২ রাজাবলী 23 - Chakma Bibleসুদোম্ পালানার এগেম্ 1 পরেন্দি রাজা যোশিয় মানুচ্ পাদেইনে যিহূদা আর যিরূশালেমর বেক্ বুড়ো নেতাগুনোরে ডাগিনে এগত্তর্ গুরিলো। 2 তে যিহূদা আর যিরূশালেমর মানুচ্চুনোরে, ধর্মগুরুগুনোরে, ভাববাদীগুনোরে আর জনগণ আর গণ্যমান্য বেক্ মানুচ্চুনোরে লোইনে লগেপ্রভুর ঘরত্ গেলঅ। লগেপ্রভুর ঘরত্ সুদোমর্ যে বোইবো পাহ্ গেলঅ সিবের্ বেক্ কধানি তে তারা ইদু পড়ে শুনেল। 3 রাজা মঞ্চ উগুরে থিয়্যেইনে লগেপ্রভুর পধেন্দি আদিবাত্তে আর বেক্ মনান-পরাণান্ দিইনে তার্ বেক্ উগুমানি, সুদোমানি আর নিদ্দেশ্ছানি মানিবাত্তে, অত্তাৎ এ বোইবো ভিদিরে লেখ্যে সুদোমর্ বেক্ কধানি পালেবাত্তে লগেপ্রভুর মুজুঙোত্ শমক্ গুরিলো। সেক্কে বেক্ মানুচ্চুনে রাজার লগে এক্কুই শমক্ গুরিলাক্। 4 রাজা সেক্কে বাল দেবেদা আর আশেরা আহ্ আগাজ বেক্ তারাগুনোরে পূজিবাত্তে বানেয়্যে বেক্ পযাপিরানি লগেপ্রভুর ঘরত্তুন্ নিগিলেবাত্তে দাঙর্ ধর্মগুরু হিল্কিয়রে, দ্বিলম্বরর ধর্মগুরুগুনোরে আর চুগিদারুনোরে উগুম দিলো। তে সিগুনোরে যিরূশালেমর বারেন্দি কিদ্রোণ কিজিঙোর্ মাদত্ পুড়ি ফেলেল আর ছেইয়ানি বৈথেলত্ নেযেল। 5 যিহূদার শঅরানি আর যিরূশালেমর চেরোকিত্তে পূজো অজল্ জাগায়ানিত্ আগর্বাট্টি জ্বালেবাত্তে যিহূদার রাজাগুনে যিদুক্কুন্ মূত্তি পূজিয়ে ধর্মগুরুরে নেযেয়োন, অত্তাৎ যিগুনে বাল দেবেদা, চান, বেল্, গ্রহ আর আগাজ অন্য বেক্ তারাগুনো নাঙে আগর্বাট্টি জ্বালেদাক্ তারারে তে ধাবেই দিলো। 6 তে লগেপ্রভুর ঘরত্তুন্ আশেরা-খুদোবো নেযেইনে যিরূশালেম বারেন্দি কিদ্রোণ কলগত্ সিবে পুড়ি দিলো। সে পরেন্দি সিবে গুড়ি গুরিনে সিবের্ ধূল্যেগান্ নাদা মানুচ্চুনোর গোরান উগুরে ছিদি দিলো। 7 মরদ মন্দির-বেশ্যেগুনোর যে গুদিগুন্ লগেপ্রভুর ঘরত্ এলাক্ তে সিগুন্ ভাঙি দিলো। সিদু মিলেগুনে আশেরাত্তে কাবড় বুনিদাক্। 8 যোশিয় যিহূদার শঅর্ আর আদামানিত্তুন্ বেক্ ধর্মগুরুগুনোরে আনিলো আর গেবাত্তুন্ বের্-শেবা সং যেদক্কানি পূজো অজল জাগাত্ সে ধর্মগুরুগুনে আগর্বাট্টি জ্বালেদাক্ সিয়েনি অসিজি গুরি দিলো। তে শাজন্গুরিয়্যে যিহোশূয়ো গেট্টোত্ সুমিবার্ পদথ্ যেদক্কানি পূজো অজল্ জাগা এলঅ সিয়েনি ভাঙি ফেলেল। এ গেট্টো অলদে শঅরর্ আজল্ গেট্টো বাঙেন্দি। 