২ শমূয়েল 23 - Chakma Bible

দায়ূদোর শেজ্ কধাগান

¹ যিশয়র পূঅ দায়ূদোর শেজ্‌ কধাগান ইয়েন: “যিবেরে তুলি ধরা ওইয়্যে, যাকোবর্ গোজেনে যিবেরে অভিষেগ্ গোজ্যে, যিবে ইস্রায়েলর ভিদিরে দোল্‌ গানগেইয়্যে, তে কোইয়্যেদে,

² লগেপ্রভুর আত্মাগানে মঅ ভিদিরেন্দি কধা কর্‌, মঅ মুয়োনত্‌ আঘে তা কধাগান।

³ ইস্রায়েলর গোজেনে কোইয়্যেদে, ইস্রায়েলর আশ্রয়-মুড়ো মরে কোইয়্যেদে, ‘যে মানুচ্চো গমেডালে মানুচ্চুনোরে শাজন্ গরে আর গোজেনরে দরায়,

⁴ তে বেন্যেমাদান্ মেঘনেইয়্যে বেলান্‌ পহর্‌ ধোক্ক্যেন্‌; ঝড় দিবার্‌ পরেন্দি বেলঅ পহরত্‌ মাদিত্তুন্‌ ঘাস উদে তে সিয়েনি ধোক্ক্যেন্‌।’

⁵ গোজেন ইদু কি মর্‌ বংশবো সেধোক্ক্যেন নয়? মত্তে তে দঅ এক্কান্‌ উমরত্যে সুদোম্ গোজ্যে। সে সুদোমানর্‌ বেক্‌ কধানি দোলেডালে সাজেয়্যে আর গমে রাগা ওইয়্যে। মঅ উদ্ধোরান্ তে গমেডালে গুরিবো, মঅ অাওজ্‌চান তে পুরেই দিবো।

⁶ মাত্তর্‌ পাজি মানুচ্চুনে বেক্কুনে উগুরে ফেলেয়্যে কাদা ধোক্ক্যেন্‌, যিগুনোরে আঢ্‌তোই ধরা ন-যায়।

⁷ যে মানুচ্চো তারারে ধুরিবাত্তে যায় তারে বেবহার গরা পরে লুয়োর্‌ অাত্যের্ লোই বা সেল্লোই; সেনত্তেই তারা যিদু আগন্‌ সিয়োদোই তারারে পুড়ি ফেলা অবঅ।”

দায়ূদোর বোলী মানুচ্চুন্

⁸ দায়ূদোর বোলী মানুচ্চুনোর নাঙানি ইয়েনি: তখমোনীয় যোশেব-বশেবৎ নাঙ্‌-গোজ্যে তিন্নো বীরোর্‌ মোধ্যে চেলা এলঅ; এক্কান যুদ্ধোত্‌ তে আস্‌তোশঅ মান্‌জ্যরে মারে ফেলেয়্যে বিলিনে তারে ইস্‌নীয় আদীনো কুয়ো অদঅ।

⁹ সে পরেন্দি মানুচ্চো অলদে ইলিয়াসর। তে এলদে অহোহীয়র বংশর দোদার পূঅ। যেক্কে পলেষ্টীয়গুনে যুদ্ধোত্তে এগত্তর্‌ ওইয়োন সেক্কে তারারে ঈচ্ গুরিবাত্তে যে তিন্নো বোলী মানুচ্‌ দায়ূদো লগে এলাক্ ইলিয়াসর অলদে তারাত্তুন্‌ এক্কো বোলী। ইস্রায়েলীয়গুনে পিজেন্দি উদি গেলাক্,

