২ শমূয়েল 24 - Chakma Bibleদায়ূদোর মানুচ্ গুণোনা 1 লগেপ্রভু আরঅ ইস্রায়েলীয়গুনো উগুরে রাগে জুলি উদিলো। তে দায়ূদোরে তারার বিরুদ্ধে রাগ তুলি দিইনে কলদে, “তুই যেইনে ইস্রায়েল আর যিহূদা মানুচ্চুনোরে গুণিই লঅ।” 2 সেক্কে রাজা তা সমারে সেনাপতি যোয়াবরে কলদে, “তুমি দানত্তুন্ বের্-শেবা সং ইস্রায়েলর গুট্টিগুনো ভিদিরে যেইনে মানুচ্চুনোরে গুণি এজঅ যেনে মুই তারার্ বেক্কুনোরে চিনি পারং।” 3 জোবত্ যোয়াবে রাজারে কলঅ, “তঅ গোজেন লগেপ্রভু যেনে মানুচ্চুনোরে একশতগুন্ বাড়েই দে, আর মঅ গিরোজ্ মহারাজে যেনে তা নিজোর চোগেন্দি দেগে। মাত্তর্ মঅ গিরোজ্ মহারাজে এবাবোত্যে কাম্ কিত্তে গুরিবাত্তে চার্?” 4 মাত্তর্ যোয়াব আর সেনাপতিগুনো ইদু রাজার উগুমান অদে অদে থেলঅ; সেনত্তেই ইস্রায়েলর মানুচ্চুনোরে গুণিবাত্তে তারা রাজার মুজুঙেত্তুন্ গেলাক্। 5 তারা যর্দন গাঙান্ পার্ ওই যেইনে গাদ চাগালার কলগ ভিদিরে শঅরর্ দোগিণে অরোয়েরত্ যেইনে তাম্বুল ফেলেলাক্, সে পরেন্দি যাসেরত গেলাক্। 6 সে পরেন্দি তারা গিলিয়দ আহ্ তহতীম-হদ্শি চাগালাত্ গেলাক্। যেরেন্দি তারা দান-যানত্ যেইনে ঘুরিনে সীদোনর ইন্দি গেলাক্। 7 সে পরেন্দি তারা সোরর্ তাম্বুলোত্ আর হিব্বীয় আর কনানীয়গুনোর বেক্ শঅরানিত্ গেলাক্। যেরেন্দি তারা যিহূদার দোগিণে বের্-শেবাত্ গেলাক্। 8 এধোক্ক্যেন গুরি তারা পুরো দেজছান ঘুরিনে নয় মাস কুড়ি দিন পরেন্দি যিরূশালেমত্ ফিরি এলাক্। 9 যোয়াবে রাজার ইদু মানুচ্চুনোর ইজেব্পান দিলো। সেক্কে দেগা গেলদে, লাম্বা ছুড়ি লারি জানন্ এবাবোত্যে বোলী মানুচ্ ইস্রায়েলত্ আগন্ আস্তো লাখ্ আর যিহূদাত্ আগন্ পাচ্ লাখ্। 10 মানুচ্চুনোরে গুণিবার পরেন্দি দায়ূদো বিবেগত্ ধুরিলো। তে লগেপ্রভুর ইদু তবনা গুরিনে কলঅ, “মুই এ কামান গুরিনে জদবদে পাপ গোজ্যং। ও লগেপ্রভু, কোজোলী গরঙর্, তুই তঅ চাগরবোর্ এ অন্যেয়ানি দূর্ গুরি দে। মুই জদবদে ভুল্ মান্জ্যর কাম্ গোজ্যং।” 11 তার্কেল্যে বেন্যে দায়ূদে ঘুমোত্তুন্ উদোনার্ পর্ তা দর্শক ভাববাদী গাদর ইদু লগেপ্রভুর এ কধাগান ফগদাঙ্ গুরিলো, 12 “তুই যেইনে দায়ূদরে এ কধাগান কঅ, ‘মুই লগেপ্রভু কঙর্, মুই তত্তে তিনেন্ সাজা ঠিগ্ গোজ্যং। তুই সিয়েনিত্তুন্ যিয়েনি বেই নিবে মুই তঅ উগুরে সিয়েনি গুরিম্।’” 13 গাদ যেক্কে দায়ূদো ইদু যেইনে কলঅ, “তঅ দেজত্ কি সাত বজর্ ধুরিনে ভাদরাত্ অবঅ? নাহি তুই শত্রুগুনোত্তুন্ লড়া হেইনে তিন মাস সং ধেই ধেই বেড়েবে? নাকি তিন দিন সং তঅ দেজত্ ভানা অবঅ? যে মরে পাদেয়্যে তারে মুই কি জবাব্ দিম্ তুই ইক্কিনে ভাবিনে মরে কঅ।” 