9 পূজোর্ অজল্ জাগায়ানি ধর্মগুরুগুনে যিরূশালেমত্ লগেপ্রভুর পূজো সেবা-কামানি গুরি ন-পারিদাক্, মাত্তর্ তারা অন্য ধর্মগুরুগুনো লগে সদানেইয়্যে রুটি হেই পারিদাক্। 10 অন্য কনজনে যেনে মোলক দেবেদা নাঙে নিজোর পুয়ো বা ঝিগুনোরে আগুনোত্ পুড়িনে উৎসর্ব গুরি ন-পারে সেনত্তে যোশিয় বেন্-হিন্নোম কলগর্ তোফৎ নাঙে পূজো জাগায়ান্ অসিজি গুরি দিলো। 11 যিহূদার রাজাগুনে যেদক্কানি রথ আর ঘোড়ারে বেলান্ পূজোনা নাঙে দুয়োন্ যোশিয় সে ঘোড়াগুন্ নিগিলে দিইনে রথ্তানি পুড়ি ফেলেল। লগেপ্রভুর ঘরত্ সুমিবার্ পথ্তান কায়, উদোন সংমোধ্যে, নথন-মেলক নাঙে এক্কো কামগুরিয়্যের গুদিবো কায় ঘোড়াগুনোরে রাগা অদঅ। 12 রাজঘর ছাল উগুরে রাজা আহস উগুরে গুদিবো ইদু যিহূদার রাজাগুনে যিদুক্কুন্ ডালিপূজো বানেয়োন আর লগেপ্রভুর ঘরর্ দ্বিয়েন্ উদোনত্ মনঃশি যিদুক্কুন্ ডালিপূজো বানেয়্যে যোশিয় সিগুনোরে ভাঙিনে কট্টা কট্টা গুরিনে কিদ্রোণ কলগত্ ফেলেই দিলো। 13 যিরূশালেম পূগেন্দি ভস্তর্ মুড়োবোর্ দোগিণেন্দি যিদুক্কুন্ পূজোর অজল্ জাগা এলঅ সিয়েনি তে অসিজি গুরিলো। ইস্রায়েল রাজা শলোমন সীদোনীয়গুনোর জঘন্য দেবী অষ্টোরতত্তেই, মোয়াবর জঘন্য দেবেদা কমোশত্তেই আর অম্মোনর মানুচ্চুনোর জঘন্য দেবেদা মোলকত্তেই এ অজল্ জাগায়ানি বানেয়্যে। 14 যোশিয় পূজোর্ পাত্তরুন্ ভাঙি ফেলেল আর আশেরা-খুদোগুন্অ কাবি ফেলেল আর সে জাগায়ানি মান্জ্য আড়গোড়ালোই ঢাগি দিলো। 15 নবাটর পুয়ো যারবিয়াম যিবে ইস্রায়েলরে দিইনে পাপ গোরেয়্যে তে বৈথেলত্ যে ডালিপূজো আর পূজো অজল্ জাগানি বানেয়্যে সিয়েনি যোশিয় ভস্ত গুরি দিয়্যে। যোশিয় সে পূজো অজল্ জাগানি পুড়ি দিইনে গুড়ি গুরি ফেলেল আর আশেরা-খুদোবোয়ো পুড়ি দিলো। 16 সে পরেন্দি তে চেরোকিত্তে চেলঅ আর মুড়োবো ইদু যেদুক্কুন গোর্ এলাক সিয়োত্তুন্ আড়গোড়া আনিনে সিগুন্ ডালিপূজোবো উগুরে পুড়িনে সিগুনোরে অসিজি গুরিলো। গোজেন মানুচ্চো যেদক্কানি ঘটনার কধা আগেন্দি ফগদাঙ্ গোজ্যে লগেপ্রভুর সে কধা মজিম এদক্কানি ওইয়্যে। 17 রাজা কলঅ, “মুই যে খুদোবো দেগঙর্ সিবে কি?” শঅর মানুচ্চুনে কলাক্, “সিবে গোজেন মানুচ্চুনোর গোর চিহ্নো। তে যিহূদাত্তুন্ এইনে বৈথেলর ডালিপূজোবো বিরুদ্ধে যিয়েনি ফগদাঙ্ গোজ্যে তুই ঠিগ্ সিয়েনি গোজ্যস্।” 