২ রাজাবলী 24 - Chakma Bible1 যিহোয়াকীমোর রাজাগিরির সময়োত্ বাবিলো রাজা নবূখদ্নিৎসর যিহূদা দেজ্ছান্ আক্রমণ গুরিলো। যিহোয়াকীমে তিন বজর সং তা অধীনোত্ এলঅ। মাত্তর্ পরেন্দি তে নবূখদ্নিৎসরর বিরুদ্ধে উল্লোমি গুরিলো। 2 লগেপ্রভু যিহোয়াকীমোর বিরুদ্ধে বাবিলোনীয়, অরামীয়, মোয়াবীয় আর অম্মোনীয় লুট্ গুরিয়্যে মানুচ্চুনোরে পাধেই দিলো। লগেপ্রভু তা চাগরুনোরে, অত্তাৎ ভাববাদীগুনোরে দিইনে যে কধাগান ফগদাঙ্ গোজ্যে সেই মজিম্ যিহূদা দেজ্ছানরে ভস্ত গুরিবাত্তে তে তারারে পাধেই দিলো। 3-4 লগেপ্রভুর উগুম মজিম যিহূদা উগুরে ইয়েনি ঘুদি যেইয়্যে যেনে তে নিজো মুজুঙোত্তুন্ তারারে ধাবেই দি পারে। ইয়েনি ঘুদি যেইয়্যে মনঃশির বেক্ পাপ্পানির কারনে আর নিদ্দুজি মানুচ্চুনোর লো ঝরানার্ কারণে। তে তারা লোগানিলোই যিরূশালেমান্ পূরোণ গোজ্যে, আর লগেপ্রভু সিয়েনি ক্ষেমা গুরিবাত্তে রাজী ন-অলঅ। 5 যিহোয়াকীমোর অন্য বেক্ কাম কধানি “যিহূদার রাজাগুনোর বিজগ” নাঙে বোইবোত্ লেগা আঘে। 6 পরেন্দি তে তা পূরোণি মানুচ্চুনো ইদু গেলগোই আর তা জাগানত্ তা পুয়োবো যিহোয়াখীনে রাজা অলঅ। 7 মিসরর রাজা যুদ্ধো গুরিবাত্তে তা রেজ্যগানত্তুন্ আর ন-নিগিলিলো, কিত্তেই বাবিলো রাজা মিসরর শুগুনো গাঙানত্তুন্ ইউফ্রেটিস গাঙান্ সং পুরো রেজ্যগান্ গজক্ গুরি নেযেল। যিহূদার রাজা যিহোয়াখীন 8 আদার বজর বয়জত্ যিহোয়াখীনে রাজা ওইয়্যে আর তিন মাস যিরূশালেমত্ রাজাগিরি গোজ্যে। তা মাবো নাঙান্ অলদে নহুষ্টা; তে অলদে যিরূশালেম শঅরর্ ইল্নাথনর ঝি। 9 যিহোয়াখীনে তা বাবঅ ধোক্ক্যেন লগেপ্রভুর চোগেন্দি যিয়েনি বজং সিয়েনি গুরিদো। 10 সে সময়োত্ বাবিলো রাজা নবূখদ্নিৎসরর সৈন্যগুনে যিরূশালেমত্ এইনে সিয়েন্ ঘিরিলাক্। 11 তা সৈন্যগুনে যেক্কে শঅরান্ ঘিরিলাক্ সেক্কে নবূখদ্নিৎসরে নিজেই শঅর ইদু গেলঅ। 12 যিহূদার রাজা যিহোয়াখীন, তা মাবো, তা বল্দিয়্যেগুনে, তা সেনাপতিগুনে আর তা কাম্গুরিয়্যেগুনে বেক্কুনে নবূখদ্নিৎসরর আঢত্ নিজোরে তুলি দিলাক্। নবূখদ্নিৎসরর রাজাগিরির আস্তো বজরত্ তে যিহোয়াখীনরে বন্দী গুরি নেযেল। 13 লগেপ্রভু যেধোক্ক্যেন কোইয়্যে সেধোক্ক্যেন গুরিনে নবূখদ্নিৎসরে লগেপ্রভুর ঘরানত্তুন্ আর রাজঘরত্তুন্ বেক্ ধন-সোম্বোত্তিগানি নেযেল আর ইস্রায়েলর রাজা শলোমন লগেপ্রভুর ঘরানত্তে সোনালোই যেদক্কানি পযাপিরা বানেয়্যে সিয়েনি তে কাবিনে কট্টা কট্টা গুরিলো। 14 ইয়েনিবাদে যিরূশালেমর বেক্কুনোরে, অত্তাৎ বেক্ কাম্গুরিয়্যেগুনোরে আর যুদ্ধোগুরিয়্যেগুনোরে, বেক্ কালিগর আর কামারুনোরে-বেক্কুনে মিলিনে দশ আজার মান্জ্যরে তে বন্দী গুরি নেযেল। দেজত্ নাদা মানুচ্চুন্ বাদে আর কনজন ন-রলাক্। 15 নবূখদ্নিৎসরে যিহোয়াখীনরে বন্দী ইজেবে বাবিলোত্ নেযেল। তে যিরূশালেমত্তুন্ রাজার মাবোরে, তা মোক্কুনোরে, তা কাম্গুরিয়্যেগুনোরে আর দেজর্ মুরুব্বী মানুচ্চুনোরেয়ো নেযেল। 16 তে যুদ্ধোত্তে যোগাজ্যে আর বোলী সাত আজার যোদ্ধার্ পুরো সৈন্যদলুন্ আর এক আজার কালিগর আর কামারুনোরে বন্দী গুরিনে বাবিলোত্ নেযেল। 17 তে যিহোয়াখীনোর জাগানত্ তা কুদ্তোবোয়ো মত্তনিয়রে রাজা বানেল আর তা নাঙান বদলে সিদিকিয় রাগেল। যিহূদার রাজা সিদিকিয় 18 এগোশ্ বজর বয়জত্ সিদিকিয় রাজা অলঅ। তে যিরূশালেমত্ এগার বজর রাজাগিরি গোজ্যে। তা মাবো নাঙান্ অলদে হমূটল; তে অলদে লিব্না শঅর যিরমিয়োর ঝি। 19 যিহোয়াকীমো ধোক্ক্যেন সিদিকিয় লগেপ্রভুর চোগেন্দি যিয়েনি বজং সিয়েনি গুরিদো। 20 যিরূশালেম আর যিহূদার মানুচ্চুনোর কারনে লগেপ্রভু রাগে জুলি উদিলো আর যেরেন্দি তে তা মুজুঙোত্তুন্ তারারে দূর্ গুরি দিলো। পরেন্দি সিদিকিয় বাবিলোর রাজার বিরুদ্ধে উল্লোমী গুরিলো। |
Copyright © 2021 Bangladesh Bible Society
Bangladesh Bible Society