২ রাজাবলী 2 - Chakma Bibleএলিয়রে স্বর্গত্ তুলি নেযানা 1 লগেপ্রভু যেক্কেনে এক্কান্ থুট্ট্যে বোইয়্যের্লোই এলিয়রে স্বর্গত্ তুলি নিবাত্তে চেলঅ সেক্কেনে এলিয় আর ইলীশায় গিল্গলত্তুন্ নিগিলি এলাক্। 2 এলিয় ইলীশায়রে কলঅ, “তুই ইয়োত্ থাক; লগেপ্রভু মরে বৈথেলত্ যেবাত্তে কোইয়্যে।” ইলীশায় কলঅ, “জেদা লগেপ্রভুর নাঙে আর তঅ পরাণান নাঙে কঙর্, মুই তরে ফেলেই ন-যেম্।” সেনত্তে তারা বৈথেলত্ গেলাক্। 3 বৈথেলর ভাববাদী সমাজ্যেগুনে ইলীশায়র ইদু যেইনে কলাক্, “তুই কি হবর্ পাজ্, লগেপ্রভু তঅ গিরোজ্সোরে এচ্ছ্যে তর্ কায়-কুরেত্তুন্ নেযেব?” জোবত্ ইলীশায় কলঅ, “অয়, আমি হবর্ পেই। তুমি এ পৌইদ্যেনে আর্ কনঅ কিজু ন-কবা।” 4 ইয়েন পরেন্দি এলিয় তারে কলঅ, “ইলীশায়, তুই ইয়োত্ থাক্; লগেপ্রভু মরে যিরীহোত্ যেবাত্তে কোইয়্যে।” ইলীশায় কলঅ, “জেদা লগেপ্রভুর নাঙে আর তঅ পরাণানর নাঙে কঙর্, মুই তরে ফেলেই ন-যেম্।” সেনত্তে তারা যিরীহোত্ গেলাক্। 5 যিরীহোর ভাববাদী সমাজ্যেগুনে ইলীশায় ইদু যেইনে কলাক্, “তুই কি হবর্ পাজ্, লগেপ্রভু তঅ গিরোজ্সোরে এচ্ছ্যে তত্তুন্ নেযেব?” জোবত্ ইলীশায় কলঅ, “অয়, মুই হবর্ পাং। তুমি এ পৌইদ্যেনে আর কনঅ কিজু ন-কবা।” 6 ইয়েন পরেন্দি এলিয় তারে কলঅ, “তুই ইয়োত্ থাগ্; লগেপ্রভু মরে যর্দন গাঙ পারত্ যেবাত্তে কোইয়্যে।” জোবত্ তে কলঅ, “জেদা লগেপ্রভুর নাঙে আর তঅ পরাণান নাঙে কঙর্, মুই তরে ফেলেই ন-যেম্।” সেনত্তে তারা দ্বিজনে যাহ্ ধুরিলাক্। 7 এলিয় আর ইলীশায় যর্দন গাঙ পারত্ যেইনে থামেলাক্ আর তারাত্তুন্ কিজু দূরোত্ পঞ্চাশজন ভাববাদী সমাজ্যে এইনে থিয়েলাক্। 8 এলিয় তা কিয়্যের কাবড়ান্ বুদিনে সিয়েন্দোই পানিগান উগুরে বাজ্জেল। সেক্কে পানিগান ডেনে-বাঙে দ্বিভাগ ওই গেলঅ আর তারা দ্বিজনে শুগুনো মাদি উগুরেন্দি পার্ ওই গেলাক্। 9 পার্ ওই এইনে এলিয় ইলীশায়রে কলঅ, “মরে কঅ, তঅ কায়-কুরেত্তুন মরে তুলি নেযেবার্ আগেন্দি মুই তত্তে কি গুরিম?” জোবত্ ইলীশায় কলঅ, “তঅ আত্মাগানর দ্বিগুন আত্মা যেনে মুই পাং।” 10 এলিয় কলঅ, “তুই এক্কান্ আগাত্যে জিনিস চেইয়োচ্। তো তঅ কায়-কুরেত্তুন্ মরে নেযেবার অক্তত্ যুনি তুই মরে দেগচ্ সালে তুই সিয়েন পেবে; যুনি ন-দেগচ্ সালে ন-পেবে।” 11 তারা কধা কদে কদে আদদন্ এন্ সময়োত্ অদাদৎ এক্কান্ আগুনো রথ আর আগুনোর কয়েক্কো ঘোড়া এইনে তারার্ দ্বিজনরে ফারগ্ গুরি দিলো আর এলিয় এক্কান্ থুট্ট্যেবোইয়্যেরলোই স্বর্গত্ গেলগোই। 12 ইলীশায় সিয়েন্ দেগিনে কিজেক্ ছাড়িনে কলঅ, “ও মর্ বাবা, মর্ বাবা, চাহ্, ইস্রায়েল রথ আর ঘোড়ার সৈন্য।” ইয়েনর্ পরেন্দি ইলীশায় আর তারে ন-দেগিলো। সেক্কে তে নিজো কাবড়ান্ ধুরি ফাদিপাদাই দ্বিভাগ গুরিলো। 