২ শমূয়েল 20 - Chakma Bibleদায়ূদো বিরুদ্ধে শেবের উল্লোমি 1 বিন্যামীন-গুট্টির বিখ্রির পূঅ শেবঃ নাঙে এক্কো পাজি মানুচ্ সেক্কে সিদু এলঅ। তে শিংগা বাজেইনে কলঅ, “দায়ূদো উগুরে আমার কনঅ দাবি নেই, যিশয়র পূঅবো উগুরে কনঅ অধিকার নেই। ও ইস্রায়েল, তুমি যে যার্ ঘরত্ ফিরি যঅ।” 2 সেক্কে ইস্রায়েলর বেক্ মানুচ্চুনে দায়ূদোরে ছাড়িনে বিখ্রির পূঅ শেবের পিজেন্দি গেলাক্। মাত্তর্ যর্দনত্তুন্ যিরূশালেম সং বেক্ পথ্তান যিহূদার মানুচ্চুনে রাজার লগে লগে গেলাক্। 3 দায়ূদে যিরূশালেমত্ তার নিজো ঘরত্ ফিরি এজানার পরেন্দি যে দশজন দ্বিতীয় ঘর মোগোরে তে রাজঘরান চেবাত্তে ফেলে যেইয়্যে তারারে তে এক্কান ঘরত্ রাগেল আর ঘরান চুগি দিবার্ বেবস্থা গুরিলো। তে তারারে হানা-দানা, উরোন-পিরোন্ দিলো মাত্তর্ আর্ তারা সমারে ন-থেলঅ। সিদু তারা রানিমিলে ইজেবে মরণ সং আক্সোয়ে অবস্থায় রলাক্। 4 ইয়েনর্ পরেন্দি রাজা অমাসারে কলঅ, “তিন দিনো ভিদিরে তুই যিহূদার মানুচ্চুনোরে মইদু ডাগি আনিবে আর তুইয়ো ইদু থেবে।” 5 অমাসা যিহূদার মানুচ্চুনোরে ডাগিবাত্তে গেলঅ মাত্তর্ রাজা ইয়েনত্তে যে সময়ান ঠিগ্ গুরি দিয়্যে তাত্তুন্ বেশ্ তে সময় নেযেল। 6 সেক্কে দায়ূদে অবীশয়রে কলঅ, “অবশালোমে আমারে যেত্তমান খোতি গোজ্যে তাত্তুনো বেশ্ ইক্কিনে ক্ষেতি গুরিবো এ বিখ্রির পূঅ শেবঃ। ইক্কিনে তুই মঅ মানুচ্চুনোরে নেযেইনে তা পিজেন্দি লোড়েই নেযা। ঢগেনলে তে কনঅ দেবাল্লোই ঘিজ্যে শঅর্ তোগেইনে আমা কায়-কুরেত্তুন্ ধেই যেবঅ।” 7 সেক্কে যোয়াবে আর তা মানুচ্চুনে, করেথীয় আর পলেথীয়গুনে আর বাদ্বাগি যোদ্ধাগুনে অবীশয়র অধীনোত্ বিখ্রির পূঅ শেবঃরে লোড়েবাত্তে যিরূশালেমত্তুন্ নিগিলি গেলাক্। 8 তারা গিবিয়োনর দাঙর্ সিল্লো ইদু লুমোনার্ পরেন্দি অমাসার লগে তারার্ দেগা অলঅ। যোয়াবর কিয়্যেত্ এলদে সেক্কে সৈনিগোর্ পোজাক্ আর তা কমরত্ কমর্-বিজোনী লগে বান্যে এলদে খৈল্যেবো ভিদিরে ছুরিগান। তে উজেই গেলে খৈল্যেবোত্তুন্ ছুরিগান মাদিত্ পড়িলো। 9 যোয়াব অমাসারে কলঅ, “ভেই, কেনজান্ আগচ্?” ইয়েন কোইনে তারে চুমিবাত্তে তে ডেন্ আত্তান্দোই তা দাড়িগানি ধুরিলো। 10 যোয়াব আঢত্ যে সে ছুরিগান এলঅ সিন্দি অমাসা খিয়েল্ ন-গরে। যোয়াবে সে ছুরিগান তা পেদথ্ ভোরেই দিলো। সেক্কে তার্ আদুরি নিগিলিনে মাদিত্ পড়িলো। অমাসারে আর্ আঘাত্ গুরিবার দরকার ন-অলঅ। তে মুরি গেলঅ। ইয়েনর্ পরেন্দি যোয়াবে আর তা ভেই অবীশয় বিখ্রির পূঅ শেবের পিজেন্দি লোড়েইনে গেলঅ। 11 যোয়াবর এক্কো মানুচ্ অমাসার মরাকিয়্যেগানর কায়-কুরে থিয়্যেইনে কলঅ, “যে যোয়াবরে কোচ্পায় আর যে দায়ূদো পক্ষেন্দি তে যেনে যোয়াবর্ পিজে পিজে যায়।” 12 অমাসার কিয়্যেগান সেক্কে রোগোনিগুরি পদথ্ পোজ্যে এলঅ। যোয়াবর সে মানুচ্চো দেগিলোদে, সৈন্যগুনে বেক্কুনে অমাসার ইদু এইনে থামাদন্, সেনত্তেই তে অমাসারে পধত্তুন্ টানিনে এক্কো মাঢত্ লামেইনে নেযেলাক্ আর এক্কান্ কাবড়লোই তারে ঢাগি দিলাক্। 