¹⁰ মাত্তর্‌ ইলিয়াসরে যুদ্ধোর জাগানত্‌ থিয়্যেনেই পলেষ্টীয়গুনোরে আঘাত্‌ গরা ধুরিলো। যেরেন্দি তা আত্তান্‌ বল্‌পোজ্যে ওইনে লাম্বা ছুরিগানর্‌ লগে বাজেয়্যে এলঅ। সেদিন্যে লগেপ্রভু দাঙর্ জিদেনাগান্ দান গুরিলো। সৈন্যগুনে ইলিয়াসর ইদু যেক্কে ফিরি এলাক্ সেক্কে মরামানুচ্চুনো ইত্তুন্‌ লুদোনা বাদে তারার্‌ আর কিচ্ছু গুরিবার ন-এলঅ।

¹¹ সে পরেন্দি মানুচ্চো অলদে হরারীয় আগির পূঅ শম্ম। একপল্লা পলেষ্টীয়গুনে মসুর ডেলোর ক্ষেদত্‌ এইনে এগত্তর্‌ অলাক্, আর ইস্রায়েলর সৈন্যগুনে তারার্‌ মুজুঙোত্তুন্‌ ধেই গেলাক্‌।

¹² মাত্তর্‌ শম্ম সে ক্ষেদ ভিদিরে থিয়্যেইনে সে ক্ষেত্‌তান রোক্ষে গুরিলো আর পলেষ্টীয়গুনোরে শেজ্‌ গুরিলো। লগেপ্রভু সেদিন্যে তারারে জদবদে জিদেই দিলো।

¹³ একপল্লা ফসল কাবিবার অক্তত্‌ ত্রিশজন বীরত্তুন্‌ সে তিনজন নাঙ-গোজ্যে বীরে অদুল্লম গাদত্‌ দায়ূদো ইদু এলাক্‌। সেক্কে এক দল পলেষ্টীয় সৈন্য রফায়ীম কলগত্‌ তাম্বুল ফেলেয়োন।

¹⁴ সে অক্তত্‌ দায়ূদে ধূল্যেচর-চাগালাত্ তাম্বুলো ধোক্ক্যেন এক্কান জাগাত্‌ এলঅ আর পলেষ্টীয় সৈন্যদলুন বৈৎলেহমত্‌ এলাক্।

¹⁵ এন্‌ সময়োত্‌ দায়ূদোর অমকদ পানি তিরেজে পেলঅ, সেনত্তেই তে কলদে, “আহ্‌, যুনি কনজনে বৈৎলেহমর গেদো কায়-কুরে কূয়োবোত্তুন্‌ মরে এক্কানা হেবার্‌ পানি আনি দিদাক্‌!”

¹⁶ এ কধাগান শুনিনে সে তিন্নো বোলী মান্‌জ্যে পলেষ্টীয় সৈন্যগুনো ভিদিরেন্দি যেইনে বৈৎলেহমর গেদো কায়-কুরে কূয়োবোত্তুন্‌ পানি তুলিনে দায়ূদো ইদু নেযেলাক্। মাত্তর্‌ দায়ূদে সিয়েন ন-হেলঅ; সিয়েনর বদলে তে সে পানিগান লগেপ্রভুর নাঙে মাদিত্‌ ঢালি দিলো।

¹⁷ তে কলদে, “ও লগেপ্রভু, মুই যে এ পানিগান হেম্‌ সিয়েন্‌ দূরোত্‌ থোক্‌। ইয়েন কি সে মানুচ্চুনোর্‌ লো নয় যিগুনে জীংকানির বাঁজি লোইনে সিয়েন্‌ আনিবাত্তে যেইয়োন?” দায়ূদে সিয়েন হেবাত্তে রাজী ন-অলঅ। সে তিন্নো নাঙ্-গোজ্যে বীরোর্‌ কামানি এলদে এবাবোত্যে।

¹⁸ সরূয়ার পূঅ যোয়াব ভেই অবীশয় অলদে সে তিনজন উগুরে অাজল্লো। তে সেল্‌ মারিনে তিনশঅ মান্‌জ্যরে মারে ফেলেয়্যে আর তেয়ো সে তিনজন ধোক্ক্যেন্ নাঙ্-গোজ্যে ওই উদিলো।

