২ রাজাবলী 17 - Chakma Bibleইস্রায়েলর বেগঅ যেরেন্দি রাজাবো হোশেয় 1 যিহূদার রাজা আহসর রাজাগিরির্ বার বজরত্ এলার্ পুয়ো হোশেয় শমরিয়াত্ ইস্রায়েলর রাজা অলঅ। তে নয় বজর রাজাগিরি গোজ্যে। 2 লগেপ্রভুর চোগেন্দি যিয়েনি বজং তে সিয়েনিই গুরিদো, মাত্তর্ ইস্রায়েলর পূরোণি রাজাগুনো ধোক্ক্যেন নয়। 3 আসিরিয়ার রাজা শল্মনেষর হোশেয়রে আক্রমণ গুরিবাত্তে এলঅ। সে কারনে হোশেয় শল্মনেষরর তলে-রাজা অলঅ আর তারে কর্ দিয়্যে ধুরিলো। 4 মাত্তর্ আসিরিয়ার রাজা হবর্ পেলদে, হোশেয় এক্কো বেঈমান, কিত্তে তে মিসরর সো রাজা ইদু দূত পাদেয়্যে আর আসিরিয়ার রাজারে বজরকে বজর্ যে হাজানাগুন্ দি এজের্ সিগুন্ আর্ ন-দের্। সেনত্তে শল্মনেষর হোশেষরে ধুরিনে জেলোত্ দিলো। 5 আসিরিয়ার রাজা পুরো দেজ্ছান আক্রমণ গুরিনে শমরিয়াত্ গেলঅ আর তিন বজর্ সং সিয়েন্ ঘিরি রাগেল। 6 হোশেয়র রাজাগিরির্ নয় বজরত্ আসিরিয়ার রাজা শমরিয়াগান্ গজক্ গুরিনে ইস্রায়েলীয়গুনোরে বন্দী গুরি আসিরিয়াত্ নেযেল। তারারে তে হলহেত, হাবোর গাঙ পারত্ গোষণ চাগালাত্ আর মাদীয়গুনোর শঅরানিত্ বজত্তি গুরিবাত্তে দিলো। পাপর কারনে ইস্রায়েলীয়গুনোর অবস্থা 7-8 ইয়েনি বেক্কানি ঘোট্যে, কিত্তে যিবে মিসরত্তুন্, মিসর রাজা ফরৌণর অধীনত্তুন্ তারারে নিগিলেই আন্যে ইস্রায়েলীয়গুনে তারার্ সেই গোজেন লগেপ্রভুর বিরুদ্ধে পাপ গোজ্যন্। তারা দেব-দেবেদার পূজো গুরিদাক্ আর যিদুক্কুন্ জাদরে লগেপ্রভু তারা মুজুঙেত্তুন্ ধাবেই দিয়্যে তারা ধোক্ক্যেন আদাউদো গুরিদাক্। ইয়েনিবাদে ইস্রায়েল রাজাগুনে যেদক্কানি সুদোম চালু গোজ্যন্ তারা সেধোক্ক্যেন গুরি চলিদাক্। 9 ইস্রায়েলীয়গুনে চুর্ গুরিনে লগেপ্রভুর বিরুদ্ধে বোউত্ ভান্ন্যেই কাম্ গুরিদাক্। তারা যে জাগানিত্ বজত্তি গুরিদাক্ -সিয়েনি চিগোন্ ওক্ বা দাঙর্ ওক্-সে বেক জাগানি নিজোত্তে পূজোর্ অজল্ জাগা বানেয়োন। 10 তারা পত্তি অজল্ মুড়োগুনো উগুরে আর ডেলা ছিদি পোজ্যে পত্তি য়েল্ গাজ তলে পূজো পাত্তর্ আর আশেরা-খুদোগুন্ বোজেয়োন্। 11 যিদুক্কুন্ জাদরে লগেপ্রভু তারা মুজুঙেত্তুন্ ধাবেই দিয়্যে তারা ধোক্ক্যেন গুরি তারায়ো পত্তি পূজো অজল্ জাগায়ানিত্ আগর্বাট্টি জ্বালেদাক্। ইয়েনিবাদে তারা আরঅ ভান্ন্যেই কাম্ গুরিনে লগেপ্রভুরে অখুজি গুরি তুল্যন্। 