২ রাজাবলী 10 - Chakma Bibleআহাবর বংশ মানুচ্চুনোর্ মরাণা 1 শমরিয়াত আহাবর সত্তুরজন বংশধর এলাক্। যেহূ চিদি লিগিনে শমরিয়াত্ যিষ্রিয়েলর শাজন্গুরিয়্যেগুনো ইদু, বুড়ো নেতাগুনো ইদু আর আহাবর বংশধরুনো রোক্ষ্যেগুরিয়্যেগুনো ইদু পাধেই দিলো। তে লিগিলোদে, 2-3 “তঅ গিরোজ্সোর্ বংশধরুনে তমা ইদু আগন্ আর রথ, ঘোড়া, দেবাল্লোই ঘিজ্যে শঅর্ আর আত্যের্অ আঘে। সেনত্তে এ চিদিগান পানার্ লগে লগে তমা গিরোজ্সোর্ বেগত্তুন্ গম্ আর যোগাজ্যে বংশধর্বোরে বেঈ নেযেইনে আহাবর সিংহাসনানত্ বজঅ, সে পরেন্দি গিরোজ্সোর বংশগুনোত্তে যুদ্ধো গরঅ।” 4 মাত্তর্ তারা অমকদ দোরেইনে কলাক্, “দ্বিজন রাজা যেক্কে যেহূর বিরুদ্ধে যেই ন-পারিলাক্ সেক্কে আমি কি গুরি পারিবোং?” 5 সেনত্তে রাজঘরর্ কাবিদ্যঙো, শঅরর্ শাজন্গুরিয়্যেবো, বুড়ো নেতাগুনে আর আহাবর বংশধরুনোর রোক্ষ্যেগুরিয়্যেবো যেহূরে এ কধাগান কোই পাদেল, “আমি তঅ চাগর্। তুই যিয়েন্ কবে আমি সিয়েনই গুরিবোং। আমি কাররে রাজা ন-বানেবং; তুই যিয়েন্ গম্ বিলি মনে গরচ্ সিয়েনই গর্।” 6 সেক্কে যেহূ তারা ইদু ইয়েন্ কোইনে দ্বিলম্বর চিদিগান লিগিলো, “তুমি যুনি মঅ পক্ষে থাগঅ আর মঅ উগুমান্ পালেবাত্তে চঅ সালে তমা গিরোজর বংশধরুনোর্ মাঢাগুন্ কাবি নেযেইনে এজেত্তে কেল্যে এ সময়ানত্ যিষ্রিয়েলত্ মইদু এজঅ।” আহাবর সে সত্তুরজন বংশধরে সেক্কে শঅর আজল্ নেতাগুনো ইদু এলাক্। তারা তারারে দেগাশুনো গুরিদাক্। 7 যেহূর চিদিগান্ লুমোনার পরেন্দি সে মানুচ্চুনে সে সত্তুরজনরে ধুরিনে মারে ফেলেলাক্। সে পরেন্দি লেইয়োত্ ভোরেইনে মাধাগুন্ যিষ্রিয়েলত্ যেহূর ইদু পাধেই দিলাক্। 8 সেক্কে এক্কো মান্জ্যে এইনে যেহূরে কলঅ, “সিগুনে তারার্ মাধাগুন্ আন্ন্যন্।” সেক্কে যেহূ উগুম্ দিলো, “সিগুন্ দ্বিকুড়্ গুরি শঅর্-গেদোত্ সুমিবার পথ্তানত্ বেন্যেমাদন্ সং রাগেই দুয়ো।” 9 তার্কেল্যে বেন্যে যেহূ বারেন্দি গেলঅ। তে বেক্ মানুচ্চুনোর মুজুঙাত্ থিয়্যেইনে কলঅ, “তমার্ কনঅ দুষ নেই। মুয়ই মঅ গিরোজ্সো বিরুদ্ধে কুজুরোমি গুরিনে তারে মারে ফেলেয়োং, মাত্তর্ ইগুনোরে বেক্কুনোরে মারিলো কন্না? 