২ রাজাবলী 7 - Chakma Bible1 ইলীশায় কলঅ, “লগেপ্রভু কি কোইয়্যে সিয়েন শুনো। তে কত্তে, এজেত্তে কেল্যে শমরিয়ার গেদোত্ বার গ্রাম রূবোলোই ছয় কেজি মোয়দে আর বার গ্রাম রূবোলোই বার কেজি কেজ্বিজি বেজা অবঅ।” 2 রাজারে যে কামগুরিয়েবো বল্ দিয়্যে তে গোজেন মানুচ্চোরে কলঅ, “চাহ্, লগেপ্রভু যুনি আগাজ দোরান্অ খুলি দে তো কি ইয়েন্ ওই পারে?” জোবত্ ইলীশায় কলঅ, “তুই নিজোর্ চোগেন্দি সিয়েন্ দেগিবে, মাত্তর্ সিয়েনির্ কনগান্ তুই হেই ন-পারিবে।” অরামীয়গুনে ধেই গেলাক্ 3 সেক্কে শঅর-গেদোত্ সুমিবার্ পথ্তানত্ চের্জন ফারাঙিবলা রোগি এলাক্। তারে তে কলাক্, “আমি ইদু থেইনে কিত্তে মুরিবোং? 4 যুনি কোই আমি শঅরত্ যেবং সালে সিদুয়ো ভাদরাত্ আর আমি মুরিবোং। যুনি ইয়োত্ থেই তুয়ো মুরিবোং। বরং আমি যেই, আমি অরামীয়গুনোর তাম্বুলোত্ যেইনে তারা আঢত্ নিজোরে তুলি দিই। যুনি তারা আমারে বাজান্ সালে আমি বাঁজিলোং, আর নয়দ মুরিবোং।” 5 ইয়েন্ কোইনে সাজ্যেন্যের্ আগেন্দি তারা অরামীয়গুনোর তাম্বুলোত্ গেলাক্। তাম্বুলোর্ ঢাগেন্দি যেইনে চেলাক্ সিয়েনত্ এক্কো মানুচ্অ নেই। 6 লগেপ্রভু রথ, ঘোড়া আর দাঙর্ এক্কো সৈন্যর্ রঅ অরামীয়গুনোরে শুনেয়্যে। সেক্কে অরামীয় সৈন্যগুনে তারে তে কলাক্, “চঅ, আমারে আক্রমণ গুরিবাত্তে ইস্রায়েলর রাজা হিত্তীয় আর মিসরীয় রাজাগুনোরে টেঙা দিয়্যে।” 7 ইয়েন্ কোইনে তারা সাজোন্যের্ আগেন্দি তারার্ তাম্বুল, ঘোড়া, গাধা বেক্কানি থোই যেইনে ধেই গেলাক্। তাম্বুলানি যেধোক্কেন্ এলঅ সেধোক্কেন্ রাগেইনে তারা পরাণ দরে ধেই গেলাক্। 8 সে ফারাঙিবলা মানুচ্চুনে তাম্বুলোর্ কায়কুরে লুমিনে এক্কান্ তাম্বুলো ভিদিরে গেলাক্। তারা হান-দানা গুরিনে সোনা, রূবো আর কাবড়-চুগোড়্ লোই গেলাক্ আর সিয়েনি লুগেই রাগেলাক্। সে পরেন্দি তারা ফিরি এইনে আর এক্কান্ তাম্বুলোত্ সুমিনে কয়েক্কান্ জিনিস লুগেই রাগেলাক্। 9 যেরেন্দি তারা তারে তে কলাক্, “আমা কামান্ দোল্ ন-অর্। এচ্ছে এক্কো গম্ হ্বরর দিন আর আমি কাররে কিচ্ছু ন-কোইনে অলর্ গুরি আগিই। আমি যুনি বেন্যেমাদান্ সং দেরি গুরিই সালে সাজাগান আমা উগুরে লামি এবঅ। আদঅ, আমি ইক্কিনে যেইনে রাজঘরত্ হবরান জানেই।” 10 সেনত্তে তারা যেইনে শঅর-গেদো চুগিদারুনোরে ডাগিনে কলাক্, “আমি অরামীয়গুনোর তাম্বুলোত্ যেইয়্যেই। সিদু এক্কো মানুচ্অ নেই, কারঅ রঅয়ো নেই; বানা ঘোড়া আর গাধাগুন্ বান্যে আগন্ আর তাম্বুলানি যেবাবোত্যে এলঅ সেবাবোত্যে গুরি রাগেইনে তারা যেইয়োন্।” 