারর্ কধায়ো তুই কোই পারচ্, মাত্তর্ প্রভু সিয়েনি বেক্কানিত্তুন্ মরে রোক্ষ্যে গোজ্জ্যে।

¹² আসলে যিগুনে খ্রীষ্ট যীশুর্ লগে মিজেইনে গোজেন উগুরে ভোক্তিবলা জিংকানি কাদেবাত্যে চান্ তারা অত্যেচারিত অবাক্।

¹³ মাত্তর্ পাজি মানুচ্চুনে আর ফক্করুনে দিন দিন আরঅ বজং অবাক্। তারা অন্যগুনোরে ভুল্ পধেদি নেযেবাক্ আর নিজেয়ো ভুল্ পধেদি চলিবাক্।

¹⁴ মাত্তর্ তুই যিয়েনি শিক্ক্যচ্ আর ঘেচ্চ্যেক গুরি বিশ্বেজ্ গোজ্জ্যস্ সিয়েনিলোই থির্ থাগ্, কিয়া কাত্তুন্ তুই সিয়েনি শিক্ক্যচ্ সিয়েন দঅ তুই কোই পারচ্।

¹⁵ চিগনত্তুন্ ধুরিনে তুই পবিত্র বোইবোত্তুন্ শিক্ষ্যে পেইয়োচ্। আর এ পবিত্র বোইবো তরে খ্রীষ্ট যীশু উগুরে বিশ্বেজর্ মাধ্যমে পাপত্তুন্ উদ্ধোর্ পেবাত্যে জ্ঞান দি পারে।

¹⁶ পবিত্র বোইবোর্ পত্তি কধা গোজেনত্তুন্ এচ্চ্যে আর সিয়েনি শিক্ষ্যে, উজ্ দেনা, সুধরানা আর গম জিংকানি গড়েই উদিবাত্যে দরকারি,

¹⁷ যেনে গোজেনর্ মানুচ্চুনে পুরোপুরি গুরিনে যগাজ্জ্যে ওইনে গম কাম গুরিবাত্যে যুক্কোল্ ওই পারন।