২ শমূয়েল 22 - Chakma Bibleদায়ূদোর বাঈনী গরানার্ গান 1 লগেপ্রভু যেক্কে দায়ূদোরে শৌল আর তার অন্য শত্রুগুনোর্ আঢত্তুন্ উদ্ধোর্ গুরিলো সেক্কে তে লগেপ্রভুর নাঙে এ গান্নো গেইয়্যে: 2 লগেপ্রভুই মর্ অজল্ মুড়ো, মর্ তাম্বুলো ধোক্ক্যেন্ আর মর্ উদ্ধোর্ গুরিয়্যে; 3 মঅ গোজেনে মর্ অজল্ মুড়োবো, সিবে ভিদিরে মুই আশ্রয় নেযাং। তেয়ই মর্ ঢাল, মর্ রোক্ষেগুরিয়্যে শিং, মর্ অজল্ চিগোন্ ঘরান, মর্ থেবার্-জাগায়ান। অত্যেচারী মানুচ্চুনোর আঢত্তুন্ তুই মরে রোক্ষ্যে গর্। 4 লগেপ্রভুরে নাঙ্ গিনিবা, মুই তারে ডাগং; সেক্কে মঅ শত্রুগুনোর আঢত্তুন্ মুই রোক্ষ্যে পাং। 5 মরণর্ তুবোলানে মরে ঘিরিনে ধোজ্যে, ভস্তর্ গঙারে মুই ভাজি যেইয়োং। 6 মরাজাগানর্ দুড়িত্ মুই বানা পোজ্যং, মত্তে পাঢা ওইয়্যেদে মরণর ফাল্। 7 মুই এ দযাত্ মঅ গোজেন লগেপ্রভুরে ডাগিলুং আর বল্ পেবাত্তে তাইদু কানাকুদি গুরিলুং। তার্ থেবার জাগানত্তুন্ তে মর্ মুয়ো রঅবো শুনিলো; মর্ কানানিগান কানত্ লুমিলো। 8 সেক্কে পিত্তিমীগানে গির্গিরে উদিলো আর লরা ধোজ্যে, গির্গিরে উদিলো আগাজর্ গোড়াগান; তা রাগে সিয়েনি গির্গিরা ধুরিলো। 9 তা নাগত্তুন্ ধূমোগানে উগুরে উদিলো, তা মুয়োত্তুন্ ভস্তগুরিয়্যে আগুনানে নিগিলি এলঅ, তা মুয়ো আগুনে আঙারাগুন্ জুলি উদিলাক্। 10 তে আগাজ্চানরে লোঙেইনে লামি এলঅ; তা টেঙত্ তলে এলদে ঘুর্ঘুজ্যে কালা মেঘ। 11 তে করূবোত্ চড়িনে উড়ি এলঅ, দেগা দিলো বোইয়্যেরর্ ডুয়োলোই ভর্ গুরিনে। 12 তে আন্ধার্লোই নিজোরে ঘিরি ফেলেল; তা চেরোকিত্তে থেলাক্ আগাজর্ ঘুর্ঘুজ্যে কালা ঝড়র্ মেঘ। 13 তা পহ্রানর্ মুজুঙোত্ কারেনানে ঝিমিত্ ঝিমিত্ গুরি উদো ধুরিলো। 14 লগেপ্রভু আগাজত্তুন্ গুজুরি উদিলো; দাঙর্ গোজেনর রঅবো শুনো গেলঅ। 15 তে সেল্লো মারিনে শত্রুগুনোরে ছিত্রিং-বাত্রাং গুরিলো আর দেবাবো ঝিমিলেনে তারারে ঝাগুলুক্ গুরি দিলো। 16 লগেপ্রভুর ধমক্কোই আর নিজেযর্ তেলাই সাগর তলাগান দেগা গেল, পিথ্তিমীর ভিদিরেগান নিগিলিলো। 17 তে উগুরেত্তুন্ আঢ্ বাড়েইনে মরে ধুরিলো, গভীন্ পানি ভিদিরেত্তুন্ মরে টানি তুলিলো। 