২ শমূয়েল 10 - Chakma Bibleদায়ূদো আঢত্ অম্মোনীয়গুনোর উদি যানা 1 যেরেন্দি অম্মোনীয় রাজা মরানার পরেন্দি তা পূঅ হানূনে তা জাগানত্ রাজা অলঅ। 2 দায়ূদে কলঅ, “হানূনোর বাপ্পো নাহশে মঅ উগুরে যেধোক্ক্যেন বিশ্বেজি এলঅ সেধোক্ক্যেন্ মুইয়ো হানূনো উগুরে বিশ্বেজি থেম্।” সেনত্তেই তা বাপ্পোর্ মরাণার অক্তত্ তারে বুজেবাত্তে তে কয়েক্কো মানুচ্ পাধেই দিলো। সেক্কে দায়ূদো মানুচ্চুনে অম্মোনীয়গুনোর দেজত্ গেলাক্। 3 মাত্তর্ অম্মোনীয় নেতাগুনে তারার্ গিরোজ্ হানূনোরে কলাক্, “তুই কি মনে গরচ্, দায়ূদে তঅ বাপ্পোরে সর্মান দেগেবাত্তে তরে বুজেবাত্তে মানুচ্ পাদেয়্যে? তে আজলে তারারে তইদু পাদেয়্যে যেনে তারা চড়্ ইজেবে শঅরর্ হবর্ নেযানার পরেন্দি সিয়েন্ ভস্ত গুরি দি পারন্।” 4 হানূনে সেক্কে দায়ূদো মানুচ্চুনোরে ধুরিনে তারার্ দাড়িগানি এক কিত্তেন্দি মুড়েই দিলো আর তারার্ লাম্বা সুলুম্মোর্ অদ্দেক্ সং, অত্তাৎ কমর্ সং কাবি দিইনে তারারে বিদেয় গুরি দিলো। 5 দায়ূদোরে এ কধাগান কুয়ো অলে পরেন্দি তার্ পাদেয়্যে সে মানুচ্চুনোর লগে দেগা গুরিবাত্তে তে কয়েকজন মানুচ্ পাধেই দিলো, কিত্যে সে মানুচ্চুনে অমকদ লাজত্ পোজ্যন্। রাজা তারারে কোই পাদেল, “তমা দাড়িগানি ন-উদোনা সং তুমি যিরীহোত থাগঅ; সে পরেন্দি তুমি ফিরি এচ্চ্য।” 6 অম্মোনীয়গুনে বুঝি পারিলাক্, তারা দায়ূদোর ঘিনাইদে মানুচ্ ওইয়োন। সেনত্তেই তারা বৈৎ-রহোব আর সোবাত্তুন্ কুড়ি আজার অরামীয় সৈন্য, এক আজার সৈন্যসুমুত্তো মাখার রাজারে আর টোবত্তুন্ বার আজার মান্জ্যরে ভাড়া গুরিলাক্। 7 ইয়েনি শুনিনে দায়ূদে যোয়াবরে আর তার্ বেক্ সৈন্যদলুনোরে পাধেই দিলো। 8 সেক্কে অম্মোনীয়গুনে নিগিলিনে তারার্ শঅরর্ গেট্টোত্ সোমেবার্ পথ্তানত্ যুদ্ধো গুরিবাত্তে সৈন্য সাজেলাক্। ইন্দি সোবা আর রহোবর অরামীয়গুনে আহ্ টোব আর মাখার্ সৈন্যগুনে হোলা মাদত্ রলাক্। 9 যোয়াবে দেগিলোদে তা মুজুঙোত্ আর পিচ্ছোন্দি অরামীয় সৈন্যগুনোরে সাজেই রাগা ওইয়্যে। সেনত্তে তে তা সৈন্যগুনো ভিদিরেত্তুন্ কুদুক্কুন্ বেঈ-লোইয়্যে সৈন্য নেযেইনে তারার্ বিরুদ্ধে সাজেলাক্। 10 বাদবাগি সৈন্যগুনোরে তে তার্ ভেই অবীশয়র অধীনোত্ অম্মোনীয়গুনোর বিরুদ্ধে সাজেল। 11 যোয়াবে তা ভেইবোরে কলঅ, “যুনি অরামীয়গুনে মত্তুন্ বেশ্ বোলী অন্ সালে তুই মরে বল্ দিবাত্তে এবে, আর যুনি অম্মোনীয়গুনে তত্তুন্ বেশ্ বোলী অন্ সালে মুই তরে বল্ দিবাত্তে যেম্। 12 ন-দোরেয়ো; আমা মানুচ্চুনোত্তে আর আমা গোজেনর শঅরানিত্তে এজঅ, আমি ন-দোরেইনে যুদ্ধো গুরিই। লগেপ্রভুর চোগোত্ যিয়েনি গম্ তে সিয়েনিই গোরোক্।” 13 ইয়েন কোইনে যোয়াবে তার সৈন্যদলুন লোইনে অরামীয়গুনোর লগে যুদ্ধো গুরিবাত্তে উজেই যানার পরেন্দি অরামীয়গুনে তা মুজুঙোত্তুন্ ধেই গেলাক্। 14 অরামীয়গুনোরে ধেই যাদে দেগিনে অম্মোনীয়গুনেয়ো অবীশয়র মুজুঙোত্তুন্ ধেই যেইনে শঅর ভিদিরে যেইনে সোমেলাক্। সেনত্তেই যোয়াবে অম্মোনীয়গুনো সমারে আর যুদ্ধো ন-গুরিনে যিরূশালেমত্ ফিরি গেলাক্। 15 অরামীয়গুনে ইস্রায়েলীয়গুনো ইদু উদিই যাদন্ দেগিনে আরঅ একসমারে এগত্তর্ অলাক্। 16 রাজা হদদেষরে মানুচ্ পাদেইনে ইউফ্রেটিস গাঙর্ উপারত্ বজত্তি গোজ্যে অরামীয়গুনোরে আনিলো। তারা হেলমত্ এলাক্। হদদেষরর্ সৈন্যগুনোর্ সেনাপতি শোবকে তারারে পরিচালনা গুরিনে অানিলো। 17 দায়ূদোরে সে কধাগান জানানার পরেন্দি তে বেক্ ইস্রায়েলীয় সৈন্যগুনোরে এগত্তর্ গুরিলো আর যর্দন গাঙান্ পার্ ওইনে হেলমত্ গেলাক্। সেক্কে অরামীয়গুনে তারার্ সৈন্য সাজেইনে দায়ূদো বিরুদ্ধে যুদ্ধো গুরিলাক্, 18 মাত্তর্ ইস্রায়েলীয়গুনো মুজুঙোত্তুন্ তারা ধেই গেলাক্। সেক্কে দায়ূদে তারার সাতশত্ রথচালেয়্যে আর চোল্লিশ আজার ঘোড়াবাহিনীরে মারে ফেলেল। তে তারার্ সেনাপতি শোবকরেয়ো আঘাত্ গুরিলো; সেক্কে শোবকে সিদু মুরি গেলঅ। 19 হদদেষরর অধীনোত্ বেক্ রাজাগুনে যেক্কে দেগিলাক্, তারা ইস্রায়েলীয়গুনো ইদু উদি যাদন্ সেক্কে ইস্রায়েলীয়গুনোর লগে তারা শান্তি-চুক্তি গুরিনে তারার্ অধীনোত্ অলাক্। সিত্তুন্ ধুরি অরামীয়গুনে দরে অম্মোনীয়গুনোরে আর বল্ ন-দুয়োন। |
Copyright © 2021 Bangladesh Bible Society
Bangladesh Bible Society