২ রাজাবলী 13 - Chakma Bibleইস্রায়েলর রাজা যিহোয়াহস 1 যিহূদার রাজা অহসিয়র পুয়ো যোয়াশর রাজাগিরির্ তেইশ্ বজরত্ যেহূর পুয়ো যিহোয়াহসে শমরিয়াত্ ইস্রায়েলর রাজা ওইনে সতর বজর রাজাগিরি গোজ্যে। 2 লগেপ্রভুর চোগেন্দি যিয়েনি ভান্ন্যেই তে সিয়েনি গুরিদো আর নবাটর পুয়ো যারবিয়ামে ইস্রায়েলরে দিইনে যেদক্কানি পাপ গোরেয়্যে তেয়ো সিয়েনি গুরিদো; সিয়েনিত্তুন্ তে নঅ-ফিরিলো। 3 সেনত্তে ইস্রায়েল বিরুদ্ধে লগেপ্রভুর রাগ্কান্ জুলি উদিলো; আর তে অরামর রাজা হসায়েল আর তা পুয়ো বিন্হদদ আঢত্ বার্ বার্ তারারে তুলি দিলো। 4 ইয়েন পরেন্দি যিহোয়াহসে লগেপ্রভুর ইদু কোজোলি গুরিলো আর লগেপ্রভু তা কধানি শুনিলো, কিত্তে অরামর রাজা জদবদেগুরিনে ইস্রায়েলর উগুরে যে অত্যেচারানি গোজ্যে সিয়েনি তে দেখ্যে। 5 সেক্কে লগেপ্রভু ইস্রায়েলরে এক্কো উদ্ধোরগুরিয়্যে দিলো। সেনে ইস্রায়েলীয়গুনে অরাম আঢত্তুন্ বাঁজিলাক্। সেনত্তে তারা আগঅ ধোক্ক্যেন আরঅ গমেডালে বজত্তি গরা ধুরিলাক্। 6 মাত্তর্ যারবিয়ামে ইস্রায়েলরে দিইনে যেদক্কানি পাপ গোরেয়্যে তারা তা বংশত্তুন্ সে পাপ্পানিত্তুন্ সুরি নঅ-এলাক্, সিয়েনি গরা ধুরিলাক্। ইয়েনিবাদে আশেরা-খুদোবো সেক্কেয়ো শমরিয়াত্ রলঅ। 7 পঞ্চাশজন ঘোড়া সৈন্য, দশছান্ রথ আর দশ আজার আত্যের্বলা সৈন্য বাদে যিহোয়াহসর সৈন্যদলত্ আর কনজনে ন-এলাক্, কিত্তে অরামর রাজা বাদবাগি বেক্কুনোরে ভস্ত গুরি দিলো। তে তারারে মাদি ধোক্ক্যেন টেঙোই উজ্যে। 8 যিহোয়াহসর অন্য বেক্ কাম কধানি আর যুদ্ধোত্ তার্ জিদেনার্ কধানি “ইস্রায়েলর রাজাগুনোর বিজগ” নাঙে বোইবোত্ লেগা আঘে। 9 যেরেন্দি যিহোয়াহসে তা পূরোণি মানুচ্চুনোর ইদু গেলঅ আর তারে শমরিয়াত্ গোর্ দিয়্যে অলঅ। তা জাগানত্ তা পুয়োবো যিহোয়াশে রাজা অলঅ। ইস্রায়েলর রাজা যিহোয়াশে 10 যিহূদার রাজা যোয়াশর রাজাগিরির্ সাত্রিশ বজর বয়জত্ যিহোয়াহসর পুয়ো যিহোয়াশে শমরিয়াত্ ইস্রায়েলর রাজা অলঅ। তে ষুলো বজর রাজাগিরি গোজ্যে। 11 লগেপ্রভুর চোগোত্ যিয়েনি গম্ নয় তে সিয়েনি গুরিদো আর নবাটর পুয়ো যারবিয়ামে ইস্রায়েলরে দিইনে যেদক্কানি পাপ গোরেয়্যে যিহোয়াশে সিয়েনি গরা ধুরিলো, সিয়েনিত্তুন্ নঅ-ফিরিলো। 12 যিহোয়াশর অন্য বেক্ কামর কধানি আর যে বলান্দোই তে যিহূদার রাজা অমৎসিয়োর লগে যুদ্ধো গোজ্যে সে কধানি “ইস্রায়েলর রাজাগুনোর বিজগ” নাঙে বোইবোত্ লেগা আঘে। 