২ রাজাবলী 19 - Chakma Bibleযিরূশালেমান্ রোক্ষ্যে গুরিবার্ আগাম কধা 1 রাজা হিষ্কিয় এ কধাগান শুনিনে নিজো কাবড়ানি ফাদিলো আর বস্তার্ সিলুম্ উরিনে লগেপ্রভুর ঘরত্ গেলঅ। 2 তে রাজঘরর্ পরিচালক ইলিয়াকীম, রাজার লিগিয়্যে শিব্ন আর ধর্মগুরু-নেতাগুনোরে বস্তার্ সিলুম্ উজ্যে অবস্থায় আমোসর পুয়ো ভাববাদী যিশাইয়ো ইদু পাধেই দিলো। 3 তারা যিশাইয়রে কলাক্, “হিষ্কিয় কত্তে, এচ্ছ্যে দিন্নো অলঅ দুগোর্, সাজা পেবার্ আর অসর্মান দিন। আমা কান্ডগান্ এমন্ ওইয়্যে যেন পুয়োগুন জর্ম অবার্ অক্ত ওইয়্যে মাত্তর্ ফুদেবার্ বলান্ নেই। 4 আসিরিয়ার রাজা জেদা গোজেনরে ঠাট্টা-তামাজা গুরিবাত্তে রব্শাকিরে পাদেয়্যে মাত্তর্ তর্ গোজেন্ লগেপ্রভু অয়ত সে কধানি শুনিনে তারে সাজা দিবো। সেনত্তে যিগুনে এজঅ বাঁজি আগন্ তারাত্তে তুই তবনা গর্।” 5-6 রাজা হিষ্কিয়োর কামগুরিয়্যেগুনে যেক্কে যিশাইয় ইদু এলাক্ সেক্কে যিশাইয় তারারে কলঅ, “তমা গিরোজ্সোরে কবাদে, লগেপ্রভু কোইয়্যেদে, ‘তুই যিয়েনি শুন্যচ্, অত্তাৎ আসিরিয়ার রাজার কাম্গুরিয়্যেগুনে মঅ বিরুদ্ধে যেদক্কানি অগমান কধা কোইয়োন্ সিয়েনিলোই তুই নঅ-দোরেচ্। 7 শুন্, মুই তা ভিদিরে এন্ এক্কান্ মনোভাব জাগেই দিম্ যিয়েনত্তে তে এক্কান্ হবর্ শুনিলে তা দেজত্ ফিরি যেবঅ আর সিদু মুই তারে লাম্বা ছুড়িলোই শেজ্ গুরি দিম্।’ ” 8 পরেন্দি রব্শাকি শুনিলোদে, আসিরিয়ার রাজা লাখীশ ছাড়ি যেইনে লিব্নার বিরুদ্ধে যুদ্ধো গরের্। সেনত্তে রব্শাকি সিদু গেলঅ। 9 আসিরিয়ার রাজা সন্হেরীবে হবর্ পেলঅ, কূশ দেজর্ রাজা তির্হকেঃ তা বিরুদ্ধে যুদ্ধো গুরিবাত্তে নিগিল্যে। সেনত্তে তে দূত্তুনোরে দিইনে হিষ্কিয়ো ইদু কোই পাদেল, 10 “তুমি যিহূদার রাজা হিষ্কিয়রে কবাদে, ‘তুই যিবে উগুরে ভাবিনে আগচ্ সেই গোজেনে কোইয়্যেদে, আসিরিয়ার রাজা আঢত্ যিরূশালেমরে তুলি দিয়্যে ন-অবঅ। তার্ সে ছলনার্ কধালোই তুমি ভুল ন-গোজ্য। 11 আসিরিয়ার রাজাগুনে কেধোক্ক্যেনগুরি অন্য বেক্ দেজ্ছানিরে এক্কুবারে ভস্তহ গুরি দুয়োন্ হামাক্কাই তুই সিয়েনি শুন্যচ্; সালে তুই কেধোক্ক্যেন গুরি মনে গরর্ তুই রোক্ষ্যে পেবে? 12 মর্ পূরোণি মানুচ্চুনে যিদুক্কুন্ জাদরে ভস্ত গোজ্যন্ তারা দেবেদাগুনে, অত্তাৎ গোষণ, হারণ, রেৎসফ আর তলঃসরত্ বজত্তিগুরিয়্যে এদনর মানুচ্চুনো দেবেদাগুনে কি তারারে রোক্ষ্যে গোজ্যন্? 13 হমাতর রাজা, অর্পদর রাজা, সফর্বয়িম শঅরর্ রাজা বা হেনা আর ইব্বার রাজাগুনে কুদু?’ ” হিষ্কিয়োর তবনা গরানা 14 হিষ্কিয় দূত্তুনো আঢত্তুন্ চিদিগান নেযেইনে পড়ি চেলঅ। সে পরেন্দি তে লগেপ্রভুর ঘরত্ যেইনে লগেপ্রভুর মুজুঙোত্ চিদিগান্ মিলিলো। 15 হিষ্কিয় লগেপ্রভু ইদু এ তবনাগান্ গুরিলো, “দ্বিবে করূবো সংমধ্যে থেইয়্যে ও ইস্রায়েলর গোজেন লগেপ্রভু, তুই, বানা তুয়ই পিত্থিমীর্ বেক্ রেজ্যগানির্ গোজেন। তুই দাঙর্ আগাজ্ আর পিত্থিমীগান বানেয়োচ্। 16 ও লগেপ্রভু, কানান পাদ্, শুন্; ও লগেপ্রভু, তঅ চোখকুন্ হুল্, চাহ্; জেদা গোজেনরে অগমান গুরিবাত্তে সন্হেরীবে যে কধাগান্ কোই পাদেয়্যে সিয়েন্ শুন্। 17 ও লগেপ্রভু, এ কধাগান্ সত্য, আসিরিয়ার রাজাগুনে এ জাদ্তুনোরে আর তারা দেজ্ছানি ভস্ত গোজ্যন্। 18 তারা দেবেদাগুনোরে তারা আগুনোত্ ফেলেইনে বর্বাত গুরি দুয়োন্। সিগুন্ দঅ গোজেন্ নয়, মান্জ্য আঢে বানেয়্যে তক্তা আর পাত্তর্ বানা; সেনত্তে তারা তারারে ভস্ত গুরি পাজ্যন্। 19 ইক্কিনে ও আমা গোজেন লগেপ্রভু, আসিরিয়ার রাজা আঢত্তুন্ তুই আমারে রোক্ষ্যে গর্ যেনে পিতথিমীর্ বেক্ রেজ্যগানিয়্যে কোই পারে, তুয়ই, ও লগেপ্রভু, বানা তুয়ই গোজেন।” যিশাইয়র্ আগাম্ কধা 20 সেক্কে আমোসর পুয়ো যিশাইয় হিষ্কিয়োর ইদু এ হবরান্ পাদেল, ইস্রায়েলর গোজেন লগেপ্রভু কোইয়্যেদে, আসিরিয়ার রাজা সন্হেরীব পৌইদ্যেনে তর্ তবনাগান্ তে শুন্যে। 21 তা বিরুদ্ধে লগেপ্রভু কোইয়্যেদে, গাবুজ্যে মিলে সিয়োনে তরে ঈচ্ গুরিবো আর ঠাট্টা-তামাজা গুরিবো। যিরূশালেম মানুচ্চুনে তঅ পিজেন্দিত্তুন্ মাধাবো লাড়েবাক্। 22 তুই কারে অসর্মান্ গোজ্যস? কা বিরুদ্ধে অগমান কধা কোইয়োচ্? তুই কা বিরুদ্ধে রঅ ছাজ্যস্ আর বার্ গুরিনে চোখ্ তুলি চেইয়োচ্? ইস্রায়েলর সে সুদ্ধো-সাংগ মানুচ্চো বিরুদ্ধে তুই ইয়েনি গোজ্যস্। 23 তঅ মানুচ্চুন্দোই তু্ই প্রভুরে ঈচ্ গুরি কোইয়োচ্, তর্ বেক্ রথ্তানিলোই তুই মুড়োমুড়িগুনো তুগোত্, লেবাননর্ বেগত্তুন্ অজল্ তুক্কোত্ উঠ্যচ্। তুই তার্ বেগত্তুন্ লাম্বা এরস গাজছুন্ আর গম্ গম্ বেরস গাজছুন্ কাবি ফেল্যচ্। তুই তার্ গভীন্ ঝারর্ দোল্ জাগানিত্ যেইয়োচ্। 24 বিদেজ মাদিত্ তুই কূয়ো খুজ্যস্ আর সিদুগোর্ পানি হেইয়োচ্। তঅ টেঙ্গোই তুই মিসর বেক্ গাঙানি শুগেই ফেলেয়োচ্। 25 তুই কি ন-শুনোজ্, বোউত্ আগেন্দি মুই সিয়েনি ঠিগ্ গুরি রাগেয়োং? ভালোক্দিন আগেন্দি মুই সিয়েনির সল্লা গোজ্যং। আর ইক্কিনে মুই সিয়েনি ঘোদেলুং। সেনত্তে দঅ তুই দেবাল-ঘিজ্যে শঅরানি পাত্তর কুর্ গুরি পাজ্যস্। 