২ রাজাবলী 25 - Chakma Bible1 সিদিকিয়োর রাজাগিরির্ নয় বজর দশ মাজর্ দশ দিনোত্ বাবিলোর রাজা নবূখদ্নিৎসরে তার্ বেক্ সৈন্যদলুন্ লোইনে যিরূশালেমর বিরুদ্ধে যুদ্ধো আরাম্ভ গুরিলো। তে শঅর বারেন্দি তাম্বুল ফেলেল আর শঅর চেরোকিত্তে চুগি থেবার্ ঘর্ বানেল। 2 রাজা সিদিকিয়োর রাজাগিরির্ এগার বজর্ সং শঅরান্ ঘিরি রাগা অলঅ। 3 চের্ মাস নয় দিনোত্ শঅরত্ ভাদঅ রাত্ এদক্ বেশ্ অলঅ, মানুচ্চুনোর হেবাত্তে কিচ্ছু ন-এলঅ। 4 পরেন্দি শঅর দেবাল এক্কান্ জাগা ভাঙি গেলঅ। যুনিয়ো বাবিলীয়গুনে সেক্কেয়ো শঅরান্ ঘিজ্যন্ তো রেদোত্ যিহূদার বেক্ সৈন্যগুনে রাজার বাগান কায় দ্বিদেবাল গেদোন্দি ধেই গেলাক্ আর রাজা অরাবার ইন্দি ধেই গেলঅ। 5 তার্ বেক্ সৈন্যগুনে তাত্তুন্ ফারগ্ ওই যেইনে ছিদি পোজ্যন্ আর সে অক্তত্ বাবিলীয় সৈন্যদলুনে রাজার পিজেন্দি লোড়েইনে যিরীহোর সঙ্ জাগানত্ তারে ধুরি ফেলেলাক্। 6 তারা তারে বন্দী গুরিনে রিব্লাত্ বাবিলো রাজা ইদু নেযেলাক্। সিদু তা উগুরে সাজার উগুম্ দিয়্যে অলঅ। 7 সৈন্যগুনে সিদিকিয়ো চোগো মুজুঙোত্ তা পুয়োগুনোরে মারে ফেলেল। সে পরেন্দি তারা তা চোখ দ্বিবে তুলি ফেলেইনে তারে পিদোল শিগোল্লোই বানিনে বাবিলোত্ নেযেলাক্। 8 বাবিলোর রাজা নবূখদ্নিৎসরর রাজাগিরির্ ঊনেশ্ বজর পাচ্ মাস সাত দিনোত্ রাজার রোক্ষ্যেদলর্ সেনাপতি নবূষরদনে যিরূশালেমত্ গেলঅ। 9 তে লগেপ্রভুর ঘরত্, রাজঘরত্ আর যিরূশালেমর বেক্ ঘরানিত্ আগুন্ বাজেই দিলো। বেক্ আজল্ আজল্ ঘরানি তে পুড়ি ফেলেল। 10 রাজার রোক্ষ্যেদলর সেনাপতি অধীনোত্ বেক্ বাবিলীয় সৈন্যদলুনে যিরূশালেম দেবালানি ভাঙি ফেলেলাক্। 11 শঅর বাদবাগি মানুচ্চুনোরে আর যিগুনে বাবিলো রাজার পক্ষে যেইয়োন্ তারারে বেক্কুনোরে রোক্ষ্যেদলর সেনাপতি নবূষরদনে বানি নেযেল, 12 মাত্তর্ আংগুর ক্ষেত চেবাত্তে আর ভূইয়ো চাষ গুরিবাত্তে কিজু নাদা মান্জ্যরে তে দেজত্ থোই গেলঅ। 13 বাবিলীয়গুনে লগেপ্রভুর ঘর পিদোলর দ্বিবে খুদো, গাবালা বোজেবাত্তে পিদোল আসনানি আর পিদোল দাঙর্ পিলেবো ভাঙিনে কট্টা কট্টা গুরি বাবিলোত্ নেযেলাক্। 14 ইগুনবাদেয়ো তারা বেক্ পিলেগুন্, বেল্চা, চেরাগ বুদ্ধি কাজেবার্ চিম্টি, লুয়ো চামেচ্ আর তবনা-ঘরর্ সেবা-কামত্তে অন্য বেক্ পিদোল পযাপিরানি নেযেলাক্। 15 আগুন্ রাগেবার্ পিলেগুন, কদরা আর সোনা-রূবোর অন্য বেক্ পযাপিরানিয়ো রাজার রোক্ষ্যেদলর সেনাপতিবো নেযেল। 16 লগেপ্রভুর ঘরত্তে শলোমনে যে দ্বিবে খুদো, দাঙর্ পিলেবো আর আসনানি বানেয়্যে সে পিদোলানি মাবানা সম্ভব ন-এলঅ। 17 এক এক্কো খুদো এলাক্কে আদার আত্ অজল্ আর তা মাধাবো অলদে তিন আত্ অজল্। মাধাবোর চেরোকিত্তে পিদোল শিগোল্ আর পিদোল ডালিম সাজেয়্যে এলঅ। 