13 সে পরেন্দি এলিয়োর্ কিয়্যেত্তুন্ পোজ্যে কাবড়ান্ পেদেই লোইনে তে ফিরিনে যর্দনর পারত্ থিয়্যেল। 14 সে কাবড়ান্দোই তে পানিত্ বাজ্জেইনে কলঅ, “ইক্কিনে এলিয়োর্ গোজেন লগেপ্রভু কুদু?” তে পানিত্ বাজ্জানার্ পরেন্দি পানিগান ডেনে-বাঙে দ্বিভাগ ওই গেলঅ, আর তে পার্ ওই গেলঅ। 15 যিরীহোর যে ভাববাদী সমাজ্যেগুনে সিয়েনত্ থিয়্যেই এলাক্ তারা ইলীশায়রে দেগিনে কলাক্, “এলিয়োর আত্মাগানে ইলীশায় উগুরে বিশ্বেজ্ গোজ্যে।” তারা ইলীশায়র লগে দেগা গুরিবাত্তে গেলাক্ আর তা মুজুঙোত্ মাদিত্ মাধাবো লোঙেইনে সালাম গুরিনে কলাক্, 16 “চাহ্, আমি ইয়োত্ তর্ পঞ্চাশজন বোলী চাগর্ আগিই; আমি যেইনে তঅ গিরোজ্সোরে তোগেই চেই। লগেপ্রভুর আত্মাগানে অয়ত তারে তুলি নেযেইনে কনঅ মুড়ো-মুড়িত্ বা কনঅ কিজিঙোত্ লামে রাগেয়্যে।” ইলীশায় কলঅ, “না, নঅ-যেয়ো।” 17 মাত্তর্ তারা বার্ বার্ কোজোলী গুরিলে তে লাজত্ পড়িনে কলঅ, “আচ্ছা, যঅ।” সেক্কে সে পঞ্চাশজন মান্জ্যে এলিয়রে তোগেবাত্তে গেলাক্। সে মানুচ্চুনে তিন দিন সং তোগেনেয়ো তারে ন-পেলাক্। 18 ইলীশায় সেক্কে যিরীহোত্ এলঅ। তারা ইলীশায় ইদু ফিরি এজানার পরেন্দি তে তারারে কলঅ, “মুই কি তমারে যেবাত্তে মানা ন-গরং?” পানির বেবস্থা 19 একদিন্যে সে শঅর মানুচ্চুনে ইলীশায়রে কলাক্, “ও আমা গিরোজ্, তুই দঅ দেগর্ এ শঅর জাগায়ান্ অমকদ দোল্, মাত্তর্ এ পানিগান গম্ নয় আর ভূইয়ানির কারনে পেদঅ ভিদিরে পুয়ো-ছাগুন বর্বাদ্ যান্।” 20 ইলীশায় কলঅ, “তুমি মইদু এক্কো নূয়ো পিলে আনিনে সিয়োত্ এক্কেনা নুন্ রাগঅ।” সেক্কে তারা তাইদু নুনান্ আনিলাক্। 21 ইলীশায় সেক্কে পানি পয়নালাবোর্ ইদু যেইনে সিয়েনত্ সে নুনান্ ফেলে দিইনে কলঅ, “লগেপ্রভু কোইয়্যেদে, ‘মুই এ পানিগান গম্ গুরি দুয়োং। এ পানিগান আর কাররে মারে ন-ফেলেব আর পুয়ো-ছাগুনো বর্বাদ্ ন-অবাক্।’” 22 ইলীশায় কধামজিম্ এজঅ সং সে পানিগান গম্ আঘে। ইলীশায়রে ঈচ্ গরানার ফল 23 ইলীশায় সিয়োত্তুন্ বৈথেলত্ গেলঅ। পধেন্দি যেবার্ অক্তত্ শঅরত্তুন্ ভালোক্কুন্ পুয়ো নিগিলি এইনে তারে ঈচ্ গুরিনে কুয়ো ধুরিলাক্, “ও টাক্কুলো, টাক্কুলো, উগুরে উঠ্তোই।” 24 ইলীশায় ঘুরিনে তারার্ ইন্দি চেলঅ আর লগেপ্রভুর নাঙে তারারে অভিশাব্ দিলো। সেক্কে ঝারত্তুন্ দ্বিবে ভালুক্ নিগিলি এইনে তারাত্তুন্ বিয়াল্লিশজন পুয়োরে কট্টা কট্টা গুরি ফেলেল। 25 ইয়েনর্ পরেন্দি তে কর্মিল মুড়োবোত্ গেলঅ আর সিয়োত্তুন্ শমরিয়াত্ ফিরি গেলঅ। |
Copyright © 2021 Bangladesh Bible Society
Bangladesh Bible Society