12 তারা মূত্তি পূজো গুরিদাক্, যুনিয়ো লগেপ্রভু তারারে সিয়েনি গুরিবাত্তে মানা গোজ্যে। 13 লগেপ্রভু তা বেক্ ভাববাদীগুনোরে আর চেইয়্যেগুনোর্ মাধ্যমে ইস্রায়েল আর যিহূদারে ইয়েন্ কোইনে উজিয়ার্ গুরি দিলো, “তুমি তমার্ ভান্ন্যেই পধত্তুন্ ফিরো আর বেক্ রীদি-সুদোমানি যিয়েনি মুই তমা পূরোণি মানুচ্চুনোরে পালেবাত্তে দুয়োং আর মর্ চাগরুনোরে, অত্তাৎ ভাববাদীগুনোর্ মাধ্যমে তমারে জানেয়োঙ্ তুমি সে ইজেবে মর্ বেক্ উগুমানি আর সুদোমানি পালঅ।” 14 মাত্তর্ তারা সে কধানিলোই কান্ ন-পাদন্। তারার্ পূরোণিমানুচ্চুনে যিগুনে তারার্ গোজেন্ লগেপ্রভুর উগুরে বিশ্বেজ্ নঅ-গুরিদাক্, তারা ধোক্ক্যেন তারা একগেয়েমি গুরিদাক্। 15 তারা তার্ বেক্ সুদোমানি, তারার্ পূরোণি মানুচ্চুনোত্তে থিদেবর্ গোজ্যে তার্ সুদোমান্ আর তারা ইদু তার্ দিয়্যে উজিয়ারর্ কধানি মানদে অস্বীগের্ গোজ্যন্। তারা বাজে মূত্তি পূজো গুরিনে নিজেয়ো বাজে ওই পোজ্যন্। লগেপ্রভু যিগুনো ধোক্ক্যেন চলিবাত্তে ইস্রায়েলীয়গুনোরে মানা গোজ্যে তারা তারার্ চেরোকিত্তে সে জাত্তুনোর্ ধোক্ক্যেন চলিদাক্। 16 তারা তারার্ গোজেন লগেপ্রভুর বেক্ উগুমানি ছাড়িনে নিজোত্তে ঢালাই গোজ্যে দ্বিবে গোরু ছঅ মূত্তি আর এক্কো আশেরা-খুদো বানেয়োন। তারা আগাজ তারাগুনোরে পূজো গুরিদাক্ আর বাল দেবেদা সেবা গুরিদাক্। 17 নিজোর্ ঝি-পুয়োগুনোরে তারা আগুনোত্ পুরিনে উৎসর্ব গুরিদাক্। তারা গোণেই দেনা আর লক্ষণ চেইনে আগাম্ কধা কবার্ অভ্যেস গুরিদাক্ আর লগেপ্রভুর চোগেন্দি যিয়েনি ভান্ন্যেই সে কামানি গুরিবাত্তে নিজোরে বিজি দিইনে লগেপ্রভুরে অখুজি গুরি তুল্যন্। 18 সেনত্তে ইস্রায়েলর মানুচ্চুনো উগুরে লগেপ্রভু অমকদ বেজার্ ওইনে তা মুজুঙোত্তুন্ তারারে ধাবেই দিলো। বাদবাগি এলাক্কে বানা যিহূদা-গুট্টিগুন, 19 মাত্তর্ যিহূদা-গুট্টিবোয়ো তারার্ গোজেন লগেপ্রভুর উগুম্ মজিম্ ন-আদিনে ইস্রায়েলে যিয়েনি গুরিদো তারায়ো সিয়েনি গরা ধুরিলাক্। 20 সেনত্তে লগেপ্রভু বেক্ ইস্রায়েলীয়গুনোরে বাদ দি দিলো। তে তারারে দুগোত্ ফেলেল আর লুটগুরিয়্যেগুনোর্ আঢত্ তুলি দিলো, আর যেরেন্দি নিজোর্ মুজুঙোত্তুন্ তারারে ধাবেই দিলো। 