২ রাজাবলী 15 - Chakma Bible1 ইস্রায়েলর রাজা যারবিয়ামর রাজাগিরির্ সাদেশ্ বজর্ বয়জত্ যিহূদার রাজা অমৎসিয়োর্ পুয়ো অসরিয় রাজাগিরি গরানা আরাম্ভ গুরিলো। 2 তে ষুলো বজর্ বয়জত্ রাজা ওইয়্যে আর যিরূশালেমত্ বায়ুন্নো বজর্ রাজাগিরি গোজ্যে। তা মাবো নাঙান্ এলদে যিখলিয়া; তে অলদে যিরূশালেম শঅর মিলে। 3 অসরিয় তা বাপ্পো অমৎসিয়ো ধোক্ক্যেন লগেপ্রভুর চোগেন্দি যিয়েনি গম্ সিয়েনি গুরিদো। 4 মাত্তর্ উপোসনা অজল্ জাগায়ানি তে ভস্ত ন-গরে; মানুচ্চুনে সিদু য়েমান্ উৎসর্ব গরানা আর আগর্বাট্টি জ্বালা ধুরিলাক্। 5 পরেন্দি লগেপ্রভু রাজারে আঘাত্ গুরিলে পরেন্দি তে মরণ সং এক্কান্ ফারাঙি রুগে ভুগিলো। তে যুদো ঘরত্ বজত্তি গুরিদো। রাজার পুয়ো যোথমে রাজঘর মুরুব্বী অলঅ আর দেজ মানুচ্চুনোরে শাজন্ গরা ধুরিলো। 6 অসরিয়োর অন্য বেক্ কাম কধানি “যিহূদার রাজাগুনোর বিজগ” নাঙে বোইবোত্ লেগা আঘে। 7 পরেন্দি অসরিয় তার পূরোণি মানুচ্চুনোর্ ইদু গেলগোই আর তারে দায়ূদ-শঅরত্ তা পূরোণি মানুচ্চুনোর লগে গোর্ দিয়্যে অলঅ। তা জাগানত্ তা পুয়ো যোথমে রাজা অলঅ। ইস্রায়েলর রাজা সখরিয় 8 যিহূদার রাজা অসরিয়র রাজাগিরির আত্রিশ বজরত্ যারবিয়ামর পুয়ো সখরিয় শমরিয়াত্ ইস্রায়েলর রাজা ওইনে ছয় মাস রাজাগিরি গুরিলো। 9 তে তা পূরোণি মানুচ্চুনো ধোক্ক্যেন লগেপ্রভুর চোগোত্ যিয়েনি বজং সিয়েনি গুরিদো। নবাটর পুয়ো যারবিয়ামে ইস্রায়েলরে দিইনে যেদক্কানি পাপ গোরেয়্যে সখরিয় সে পাপ্পানি গরা ধুরিলো। 10 সখরিয়োর বিরুদ্ধে যাবেশর্ পুয়ো শল্লুম কুজুরোমি গুরিলো আর মানুচ্চুনো মুজুঙোত্ তারে আক্রমণ গুরিনে মারে ফেলেল আর তা জাগানত্ রাজা অলঅ। 11 সখরিয়োর অন্য বেক্ কাম কধানি “ইস্রায়েলর রাজাগুনোর বিজগ” নাঙে বোইবোত্ লেগা আঘে। 12 লগেপ্রভু যেহূরে যিয়েনি কোইয়্যে, “তঅ বংশত্তুন চের্ আজু সং ইস্রায়েলর সিংহাসনত্ বুজিবাক্,” সিয়েন্ পূরোণ অলঅ। ইস্রায়েলর রাজা শল্লুম 13 যিহূদার রাজা উষিয়ের, অত্তাৎ অসরিয়ের রাজাগিরির ঊনচোল্লিশ বজরত্ যাবেশের পুয়ো শল্লুম রাজা অলঅ আর শমরিয়াত্ এক মাস রাজাগিরি গুরিলো। 14 সে পরেন্দি গাদির পুয়ো মনহেম তির্সাত্তুন্ শমরিয়াত্ যেইনে যাবেশর্ পুয়ো শল্লুমরে আক্রমণ গুরিনে তারে মারে ফেলেল আর তা জাগানত্ রাজা অলঅ। 