২ শমূয়েল 21 - Chakma Bibleগিবিয়োনীয়গুনোর মরাণার হেনাবো সুজোনা 1 দায়ূদোর রাজাগিরি গরানার সলাবোত্ উদোউত্যে তিন বজর সং ভাদরাত্ ওইয়্যে। সেনত্তে দায়ূদে লগেপ্রভু ইদু ইয়েনর কারণান পুযোর্ গুরিলো। জোবত্ লগেপ্রভু কলদে, “ইয়েন্ ওইয়্যেদে শৌল আর তা গুট্টিগুনোত্তে। তারা লো ঝরানার্ দুজে দুষী; শৌল গিবিয়োনীয়গুনোরে মারে ফেলেয়্যে।” 2 রাজা সেক্কে গিবিয়োনীয়গুনোরে ডাগিনে তারা লগে কধা কলঅ। গিবিয়োনীয়গুনে ইস্রায়েলীয় ন-এলাক্। আজলে তারা এলাক্কে ইমোরীয়গুনোর বাঁজি রোইয়্যে মানুচ্। তারারে ভস্ত ন-গুরিবাক্ বিলিনে ইস্রায়েলীয়গুনে শমক্ হেইয়োন, মাত্তর্ ইস্রায়েল আর যিহূদার উগুরে বিশেজ্ আওজত্তে শৌল তারারে বেক্কুনোরে মারে ফেলেবার চেট্ট্যা গুরিলো। 3 দায়ূদ গিবিয়োনীয়গুনোরে পুযোর্ গুরিলো, “মুই তমাত্তে কি গুরিম? কেধোক্ক্যেন গুরি মুই ক্ষতিপূরণ গুরি পারং যেনে তুমি লগেপ্রভুর সোম্বোত্তিগানি ইস্রায়েলীয়গুনোরে বর্ দুয়ো।” 4 জোবত্ গিবিয়োনীয়গুনে তারে কলাক্, “শৌল বা তা গুট্টিগুনোর ইদু আমার যে দাবি সিয়েন সোনা বা রূবোর্ বেপার নয় বা ইস্রায়েলীয়গুনোরে মারে ফেলেবার বেপার্অ নয়।” দায়ূদে পুযোর্ গুরিলো, “সালে তুমি মরে কঅ তমাত্তে কি গুরিম্?” 5 জোবত্ তারা রাজারে কলাক্, “যে মানুচ্চো আমারে শেজ্ গোজ্যে আর ইস্রায়েলর ধুজিত্তুন্ আমারে তুলি দিবাত্তে আমা বিরুদ্ধে কুজুরোমি গোজ্যে, 6 তা বংশর সাতজন মরদরে আমা আাঢত্ তুলি দে। আমি লগেপ্রভুর বেঈ লোইয়্যে সে মানুচ্চুনোরে, অত্তাৎ শৌলর শঅর্ গিবিয়াতদ্ লগেপ্রভুরে সাক্ষী রাগেইনে তারারে মারে ফেলেবং আর বেক্কুনো মুজুঙোত্ তারার্ মরাকিয়্যেগানি ফেলেই রাগেবং।” সেক্কে রাজা কলঅ, “মুই তমা আঢত্ তারারে তুলি দিম্।” 7 শৌলর নাদিন্নোরে, অত্তাৎ যোনাথনর্ পূঅ মফীবোশতরে রাজা বাঁজেই রাগেল, কিত্যে শৌলর পূঅ যোনাথনর ইদু দায়ূদে লগেপ্রভুরে সাক্ষী রাগেইনে এক্কান্ শমক্ গোজ্যে। 8-9 রাজা সেক্কে অয়ার ঝি রিস্পার পেদর্ শৌলর দ্বিবে পূঅ অর্মোণি আর মফীবোশতরে আর শৌলর ঝি মেরবর পেদর্ মহোলাতীয় বর্সিল্লয়র পূঅ অদ্রীয়েলর পাচজন পূঅরে অানিনে গিবিয়োনীয়গুনোর আঢত্ তুলি দিলো। তারা তারারে এক্কো মুড়ো উগুরে নেযেইনে লগেপ্রভুরে সাক্ষী রাগেইনে মারে ফেলেলাক্ আর বেক্কুনো মুজুঙোত্ তারার্ মরাকিয়্যেগানি ফেলেই রাগেলাক্। সে সাতজনর বেক্কুনোরে এক সমারে মারে ফেলা অলঅ; ফসল কাবিবার অক্তত্, অত্তাৎ যেদেনা বিজির ফসল কাবানার আরাম্ভত্ তারারে মারে ফেলা ওইয়্যে। 10 অয়ার ঝি রিস্পা বস্তা নেযেইনে এক্কো পাত্তর উগুরে নিজোত্তে বিজেই রাগেল। পত্তম ফসল কাবানার অক্তত্তুন্ ধুরি আরাম্ভ গুরিনে যেদকদিন সং সে কিয়্যেগানি উগুরে আগাজত্তুন্ ঝড় ন-পড়িলো সেদকদিন সং তে দিনোত্ পেক্কুনোরে আর রেদোত্ ঝাড়্বো য়েমানুনোরে সেই মরাকিয়্যেগানি রোক্ষ্যে গুরিলো। 