২ শমূয়েল 7 - Chakma Bibleরাজা দায়ূদো ইদু গোজেনর্ শমক্ 1 সে পরেন্দি রাজা রাজঘরত্ থাহ্ ধুরিলো আর লগেপ্রভু তার্ চেরোকিত্তে শত্রুগুনোর আঢত্তুন্ তারে ইরি দিলো। 2 রাজা সেক্কে একদিন্যে ভাববাদী নাথনরে কলঅ, “চাহ্, মুই বজত্তি গরঙর্ এরস তক্তার্ ঘরত্ আর গোজেন সুন্দুক্কো আগেদে তাম্বুলোত্।” 3 জোবত্ নাথনে রাজারে কলঅ, “তঅ মনত্ যিয়েনি আঘে তুই সিয়েনি গর্। লগেপ্রভু তা সমারে আঘে।” 4 মাত্তর্ সে রেদোত্ লগেপ্রভুর কধাগান নাথন ইদু লুমিলো; তে কলঅ, 5 তুই যেইনে মঅ চাগর্ দায়ূদোরে কঅ, লগেপ্রভু কোইয়্যেদে, তুই কি মর্ থেবাত্তে এক্কান্ ঘর্ বানেবে? 6 মিসর দেজত্তুন্ ইস্রায়েলীয়গুনোরে নিগিলেই আনিবার্ দিন্নোত্তুন্ ধুরি এচ্ছে সং মুই দঅ কনঅ ঘরত্ বজত্তি ন-গরং। মুই তাম্বুলোত্ থেইনে এক্কান্ থেবার্ জাগাত্তুন্ আরেক্কান থেবার জাগাত্ যেইয়োং। 7 যিদুক্কুন নেতা উগুরে মুই মঅ মানুচ্ ইস্রায়েলীয়গুনোরে পালেবার্ ভারান্ দুয়োং, নানান্ জাগাত্ ইস্রায়েলীয়গুনো সমারে ঘুরিবার অক্তত্ মুই সে নেতাগুনোরে কাররে ন-কং, কিত্তেই তারা এরস তক্তালোই মল্লাই ঘর ন-বানান্। 8 ইক্কিনে তুই মঅ চাগর দায়ূদরে কঅ, বেগত্তুন্ খেমতাবান লগেপ্রভু এ কধাগান কত্তে, মঅ মানুচ্ ইস্রায়েলীয়গুনোর শাজন্গুরিয়্যে অবাত্তে মুয়ই তরে এ্যমান চোড়েবার্ হলাত্তুন্, ভেড়া পালর্ পিচ্ছোত্তুন্ অান্যং। 9 তুই যেদক্কানি জাগাত্ যেইয়োচ্ মুইয়ো সিদু তঅ লগে যেইয়োং আর তঅ মুজুঙোত্তুন্ তর্ বেক্ শত্রুগুনোরে শেজ্ গুরি দুয়োং। মুই তঅ নাঙান্ পিত্তিমীর্ নাঙ্গিন্যে মানুচ্চুনোর নাঙানি ধোক্ক্যেন্ নাঙ্ তাই পাড়া গুরিম্। 10-11 মঅ মানুচ্ ইস্রায়েলীয়গুনোত্তে মুই এক্কান জাগা ঠিগ্ গুরিনে সিয়েনত্ গাজঅ ধোক্ক্যেন্ তারারে বোজেই থোম্, যেনে তারা নিজো জাগাত্ গমে ডালে বজত্তি গুরি পারন্ আর মঅ মানুচ্চুনে ইস্রায়েলীয়গুনো উগুরে শাজন্গুরিয়্যে নেযানার পরেত্তুন্ ধুরি পাজি মানুচ্চুনে তারা উগুরে যে অত্যেচার্ গুরি এত্তন্ তারা যেনে আর সিয়েনি গুরি ন-পারন। মুই বেক্ শত্রুগুনোর আঢত্তুন্ তরে মাব্ দিম্। “ ‘মুই লগেপ্রভু আরঅ কঙর্, মুই নিজেই তর্ বংশবোরে অাক্কোই নেযেম্। 12 তঅ আয়ুগান শেজ্ অনার পরেন্দি যেক্কে তুই তর্ পুরোণি মানুচ্চুনোর ইদু যেবে সেক্কে মুই তঅ জাগাত্ তঅ বংশর্ একজনরে, তঅ নিজো পূঅবোরে বোজেম্ আর তা রেজ্যগান থির্ রাগেম্। 13 তর্ সে পূঅবোই মঅ গম্ নাঙানত্তে এক্কান ঘর বানেব। তার রাজ-সিংহাসনান্ মুই জিংকানিবর্ থিদেবর্ গুরিম। 14 মুই ওম্ তা বাপ্ আর তে অবঅ মর্ পূঅ। যেক্কে তে অন্যেয় গুরিবো সেক্কে অন্য মান্জ্যে যেধোক্ক্যেন্ সাজা পান সেধোক্ক্যেন গুরি মুই তারে সাজা দিম্। 15 মাত্তর্ মঅ কোচ্পানাগান মুই কনদিন্অ তা উগুরেত্তুন তুলি ন-নেযেম্, যেধোক্ক্যেন গুরি মুই শৌল উগুরেত্তুন তুলি নেযেয়োং আর তঅ পথ্তানত্তুন্ তারে সোরেই দুয়োং। 