13 অমাসারে পধত্তুন্ সোরেই নেযানার পরেন্দি বেক্ মানুচ্চুনে যোয়াবর্ পিজে পিজে বিখ্রির পূঅ শেবঃরে লোড়েবাত্তে গেলাক্। 14 শেবঃ ইস্রায়েলর বেক্ গুট্টিগুনোর চাগালা ভিদিরেন্দি আর বেরীয়গুনোর পুরো চাগালান্দি আবেল-বৈৎমাখা সং গেলঅ। সিদু মানুচ্চুনে এগত্তর্ ওইনে শেবের পিজে পিজে শঅরত্ সোমেলাক্। 15-16 সে পরেন্দি যোয়াবর্ লগে বেক্ সৈন্যগুন্ এইনে আবেল-বৈৎমাখাগান ঘিরিলাক্। তারা শঅরর্ বারেন্দি দেবাল লগে এক্কো লেদান্যেগুরি কুর্ বানেলাক্। সে পরেন্দি তারা যেক্কে ভিদিরে দেবালান ভাঙিবাত্তে আরাম্ভ গুরিলাক্ সেক্কে এক্কো চালাগ্ মিলে শঅরর্ ভিদিরেত্তুন্ দাঙর্ দাঙর্ গুরি ডাগিনে কলঅ, “শুনো, শুনো, যোয়াবরে ইদু এবাত্তে কঅ যেনে মুই তা লগে কধা কোই পারং।” 17 যোয়াবে তান্দি উজেই যানার পরেন্দি তে পুযোর্ গুরিলো, “তুই কি যোয়াবে?” তে কলদে, “অয়, মুই যোয়াব।” মিলেবো কলঅ, “তঅ চাগরানীবোর্ কধা শুন্।” তে কলঅ, “শুনোঙর্।” 18 মিলেবো কলঅ, “আগ দিনোত্ মান্জ্যে কদাক্, ‘আবেলত্ যেইনে তঅ প্রশ্নর্ জোব্পান জানি লোচ্।’ আর এবাবোত্যে গুরিনে তারা বেক্ বেপারানি সামালাদোক্। 19 আমি ইস্রায়েল ভিদিরে শান্তিপ্রিয় আর বিশ্বেজী। তুই ইস্রায়েলর ভিদিরে মা ধোক্ক্যেন্ এ শঅরানরে ভস্ত গুরি দিবাত্তে চর্। লগেপ্রভুর সোম্বোত্তি এ ইস্রায়েলীয়গুনোরে কিত্তে তুই গিলিবার চেট্ট্যা গরর্?” 20 জোবত্ যোয়াবে কলঅ, “গিলেনা বা ভস্ত গুরিবার কামান্ মত্তুন্ দূরোত্ থোক্, দূরোত্ থোক্। 21 বেপারান সেবাবোত্যে নয়। ইফ্রয়িমর মুড়োমুড়ি চাগালার বিখ্রির পূঅ শেবঃ নাঙে এক্কো মান্জ্যে রাজা দায়ূদো বিরুদ্ধে আত্ তুল্যে। সে মানুচ্চোরে বানা মঅ আঢত্ তুলি দে, সেক্কে মুই এ শঅরানত্তুন্ যেম্বোই।” মিলেবো যোয়াবরে কলঅ, “দেবাল উগুরেন্দি তা মাধাবো তইদু ফেলে দিয়্যে অবঅ।” 22 সে পরেন্দি সে মিলেবো বেক্ মানুচ্চুনো ইদু যেইনে জ্ঞানর্ উপদেশ দিলো। মানুচ্চুনে বিখ্রির পূঅ শেবের মাধাবো কাবি নেযেইনে যোয়াব ইদু দলা মারিনে ফেলেই দিলাক্। যোয়াবে সেক্কে শিংগা বাজেই দিলো আর তা মানুচ্চুনে শঅরত্তুন্ যেইনে পত্তিজনে যে যার্ ঘরত্ আঢি গেলাক্। যোয়াবে যিরূশালেমত্ রাজার ইদু ফিরি গেলঅ। 23 যোয়াবে এলদে ইস্রায়েলর পুরো সৈন্যদলুনোর নেতাবো আর যিহোয়াদারর পূঅ বনায় এলদে দায়ূদো রোক্ষ্যেগুরিয়্যে করেথীয় আর পলেথীয়গুনোর নেতাবো; 24 যিগুনোরে কাম্ গুরিবাত্তে বাধ্য গরা অদঅ তারার্ দেগাশুনোর ভারান্ এলদে অদোরাম উগুরে; অহীলূদোর পূঅ যিহোশাফটে এলদে বিজগ্ লিগিয়্যে; 25 শবা এলদে রাজার লিগিয়্যে; সাদোক আর অবিয়াথরে এলাক্কে ধর্মগুরু। 26 অার যায়ীরীয় ঈরা এলদে দায়ূদোর্ সল্লাদিয়্যে ধর্মগুরু। |
Copyright © 2021 Bangladesh Bible Society
Bangladesh Bible Society