18 তে কলঅ, “উবোন্ থোক্; কনজনে যেনে তা আড়ুন বর্বাদ্ ন-গরন্।” সেনত্তে মানুচ্চুনে তা আড়্ গোড়াগুন্ আর যে ভাববাদীবো শমরিয়াত্তুন্ এচ্ছ্যন্ তা আড়্ গোড়াগুন্ যেধোক্ক্যেন এলাক্ সেধোক্ক্যেন থেবাত্তে দিলাক্। 19 শমরিয়ার শঅর্ আর আদাম পূজো অজল্ জাগানিত্ ইস্রায়েলর রাজাগুনে যেদক্কানি মন্দির বানেইনে লগেপ্রভুরে অহুজি বানেয়োন্ যোশিয় সিয়েনি ভস্ত গুরি দিলো আর সিগুনো কান্দয়ান বৈথেলর অজল্ জাগানি ধোক্ক্যেন গুরিলো। 20 যোশিয় সে ডালিপূজোগুনো উগুরে সিদুগো ধর্মগুরুগুনোরে ডালি দিলো আর সিগুনো উগুরে মান্জ্য আড়ুন পুড়িলো। সে পরেন্দি তে যিরূশালেমত্ ফিরি গেলঅ। 21 ইয়েন পরেন্দি রাজা বেক্ মানুচ্চুনোরে এ উগুমান দিলো, “সুদোমর বোইবোত্ যেধোক্ক্যেন লেগা আঘে সেদোক্কেন গুরি তুমি তমার গোজেন লগেপ্রভুর নাঙে উদ্ধোর-পরব্ পালন্ গরঅ।” 22 ইস্রায়েলীয় শাজন্গুরিয়্যেগুনোর আমলত্ বা ইস্রায়েল আর যিহূদা রাজাগুনোর আমলত্ এধোক্ক্যেন উদ্ধোর-পরব্ পালন গরা ন-অয়। 23 মাত্তর্ রাজা যোশিয়োর্ রাজাগিরির আদার বজরত্ যিরূশালেমত্ লগেপ্রভুর নাঙে এ উদ্ধোর-পরব্ পালন গরা অলঅ। 24 ইয়েনি বাদেয়ো যিগুনে ভুত্তোই কাম্ গরন্ আর যিগুনে বজং আত্মালোই মিজেন্ যোশিয় তারারে ধাবেই দিলো। তে পরিবার দেবেদামূত্তি, মূত্তি আর যিহূদা আর যিরূশালেমত্ যেদক্কানি জঘন্য জিনিস্ দেগিলাক্ সিয়েনি বেক্কানি ধাবেই দিলো। ধর্মগুরু হিল্কিয় লগেপ্রভুর ঘরত্ রীদি-সুুদোম লেগা যে বোইবো তোগেইনে পেইয়োন্ সিবের্ বেক্ কধানি যেনে গমেডালে পালা অয় সেনত্তে যোশিয় এ কামান্ গোজ্যে। 25 তে তার্ বেক্ মনান, পরাণান আর বলান্দোই মোশির বেক্ রীদি-সুদোম মজিম লগেপ্রভুর পধেন্দি আদিদো। তা আগেন্দি বা পরেন্দি আর কনঅ রাজা তা ধোক্ক্যেন ন-এলাক্। 26 তো মনঃশি যে কামানি গুরিনে লগেপ্রভুরে অহুজি গোজ্যে সেনত্তে যিহূদার বিরুদ্ধে যে দর্গরেপারা রাগে লগেপ্রভু জুলি উঠ্যে সিয়েনত্তুন্ তে নঅ-ফিরিলো। 27 সেনত্তে লগেপ্রভু কলঅ, “মঅ মুজুঙেত্তুন্ যেধোক্ক্যেন গুরি মুই ইস্রায়েলরে দূর্ গোজ্যং সেধোক্ক্যেন গুরি যিহূদারেয়ো দূর্ গুরিম্, আর যে শঅরানরে মুই বেঈ লোইয়োং সে যিরূশালেমানরে আর যিবে পৌইদ্যেনে মুই কোইয়োং, ‘ইয়েন্ মর্ থেবার্ জাগা অবঅ’ সে তবনা- ঘরানরে মুই অগ্রাজ্য গুরিম।” 