২ রাজাবলী 22 - Chakma Bibleরীদি-সুদোম বোইবো পাহ্ গেলঅ 1 যোশিয় আস্তো বজর্ বয়জত্ রাজা ওইয়্যে আর এগত্রিশ বজর্ যিরূশালেমত্ রাজাগিরি গোজ্যে। তা মাবো নাঙান্ অলদে যিদীদা; তে অলদে বস্কৎ আদামর আদায়ার ঝি। 2 লগেপ্রভুর চোগেন্দি যিয়েনি গম্ যোশিয় সিয়েনি গুরিদো আর তা পূরোনি মানুচ্ দায়ূদো ধোক্ক্যেন চলিদো সে পধত্তুন্ ডেনে- বাঙে ন-যেদঅ। 3 রাজা যোশিয়োর্ রাজাগিরির্ আদার বজরত্ তে মশুল্লমর নাদিন্, অত্তাৎ অৎসলিয়র পুয়ো রাজার্ লিগিয়্যে শাফনরে এ কধাগান কোইনে লগেপ্রভুর ঘরত্ পাদেল, 4 “তুই দাঙর্ ধর্মগুরু হিল্কিয় ইদু যাহ্ আর তারে কঅ যেনে তে লগেপ্রভুর ঘরত্ আন্যে বেক্ টেঙা-পৌইজ্যেগুন যিগুন্ চুগিদারুনে মানুচ্চুনোত্তুন্ তুল্যন্ সে ইজেপ্পানি ঠিগ্ গুরি রাগায়। 5-6 তবনা-ঘর কামানি চেবাত্তে যে মানুচ্চুনোরে নেযা ওইয়্যে সে টেঙাগুন্ যেনে তে তারা আঢত্ দে। লগেপ্রভু ঘরান্ যিগুনে সোর্ গোজ্যন্ চেই দিয়্যেগুনে যেনে সে টেঙাগুন্দোই গাজঅ মিস্ত্রিগুনোরে, ঘর বানেয়্যে মিস্ত্রিগুনোরে আর রাজমিস্ত্রিগুনোরে বেতন দুয়োন্। ইয়েনিবাদেয়ো তবনা-ঘরান্ সোর্ গুরিবাত্তে যেনে তারা তক্তা আর দোল্ গুরিনে কাপ্যে পাত্তর্ কিনোন্। 7 তারা আঢত্ যে টেঙাগুন্ দিয়্যে অবঅ সিগুনোর্ ইজেব তারারে দিয়্যে ন-পুরিবো, কিত্তে তারা বিশ্বেজ্ গুরি কাম্ গরন্।” 8 সেক্কে রাজার লিগিয়্যে শাফনরে দাঙর্ ধর্মগুরু হিল্কিয় কলঅ, “লগেপ্রভুর ঘরত্ মুই রীদি-সুুদোম বইবো পেইয়োং।” হিল্কিয় সে বোইবো শাফনরে দেনার্ পরেন্দি তে সিবে পড়িলো। 9 সে পরেন্দি শাফনে সে বোইবো রাজা ইদু নেযেইনে কলঅ, “লগেপ্রভুর ঘরত্ যে টেঙাগুন্ এলাক্ সিগুন্ তঅ চাগরুনে নিগিলিনে লগেপ্রভুর ঘর চেই দিয়্যেগুনো আঢত্ দুয়োন্।” 10 সেক্কে লিগিয়্যে শাফনে এ কধাগান্ রাজারে জানেল, “ধর্মগুরু হিল্কিয় মরে এক্কো বোই দিয়্যে।” ইয়েন্ কোইনে শাফনে সিবে রাজারে পড়ে শুনেল। 11 রীদি-সুদোম বোইবোত্ যিয়েনি লেগা এলঅ সিয়েনি শুনিনে রাজা উজ্যে কাবড়-চুগোরানি ফাদিলো। 