18 যিহূদীগুনোর্ আজল্ ধর্মগুরু সরায়, দ্বিলম্বর ধর্মগুরু সফনিয় আর তিনজন চুগিদাররে রোক্ষ্যেদলর্ সেনাপতিবো বানিনে নেযেল। 19 যিগুনে সেক্কেয়ো শঅরত্ এলাক্ তারা ভিদিরেত্তুন্ তে যোদ্ধাগুনে উগুরে নেযেয়্যে এক্কো কাম্গুরিয়্যে আর রাজার পাচজন সল্লা দিয়্যেরে ধুরিলো। ইগুনবাদেয়ো সেনাপতিগুনোর লিগিয়্যেবো, যিবেই সৈন্যদলর্ মানুচ্ ভুত্তি গুরিদো তারে আর শঅর ভিদিরে পেইয়্যে আর ষায়েটজন মান্জ্যরেয়ো ধুরিলো। 20 সেনাপতি নবূষরদনে তারারে বেক্কুনোরে বানিনে রিব্লাতদ্ বাবিলো রাজার ইদু নেযেল। 21 রাজা হমাৎ দেজর রিব্লাতদ্ এই মানুচ্চুনোরে মারে ফেলেল। এধোক্ক্যেন গুরিনে যিহূদার মানুচ্চুনোরে বানিনে নিজোর দেজত্তুন্ দূরোত্ নেযা অলঅ। 22 বাবিলোর রাজা নবূখদ্নিৎসরে যিদুক্কুন্ মান্জ্যরে যিহূদা দেজত্ ফেলে যেইয়্যে তারা উগুরে তে শাফনর নাদিন, অত্তাৎ অহীকামর পুয়ো গদলিয়রে নেযেল। 23 বাবিলোর রাজা গদলিয়রে শাজন্গুরিয়্যে নেযেয়োন্ শুনিনে যিহূদার বাদবাগি সেনাপতিগুনে আর তারা মানুচ্চুনে, অত্তাৎ নথনিয়োর পুয়ো ইশ্মায়েল, কারেয়ের পুয়ো যোহানন, নটোফাতীয় তন্হূমতর পুয়ো সরায় আর মাখাথীয়োর পুয়ো যাসনিয় আর তারা মানুচ্চুনে মিস্পাত গদলিয়ো ইদু এলাক্। 24 গদলিয় তা মানুচ্চুনো ইদু শমক্ হেইনে কলঅ, “তুমি বাবিলীয় শাজন্গুরিয়্যেগুনোরে ন-দোরেবা। তুমি দেজত্ বজত্তি গুরিনে বাবিলো রাজার তলেন্দি তানাগান মানি নেযঅ, সেক্কে তমার্ ভালেদি অবঅ।” 25 মাত্তর্ সাত মাজত্ ইলীশামার নাদিন, অত্তাৎ নথনিয়োর পুয়ো ইশ্মায়েলে দশজন মান্জ্যরে লগে গুরি নেযেইনে গদলিয়রে আর যিহূদার যিদুক্কুন্ মানুচ্ আর বাবিলীয়গুন মিস্পাত তা সমারে এলাক্ তারারে বেক্কুনোরে মারে ফেলেল। এ ইশ্মায়েলে অলদে রাজবংশর মানুচ্। 26 সেক্কে বাবিলীয়গুনোর দরে যিহূদার চিগোন-দাঙর্ বেক্ মানুচ্চুনে আর সেনাপতিগুনে মিসরত্ ধেই গেলাক্। বন্দীদজাত্তুন্ যিহোয়াখীনোর উদ্ধোর্ 27 যিহূদার রাজা যিহোয়াখীনোর বন্দী অনার্ সাত্রিশ বজরত্ ইবিল-মরোদকে বাবিলো রাজা অলঅ। তে সে বজরত্ বার মাস সাদেশ্ দিনোত্ যিহোয়াখীনরে জেলোত্তুন্ ইরি দিলো। 28 তে যিহোয়াখীনোর লগে লগেডালে কধা কলঅ আর বাবিলোত্ তা সমারে আহ্ যিদুক্কুন্ রাজা এলাক্ তারাত্তুন্অ বেশ্ তারে আরঅ সর্মান আসনান্ দিলো। 29 যিহোয়াখীনে জেলখানা কাবড়-চুগোড়ানি খুলি ফেলেল আর জীংকানির বাদবাগি দিনুন্ সুদোম মজিম রাজার লগে হানা-দানা গুরি কাদেই দিলো। 30 তে যেদকদিন বাঁজি এলঅ সেদকদিন সং রাজা সুদোম মজিম তারে পত্তি দিন এক্কো ভেদ দিদো। |
Copyright © 2021 Bangladesh Bible Society
Bangladesh Bible Society