15 শল্লুমোর অন্য বেক্ কাম কধানি আর তা কুজুরোমির কধানি “ইস্রায়েলর রাজাগুনোর বিজগ” নাঙে বোইবোত্ লেগা আঘে। 16 যেরেন্দি মনহেমে তির্সাত্তুন্ নিগিলিনে তিপ্সহ শঅর্ আর সিদুগোর্ আদাম্মেগুনোরে আর তা চেরোকিত্তে চাগালার্ বেক্কুনোরে আক্রমণ গুরিলো, কিত্তে তারা তারার্ শঅর্-গেট্টো খুলি দিবাত্তে রাজী ন-অন্। সেনত্তে তে তিপ্সহ ভস্ত গুরিলো আর বেক্ পিদিলী মিলেগুনো পেট্টুন্ ফাদি দিলো। ইস্রায়েলর রাজা মনহেম 17 যিহূদার রাজা অসরিয়র রাজাগিরির ঊনচোল্লিশ বজরত্ গাদির পুয়ো মনহেমে ইস্রায়েলর রাজা অলঅ। তে শমরিয়াত্ দশ বজর রাজাগিরি গোজ্যে। 18 লগেপ্রভুর চোগেন্দি যিয়েনি বজং তে সিয়েনি গুরিদো। তার পুরো রাজাগিরির সময়োত্ তে সে পাপ্পানি গরা ধুরিলো যিয়েনি নবাটর পুয়ো যারবিয়ামে ইস্রায়েলরে দিইনে গোরেয়্যে। 19 ইয়েন পরেন্দি আসিরিয়ার রাজা পূল ইস্রায়েলান্ আক্রমণ গুরিলো। সেক্কে মনহেমে পূলর বলে দেজত্ তার্ রাজাগিরি ঠিগ্ রাগেবাত্তে তারে ঊনচোল্লিশ টন রূবো দিলো। 20 মনহেমে এ টেঙাগুন্ ইস্রায়েলর মানুচ্চুনোত্তুন্ বলাজরি গুরিনে আদায় গুরিলো। আসিরিয়ার রাজারে দিবাত্তে পত্তি তাগোয়্যে মান্জ্যত্তুন্ সাড়ে ছয়শ গ্রাম গুরিনে রূবো দিয়্যে পড়িলো। 21 মনহেমর অন্য বেক্ কাম কধানি “ইস্রায়েলর রাজাগুনোর বিজগ” নাঙে বোইবোত্ লেগা আঘে। 22 যেরেন্দি মনহেমে তা পূরোণি মানুচ্চুনোর ইদু গেলগোই আর তা জাগানত্ তার্ পুয়ো পকহিয় রাজা অলঅ। ইস্রায়েলর রাজা পকহিয় 23 যিহূদার রাজা অসরিয়োর রাজাগিরি পঞ্চাশ বজরত্ মনহেমর পুয়ো পকহিয় শমরিয়াত্ ইস্রায়েলর রাজা ওইনে দ্বিবজর রাজাগিরি গোজ্যে। 24 লগেপ্রভুর চোগোত্ যিয়েনি বজং পকহিয় সিয়েনি গুরিদো। নবাটর পুয়ো যারবিয়ামে ইস্রায়েলরে দিইনে যে পাপ্পানি গোরেয়্যে পকহিয় সে পাপ্পানি গরা ধুরিলো। 25 রমলিয়ের পুয়ো পেকহ নাঙে তার্ এক্কো সেনাপতি তা বিরুদ্ধে কুজুরোমি গুরিলো। পেকহ গিলিয়দর পঞ্চাশজন মান্জ্যরে লগে নেযেইনে শমরিয়ার রাজঘরর্ তাম্বুলোত্ পকহিয়, অর্গোব আর অরিয়িরে মারে ফেলেল। পকহিয়রে মারে ফেলেইনে পেকহ তা জাগানত্ রাজা অলঅ। 