11 শৌলর দ্বিতীয় ঘর মোগ্ অয়ার ঝি রিস্পা যিয়েনি গোজ্যে সিয়েনি দায়ূদোরে কুয়া অলঅ। 12 দায়ূদে সেক্কে যাবেশ-গিলিয়দর মানুচ্চুনো ইত্তুন্ শৌল আর তা পূঅ যোনাথনর অাড়ুন তুলি আনিলো। পলেষ্টীয়গুনে গিল্বোয়ত্ শৌলরে মারে ফেলানার পরেন্দি তারার্ দ্বিজনর কিয়্যেগানি বৈৎশানর শঅর-চক্করবোত্ টাঙেই দিলাক্। যাবেশ-গিলিয়দর মানুচ্চুনে সিয়োত্তুন্ কিয়্যেগানি চুর্ গুরি আন্যন্। 13 দায়ূদে সিয়োত্তুন্ শৌল আর তা পূঅ যোনাথনর অাড়ুন অানিলো। যিগুনোরে বেক্কুনো মুজুঙোত্ মারে ফেলা ওইয়্যে তারার্ অাড়ুনো এগত্তর্ গরা অলঅ। 14 দায়ূদো মানুচ্চুনে শৌল আর তার্ পূঅ যোনাথনর অাড়ুন বিন্যামীন চাগালার্ সেলাত্ তা বাপ্পো কীশোর গোরানত্ থলাক্। রাজার উগুম্ মজিম্ তারা বেক্কানি গুরিলাক্। সে পরেন্দি দেজত্তেই গোজেন ইদু তবনা গরা অলে পরেন্দি তে জোব্ দিলো। পলেষ্টীয়গুনোর বিরুদ্ধে যুদ্ধো 15 পলেষ্টীয় আর ইস্রায়েলীয়গুনো ভিদিরে আরঅ যুদ্ধো আরাম্ভ অলঅ। দায়ূদে তা মানুচ্চুনোরে লোইনে পলেষ্টীয়গুনোর বিরুদ্ধে যুদ্ধো গুরিবাত্তে গেলঅ। যুদ্ধো গত্তে গত্তে তে বল্পোজ্যে ওই পড়িলো। 16 সেক্কে যিশ্বী-বনোব নাঙে এক্কো রফায়ীয় নূয়ো সাজ্গুজ্ গুরি সাজিনে দায়ূদোরে মারে ফেলেবাত্তে এলঅ। তা সেল্লোর পিদোল মাধাবোর্ ওজন এলদে পেরায় চের্ কেজি। 17 মাত্তর্ সরূয়ার পূঅ অবীশয় দায়ূদোরে রোক্ষ্যে গুরিলো। তে সে পলেষ্টীয়বোরে আঘাত্ গুরিনে মারে ফেলেল। সেক্কে দায়ূদো মানুচ্চুনে শমক্ গুরিনে দায়ূদোরে কলাক্, “তুই আর্ কনদিনঅ আমা লগে যুদ্ধোত্ ন-যেবে, ইস্রায়েলর চেরাক্কো মারেই ন-দিচ্।” 18 এ পরেন্দি গোবত্ পলেষ্টীয়গুনোর লগে আরঅ এক্কান যুদ্ধো অলঅ। সে অক্তত্ হূশাতীয় সিব্বখয় সফ নাঙে এক্কো রফায়ীয়রে মারে ফেলেল। 19 গোবত্ পলেষ্টীয়গুনোর লগে আর এক্কো যুদ্ধোত্ বৈৎলেহমীয় যারে-ওরগীমোর পূঅ ইল্হাননে গাতীয় গলিয়াতরে মারে ফেলেল। এ গলিয়াতর সেল্লো এলদে তাতীগুনোর বিয়োঙ ধোক্ক্যেন্। 20 আর এক্কো যুদ্ধো গাতদ্ ওইয়্যে। সে যুদ্ধোত্ এক্কো লাম্বা বাবোত্যে মানুচ্ এলঅ যার্ দ্বিয়েন আঢত্ আর টেঙত্ ছগান্ গুরিনে বেক্কানিয়ে চোব্বিশচুয়ো আঙুল এলাক্। তেয়ো এলদে এক্কো রফায়ীয়। 21 তে যেক্কে ইস্রায়েল জাত্তোরে ঈচ্ গরের্ সেক্কে দায়ূদো ভেই শিমিয়র পূঅ যোনাথনে তারে মারে ফেলেল। 22 এ চের্জনে এলাক্কে গাতদ্ বজত্তিগোজ্যে রফায়ীয়। দায়ূদ আর তা মানুচ্চুনোর আঢত্ ইগুনে মারা পোজ্যন্। |
Copyright © 2021 Bangladesh Bible Society
Bangladesh Bible Society