21 লগেপ্রভু দায়ূদো বংশত্তুন্ যেক্কে ইস্রায়েলরে ছিনি নেযেইনে যুদো গুরি ফেলেল সেক্কে তারা নবাটর পুয়ো যারবিয়ামরে তারা রাজা বানেয়োন। যারবিয়াম ইস্রায়েলরে লগেপ্রভুর পধেন্দি আদানাত্তুন্ সোরেই নেযেইনে তারারে দিইনে দাঙর্ পাপ গোরেয়্যে। 22 ইস্রায়েলর মানুচ্চুনে যারবিয়ামর বেক্ পাপর্ পধেন্দি যেইয়োন্, সিয়েনিত্তুন্ ফিরি ন-এজন্। 23 যেরেন্দি লগেপ্রভু তার্ বেক্ চাগরুনোরে, অত্তাৎ ভাববাদীগুনোর্ মাধ্যমে দিয়্যে উজিয়ারর্ কধা মজিম তার্ মুজুঙোত্তুন্ তারারে দূর্ গুরি দিলো। ইয়েনত্তেই ইস্রায়েলর মানুচ্চুনোরে তারার্ নিজোর্ দেজত্তুন্ বন্দী গুরিনে আসিরিয়া দেজত্ নেযা অলঅ, আর এজঅ তারা সিদু আগন্। শমরিয়ায় অন্য মানুচ্চুনোর বজত্তি গরানা 24 আসিরিয়ার রাজা ইস্রায়েলর মানুচ্চুনোর জাগায়ানি পূরেই দিবাত্তে বাবিল, কূথা, অব্বা, হমাৎ আর সফর্বয়িমত্তুন্ মানুচ্ আনিনে শমরিয়ার শঅর্ আর আদামানিত্ বোজেই দিলাক্। তারা সেই বেক্ জাগায়ানিত্ বজত্তি গরা ধুরিলাক। 25 সিদু বজত্তি গুরিবার্ পোল্যেন্দি তারা লগেপ্রভুর উবোসনা ন-গুরিদাক্, সেনত্তে তে তারা ভিদিরে সিংহ পাধেই দিলো। সিগুনে তারাত্তুন কয়েক্কো মান্জ্যরে মারে ফেলেল। 26 সেক্কে আসিরিয়ার রাজা ইদু এ হবরান্ দিয়্যে অলঅ, “যিদুক্কুন্ মান্জ্যরে তুই বন্দী গুরিনে শমরিয়াত্ বজত্তি গুরিবাত্তে পাধেই দুয়োচ্ তারা হবর্ ন-পান্ সে দেজ গোজেনরে কেধোক্ক্যেনগুরি হুজি গরন্। সেনত্তে গোজেনে তারা ভিদিরে সিংহ পাধেই দিলো আর সিগুনে তারারে মারে ফেলেয়োন্।” 27 সেক্কে আসিরিয়ার রাজা তা মানুচ্চুনোরে এ উগুমান্ দিলো, “যিদুক্কুন্ ধর্মগুরুরে তুমি শমরিয়াত্তুন্ বন্দী গুরি আন্য তারাত্তুন্ একজনরে তুমি সিদু পাধেই দুয়ো যেনে তে সিদু যেইনে বজত্তি গরে আর সে দেজ্ছান গোজেনরে কেধোক্ক্যেনগুরি হুজি গরা পড়ে সিয়েন্ তারারে শিগেই দে।” 28 সেক্কে শমরিয়াত্তুন্ নেযেয়্যে ধর্মগুরুগুনোত্তুন্ একজনে যেইনে বৈথেলত্ বজত্তি গরা ধুরিলো আর তেয়ই তারারে শিগেই দিলো কেধোক্ক্যেনগুরি লগেপ্রভুরে তবনা গরা পড়ে। 29 তো পত্তি জাদ মানুচ্চুনে যে যেই আদামত আর শঅরত্ বজত্তি গুরিদাক্ সিদু নিজো নিজোর্ দেবেদা বানেলাক্ আর শমরিয়ার মানুচ্চুনে বানেইয়্যে পূজো অজল্ জাগায়ানিত্ নানান্ মন্দিরোত্ সিয়েনি রাগেলাক্। 