২ শমূয়েল 1 - Chakma Bibleশৌল আর যোনাথনর মরাণার হবর্ 1 শৌল মরাণার পরেন্দি দায়ূদে অমালেকীয়গুনোরে ওদেই দিইনে সিক্লগত্ ফিরি এলঅ আর সিদু দ্বিদিন রলঅ। 2 তিন দিনোত্ শৌল সৈন্যগুনোর-তাম্বুলোত্তুন্ এক্কো মানুচ্ দায়ূদো ইদু এলঅ। আবিলেজ্ হানার চিহ্নো ইজেবে তা কিয়্যের্ কাবড়-চুগোড়ানি ফাদা এলঅ আর মাঢাত্ ধুল্যে এলঅ। তে দায়ূদো ইদু যেইনে মাদিত্ পড়িনে তারে সালাম্ গুরিলো। 3 দায়ূদে তারে পুযোর্ গুরিলো, “তুই কুত্তুন্ এচ্ছোস্?” তে কলঅ, “মুই ইস্রায়েলীয়গুনোর তাম্বুলোত্তুন্ ধেই এচ্ছোং।” 4 দায়ূদে তারে পুযোর্ গুরিলো, “কি ওইয়্যে? মরে কঅ।” তে কলঅ, “মানুচ্চুনে যুদ্ধোর্ জাগানত্তুন্ ধেই যেইয়োন। ভালোক্জনে মারা পোজ্যন্ আর শৌল আহ্ তা পূয়ো যোনাথনেয়ো মুরি যেইয়্যে।” 5 যে গাবুজ্যেবো এ হবরান্ আন্যে দায়ূদে তারে পুযোর্ গুরিলো, “তুই কিঙিরি থার্ পেলে, শৌল আর তার পূয়ো যোনাথনে মুরি যেইয়োন?” 6 গাবুজ্যেবো তারে কলঅ, “মুই সে অক্তত্ গিল্বোয় মুড়োবোত্ এলুং আর শৌল সেক্কে তা সেল্লো উগুরে ভর্ দিইনে থিয়্যেই এলঅ। সে অক্তত্ রথ আর ঘোড়াচালেইয়্যেগুনে পেরায়্ তা মাঢা উগুরে লুম্মোন্দি। 7 তে পিজেন্দি ফিরি মরে দেগিনে ডাগিলো। মুই কলুং, ‘এইয়্যে দঅ মুই।’ 8 তে মরে পুযোর্ গুরিলো, ‘তুই কন্না?’ জোবত্ মুই কলুং, ‘মুই এক্কো অমালেকীয়।’ 9 তে মরে কলঅ, ‘দোয়্যে গুরি মইদু এইনে মরে মারে ফেলা, কিত্যে মর্ অমকদ জ্বালা-যন্ত্রণা গরের্ মাত্তর্ মুই এজঅ বাঁজি আগং।’ 10 সেনত্যেই মুই তাইদু যেইনে তারে মারে ফেলেলুং। মুই বুঝি পাজ্যং, তার যে অবস্থা সিয়েন্দোই তে আর ন-বাঁজিবো। মু্ই তা চিরেবোর্ মুকুটতুয়ো আরে তা আঢর্ হারুনি হুলিনে ইদু মঅ গিরোজ্ তইদু অানিলুং।” 11 এ কধাগান শুনিনে দায়ূদ আহ্ তা সমারে এলাক্কে মানুচ্চুনে নিজো কাবড়ানি ফাদিলাক্। 12 শৌল আর তা পূঅ যোনাথন আর লগেপ্রভুর সৈন্যদলর যিদুক্কুন্ ইস্রায়েলীয় যুদ্ধোত্ মুরি যেইয়োন্ তারাত্যে তারা সাজোন্যে সং কানিলাক আহ্ আবিলেচ্ গরা ধুরিলাক আর কিচ্ছু ন-হেলাক্। 13 যে গাবুজ্যেবো এ হ্বরান আন্যে দায়ূদে তারে পুযোর্ গুরিলো, “তুই কুদুগোর্ মানুচ্?” জোবত্ তে কলঅ, “মুই এ দেজর্ বজত্তি গোজ্যে এক্কো বিদেশী মানজ্যর্ পূয়ো, এক্কো অমালেকীয়।” 14 দায়ূদে তারে কলঅ, “লগেপ্রভুর অভিষেক গোজ্যে মানুচ্চোরে মারে ফেলেবাত্তে আত্ তুলোদে তুই কি এক্কেনায়ো ন-দোরেলে?” 