২ থিষলনীকীয় 3 - Chakma Bible

তবনা গুরিবাত্যে কোজোলি

¹ শেজদি কং ভেই-বোনলগ্, আমাত্যে তবনা গরঅ যেন প্রভুর কধানি তমা ইধু যেবাবোত্যেগুরি যাদিমাদি ছিদি পোজ্জ্যে সেবাবোত্যেগুরি সিয়েনি ছিদি পড়ানাত্ আর বাঈনী পানাত্ থায়।

² আরঅ তবনা গোজ্জ্য যেন আমি বিবেক্ নেইয়্যে আর শদান মানুচ্চুনো আঢত্তুন্ রোক্ষ্যে পেই, কিয়া বেক্‌ মানুচ্চুনোর্ যে বিশ্বেজ্‌চান আঘে সিয়েন নয়।

³ মাত্তর্ প্রভু বিশ্বেজ্‌বলা; তেয়ই তমারে থির্ রাগেব আর শদান আঢত্তুন্ তমারে রোক্ষ্যে গুরিবো।

⁴ প্রভু সমারে এগত্তর্ বিলিনে তমা পৌইদ্যেনে আমার্ এ বিশ্বেজ্‌চান আঘে, আমি তমারে যে উগুমানি দিয়্যেই সেবাবোত্যেগুরি তুমি কাম্ গরর্ আর গরানাত্অ থেবা।

⁵ প্রভু যেন তমার মনানি গোজেনর্ কোচ্‌পানার পধেদি আর খ্রীষ্টর্ ধৈজ্জ্যর্ পধেদি চালেই নেযায়।

আল্‌সি গরানার্ বিরুদ্ধে

⁶ ভেইলগ্, আমা প্রভু যীশু খ্রীষ্টর্ নাঙে আমি তমারে এ উগুমান দির্-যুনি কনঅ ভেই আল্‌সি গুরিনে কাদায় আর আমাত্তুন্ তুমি যে শিক্ষ্যেগানি পেয়ো সিয়েনি ন-পালায়, সালে তুমি তা সমারে ন-মিল্ল্য।

⁷ কেধোক্ক্যেন গুরিনে আমা ধোক্ক্যেন চলানা উচিত সিয়েন তুমি নিজেই কোই পারঅ। তমা ইধু থেবার সময়োত্ আমি আল্‌সি গুরিনে ন-চুলিই,

⁸ দাম ন-দিইনে কারঅ হানা ন-হেই। আমি দিন-রেত্ কাম আর কষ্ট গোজ্জ্যেই যেনে আমি তমার কারঅ কাঙেলেত্যে ন-ওই।

⁹ তমাত্তুন্ সাহায্য লবার অধিকার যে আমার নেই সিয়েন নয়, মাত্তর্ তুমি যেন আমা ধোক্ক্যেন ওইনে চলঅ সেনত্যে আমি এবাবোত্যে গুরি কাম্ গুরিনে তমারে দেগেয়্যেই।

¹⁰ তমা ইধু থেবার অক্তত্ আমি তমারে উগুম দিইনে কোইয়্যেদে, কেঅ যুনি কাম গুরিবাত্যে ন-চায় সালে তে যেন ন-খায়।

¹¹ আমি শুনির্, তমা ভিদিরে কেঅ কেঅ আল্‌সি গুরি চলদন্ আর এক্কুবারে কাম ন-গত্তন্, বরং অন্য পৌইদ্যেনে খিজেখিচ্চ্যে গত্তন্।

¹² আমা প্রভু যীশু খ্রীষ্টর্ ওইনে আমি এবাবোত্যে মানুচ্চুনোরে উগুম আর উপদেচ্‌ দির্, তারা যেন অলর্ গুরি কাম্ গুরিনে নিজোর্ হানা নিজে জগার গরন্।

¹³ ভেই-বোনলগ্, গম কামত্ অরান্ ন-ওয়ো।

¹⁴ এ চিধিগান ভিদিরে লেগা আমা কধানি যুনি কেঅ ন-মানন্ সালে সেই মানুচ্চোরে চিনি রাগঅ। তা সমারে ন-মিল্ল্য যাতে তে লাজ্ পায়।

¹⁵ মাত্তর্ তারে শত্রু বিলিনেয়ো মনে ন-গোজ্জ্য, বরং ভেই ইজেবে তারে উজিয়ার্ গরঅ।

শেচ্‌ কধা

¹⁶ শান্তিদিয়্যে প্রভু নিজে নিত্য তমারে শান্তি দান গোরোক্। প্রভু তমার বেক্কুনো সমারে থোক্।

¹⁷ এ পাত্তুরু তুরু জানানার্ কধাগান মুই পৌল নিজো আঢে লেগঙর্। ইয়েনই মর্ পত্তি চিধির্ চিহ্নো; মুই এবাবোত্যে গুরি লিগি থাং।

¹⁸ আমা প্রভু যীশু খ্রীষ্টর্ দোয়্যেগান্ তমা বেক্কুনো সমারে থোক্।