২ রাজাবলী 21 - Chakma Bibleযিহূদার রাজা মনঃশি 1 মনঃশি বার বজর বয়জত্ রাজা ওইয়্যে আর পাচ্পান্ন বজর যিরূশালেমত্ রাজাগিরি গোজ্যে। তা মাবো নাঙান্ অলদে হিফ্সীবা। 2 লগেপ্রভু ইস্রায়েলীয়গুনো মুজুঙেত্তুন্ যিদুক্কুন্ জাদরে ধাবেই দিয়্যে তারা ধোক্ক্যেন জঘন্য কাম্ গুরিনে মনঃশি লগেপ্রভুর চোগেন্দি যিয়েনি বজং সিয়েনি গুরিদো। 3 তা বাপ্পো হিষ্কিয় পূজোর্ যেদক্কানি অজল্ জাগা চোইদেল গোজ্যে সিয়েনি তে আরঅ বানেল। ইস্রায়েল রাজা আহাবে যেধোক্ক্যেন গোজ্যে সেধোক্ক্যেন তেয়ো বাল দেবেদা নাঙে কয়েক্কো ডালিপূজো আর এক্কো আশেরা-খুদো বানেল। তে আগাজর বেক্ তারাগুনোরে পূজো আর সেবা গুরিদো। 4 লগেপ্রভু যে ঘরান পৌইদ্যেনে কোইয়্যে, “মুই যিরূশালেমত্ বজত্তি গুরিম,” লগেপ্রভুর সে ঘরান ভিদিরে তে কয়েক্কো ডালিপূজো বানেল। 5 লগেপ্রভু ঘরর্ দ্বিয়েন উদোনত্ তে আগাজ বেক্ তারাগুনো নাঙে কয়েক্কো পূজো বানেল। 6 তে নিজো পুয়োবোরে আগুনোত্ পুড়িনে উৎসর্ব গুরিলো। তে যাদু বেবহার গুরিদো আর বাঁজি চেইনে আগাম্ কধা কদঅ আর যিগুনে ভূত্তোই কাম্ গরন্ আর বজং আত্মা সমারে মিজেন্ তে তারা লগে তেম্মাং গুরিদো। তে লগেপ্রভুর চোগেন্দি বোউত্ বজং কাম্ গুরিনে তারে অহুজি গোজ্যে। 7 তে যে আশেরা-খুদোবো চাজিনে বানেয়্যে সিবে নেযেইনে তবনা-ঘরত্ রাগেল। এ তবনা-ঘরান পৌইদ্যেনে লগেপ্রভু দায়ূদ আর তা পুয়ো শলোমনরে কোইয়্যে, “এ ঘরান্ আর ইস্রায়েলর বেক্ গুট্টিগুনো ভিদিরেত্তুন্ মর্ বেঈ নেযেয়্যে এ যিরূশালেমানরে মুই উমরত্তে মর্ বজত্তি জাগা বানেম্। 8 ইস্রায়েলীয়গুনে যুনি বানা মর্ বেক্ উগুমানি গমেডালে পালান্ আর মর্ চাগর্ মোশি তারারে যে রীদি-সুদোমানি দিয়্যে সেধোক্ক্যেন গুরিনে চলন্ সালে মুই তারা পূরোণি মানুচ্চুনোরে যে দেজ্ছান দুয়োং সে দেজ্ছান তারাত্তুন্ আর ছাড়া ন-পুরিবো।” 9 মাত্তর্ মানুচ্চুনে সে কধাগান ন-শুনিলাক্। মনঃশি তারারে বজং পধেন্দি নেযেল; সেনত্তে যিদুক্কুন্ জাদরে লগেপ্রভু ইস্রায়েলীয়গুনো মুজুঙোত্তুন্ ভস্ত গুরি দিলো তারাত্তুন্অ বেশ্ তারা আরঅ বজং কাম্ গরা ধুরিলাক্। 10 সেক্কে লগেপ্রভু তা চাগরুনোরে, অত্তাৎ ভাববাদীগুনোরে দিইনে এ কধাগান কলঅ, 11 “যিহূদার রাজা মনঃশি এ জঘন্য পাপ্পানি গোজ্যে। তা আগেন্দি যে ইমোরীয়োগুনে এলাক্ তারাত্তুন্অ বেশ্ তে আরঅ বজং কাম্ গোজ্যে আর নিজো মূত্তিগুন্দোই যিহূদারে পাপত্ ফেলেয়্যে। 12 সেনত্তে মুই ইস্রায়েলর গোজেন লগেপ্রভু কঙর্, মুই যাদিমাদি যিরূশালেম আর যিহূদা উগুরে এন্ দযা আনি দিম, সে কধাগান যিগুনে শুনিবাক্ তারা বেক্কুনোর জারকাদা সারি উদিবো। 