২ রাজাবলী 20 - Chakma Bibleহিষ্কিয়োর অসুখ্ অনা 1 সে অক্তত্ হিষ্কিয় অসুখ্ ওই পেরায় মরা ধোক্ক্যেন ওইয়্যে। সেক্কে আমোস পুয়ো ভাববাদী যিশাইয় তাইদু যেইনে কলঅ, “লগেপ্রভু কোইয়্যেদে, তুই যেনে তঅ ঘরর্ বেবস্থাগান্ গুরিনে রাগাচ্, কিত্তে তুই মুরি যেবে, গম্ নঅ-অবে।” 2 এ কধাগান শুনিনে হিষ্কিয় দেবাল ইন্দি মুয়োন্ ফিরেইনে লগেপ্রভু ইদু তবনা গুরিনে কলঅ, 3 “ও লগেপ্রভু, তুই ইদোত্ তুলি চাহ্ মুই তঅ মুজুঙোত্ কেধোক্ক্যেন বিশ্বেজ্ গুরিনে আর পুরো মন ভোক্তিলোই চোল্যং আর তঅ চোগেন্দি যিয়েনি ঠিগ্ সিয়েনি গোজ্যং।” ইয়েন্ কোইনে হিষ্কিয় অমকদ কানা ধুরিলো। 4 যিশাইয় রাজঘরর্ উদোনান সংমধ্যে যাদে ন-যাদে লগেপ্রভুর এ কধাগান্ তাইদু ফগদাং অলঅ, 5 “তুই ফিরি যেইনে মঅ মানুচ্চুনোর্ নেতা হিষ্কিয়রে কঅ, তা পূরোণি মানুচ্ দায়ূদো গোজেন্ লগেপ্রভু এ কধাগান্ কোইয়্যেদে, ‘মুই তর্ তবনাগান্ শুন্যং আর তর্ চোগো পানিগান দেখ্যং। মুই তরে গম্ গুরিম্। ইক্কিনেত্তুন্ ধুরি তিন দিন পরেন্দি তুই লগেপ্রভুর ঘরত্ যেবে। 6 তঅ আয়ুগান্ আরঅ পনর বজর্ বাড়ে দিলুং। আর আসিরিয়ার রাজা আঢত্তুন্ মুই তরে আর এ শঅরান্ উদ্ধোর্ গুরিম্। মত্তে আর মঅ চাগর্ দায়ূদত্তে মুই এ শঅরান্ রোক্ষ্যে গুরিম্।’ ” 7 যিশাইয় কলঅ, “ডুমুরোর্ এক্কো চাক আন।” মানুচ্চুনে সিবে আনিনে হিষ্কিয়ো ফোড়াবোত্ দিলে তে গম্ অলঅ। 8 ইয়েন আগেন্দি হিষ্কিয় যিশাইয়রে পুযোর্ গুরিলো, “লগেপ্রভু যে মরে গম্ গুরিবো আর ইক্কিনিত্তুন্ ধুরি তিন দিন পরেন্দি মুই লগেপ্রভু ঘরত্ যেই পারিম্ সিয়েন চিহ্নোগান্ কি?” 9 জোবত্ যিশাইয় কোইয়্যেদে, “লগেপ্রভু যে তা শমক্তান্ রোক্ষ্যে গুরিবো সেনত্তে তে এক্কান্ চিহ্নো দিবো। তুই কঅ, ছাবাবো কি দশ পোইদ্যে উজেই যেবঅ, না দশ পোইদ্যে পিজে যেবঅ?” 10 হিষ্কিয় কোইয়্যেদে, “ছাবাবো দশ পোইদ্যে উজেই যানা সহজ বেপার, বরং সিবে দশ পোইদ্যে পিজে যোক্।” 