30 এধোক্ক্যেনগুরি বাবিলো মানুচ্চুনে বানেলাক্ সুক্কোৎ-বনোতর মূত্তি, কূথের মানুচ্চুনে বানেলাক্ নের্গল মূত্তি, হমাতর মানুচ্চুনে বানেলাক্ অশীমার মূত্তি, 31 অব্বীয়োগুনে বানেলাক্ নিভস আর তর্তকর মূত্তি আর সফর্বীয়োগুনে অদ্রম্মেলক আর অনম্মেলক নাঙে সফর্বয়িমোর দেবেদাগুনোর নাঙে তারা নিজোর্ ঝি-পুয়োগুনোরে আগুনোত্ পুড়িনে উৎসর্ব গুরিলাক্। 32 তারা লগেপ্রভুরে তবনা গুরিদাক্ আর পূজো অজল্ জাগার্ মন্দিরুনোত্ ধর্মগুরু কাম্ গুরিবাত্তে নিজো ভিদিরেত্তুন্ মানুচ্ নেযেলাক্। 33 তারা লগেপ্রভুরে তবনা গুরিদাক্, মাত্তর্ সে লগে যেদক্কানি দেজত্তুন্ তারারে আনা ওইয়্যে সে দেজ্ছানির সুদোম মজিম তারা নিজোর নিজোর দেবেদাগুনোরেয়ো পূজো গুরিদাক্। 34 এচ্ছে সং তারা সে সুদোমানি মানি চলদন্। তারা আজলে লগেপ্রভুরে তবনা ন-গরন্, কিত্তে লগেপ্রভু যে যাকোব নাঙান্ ইস্রায়েল রাগেয়্যে সে যাকোব পুয়োগুনো ইদু লগেপ্রভুর দিয়্যে সুদোম, হুকুম, আইন আর উগুমানি তারা মানি ন-চলন্। 35 লগেপ্রভু ইস্রায়েলীয়গুনোত্তে সুদোম থিদেবর গুরিবার সময়োত্ তারারে এ উগুমানি দিলো, “তুমি কনঅ দেব-দেবেদা পূজো ন-গুরিবা বা তারা ইদু মাধা ন-লোঙেবা আর তারারে সেবা বা তারা নাঙে উৎসর্ব ন-গুরিবা। 36 মাত্তর্ লগেপ্রভু, যিবে আত্ বাবেইনে দাঙর্ বল্লোই মিসরত্তুন্ তমারে নিগিলে আন্যে তুমি তারে তবনা গুরিবা, তাইদু মাধা লোঙেবা আর তা নাঙে বেক্ উৎসর্বগুন্ গুরিবা। 37 তে যেদক্কানি সুদোম, হুকুম, আইন আর উগুম তমাত্তে লিগি দিয়্যে সিয়েনি গমেডালে পালেবা। তুমি দেব-দেবেদার পূজো ন-গুরিবা। 38 তমাত্তে যে সুদোমান মুই থিদেবর্ গোজ্যং সিয়েন্ মনত্ রাগেয়ো; কনঅ দেব-দেবেদা পূজো তুমি ন-গুরিবা, 39 বরং তমার গোজেন লগেপ্রভুরে তবনা গুরিবা। তমার বেক্ শত্রুগুনো আঢত্তুন্ তেয়ই তমারে উদ্ধোর্ গুরিবো।” 40 মাত্তর্ সে জাদ্তুনে সে কধানিলোই কান্ ন-পাদিনে তারার্ আগঅ অভ্যেস ধোক্ক্যেন চলা ধুরিলাক্। 41 তারা লগেপ্রভুর তবনায়ো গুরিদাক্ আরঅ তারা দেব-দেবেদা পূজোয়ো গুরিদাক্। এজঅ তারার ঝি-পুয়োগুনে আর নাদিন্-পুদিনুনে তারা পূরোণি মানুচ্চুনো ধোক্ক্যেন চলদন্। |
Copyright © 2021 Bangladesh Bible Society
Bangladesh Bible Society