28 যোশিয়োর অন্য বেক্ কাম কধানি “যিহূদার রাজাগুনোর বিজগ” নাঙে বোইবোত্ লেগা আঘে। 29 যোশিয়োর রাজাগিরির সময়োত্ মিসরর রাজা ফরৌণ-নখো আসিরিয়ার রাজারে বল্ দিবাত্তে ইউফ্রেটিস গাঙ ইন্দি গেলঅ। সেক্কে রাজা যোশিয় তা লগে যুদ্ধো গুরিবাত্তে নিগিলিলো, মাত্তর্ ফরৌণ-নখো তা লগে যুদ্ধো গুরিনে তারে মগিদ্দোত মারে ফেলেল। 30 যোশিয়োর সৈন্যগুনে তা কিয়্যেগান্ রথ্তোই মগিদ্দোত্তুন্ যিরূশালেমত্ আনিনে তা নিজোত্তে ঠিগ্ গোজ্যে গোরানত্ তারে গারেলাক্। পরেন্দি দেজ মানুচ্চুনে তা পুয়ো যিহোয়াহসরে অভিষেগ্ গুরিনে তা বাব জাগানত্ তারে রাজা বানেলাক্। যিহূদার রাজা যিহোয়াহস 31 তেইশ বজর্ বয়জত্ যিহোয়াহসে রাজা অলঅ। তে তিনমাস যিরূশালেমত্ রাজাগিরি গুরিলো। তা মাবো নাঙান্ অলদে হমূটল; তে অলদে লিব্না শঅর যিরমিয়োর ঝি। 32 যিহোয়াহসে তা পূরোণি মানুচ্চুনো ধোক্ক্যেন লগেপ্রভুর চোগেন্দি যিয়েনি বজং সিয়েনি গুরিদো। ফরৌণ-নখো তারে হমাৎ দেজর রিব্লাতদ্ আক্সোই রাগেল যেনে তে যিরূশালেমত্ রাজাগিরি গুরি ন-পারে। 33 ফরৌণ-নখো পেরায় চের্ টন রূবো আর ঊনচোল্লিশ কেজি সোনা কর্ ইজেবে যিহূদা দেজ উগুরে চাপি দিলো। 34 তে যোশিয়োর আর এক্কো পুয়ো ইলিয়াকীমরে তা বাপ্পো যোশিয়োর জাগানত্ রাজা বানেল আর ইলিয়াকীমোর নাঙান্ বুদুলিনে যিহোয়াকীম রাগেল। ফরৌণ-নখো যিহোয়াহসরে মিসরত্ নেযেল, আর সিদু যিহোয়াহসে মুরি গেলঅ। 35 ফরৌণ-নখোর দাবি মজিম যিহোয়াকীমে তারে সেই সোনা-রূবোণি দিলো। সিয়েনি দিবাত্তে তে দেজ মানুচ্চুনো উগুরে কর্ চাপি দিলো আর দেজ পত্তিজন খাজানা ঠিগ্ গুরি দিইনে সেই সোনা-রূবোনি তে দেজ মানুচ্চুনোত্তুন্ আদায় গুরিলো। যিহূদার রাজা যিহোয়াকীম 36 পোজোশ্ বজর বয়জত্ যিহোয়াকীমে রাজা অলঅ। তে এগার বজর যিরূশালেমত্ রাজাগিরি গুরিলো। তা মাবো নাঙান্ অলদে সবীদা; তে অলদে রূমা আদাম পদায়ের ঝি। 37 যিহোয়াকীমে তা পূরোণি মানুচ্চুনো ধোক্ক্যেন লগেপ্রভুর চোগেন্দি যিয়েনি বজং সিয়েনি গুরিদো। |
Copyright © 2021 Bangladesh Bible Society
Bangladesh Bible Society