12 তে ধর্মগুরু হিল্কিয়, শাফনর পুয়ো অহীকাম, মীখায়ের পুয়ো অক্বোর, শাফন আর রাজার বল্ দিয়্যে অসায়রে এ উগুমান্ দিলো, 13 “ইবে যে বোইবো পাহ্ যেইয়্যে সিবে ভিদিরে যেদক্কানি কধা লেগা আঘে সে কধানি পৌইদ্যেনে তুমি যেইনে মত্তে আর এ জাগানর্ আহ্ বেক্ যিহূদার মানুচ্চুনোত্তে লগেপ্রভু ইদু পুযোর্ গরঅ। লগেপ্রভু আমা বিরুদ্ধে রাগ আগুনে জুলি উঠ্যে, কিত্তে আমা পূরোণি মানুচ্চুনে এ বোইবো কধামজিম্ ন-চলন্ আর পালেবাত্তে যেদক্কানি কধা সিয়োত্ লেগা আঘে সে ইজেবে তারা কাম্ ন-গরন্।” 14 এ কধাগান্ শুনিনে ধর্মগুরু হিল্কিয়, অহীকাম, অক্বোর, শাফন আর অসায় মিলে-ভাববাদী হুল্দা ইদু যেইনে তা লগে কধাবার্তা কলাক্। হুল্দা অলদে কাবড়-চুগোর্ রোক্ষ্যেগুরিয়্যে শল্লুমো মোগ্। শল্লূম অলদে হর্হসের নাদিন, অত্তাৎ তিক্বর পুয়ো। হুল্দা যিরূশালেমর দ্বিলম্বর্ ভাগত্ বজত্তি গুরিদো। 15-16 হুল্দা তারারে কলঅ, “ইস্রায়েলর গোজেন লগেপ্রভু মরে কবাত্তে কোইয়্যেদে, যিবেই তমারে মইদু পাদেয়্যে তারে যেইনে কগোই লগেপ্রভু কোইয়্যেদে, যিহূদার রাজা এ বোইবোর লেগা যিয়েনি পোজ্যে মুই সেই মজিম পত্তি দযা এ জাগায়ান উগুরে আর তা মানুচ্চুনো উগুরে আনিম্। 17 তারা মরে বাদ দিইনে দেব-দেবেদাগুনো নাঙে আগর্বাট্টি জ্বালেয়োন্ আর তারা আঢে বানেয়্যে বেক্ মূত্তিগুন্দোই মরে মনত্ দুগ্ লাগেয়োন; সেনত্তে এ জাগান বিরুদ্ধে মর্ রাগ আগুনান্ জুলি উদিবো আর সিয়েন্ মারা ন-যেবঅ। 18-19 লগেপ্রভু ইদু পুযোর্ গুরিবাত্তে যিবে তমারে পাদেয়্যে সে যিহূদার রাজারে কবাদে, ইস্রায়েলর গোজেন লগেপ্রভু কোইয়্যেদে, ‘মুই এ জাগায়ান্ আর তা মানুচ্চুনো বিরুদ্ধে যে অভিশাব আর ভস্ত কধানি কোইয়োং সিয়েনি শুনিনে তঅ মনানে সেক্কে শমক্ দিয়্যে আর তুই লগেপ্রভুর মুজুঙোত্ নিজোরে চিগোন্ গোজ্যস্, তঅ কাবড়-চুগোরানি ফাদি ফেল্যস্ আর মঅ মুজুঙোত্ কান্যস্। তুই এ বেক্কানি গোজ্যস্ বিলিনে মুই লগেপ্রভু তঅ তবনাগান্ শুন্যং। 20 সেনত্তে মুই যাদিমাদি তরে তঅ পূরোণি মানুচ্চুনো ইদু নেযেম্ আর তুই সুগে শান্দিয়্যে গোর্ পেবে। এ জাগায়ান উগুরে মুই যেদক্কানি দযা আনিম্ তঅ চোখ্কুনে সিয়েন্ ন-দেগিবাক্।’ ” সেক্কে তারা হুল্দার জোব্পান লোইনে রাজা ইদু ফিরি গেলাক্। |
Copyright © 2021 Bangladesh Bible Society
Bangladesh Bible Society