26 পকহিয়োর অন্য বেক্ কাম কধানি “ইস্রায়েলর রাজাগুনোর বিজগ” নাঙে বোইবোত্ লেগা আঘে। ইস্রায়েলর রাজা পেকহ 27 যিহূদার রাজা অসরিয়োর রাজাগিরির বায়ূন্নো বজরত্ রমলিয়োর পুয়ো পেকহ শমরিয়াত্ ইস্রায়েলর রাজা অলঅ। তে কুড়ি বজর্ রাজাগিরি গোজ্যে। 28 লগেপ্রভুর চোগেন্দি যিয়েনি বজং তে সিয়েনি গুরিদো। নবাটর পুয়ো যারবিয়ামে ইস্রায়েলরে দিইনে যে পাপ্পানি গোরেয়্যে পেকহ সে পাপ্পানি গরা ধুরিলো। 29 ইস্রায়েলর রাজা পেকহর সময়োত্ আসিরিয়ার রাজা তিগ্লৎ-পিলেষর এইনে ইয়োন, আবেল-বৈৎ-মাখা, যানোহ, কেদশ, হাৎসোর, গিলিয়দ, গালীল আর নপ্তালির পুরো চাগালাগান গজক গুরিলো আর মানুচ্চুনোরে বন্দী গুরিনে আসিরিয়াত্ নেযেল। 30 পরেন্দি উষিয়োর পুয়ো যোথমর রাজাগিরির কুড়ি বজরত্ এলার্ পুয়ো হোশেয় রমলিয়োর পুয়ো পেকহর বিরুদ্ধে কুজুরোমি গুরিলো আর তারে মারে ফেলেইনে তা জাগানত্ রাজা অলঅ। 31 পেকহর অন্য বেক্ কাম কধানি “ইস্রায়েলর রাজাগুনোর বিজগ” নাঙে বোইবোত্ লেগা আঘে। যিহূদার রাজা যোথম 32 রমলিয়োর পুয়ো ইস্রায়েলর রাজা পেকহর রাজাগিরির দ্বিবজরত্ যিহূদার রাজা উষিয়োর পুয়ো যোথমে রাজাগিরি গরানা আরাম্ভ গুরিলো। 33 পোজোশ্ বজর্ বয়জত্ তে রাজা অলঅ আর ষুলো বজর যিরূশালেমত্ রাজাগিরি গোজ্যে। তা মাবো নাঙান্ এলদে যিরূশা; তে এলদে সাদোকর ঝি। 34 তা বাপ্পো উষিয়োর ধোক্ক্যেন যোথমে লগেপ্রভুর চোগোত্ যিয়েনি গম্ সিয়েনি গুরিদো। 35 মাত্তর্ উবোসনা অজল্ জাগায়ানি তে ভস্ত ন-গরে। মানুচ্চুনে সিদু য়েমান্ উৎসর্ব গরানা আর আগর্বাট্টি জ্বালা ধুরিলাক্। যোথমে লগেপ্রভুর ঘরর্ চেরোকিত্তে দেবাল অজল্ জাগায়ানির গেট্টুন্ সোর্গরা ধুরিলো। 36 যোথমর অন্য বেক্ কাম কধানি “যিহূদার রাজাগুনোর বিজগ” নাঙে বোইবোত্ লেগা আঘে। 37 লগেপ্রভু সে অক্তত্তুন্ ধুরি অরামর রাজা রৎসীন আর রমলিয়োর পুয়ো পেকহরে যিহূদার বিরুদ্ধে যুদ্ধো গুরিবাত্তে পাদানা আরাম্ভ গুরিলো। 38 যেরেন্দি যোথমে তা পূরোণি মানুচ্চুনোর ইদু গেলগোই আর তা পূরোণি মানুচ্ দায়ূদো শঅরত্ তারে তা পূরোণি মানুচ্চুনোর লগে গোর্ দিয়্যে অলঅ। ইয়েনর্ পরেন্দি তার্ পুয়ো আহসে তা জাগানত্ রাজা অলঅ। |
Copyright © 2021 Bangladesh Bible Society
Bangladesh Bible Society