২ তীমথিয় 2 - Chakma Bible

¹ মঅ পুয়োবো, খ্রীষ্ট যীশুর্ দোয়্যেই তুই বোলী অ।

² ভালোক্কুন সাক্ষীর্ মুজুঙোত্ মঅ মুয়োত্তুন যেদক্কানি শিক্ষ্যের্ কধা তুই শুন্ন্যচ্ সেই শিক্ষ্যেনি ধুরি রাগেবাত্যে তুই সিয়েনি এন্‌ বিশ্বেজি মানুচ্চুনোরে দে যিগুনোর্ অন্যগুনোরে শিক্ষ্যে দিবার কাবিল আঘে।

³ খ্রীষ্ট যীশুর এক্কো যগাজ্জ্যে সৈনিক ধোক্ক্যেন তুই আমা লগে কষ্ট সোজ্জ্য গর্।

⁴ যুদ্ধ গুরিবাত্যে যেইনে কেঅ সংসারর্ চিদে-চজ্জা ন-গরন্, যেন সৈন্য ইজেবে যিবে তারে ভর্তি গোজ্জ্যে তারে তে হুজী গুরি পারে।

⁵ সেবাবোত্যে গুরি জিদেজিত্যে খারাত্ মিজেইনে কেঅ যুনি সুদোম মজিম ন-খেলে সালে তে জিদেনার্ মালাবো ন-পায়।

⁶ যে চাষাবলাবো কাম্ গরে তাত্তুনই পত্তমে খেদর্ ভাগ্ পানা উচিত।

⁷ মুই যিয়েন কঙর্ সিয়েন তুই চিন্তে গুরি চেইচ্, কিয়া প্রভুই তরে বেক্কানি পৌইদ্যেনে বুঝিবার খেমতা দান গুরিবো।

⁸ যীশু খ্রীষ্ট পৌইদ্যেনে এ কধাগান মনত্ রাগেচ্, তারে মরাত্তুন্ জেদা গুরি তুলো ওইয়্যে আর তে দায়ুদো গুট্টির্ মানুচ্‌ এলঅ। যে গম হবরান মুই প্রচার গরং সিয়েন ভিদিরে এ কধাগান আঘে,

⁹ আর এই গম হবরান ফগদাঙত্যে মুই দুঘ্ গরঙর্; এন্‌ কি, দুষি ধোক্ক্যেন মরে বানা ওইয়্যে। মাত্তর্ গোজেনর্ কধাগানিরে দঅ বানা ন-অয়।

¹⁰ সেনত্যে গোজেনে যিগুনোরে বেঈ লোইয়্যে সিগুনোত্যে মুই বেক্কানি সোজ্জ্য গরঙর্, যেন তারায়ো খ্রীষ্ট যীশুলোই পাপত্তুন্ উদ্ধোর পান্ আর উমরর্ মহিমা লাভ গরন।

¹¹ এ কধাগান বিশ্বেজ্ গুরিবার যে, খ্রীষ্ট সমারে যুনি আমি মুরি থেই, সালে তা সমারে আমি জেদায়ো থেবং।

¹² আমি যুনি ধৈজ্জ্য ধুরিনে সোজ্জ্য গুরিই, সালে তা সমারে রাজাগিরিয়ো গুরিবোং। যুনি তারে আমি অস্বীগের্ গুরিই, সালে তে-য়ো আমারে অস্বীগের্ গুরিবো।

¹³ আমি অবিশ্বেজি অলেয়ো তে বিশ্বেজি থায়, কিয়া তে নিজোরে অস্বিগের্ গুরি ন-পারে।

বাজে কধাবাত্তার্ বিরুদ্ধে

¹⁴ এই বেক্‌ কধানি মানুচ্চুনোরে ইদোত্ গুরি দেনাত্ থাগ। গোজেন মুজুঙোত্ তারারে উজিয়ার গুরি দে যেন তারা বাজে কধালোই তর্কাতর্কি ন-গরন। ইয়েনর কনঅ দাম নেই, বরং যিগুনে সিয়েনি শুনোন্ তারারে সিয়েনে সর্বনাশ গরে।

¹⁵ যিবে উগুরে গোজেনে হুজি, অত্তাৎ যিবের্ লাজেবার্ কনঅ কারন নেই সেবাবোত্যে কামর্ মানুচ্‌ ইজেবে আর যে ভুল্-নেইয়্যে গুরি সত্যর্ কধা শিক্ষ্যে দে সেবাবোত্যে মানুচ্‌ ইজেবে নিজোরে গোজেন মুজুঙোত্ আঝির্ গুরিবাত্যে বিশেষ গুরিনে আয়োজি অ।