18 মঅ বোলী শত্রুগুনোর আঢত্তুন্ তে মরে বাজেল; বাজেল বিপক্ষগুনোর আঢত্তুন্ যিগুনোর বলানি আমাত্তুনো বেশ্। 19 দযার্ দিনোত্ তারা মঅ উগুরে ঝাবেই পড়িলাক্, মাত্তর্ লগেপ্রভু মরে ধুরি রাগেল। 20 তে মরে এক্কান্ খুলো জাগাত্ নিগিলেই আনিলো; মঅ উগুরে খুজি এলঅ বিলিনেই তে মরে উদ্ধোর্ গুরিলো। 21 মঅ গম্ কাম অনুসারে লগেপ্রভু মরে দান গুরিলো, মঅ কামর্ সিজি অনুসারে বক্ শিজ্ দিলো; 22 কিত্যে লগেপ্রভুর পধেন্দি মুই আদা-উদো গোজ্যং; বজং কাম গুরিনে মঅ গোজেনর মুজুঙোত্তুন্ সুরি ন-যাং। 23 তার্ বেক্ রীদি-সুদোমানি মঅ মুজুঙোত্ আঘে; তা সুদোমানত্তুন্ মুই সুরি ন-যাং। 24 তা মুজুঙোত্ মুই নিদ্দুজী এলুং, মুই পাপত্তুন্ দূরোত্ থেইয়োং। 25 সেনত্তেই লগেপ্রভু মরে বকশিজ্ দিয়্যে তা চোগোত্ মঅ গম্ কাম অনুসারে, মর্ সিজি অনুসারে। 26 তুই দোয়্যেলুগুনোর লগে দোয়্যের্ বেবহার গর্, নিদ্দুজীগুনোর লগে নিদ্দুজী বেবহার গুরিচ্, 27 সিজিগুনোর লগে সিজি বেবহার গর্, আর কুজুরোমিগুনোরে দেগা তঅ বুদ্ধির্ চালাগি। 28 তুই দুখীগুনোরে রোক্ষ্যে গুরি থাচ্, আর বার্বোগুনোরে তলেন্দি লামেবাত্তে তঅ চোক্কুন্ তারার্ ইন্দি আঘে। 29 ও লগেপ্রভু, তুয়ই মঅ চেরাগ; তুয়ই মর্ আন্ধারানরে পহর্ গুরি থাচ্। 30 তর্ বল্লোই মুই সৈন্যদলুনো উগুরে ঝাবেই পড়ি পারং, আর মঅ গোজেনর্ বলে লাফ্ দিইনে দেবাল্ পার্ ওই পারং। 31 গোজেনর্ পধেন্দি কনঅ বেজাল্ নেই; লগেপ্রভুর কধানি খাটি বিলিনে প্রমাণ ওইয়্যে। তেয়ই তা ভিদিরে আশ্রয় লোইয়্যে বেক্কুনোর ঢাল। 32 বানা লগেপ্রভু বাদে গোজেন আর্ কন্না অাঘে? আমা গোজেনে বাদে আর কি কনঅ আশ্রয়-মুড়ো আঘে? 33 গোজেনে মর্ দরমর আশ্রয়; তে মঅ আঢিবার পথ্তান্ দোল্ গোজ্যে। 34 তে মরে উরিঙো ধোক্ক্যেন্ গুরি লাফ্ দিইনে আঢিবার্ বলান্ দিয়্যে; বেক্ উজু জাগানিত্ তেয়ই মরে থিয়্যেবাত্তে দিয়্যে। 35 তা সিত্তুন্ মঅ আঢ্তানে যুদ্ধো গুরিবাত্তে শিখ্যে সেনত্তেই মঅ আঢ্তানিয়ে পিদোল ধনুরে বেঙা গুরি পারে। 36 ও লগেপ্রভু, তঅ রোক্ষ্যেগুরিয়্যে ঢালান তুই মরে দুয়োচ্; তঅ যত্তন্দোই তুই মরে দাঙর্ বানেয়োচ্। 