২ শমূয়েল 8 - Chakma Bibleদায়ূদোর জিদেনা 1 পরেন্দি দায়ূদে পলেষ্টীয়গুনোরে ওদেই দিইনে তারার্ নিজো অধীনোত্ আনিলাক্। তে পলেষ্টীয়গুনোর আঢত্তুন্ মেথেগ-আম্মাাগান্ গজক্ গুরি নেযেল। 2 দায়ূদে মোয়াবীয়গুনোরেয়ো ওদেই দিলো। তে মোয়াবীয়গুনোরে মাদিত্ কায়-কুই গুরি পোড়েইনে এক ডাগেত্তুন ধুরি অন্য ডাগর্ থুম্ সং দুড়িলোই মাবিলো। পত্তমে দ্বিয়েন দুড়িলোই মাপ্যে মানুচ্চুনোরে মারে ফেলা অলঅ আর সে পরেন্দি এক্কান দুড়িলোই মাপ্যে মানুচ্চুনোরে বাঁজেই রাগা অলঅ। ইয়েনর্ পরেন্দি মোয়াবীয়গুনে দায়ূদো অধীন ওইনে তারে হাজানা দিয়্যে ধুরিলাক্। 3 পরেন্দি সোবার রাজা রহোবর পূঅ হদদেষরে যেক্কে ইউফ্রেটিস গাঙান সং তা জাগায়ানিত্ আরঅ তার্ খেমতা থিদেবর্ গুরিবাত্তে গেলঅ সেক্কে দায়ূদে তা লগে যুদ্ধো গুরিলো। 4 দায়ূদে তার এক আজার সাতশ ঘোড়াবলা সৈন্য আর কুড়ি আজার অার্মি আক্সোই রাগেল। তারার একশত্তুয়ো ঘোড়ার রথ রাগেইনে তে বাগি বেক্ ঘোড়ার টেঙঅ রক্কুন্ কাবি দিলো। 5 দম্মেশকর অরামীয়গুনে যেক্কে সোবার রাজা হদদেষররে বল্ দিবাত্তে এলাক্ সেক্কে দায়ূদে তারার বেইশ্ আজার মান্জ্যরে মারে ফেলেল। 6 দায়ূদে অরাম রেজ্যর্ দম্মেশকত্ তার সৈন্যদলুন্ রাগেল। সেক্কে অরামীয়গুনে তা অধীনোত্ তারে খাজানা দিয়্যে ধুরিলাক্। এধোক্ক্যেনগুরি দায়ূদে যে কনঅ জাগাত্ গেলে লগেপ্রভু সিয়োদোই তারে জিদেই দিদো। 7 হদদেষরর মানুচ্চুনোর সনার ঢালানি দায়ূদে যিরূশালেমত্ অানিলো। 8 বেটহ আর বেরোথা নাঙে হদদেষরর দ্বিয়েন শঅরত্তুন রাজা দায়ূদে ভালোক্কানি পিদল্অ অানিলো। 9 হমাতর রাজা তয়ি শুনিলোদে, দায়ূদে হদদেষরর পুরো সৈন্যদলুনোরে ওদেই দিলো। 10 দায়ূদে হদদেষরর লগে যুদ্ধোত্ জিত্যে বিলিনে তারে ভালেদি জানেবাত্তে তয়ি তার পূঅ যোরামরে রাজা দায়ূদো ইদু পাধেই দিলো। এ হদদেষরর লগে তয়ির বোউত্ যুদ্ধো ওইয়্যে। যোরাম দায়ূদোত্তে লগে গুরিনে সোনা, রূবো আর পিদোলর জিনিস অানিলো। 11-12 ইয়েনর্ আগেন্দি দায়ূদে অরামীয়, মোয়াবীয়, অম্মোনীয়, পলেষ্টীয় আর অমালেকীয় জাদ্তুনোরে দোঙেবাত্তে তারারে সনা-রূবোগানি অানিনে লগেপ্রভুর নাঙে ফারক্ গুরিনে রাগেয়্যে, আর তে সোবার রাজা রহোবর পূঅ হদদেষরর ইত্তুন্ যিয়েনি লুদেইনে আন্যে সিয়েনিয়ো ফারক্ গুরি রাগেয়্যে। ঠিগ্ সেধোক্ক্যেন গুরি যোরামর দিয়্যে বেক্ পযাপিরানিয়ো তে লগেপ্রভুর নাঙে যুদো গুরি রাগেল। 13 দায়ূদ নুন্-কলগত্ আদার আজার অরামীয়রে মারে ফেলেইনে ফিরি এজানার পরেন্দি চেরোকিত্তে তার নাঙান্ ছিদি পড়িলো। 14 ইদোম দেজর্ বেক্ জাগানিত্ তে নিজো সৈন্যদলুন রাগেল আর সেক্কে ইদোমীয়গুনে তা অধীনোত্ অলাক্। দায়ূদে যে কনঅ জাগাত্ গেলে লগেপ্রভু সিয়োদোই তারে জিদেই দিদো। দায়ূদোর কামগুরিয়্যেগুন 15 দায়ূদে গোদা ইস্রায়েল দেজ উগুরে রাজাগিরি গরা ধুরিলো। তার মানুচ্চুনোরে তে গমেডালে বিচের্ আর শাজন্ গুরিদো। 16 সরূয়ার পূঅ যোয়াবে এলদে তার আজল্ সেনাপতি আর অহীলূদোর পূঅ যিহোশাফট তা রাজাগিরির্ বেক্ ঘটনানি লিগি রাগেদ। 17 অহীটূবোর পূঅ সাদোক আর অবিয়াথরর পূঅ অহীমেলকে এলদে ধর্মগুরু আর সরায় এলদে রাজার লিগিয়্যেবো। 18 যিহোয়াদার পূঅ বনায় এলদে দায়ূদোর কিয়্যে রোক্ষ্যেগুরিয়্যে করেথীয় আর পলেথীয়গুনোর নেতা, আর দায়ূদোর পূঅগুনে এলাক্ রাজার সল্লাদিয়্যে ধর্মগুরু। |
Copyright © 2021 Bangladesh Bible Society
Bangladesh Bible Society