২ তীমথিয় 1 - Chakma Bible

তীমথিয় ইধু পৌলর দ্বি-লম্বর চিধি

¹ খ্রীষ্ট যীশুর মাধ্যমে উমর্‌‌অ জিংকানির এগেম্ মজিম গোজেনর্ আয়োজে মুই পৌল খ্রীষ্ট যীশুর এক্কো প্রচারক ওইয়োং।

² এ চিধিগান মুই মর্ কোচ্‌পেইয়্যে পুয়ো তীমথিয় ইধু লেগঙর্। বাবা গোজেন আর আমা প্রভু খ্রীষ্ট যীশু তরে দোয়্যে, বর্ আর শান্তি-দান গোরোক্।

ভালেদি জানানা আর উচ্চোমি দেনা

³ মর্ পূরোণি মানুচ্চুনে যেবাবোত্যে গুরি গোজেনর্ সেবা গুরিদাক্ সেবাবোত্যে গুরি মুইয়ো গমেডালে গোজেনরে সেবা গুরি থাং; আর তত্যে দিনরেত্ আমিঝে তবনা গুরিবার্ অক্তত্ মুই তারে ভালেদি জানেই থাং।

⁴ তুই যে কান্ন্যচ্ সে কধাগান মনে গুরিনে তরে ভারী চেবাত্যে আওজ্ অর্, যেন মঅ মনান্ হুজিয়ে ভুরি উদে।

⁵ তঅ মনত্ যে ঘেচ্চ্যেকগুরি বিশ্বেজ্ আঘে সে কধাগান্অ মঅ মনত্ আঘে। এ বিশ্বেজ্‌চান আগে তর্ নানু লোয়ীর আর তর্ মা উনীকীর মনত্ এলঅ, আর মুই ঘেচ্চ্যেকগুরি হবর্ পাং, এ বিশ্বেজ্‌চান তঅ মনত্‌অ আঘে।

⁶ ইয়েনত্যে মুই তরে আরঅ এ কধাগান কবাত্যে চাং-তঅ উগুরে মঅ আঢ্‌তান দিইনে গোজেনে তরে যে বিশেষ দান দিয়্যে সিয়েন আরঅ জাগেই তুল্।

⁷ গোজেনে আমারে দরর্ মনভাব্ ন-দে; তে আমারে এমন্‌ মনভাব দিয়্যে যিয়েন ভিদিরে খেমতা, কোচ্‌পানা আর নিজোরে দোঙেই থবার্ খেমতা আঘে।

⁸ সেনত্যে আমা প্রভু পৌইদ্যেনে সাক্ষি দেদে ন-লাজেচ্, আর তাত্যেই যে মুই বন্দী, মত্যেয়ো ন-লাজেচ্। সিয়েনর বদলে গোজেনে তরে যে খেমতা দিয়্যে সেই খেমতা মজিম তার্ গম হবর্ প্রচারত্যে মঅ লগে দুঘ্ গর্।

⁹ গোজেনে আমারে পাপত্তুন্ উদ্ধোর্ গোজ্জ্যে আর পবিত্র গুরি জিংকানি কাদেবাত্যে ডাক্ক্যে। আমার কনঅ কামত্যে তে সিয়েন ন-গরে, বরং তার্ উদ্দেচ্য আর দোয়্যের্ কারনে গোজ্জ্যে। জগদ্ সৃট্টি অবার আগে খ্রীষ্ট যীশুরে দিইনে তে তার্ দোয়্যে আমারে দান গোজ্জ্যে,

¹⁰ মাত্তর্ ইক্কিনে আমার উদ্ধোর্ গুরিয়্যে খ্রীষ্ট যীশুর এ জগদত্ এজানায় তে সেই দোয়্যেগান ফগদাং গোজ্জ্যে। খ্রীষ্ট মরণানরে ভস্ত গোজ্জ্যে আর গম হবরর্ মাধ্যমে ভস্ত ন-ওইয়্যে জিংকানির্ কধা ফগদাং গোজ্জ্যে।

¹¹ আর এই গম্ হবরান জানেবাত্যে মরে প্রচারক, মাষ্টর ইজেবে নেযা ওইয়্যে।

¹² ইয়েনত্যে মুই এ দুঘ্‌কানি ভুগোঙর্; তো মুই ন-লাজাঙর্, কিয়া মুই কোই পারং মুই কা উগুরে বিশ্বেজ্ গোজ্জ্যং। মুই ঘেচ্চ্যেকগুরি কোই পারং, মুই তা ইধু যিয়েনি থোইয়োং খ্রীষ্টর এবার দিন্নোত্যে সিয়েনি রোক্ষ্যে গুরিবার খেমতা তার্ আঘে।

¹³ তুই মত্তুন্ যিয়েনি শুন্ন্যচ্ সে সত্য শিক্ষ্যেগানি তর্ আদর্শ ইজেবে ধুরি থঅ; আর খ্রীষ্ট যীশু লগে মিজেনার ফলে আমা মনত্ যে কোচ্‌পানা আর বিশ্বেজ্ ওইয়্যে সিয়েন্অ ধুরি রাগা।

¹⁴ গোজেনে তরে যিয়েনি রোক্ষ্যে গুরিবাত্যে দিয়্যে সিয়েনি পবিত্র আত্মালোই রোক্ষ্যে গর্, যিবে আমা মনত্ থায়।

¹⁵ তুই হবর্ পাজ্ এশিয়া রেজ্যত্ বেক্কুনে মরে ফেলে যেয়োন। তারাত্তুন্ আঘন্ ফুগিল্ল আর হর্মগিনি।

¹⁶ অনীষিফর ঘোর্‌‌‌‌‌বোগুনো উগুরে প্রভু দোয়্যে গোরোক্; তে ভালোক্ বার্ মরে তচ্‌তাজা গুরি তুল্যে, আর মুই জেল্ খাট্যে ওইয়োং বিলিনে তে ন-লাজায়।

¹⁷ তে যেক্কে রোমত্ এলঅ সেক্কে মরে জদবদে তোগেইনে মরে পেইয়্যে।

¹⁸ ইফিষত্ কেধোক্ক্যেন গুরিনে তে মরে সেবা গোজ্জ্যে সিয়েন তর্ গমেডালে জানা আঘে। প্রভু গোরোক্, যেন খ্রীষ্টর্ এবার দিনোত্ তে প্রভুত্তুন্ দোয়্যে পায়।