13 যেরেন্দি যিহোয়াশে তা পূরোণি মানুচ্চুনোর্ ইদু গেলগোই আর তা পুয়ো যারবিয়ামে তা জাগানত্ রাজা অলঅ। শমরিয়াত্ ইস্রায়েল রাজাগুনোর লগে যিহোয়াশরে গোর্ দিয়্যে অলঅ। ভাববাদী ইলীশায়র মরাণা 14 ইয়েন আগেন্দি ইলীশায় অসুগ্ এলঅ আর সে অসুগকান্দোই তে মুরি গেলঅ। তে মুরি যেবার্ আগেন্দি ইস্রায়েলর রাজা যিহোয়াশে তারে চেবাত্তেই যেইয়্যে আর কানি কানি কোইয়্যেদে, “ও মর্ বাবা, মর্ বাবা, রথ আর ঘোড়াসৈন্যগুনো ধোক্ক্যেন তুই ইস্রায়েলর রোক্ষ্যেগুরিয়্যে।” 15-16 সে সময়োত্ ইলীশায় তারে কলঅ, “তুই সেল্-ধনু লোই আয়।” তে সিয়েন্ আনানার্ পরেন্দি ইলীশায় কলদে, “ধনুগান্ আঢত্ লঅ।” সেক্কে তে সিয়েন্ আঢত্ লল। যেরেন্দি ইলীশায় রাজার আত্তানি উগুরে তা আত্তান্ থোইনে কলঅ, 17 “পূগেন্দি জানালাগান্ খুলি দে।” তে খুলিলো। সে পরেন্দি ইলিশায় কলদে, “সেল্ মার্।” যিহোয়াশে জানালা খুলিনে সেল্ মারিলো। সেক্কে ইলীশায় ফগদাঙ্ গুরিলো, “ইবে অলঅ লগেপ্রভুর জিদেনার্ সেল্, অরাম উগুরে জিদেনার্ সেল্। তুই অফেকত্ অরামীয়গুনোরে ওদেই দিইনে এক্কুবারে ভস্ত গুরি দিবে।” 18 সে পরেন্দি ইলীশায় কলঅ, “তুই সেলুন্ আঢত্ লঅ।” রাজা সিগুন্ আঢত্ নেযানার্ পরেন্দি ইলীশায় কলঅ, “মাদিত্ ফুদেই দে।” রাজা তিনবার ফুদে দিইনে থামেল। 19 সেক্কে গোজেন মানুচ্চো রাগ গুরিনে কলঅ, “পাচ্ বা ছয়বার্ মাদিত্ ফুদেই দেনা তর্ উজিত্ এলঅ; সেক্কে তুই অরামীয়গুনোরে এক্কুবারে ভস্ত গুরি পারিদে। মাত্তর্ ইক্কিনে তুই বানা তিনবার তারারে ওদেই দি পারিবে।” 20 যেরেন্দি ইলীশায় মুরি গেলঅ আর তারে গোর্ দিয়্যে অলঅ। পত্তিবারত্ ফাগোন-চোত্মাস্যে মোয়াবীয় হানাদারুনে ইস্রায়েল দেজত্ সুমিদাক্। 21 একবার ইস্রায়েলীয়গুনে যেক্কে একজনরে গোর্ দেদন্ সেক্কে আদিক্কেগুরি একদল হানাদাররে দেগিনে তারা মরাকিয়্যেগান্ ইলীশায়র গোরত্ ফেলেই দিলাক্। মানুচ্চো মরাকিয়্যেগান্ ইলীশায়র আড়ুনোত্ বাজানা লগে লগে জেদা ওইনে টেঙোই ভর্ দিইনে থিয়্যেল। 22 যিহোয়াহসর পুরো রাজাগিরি সময়ান ধুরিনে অরামর রাজা হসায়েলে ইস্রায়েল উগুরে অত্যেচার্ গোজ্যে। 23 মাত্তর্ লগেপ্রভু অব্রাহাম, ইস্হাক আর যাকোবত্তে যে সুদোমান্ থিদেবর্ গোজ্যে সেনত্তেই তে ইস্রায়েলীয়গুনো উগুরে দোয়্যে বা মেয়্যে গুরিলো আর তারান্দি মন্ দিলো। এজঅ সং তারারে ভস্ত গুরি ফেলাদে বা নিজো মুজুঙেত্তুন্ দূর্ গুরি দিবাত্তে তে নঅ-চায়। 24 অরামর রাজা হসায়েলে মুরি যানার্ পরেন্দি তা পুয়োবো বিন্হদদে তা জাগানত্ রাজা অলঅ। 25 সেক্কে যিহোয়াহসর পুয়ো যিহোয়াশে সেই বেক্ শঅরানি আরঅ গজক গুরি নেযেল যিয়েনি হসায়েলর পুয়ো বিন্হদদে তা বাপ্পো যিহোয়াহসত্তুন্ যুদ্ধোত্ জিদিনে নেযেয়্যে। যিহোয়াশে তিনবার বিন্হদদরে যুদ্ধোত্ ওদেই দিইনে ইস্রায়েলীয় শঅরানি উদ্ধোর্ গুরি নিলো। |
Copyright © 2021 Bangladesh Bible Society
Bangladesh Bible Society