¹⁶ গোজেন উগুরে ভোক্তি-নেইয়্যে আর বাজে কধাবাত্তাত্তুন্ দূরোত্ থাগঅ, কিয়া এবাবোত্যে কধা বাত্তাত্যে মানুচ্চুনো মনত্ গোজেন উগুরে ভোক্তির্ মনভাব্‌পান কুমি যানাত্ থেবঅ।

¹⁷ যিগুনে এবাবোত্যে কধাবাত্তা কন্ সিগুনোর শিক্ষ্যেনি পচা ঘা ধোক্ক্যেন গুরি ছিদি পড়িবো। এবাবোত্যে মানুচ্চুনো ভিদিরে আঘন হুমিনায় আর ফিলীতোত্।

¹⁸ ইগুনে গোজেনর্ সত্যত্তুন্ দূরোত্ সুরি যেইয়োন। ইগুনে কন্, বিশ্বেজিগুনোর্ মরণত্তুন্ জেদা ওই উদোনা আগে ওই যেইয়্যে। ইগুনে কারঅ কারঅ বিশ্বেজরে বর্‌বাত্ গুরি ফেলেয়োন।

¹⁹ তো গোজেনর্ গাড়েইয়্যে দরমর গড়াগান থিয়্যেই আঘে, আর সিয়েন উগুরে সীলমাজ্যে ধোক্ক্যেন গুরি এ কধানি লেগা আঘে, “প্রভু কোই পারে, কনা তার্”, আর “যে কেঅ খ্রীষ্টরে প্রভু বিলিনে ডাগে তে বেক্‌ পাপ্পানিত্তুন্ দূরোত্ যোক্।”

²⁰ দাঙর্ ঘরত বানা যে সনা-রূবোর বাজোন্ থায় সিয়েন নয়, মাত্তর্ তক্তার আর মাদির্ বাজোন্‌অ থায়। সিগুনো ভিদিরে কুদুক্কুন্ বাজোন্ সর্মানর্ কামত আর কুদুক্কুন্ বাজোন্ নিচু কামত বেবহার গরা অয়।

²¹ যিগুনে এবাবোত্যে নিচু কামর বাজোন ধোক্ক্যেন, তারাত্তুন্ সুরি এইনে যুনি কেঅ নিজোরে সিজি গরে সালে তে এমন্‌ বাজোন ধোক্ক্যেন অবঅ যিবেরে সর্মানর কামত্ বেবহার গরা অয়। পবিত্র উদ্দেচ্যে তারে যুদো গুরি থুয়ো অবঅ, তে প্রভুর কামত্ লাগিবো আর নানান্ বাবোত্যে গম কাম গুরিবাত্যে তে যুক্কোল্ থেবঅ।

²² গাবুজ্জ্যে কালর্ ভান্ন্যেই কামনা-বাসনাত্তুন্ তুই ধেই যাগোই আর যিগুনে খাটি মনে প্রভুরে ডাগন্ তারা সমারে সৎ জিংকানি, বিশ্বেজ্, কোচ্‌পানা আর শান্তিত্যে আয়োজি অ।

²³ বাজে, অঘা তর্কাতর্কিত্ ন-মিজেয়ো, কিয়া তুই দঅ কোই পারচ্ সিয়েনিয়ে যেরেদি কোল্-কোজ্জ্যে বাজেই দে।

²⁴ যিবে প্রভুর চাগর্, তার কোল্-কোজ্জ্যে গরানা উচিত নয়, বরং তাত্তুন্ বেক্কুনো উগুরে দোয়্যেলু উয়ো পরিবো। তাত্তুন্ অন্যগুনোরে শিক্ষ্যে দানর্ খেমতা আর সোজ্জ্যগুণ থাহ্ পরিবো।

²⁵ যিগুনে তা বিরুদ্ধে থিয়্যেন তারারে তাত্তুন্ চিদে ওইনে শিক্ষ্যে দিয়্যে পরিবো। সেই শিক্ষ্যেগান যেন তে এ আজায় দে, গোজেনে তারারে মনানি ফিরেবার জু দিবো যেন গোজেনর্ সত্যগানরে তারা মূড়োত্ পুরিনে বুঝি পারন।

²⁶ সিয়েনর্ ফলে তারা শদানর্ ফালত্তুন্ ধেই এবাক্, কিয়া শদানে তার্ আওজ্‌চান পালেবাত্যে তারারে ধোজ্জ্যে।