11 গেদো চুগিদারুনে হবরান্ জানেই দিলাক্ আর সিয়েনি রাজঘরর্ ভিদিরেয়ো জানা অলঅ। 12 রাজা রেদোত্ উদিনে তার্ কামগুরিয়্যেগুনোরে কলঅ, “অরামীয়গুনে কি গোজ্যন্ সিয়েন্ মুই তমারে কোইয়োং। আমি যে নঅ-হেইনে আগিই সিয়েন্ তারা হবর্ পান্; সেনত্তে তারা তাম্বুলান্ ছাড়িনে মাদত্ যেইনে পোল্লেই রোইয়োন্। তারা মনে গোজ্যন্দ আমি হামাক্কাই নিগিলি এবং আর সেক্কে তারা আমারে জেদা বাদে ধুরিবাক্ আর শঅরত্ সোমেবাক্।” 13 তার্ এক্কো কামগুরিয়্যে কলঅ, “শঅরত্ যে কয়েক্কো ঘোড়া বাগি আগন্ সিয়োত্তুন্ পাচ্ছো ঘোড়া লোইনে কয়েকজন মানুচ্ নিগিলি যাদোক্। ইদুগোর্ বেক্ ইস্রায়েলীয়গুনো ধোক্কেন্ তারা দঅ হামাক্কাই মুরি যেবাক্, সেনত্তে কি ওইয়্যে সিয়েন্ জানিবাত্তে আমি তারারে পাধেই দিই।” 14 সেক্কে তারা ঘোড়া সহ দ্বিয়েন্ রথ বেই নিলাক্, আর রাজা অরামীয় সৈন্যগুনোরে তোগেবাত্তে তারারে পাধেই দিলো। রথ-চালেয়্যেগুনোরে তে এ উগুমান্ দিলো, “তুমি যেইনে হবর্ লঅ কি ওইয়্যে।” 15 তারা যর্দন গাঙ সং তারারে তোগেলাক আর দেগিলাক্ অরামীয়গুনে যাদিমাদিগুরিনে ধেই যেবার্ সময়োত্ বেক্ পথ্তানিত্ তারার্ কাবড়-চুগোড়ানি আর বেক্ পযাপিরানি ফেলেই যেইয়োন্। যিগুনোরে পাদা ওইয়্যে তারা ফিরি যেইনে রাজারে বেক্ হবরানি জানেলাক্। 16 সেক্কে মানুচ্চুনে নিগিলি যেইনে অরামীয়গুনোর্ তাম্বুলান্ লুদেলাক্। সেক্কে লগেপ্রভুর কধামজিম্ ছয় কেজি মোয়দে বার গ্রাম রূবোলোই আর বার কেজি কেজ্বিজি বার গ্রাম রূবোলোই বেজা অলঅ। 17 যে কাম্গুরিয়্যেবো রাজারে বল্ দিয়্যে তা উগুরে তে গেদোত্ দেগাশুনো গুরিবার্ ভারান্ দিলো, মাত্তর্ মানুচ্চুনে এন্গুরি নিগিলি গেলাক্, তে গেদো পথ্তানত্ মানুচ্চুনোর্ টেঙ তলে চাবা পড়িনে মুরি গেলঅ। গোজেন মানুচ্ ইলীশায় তা ঘরত্ রাজারে যে কধাগান কোইয়্যে সেধোক্কেন্ গুরিনে মুরি গেলঅ। 18 তে রাজারে যেধোক্কেন্ কোইয়্যে সেধোক্কেন্ ঘটনাগান্ ঘুদিলো। তে কোইয়্যেদে, “এজেত্তে কেল্যে এ সময়োত্ শমরিয়ার গেদোত্ ছয় কেজি মোয়দে বার গ্রাম রূবোলোই আর বার কেজি কেজ্বিজিলোই বার গ্রাম রূবো বেজা অবঅ।” 19 জোবত্ সে কাম্গুরিয়্যেবো গোজেন মানুচ্চোরে কোইয়্যেদে, “চাহ্, লগেপ্রভু যুনি আগাজ দোরান্অ খুলি দে তো কি ইয়েন্ ওই পারে?” গোজেন মানুচ্চো কোইয়্যেদে, “তুই নিজের্ চোগে সিয়েন্ দেগিবে, মাত্তর্ সিয়েনি কিচ্ছু তুই হেই ন-পারিবে।” 20 আর ঠিগ্ সিয়েনোই তা উগুরে ঘুদিলো, কিত্তে গেদো পথ্তানথ্ তে মানুচ্চুনো টেঙ তলে চাবা পড়িনে মুরি গেলঅ। |
Copyright © 2021 Bangladesh Bible Society
Bangladesh Bible Society