37 তুই মর্ আঢিবার পথ্তান্ দাঙর্ গোজ্যস্, সেনত্তেই মঅ টেঙত্ উজোত্ ন-লাগে। 38 মঅ শত্রুগুনোরে লোড়েইনে মুই তারারে ভস্ত গোজ্যং; তারা ভস্ত ন-অনা সং মুই পিজেন্দি ন-ফিরোং। 39 মুই তারারে শেজ্ গোজ্যং, তারারে নিগুজ্ গোজ্যং, যেনে তারা আর উদি ন-পারন্; তারা মঅ টেঙত্ তলে পোজ্যন্। 40 তুয়ই মঅ কমরত্ যুদ্ধো গুরিবার্ বলান্ দুয়োচ্, মর্ বিপক্ষগুনোরে মঅ টেঙত্ তলে গোজ্যস্। 41 মঅ শত্রুগুনোরে তুই মঅ কায়কুরেত্তুন্ ধেই যেবাত্তে বাধ্য গোজ্যস্; যিগুনে মরে ঈচ্ গরন্ তারারে মুই ভস্ত গোজ্যং। 42 তারা বল্ পেবাত্তে চেই রোইয়োন, মাত্তর্ কনজনে তারারে রোক্ষ্যে গুরিবাত্তে ন-এজন্। তারা লগেপ্রভুর ইন্দি চেই রোইয়োন, মাত্তর্ তেয়ো তারারে উত্তোর্ ন-দে। 43 পিত্তিমীর্ ধূল্যে ধোক্ক্যেন্ তারারে গুড়ি গোজ্যং; পধর্ মাদি-ফুদো ধোক্ক্যেন্ টেঙগোই মাড়িনে মুই তারারে নিগুজ্ গোজ্যং। 44 ও লগেপ্রভু, মঅ মানুচ্চুনোর উল্লোমিত্তুন তুই মরে উদ্ধোর্ গোজ্যস, অন্য জাদ্তুনো উগুরে মরে নেতা ইজেবে রাগেয়োচ্; মুই যিগুনোরে ন-চিনিদুং তারায়ো মঅ অধীন্ ওইয়োন। 45 উল্লোমি মনভাব্পোই বিদেশীগুনে মর্ বাধ্য অন্; মঅ কধা শুনিলে তারা মঅ অধীনোত্ সিয়েন স্বীগের্ গরন্। 46 তারা অামক্ ওইয়োন; তারা গির্গিরাদে গির্গিরাদে তাম্বুলোত্তুন্ নিগিলোন। 47 লগেপ্রভু জেদা। মর্ আশ্রয়-মুড়োবোর বাঈনী ওক্। মঅ গোজেন, যিবে মর্ রোক্ষ্যেগুরিয়্যে মুড়ো, তার সর্মানান বাড়োক্। 48 তেয়ই অন্য জাদ্তুনোরে মঅ অধীনোত্ আনে আর মর্ ওইনে তারারে পাওনা সাজা দে। 49 তে শত্রুগুনোর আঢত্তুন্ মরে রোক্ষ্যে গোজ্যে। ও গোজেন, তুই মরে শত্রুগুনোর উগুরে তুল্যচ্, অত্যেচারী মানুচ্চুনোর আঢত্তুন্ তুয়ই মরে রোক্ষ্যে গোজ্যস্। 50 ও লগেপ্রভু, ইয়েনত্তে অন্য জাদ্তুনো ভিদিরে মুই তর্ বাঈনীগান্ ফগদাং গুরিম আর তরে নাঙ্ গিনিম। 51 লগেপ্রভু তা রাজাবোরে ভালোক্বার্ দাঙর্ জিদেনাগান্ দান গোজ্যে; অয়, তার অভিষেগ্ গোজ্যে মানুচ্চুনো উগুরে, দায়ূদ আর তা গুট্টিগুনো উগুরে, তে জিংকানিবর্ তার ন-পুরেইয়্যে কোচ্পানা দেগায়। |
Copyright © 2021 Bangladesh Bible Society
Bangladesh Bible Society