¹⁹ তে সে তিনজনত্তুন্‌ বেশ্‌ সর্মান পেইয়্যে। সেনত্তে সে তিনজন ভিদিরে তারে ধরা ন-অলেয়ো তে তারার্ সেনাপতি ওইয়্যে।

²⁰ কব্‌সেলীয় যিহোয়াদার পূঅ বনায় অলদে এক্কো বীর যোদ্ধা। তেয়ো দাঙর্‌ দাঙর্‌ কাম্ গোজ্যে। মোয়াবীয় অরীয়েলর দ্বিবে পূঅরে তে মারে ফেলেয়্যে। এক বরফ-পোজ্যে দিনোত্‌ তে এক্কো গাদঅ ভিদিরে লামিনে এক্কো সিংহরে মারে ফেলেয়্যে।

²¹ আরঅ এক্কো লাম্বা-পক্তা মিসরীয়রেয়ো তে মারে ফেলেয়্যে। সে মিসরীয়বোর্‌ আঢত্‌ এলদে এক্কো সেল্‌, মাত্তর্‌ তো তে লুদিক্কো আঢত্‌ গুরিনে তাইন্দি উজেই গেলঅ। তে সে মিসরীয়বোর্‌ আঢত্তুন্‌ সেল্লো কাড়ি লোইনে সে সেল্লোলোই তারে মারে ফেলেয়্যে।

²² যিহোয়াদার্‌ পূঅ বনায়র কামানি সেধোক্ক্যেন্‌। তেয়ো সে তিন্নো বীরো ধোক্ক্যেন্‌ নাঙ-গোজ্যে ওই উদিলো।

²³ সে তিন্নো ভিদিরে তারে ধরা ন-অলেয়ো তে “ত্রিশ” নাঙে দল মানুচ্চুনোত্তুন্‌ বেশ্‌ সর্মান পেইয়্যে। দায়ূদে তার কিয়্যে রোক্ষ্যেগুরিয়্যেগুনোর্‌ ভারান্‌ বনায় উগুরে দিলো।

²⁴ “ত্রিশ” নাঙে দল্লোর ভিদিরে এলদে যোয়াবর ভেই অসাহেল, বৈৎলেহমর দোদয়র পূঅ ইল্‌কানন,

²⁵ হরোদীয় শম্ম, হরোদীয় ইলীকা,

²⁶ পল্টীয় হেলস, তকোয়ীয় ইক্কেশর পূঅ ঈরা,

²⁷ অনাথোতীয় অবীয়েষর, হূশাতীয় মবুন্নয়,

²⁸ অহোহীয় সল্‌মোন, নটোফাতীয় মহরয়,

²⁹ নটোফাতীয় বানার পূঅ হেলব, বিন্যামীন-গুট্টির গিবিয়ার রীবয়র পূঅ ইত্তয়,

³⁰ পিরিয়াথোনীয় বনায়, গাশ কলগর্‌ হিদ্দয়,

³¹ অর্বতীয় অবি-অলবোন, বরহূমীয় অস্‌মাবৎ,

³² শাল্‌বোনীয় ইলিয়হবা, যাশেনর পূঅগুনে, যোনাথন,

³³ হরারীয় শম্ম, হরারীয় সাররের পূঅ অহীয়াম,

³⁴ মাখাথীয় অহস্‌বয়ের পূঅ ইলীফেলট, গীলোনীয় অহীথোফলর পূঅ ইলীয়াম,

³⁵ কর্মিলীয় হিষ্রয়, অর্বীয় পারয়,

³⁶ সোবা আদামর্‌ নাথনর পূঅ যিগাল, গাদীয় বানী,

³⁷ অম্মোনীয় সেলক, সরূয়ার পূঅ যোয়াবর অাত্যের্ বোইয়্যে বেরোতীয় নহরয়,

^38-39 যিত্রীয় ঈরা, যিত্রীয় গারেব আহ্ হিত্তীয় ঊরিয়। ইগুনে অলাক্কে বেক্কুনে সাত্রিশজন।