14 সেক্কে দায়ূদে গাদরে কলঅ, “মুই অমকদ দজাত্ পোজ্যং। মুই যেনে মান্জ্যর্ আঢত্ ন-পড়ং; তাত্তুন্ বরং এজঅ, আমি লগেপ্রভুর আঢত্ পুড়িই, কিত্যে তার দোয়্যে থুম্ ন-ওইয়্যে।” 15 লগেপ্রভু সেক্কে বেন্যেত্তুন্ ধুরি আরাম্ভ গুরিনে ঠিগ্ গোজ্যে অক্তবো সং ইস্রায়েল উগুরে এক্কান্ ভানা পাধেই দিলো। সেক্কে দানত্তুন্ বের্-শেবা সং পুরো দেজর্ মানুচ্চুনো ভিদিরেত্তুন্ সত্তুর্ আজার মানুচ্ মুরি গেলাক্। 16 যিরূশালেমান ভস্ত গুরিবাত্তে স্বর্গদূত্তো যেক্কে আঢ্তান্ বাড়েল সেক্কে লগেপ্রভু সে জদবদে সাজা দেনাত্তুন মনান্ ফিরেল। যে স্বর্গদূত্তো মানুচ্চুনোরে ভস্ত গোজ্যে তে তারে কলদে, “থোক্, যদেষ্ট ওইয়্যে। তঅ আঢ্তান্ বুদি নেযা।” সে অক্তত্ লগেপ্রভুর দূত্তো যিবূষীর অরৌণার খামার ইদু এলঅ। 17 যে স্বর্গদূত্তো মানুচ্চুনোরে আঘাত্ গোজ্যে দায়ূদে তারে দেগিনে লগেপ্রভুরে কলঅ, “পাপ আর অন্যেয় মুই গোজ্যং। তারা দঅ ভেড়া ধোক্ক্যেন্। তারা কি গোজ্যন্? সেনত্তেই মরে আর মঅ বাব বংশবোরে তুই সাজা দিচ্।” দায়ূদে এক্কান ডালিপূজো বানেল। 18 সেদিন্যে গাদ দায়ূদো ইদু যেইনে কলঅ, “তুই যিবূষীয় অরৌণার ইদু খামারত্ যেইনে গোজেনর নাঙে সিয়োত্ এক্কান ডালিপূজো বানেচ্।” 19 সেক্কে দায়ূদে লগেপ্রভুর উগুম মজিম্ গাদর্ কধা মজিম্ সিদু গেলঅ। 20 অরৌণা যেক্কে রাজা আর তা মানুচ্চুনোরে তাইন্দি এত্তে দেগিলো সেক্কে তে যেইনে রাজার মুজুঙোত্ মাদিত্ মাদা নিগিরিনে তারে সালাম গুরিলো। 21 অরৌণা কলঅ, “মঅ গিরোজ্ মহারাজে তা চাগর্বো ইদু কিত্তে এচ্যে?” জোবত্ দায়ূদে কলঅ, “লগেপ্রভুর নাঙে এক্কান ডালিপূজো বানেবাত্তে মুই তঅ খামার্বো কিনিবাত্তে চাং, যেনে মানুচ্চুনো উগুরে এচ্যে এ ভানাগান্ থামায়।” 22 অরোণা দায়ূদোরে কলঅ, “মঅ গিরোজ মহারাজে যিয়েন্ গম্ বিলিনে মনে গরে সিয়েনই ইয়োত্তুন্ নেযেইনে উৎসর্ব গোরোক্। পূজ্যে-উৎসর্বত্তে ইয়োত্ বলদ গোরু আগন্ আর তক্তাত্তে আগে ফসল মারেদে মিশিন আর বলদ গোরুগুনোর জুঙোলানি। 23 ও মহারাজ, অরোণা রাজারে এ বেক্কানি দের্।” অরৌণা তারে আরঅ কলঅ, “তঅ গোজেন লগেপ্রভু যেনে তর্ উৎসর্বানি গুজি লয়।” 24 জোবত্ রাজা অরৌণারে কলদে, “না, সিয়েন ন-অবঅ। মুই হামাক্কায় দাম দিইনে ইগুন্ কিনি নেযেম্। মাগানা পেইয়্যে এবাবোত্যে কনকিজু মুই মঅ গোজেন্ লগেপ্রভুর নাঙে পুজ্যে-উৎসর্ব ইজেবে ন-দিম্।” ইয়েন কোইনে দায়ূদে পঞ্চাশ শেখেল রূবোলোই সে খামার্বো আর বলদ গোরুগুন্ কিনি নেযেল। 25 সে পরেন্দি তে সিদু লগেপ্রভুর নাঙে এক্কান ডালিপূজো বানেল আর পূজ্যে-উৎসর্ব আর উদোলোলি-উৎসর্বর অনুষ্ঠানান্ গুরিলো। এবাবোত্যেগুরি দেজত্তে তবনা গরা অলে লগেপ্রভু সিয়েন শুনিলো আর ইস্রায়েল দেজর্ ভানাগানি থামেল। |
Copyright © 2021 Bangladesh Bible Society
Bangladesh Bible Society