15 দায়ূদে তা এক্কো মান্জ্যরে ডাগিনে কলঅ, “তুই কায়-কুরে যেইনে তারে মারে ফেলা।” সেক্কে তে তারে মারে ফেলেল। 16 দায়ূদে সে গাবুজ্যেবোরে কলদে, “তর্ মরণানত্তে তুই নিজেই দায়ী, কিত্যে তর্ মুয়ো কধানি তর্ বিরুদ্ধে সাক্ষী দিয়্যেদে, লগেপ্রভুর অভিষেগ গোজ্যে মানুচ্চোরে তুই মারে ফেলেয়োচ্।” শৌল আর যোনাথনর মরনত্যে দায়ূদোর আবিলেচ্ হানা 17 শৌলে আর তা পূঅ যোনাথনত্তে দায়ূদে সেক্কে এ আবিলেচর্ গান্নো গাহ্ ধুরিলো। 18 তে উগুম দিলো যেনে ধনুক নাঙে এ আবিলেজর্ গান্নো যিহূদা-গুট্টির মানুচ্চুনোরে শিগে অয়। এ গান্নো যাশের নাঙে এক্কো বোইয়োত্ লেগা আঘে। 19 “ও ইস্রায়েল, যিগুনে তর্ বাঈনী গরন্ তারা তর্ সেই অজল জাগানত্ মুরিনেই পড়ি রোইয়োন। হায়! কেধোক্ক্যেনগুরি বীর মানুচ্চুনে ভস্ত ওই গেলাক্! 20 তুমি গাতদ্ এ হবরান্ ন-দুয়ো, আর অস্কিলোনর পধে পধে ফগদাং ন-গোজ্য; সিয়েনি গুরিলে পলেষ্টীয়গুনোর্ মিলেগুনে ফুত্তি গুরিবাক্, সেই সুন্নত ন-গোজ্যে মানুচ্চুনোর্ মিলেগুনে রঙ্গ-ফুত্তি গুরিবাক্। 21 ও গিল্বোয়োর্ মুড়োমুড়িগুন, তমা উগুরে শিরোপানি বা ঝড় ন-পোড়োক্, তমা ভিদিরে বোলি শোজ্য খেদ্অ ন-থোক্; কিত্যে সিয়োদোই দঅ বীরমানুচ্চুনোর ঢালানি অসর্মানিত ওইয়োন, শৌলর ঢালত্ আর তেল গুলোনা ন-অর্। 22 মুরি যেইয়্যে মানুচ্চুনোর্ লোগানি আর বীর মানুচ্চুনোর য়েরা ন-পেলে যোনাথনর ধনুগান ফিরি ন-এদঅ; ঈল্ ন-ওইনে শৌলর লাম্বা ছুড়িগান ফিরি ন-এদঅ। 23 বাঁজি থাগদে শৌল আর যোনাথনে কোচ্পেইয়্যে আর গম্ মানুচ্ এলাক্; তারা মরদেয়ো ফারক্ ন-অলাক্। তারার গঙার্ এলদে চিল পেগোত্তুন্অ বেশ্, আর বল্অ এলদে সিংহত্তুন্ বোউত্ বেশ্। 24 ও ইস্রায়েলর মিলেগুন, শৌলত্যেই কানঅ। তে তমারে মংগা রাঙা কাবড় উরেয়্যে, তমা কাবড়ানি উগুরে সোনা মুড়েয়্যে কাম্ গোজ্যে। 25 হায়, সে বীর মানুচ্চুন যুদ্ধোত্ কেন্জান্ গুরি ভস্ত ওই গেলাক্! সেই অজল জাগানত্ যোনাথনে মরা অবস্থায় পোজ্যে এলঅ। 26 হায় যোনাথন, মঅ ভেইবো! তত্যেই মর্ অমকদ দুঃখো। মইদু তুই কত্তমান কোচ্পেইয়্যে; মত্তে তর্ কোচ্পানা এলঅ মিলেগুনোত্তুন্অ বেশ্ কোচ্পানাগান অমকদ এলঅ। 27 হায়, কেন্জানগুরি বীর মানুচ্চুনে ভস্ত ওই গেলাক্, আর বর্বাদ্ গেলঅ তারার যুদ্ধোর্ অাত্যেরানি!” |
Copyright © 2021 Bangladesh Bible Society
Bangladesh Bible Society