16 তর্ বংশ আর রেজ্যগান তর্ মুজুঙোত্ জিংকানিবর্ থিদেবর্ থেবঅ। তর্ সিংহাসনান্ অবঅ জনম্ভরা।’” 17 এ দর্শনর বেক্ কধানি নাথনে দায়ূদোরে কলঅ। দায়ূদোর তবনা গরানা 18 এদক্কানি কধা শুনিনে রাজা দায়ূদে তাম্বুলো ভিদিরে গেলঅ আহ্ লগেপ্রভুর মুজুঙোত্ বোইনে কলঅ, ও প্রভু লগেপ্রভু, মুয়ই বা কন্না আহ্ মঅ বংশবোই বা কি, তুই মরে এত্তমান সং অান্যচ্। 19 ও প্রভু লগেপ্রভু, ইয়েন তঅ চোগোত্ যদবদে ন-অয়; ইয়েনর্ লগে তঅ চাগরর্ বংশর আগাম্ কধানিয়ো তুই কোইয়োচ্। ও প্রভু লগেপ্রভু, ইয়েনই যেনে মান্জ্যত্তে তর্ সুদোম অয়। 20 দায়ূদে তঅ মুজুঙোত্ আর কি কোই পারিবো? ও প্রভু লগেপ্রভু, তুই দঅ তঅ চাগর্বোরে হবর্ পাজ্। 21 তঅ কধাত্যে আর তঅ অাওজত্তে এ দোল্ কামান্ তুই গোজ্যস আর তঅ চাগর্বোরে সিয়েনি জানেয়োচ্। 22 ও লগেপ্রভু গোজেন, তুই কত্তমান দাঙর্! তঅ ধোক্ক্যেন্ আর কনজন নেই আর তুই বাদে অন্য কনঅ গোজেন নেই; সে কধানি আমি নিজো কানানিলোই শুন্যেই। 23 তর্ ইস্রায়েল জাদঅ ধোক্ক্যেন্ পিত্তিমীত্ আর কন জাত আঘে যিবেরে তুই তর্ নিজো মানুচ্ বানেবাত্তে আর নিজোরে নাঙ্ গিনিবার অাশাই উদ্ধোর্ গুরিবাত্তে যেইয়োচ্? আর কন জাদ্অ মুজুঙোত্ তুই নিজোর্ নাঙে তঅ দেজত্তে মহৎ আর দর্গরেপারা কাম্ গোজ্যস, যেধোক্ক্যান তঅ মানুচ্চুনোত্তে গোজ্যস্ যিগুনোরে তুই মিসর দেজত্তুন্ নানান্ জাদ্ আর দেব-দেবেদাগুনোর আঢত্তুন্ উদ্ধোর্ গোজ্যস্? 24 তর্ মানুচ্ ইস্রায়েলীয়গুনোরে তুই নিজোর নাঙে জিংকানিবর্ তর্ নিজো মানুচ্ অবাত্তে থিদেবর্ গোজ্যস্, আর তুই, ও লগেপ্রভু, তুই তারার্ গোজেন্ ওইয়োচ্। 25 ইক্কিনে ও লগেপ্রভু গোজেন, তঅ চাগর্ আর তার্ বংশর্ পৌইদ্যেনে তুই যে এগেম্ গোজ্যস্ সিয়েন জিংকানিবর্ রোক্ষ্যে গর্। তর্ এগেম্ মজিম সিয়েন গর্। 26 ইয়োত্ তঅ চাগর্ দায়ূদো গুট্টিগুন তঅ মুজুঙোত্ থির্ থেবাক্ আর জিংকানিবর্ তর্ বাঈনী অবঅ। সেক্কে মান্জ্যে কবাক্, বেগত্তুন্ খেমতাবলা লগেপ্রভু ইস্রায়েলীয়গুনোর গোজেন। 27 “ও বেগত্তুন্ খেমতাবলা লগেপ্রভু, ইস্রায়েলীয়গুনোর গোজেন, তুই তঅ চাগর্বো ইদু এ পৌইদ্যেনে ফগদাং গুরিনে কোইয়োচ্, ‘মুই তত্তে এক্কো বংশ যুক্কোল্ গুরিম।’ সেনত্তেই তইদু এ তবনাগান গুরিবাত্তে তর্ এ চাগরবোর্ মনত্ সাহস ওইয়্যে। 28 ও প্রভু লগেপ্রভু, তুয়ই গোজেন। তঅ কধানি সত্য, আর এ ভালেদির্ এগেমান্ তুয়ই তর্ চাগর্বো ইদু গোজ্যস্। 29 ইক্কিনে তুই হুজি ওইনে তঅ চাগর্বোর্ বংশবোরে বর্ দে যেনে সে বংশবো জিংকানিবর্ তর্ মুজুঙোত্ থায়। ও প্রভু লগেপ্রভু, তুই নিজে সে কধানি কোইয়োচ্ আর তঅ বর্ দেনায় তর্ এ চাগর্বোর্ বংশবো জিংকানিবর্ বর্ থেবঅ।” |
Copyright © 2021 Bangladesh Bible Society
Bangladesh Bible Society