26 সিদুগোর্ মানুচ্চুনে বল্নেইয়্যে ওইয়োন্ আর অমকদ দোরেয়োন্ আহ্ লাজ্ পেইয়োন্। তারা ক্ষেদ ঘাস ধোক্ক্যেন, লাগেয়্যে য়েল্ চারা ধোক্ক্যেন, চাল উগুরে উঠ্যেদে ঘাস ধোক্ক্যেন যিয়েনি দাঙর্ অবার্ আগেন্দি শুগেই যায়। 27 মাত্তর্ তুই কুদু থাস্ কক্কে এজস্ বা যাচ্ আর কেধোক্ক্যেন গুরি মঅ বিরুদ্ধে রাগে ফুলি যাচ্, সিয়েনি বেক্কানি মুই হবর্ পাং। 28 তুই মঅ বিরুদ্ধে রাগে ফুলি উঠ্যচ্ বিলি আর তঅ দেমাগ কধানি মঅ কানত্ এচ্ছে বিলি মুই তঅ নাগত্ মঅ কেবাবো লাগেম্ আর তঅ মুয়োনত্ মর্ লাগামান্ লাগেম্; আর যে পথ্তানন্দি তুই এচ্ছোস্ সে পথ্তানন্দি ফিরি যেবাত্তে মুই তরে বাধ্য গুরিম্। 29 ও হিষ্কিয়, তত্তেই চিহ্নোগান্ অবঅ ইয়েন্: এ বজরত্ নিজে নিজে যিয়েনি জোর্মেব তুমি সিয়েনি হেবা, আর দ্বিবজরত্ সিয়েনিত্তুন্ যিয়েনি জোর্মেব সিয়েনি হেবা। মাত্তর্ তিন বজরত্ তুমি বীজ্ ফেলেবা আর খেত্-খেত্তি কাবিবা আহ্ আংগুর ক্ষেত্তানি গুরিনে সে গুলোগুলিগুন্ হেবা। 30 যিহূদা-গুট্টির যে মানুচ্চুনে সেক্কেয়ো বাঁজি থেবাক্ তারা আর একপল্লা ফোলিবো। তারা গাজঅ ধোক্ক্যেন তলেন্দি শিঙোর্ গারেবাক্ আর উগুরে ফল ফোলেবাক্। 31 বাঁজি থেইয়্যে মানুচ্চুনে যিরূশালেমত্তুন্ এবাক্, আর সিয়োন্ মুড়োবোত্তুন্ এবাক্ রোক্ষ্যে পেইয়্যে এক দল্ মানুচ্। লগেপ্রভুর আওজে ইয়েনি অবঅ। 32 “সেনত্তে আসিরিয়ার রাজা পৌইদ্যেনে লগেপ্রভু এ কধাগান্ কোইয়্যে, ‘তে এ শঅরত্ নঅ-সোমেব বা ইদু এক্কো সেল্অ নঅ-মারিবো। তে ঢাল্লোই মুজুঙোত্ নঅ-এবঅ বা ঘিরিনে উদোনি-লামোনি গুরিবাত্তে কিচ্ছু নঅ-বানেব। 33 তে যে পথ্তানন্দি এচ্ছে সে পথ্তানন্দি ফিরি যেব; এ শঅরত্ তে নঅ-সোমেব। মুই লগেপ্রভু এ কধাগান্ কঙর্। 34 মুই মর্ আর মঅ চাগর্ দায়ূদত্তে এ শঅরান্ ঘিরি রাগেইনে সিয়েন্ রোক্ষ্যে গুরিম্।’ ” 35 সে রেদোত্ লগেপ্রভু দূত্তো নিগিলিনে আসিরিয়গুনো তাম্বুলোর্ এক লাখ্ পাজাশি আজার্ মান্জ্যরে মারে ফেলেল। তার্কেল্যে বেন্যে মানুচ্চুনে যেক্কে ঘুমোত্তুন উদিলাক্ সেক্কে দেগা গেলদে বেক্ জাগানিত্ বানা মরামানুচ্। 36 সেনত্তে আসিরিয়ার রাজা সন্হেরীবে তা সৈন্যদলুন্ লোইনে গেলগোই আর নীনবী শঅরত্ ফিরি যেইনে সিদু থাহ্ ধুরিলো। 37 একদিন্যে যেক্কে সন্হেরীবে তা দেবেদাবো নিষ্রোকর মন্দিরোত্ পূজো গরের্ সেক্কে অদ্রম্মেলক আর শরেৎসর নাঙে তার্ দ্বিবে পুয়ো তারে লাম্বা ছুড়িলোই মারে ফেলেইনে অরারট দেজত্ ধেই গেলাক্। সন্হেরীবোর জাগানত্ তা পুয়োবো এসর-হদ্দোনে রাজা অলঅ। |
Copyright © 2021 Bangladesh Bible Society
Bangladesh Bible Society