13 শমরিয়ার বিরুদ্ধে যে মাব দুড়িগান্ আর আহাব বংশগুনো বিরুদ্ধে যে ওলন দুড়িগান্ বেবহার গরা ওইয়্যে সিয়েন্ মুই যিরূশালেম বিরুদ্ধে বেবহার গুরিম। যেধোক্ক্যেন গুরিনে একজনে থাল্লো পুজিবাত্তে এপিট ওপিট গরে সেধোক্ক্যেন গুরিনে মুই যিরূশালেমরে বাদ দিম্। 14 মঅ মানুচ্চুনোর্ বাদবাগি কয়েক্কোরে মুই ইরি দিম্ আর শত্রুগুনো আঢত্ তারারে তুলি দিম্। তারার্ বেক্ শত্রুগুনে তারারে লুদেবাক্ আর বেক্কানি জোর্ গুরি নেযেবাক্, 15 কিত্তে মঅ চোগেন্দি যিয়েনি বজং তারা সিয়েনি গোজ্যন্ আর যেদিন্যে তারা পূরোণি মানুচ্চুনে মিসর দেজত্তুন্ নিগিলি এচ্ছ্যন্ সেদিন্যেত্তুন্ ধুরি এচ্ছ্যে সং তারা মরে অহুজি বানেয়োন্।” 16 ইয়েনবাদে মনঃশি এত নিদ্দুযি মান্জ্যর লো ঝোরেয়্যে, সে লো-গানিলোই যিরূশালেমর এক দুযিত্তুন্ অন্য দুযি সং তজিমপুরো ওই যেইয়্যে। তে যিহূদার মানুচ্চুনোরে দিইনে পাপ গোরেয়্যে যিয়েনত্তে তারা লগেপ্রভুর চোগেন্দি যিয়েনি বজং সিয়েনি গোজ্যন্। 17 মনঃশির অন্য বেক্ কাম কধানি আর তা পাপর্ কধানি “যিহূদার রাজাগুনোর বিজগ” নাঙে বোইবোত্ লেগা আঘে। 18 পরেন্দি মনঃশি তা পূরোণি মানুচ্চুনো ইদু গেলগোই আর তারে রাজঘর বাগানত্, অত্তাৎ উষের বাগানত্ গোর্ দিয়্যে অলঅ। তা জাগানত্ তা পুয়োবো আমোনে রাজা অলঅ। যিহূদার রাজা আমোন 19 আমোনে বেইশ্ বজর্ বয়জত্ রাজা ওইয়্যে আর দ্বিবজর যিরূশালেমত্ রাজাগিরি গোজ্যে। তা মাবো নাঙান্ অলদে মশুল্লেমৎ; তে অলদে যট্বা আদাম হারুষের ঝি। 20 আমোনে তা বাপ্পো মনঃশি ধোক্ক্যেন লগেপ্রভুর চোগেন্দি যিয়েনি বজং সিয়েনি গুরিদো। 21 তা বাপ্পো যে কামানি গোজ্যে তেয়ো সে বাবোত্যে গুরিদো; তা বাপ্পো যিদুক্কুন্ মূত্তি সেবা গুরিদো তেয়ো সিগুনোরে সেবা আর পূজো গুরিদো। 22 তে তা পূরোণি মানুচ্চুনো গোজেন্ লগেপ্রভুরে বাদ দিয়্যে আর তা পধেন্দি ন-চলিদো। 23 আমোনর কামগুরিয়্যেগুনে তা বিরুদ্ধে কুজুরোমি গুরিনে তা রাজঘরত্ তারে খুন্ গুরিলাক্। 24 মাত্তর্ যিগুনে রাজা আমোন বিরুদ্ধে কুজুরোমি গোজ্যন্ দেজ মানুচ্চুনে তারারে বেক্কুনোরে মারে ফেলেয়োন্ আর তারা তা পুয়ো যোশিয়রে তা জাগানত্ রাজা বানেলাক্। 25 আমোনর অন্য বেক্ কাম কধানি “যিহূদার রাজাগুনোর বিজগ” নাঙে বোইবোত্ লেগা আঘে। 26 উষের বাগানত্ তাত্তে ঠিগ্ গোজ্যে গাত্তোত্ তারে গোর্ দিয়্যে অলঅ। তা জাগানত্ তা পুয়োবো যোশিয় রাজা অলঅ। |
Copyright © 2021 Bangladesh Bible Society
Bangladesh Bible Society