11 সেক্কে ভাববাদী যিশাইয় লগেপ্রভুরে ডাগিলো। সেক্কে আহসর সাঙুগানত্তুন্ ছাবাবো যেদক্ পোইদ্যে লামি যেইয়্যে লগেপ্রভু সিয়োত্তুন্ দশ পোইদ্যে পিজেদি দিলো। বাবিলোর দূত 12 এ সময়োত্ বলদনর্ পুয়ো বাবিলোর রাজা বরোদক্বলদন্ হিষ্কিয়োর অসুগো হবর্ শুনিনে তাইদু চিদি আর ভেদ পাধেই দিলো। 13 হিষ্কিয় সে দূত্তুনোরে গুজি ললঅ আর তার্ বেক্ ভান্ডালুনোত্ যিয়েনি এলঅ, অত্তাৎ সোনা, রূবো, তুম্বাজ্ মজলা, মংগা তেল আর তার্ আত্যেরানি আর ধনভান্ডাল বেক্কানি তারারে দেগেল। হিষ্কিয়োর রাজঘরত্ বা তা গোদা রেজ্যগানত্ এন্ কিজু বাদ ন-যায় যিয়েনি তে তারারে ন-দেগায়। 14 সেক্কে ভাববাদী যিশাইয় রাজা হিষ্কিয়ো ইদু যেইনে পুযোর্ গুরিলো, “সে মানুচ্চুনে কি কলাক্, আর কুত্তুন্ বা তারা এচ্ছোন্?” হিষ্কিয় কলঅ, “তারা দূর দেজত্তুন্, বাবিল দেজত্তুন্ এচ্ছোন্।” 15 ভাববাদীবো পুযোর্ গুরিলো, “তারা তর্ রাজঘর ভিদিরে কি কি দেখ্যন্?” হিষ্কিয় কলঅ, “মঅ রাজঘরর্ বেক্কানি তারা দেখ্যন্। মঅ ধনভান্ডালত্ এন্ কিজু বাদ ন-যাই যিয়েনি মুই তারারে ন-দেগাং।” 16 সেক্কে যিশাইয় হিষ্কিয়রে কলঅ, “লগেপ্রভু যিয়েনি কোইয়্যে সিয়েনি তুই শুন্। 17 লগেপ্রভু কত্তে, এন্ দিন এবঅ যেক্কে তঅ রাজঘরর্ বেক্কানি আর তঅ পূরোণি মানুচ্চুনোর্ জোমেয়্যে যেদক্কানি এচ্ছে সং আঘে বেক্কানি বাবিলোত্ নেযা অবঅ, কিচ্ছু পুরি ন-থেবঅ। 18 তর্ কয়েক্কো বংশধর, তর্ নিজোর্ পুয়ো, যিগুনোরে তুই জর্ম দুয়োচ্ তারা বাবিলো রাজা ঘরত্ ইজিরে নমনসুক্ ওই থেবাক্।” 19 জোবত্ হিষ্কিয় কলঅ, “লগেপ্রভু যে কধাগান্ তুই কোইয়োচ্ সিয়েন্ দোল্ কধা।” তে এ কধাগান কলঅ, কিত্তে তে মনে গোজ্যেদে তা জিংকানিত্ তে সুগে-শান্দিয়্যে আর গমেডালে থেই পারিবো। 20 হিষ্কিয়োর অন্য বেক্ কাম কধানি আর যুদ্ধোত্ তার্ জিদেনার্ কধানি আর কেধোক্ক্যেন গুরি তে পুয়োর আর গাত্ কুরিনে শঅরত্ পানি আন্যে সিয়েন “যিহূদার রাজাগুনোর বিজগ” নাঙে বোইবোত্ লেগা আঘে। 21 পরেন্দি হিষ্কিয় তা পূরোণি মানুচ্চুনো ইদু গেলগোই আর তা জাগানত্ তাহ্ পুয়োবো মনঃশি রাজা অলঅ। |
Copyright © 2021 Bangladesh Bible Society
Bangladesh Bible Society