10 তুমি জানি লঅ, আহাবর বংশর বিরুদ্ধে লগেপ্রভুর কোইয়্যে এক্কান্ কধায়ো মিজে ন-অবঅ। লগেপ্রভু তার্ চাগর্ এলিয়োর মাধ্যমে যিয়েনি গুরিবার কধা কোইয়্যে সিয়েনি গোজ্যে।” 11 পরেন্দি যেহূ যিষ্রিয়েলত্ আহাবর বংশর বাদ্বাগি মানুচ্চুনোরে, তার্ বেক্ মুরুব্বীগুনোরে, তার আজল সমাজ্যেগুনোরে আর তার ধর্মগুরুগুনোরে মারে ফেলেল। তারাত্তুন্ আর কনজনে বাঁজি ন-রলাক্। 12-13 ইয়েন পরেন্দি যেহূ নিগিলিনে শমরিয়ার ইন্দি গেলঅ। পদথ্ এ্যমান চোরেইয়্যেগুনোর আদামান্ বৈৎ-একদদ যিহূদার রাজা অহসিয়োর বংশর কয়েক্কো মান্জ্যর লগে তার দেগা অলঅ। তে তারারে পূযোর্ গুরিলো, “তুমি কন্না?” তারা কলাক্, “আমি অহসিয়োর বংশর মানুচ্। আমি রাণী ঈষেবলর পুয়োগুনোরে আর রাজগিরির্ বেক্কুনোরে ভালেদি জানেবাত্তে এচ্ছ্যেই।” 14 সেক্কে যেহূ উগুম দিলো, “তারারে জেদাবাদে ধরঅ।” মানুচ্চুনে তারারে জেদাবাদে ধুরিলাক্ আর সে জাগার কূয়োবোর্ কায়কুরে তারারে মারে ফেলেলাক্। তারা সোংখ্যেন্দি এলাক্কে বিয়াল্লিশজন। তারাত্তুন্ একজনরেয়ো তে বাঁজেই ন-রাগেলাক্। 15 সিয়োত্তুন্ যানার পরেন্দি রেখবর পুয়ো যিহোনাদবর লগে যেহূর দেগা অলঅ। তে যেহূর লগে দেগা গুরিবাত্তে এইচ্ছ্যে। যেহূ তারে ভালেদি জানেইনে কলঅ, “মুই যেধোক্ক্যেন্ তমা পক্ষেন্দি আগং সেধোক্ক্যেন্ তুইয়ো কি মর্ পক্ষেন্দি আগচ্?” জোবত্ যিহোনাদবে কলঅ, “অয়, আগং।” যেহূ কলঅ, “যুনি সিয়েনই অয় সালে তর্ আত্তান্ বাবেই দে।” যিহোনাদবে সিয়েনই গুরিলো আর যেহূ তারে রথ্তানত্ তুলি নিলো। 16 সে পরেন্দি যেহূ কলঅ, “মঅ লগে আয় আর লগেপ্রভুত্তেই মর্ আওজ্চান্ কত্তমান্ সিয়েন্ চঅ।” ইয়েন্ কোইনে তে তারে তার রথ্তানত্ গুরি নেযেল। 17 যেহূ শমরিয়াত্ এইনে আহাবর বংশর বাদ্বাগি বেক্ মানুচ্চুনোরে মারে ফেলেল। লগেপ্রভু এলিয়রে যেধোক্ক্যেন্ কোইয়্যে সেই মজিম যেহূ তারারে ভস্ত গুরিলো। বাল দেবেদার ধর্মগুরুগুনোর মরাণা 18 সে পরেন্দি যেহূ বেক্ মানুচ্চুনোরে এগত্তর্ গুরিনে তারারে কলঅ, “আহাবে বাল দেবেদার পূজো সামান্য গোজ্যে, মাত্তর্ যেহূ তার পূজো গুরিবোদে বোউত্ বেশ্। 19 ইক্কিনে বাল দেবেদার বেক্ ভাববাদীগুনোরে, পূজোগুরিয়্যেগুনোরে আর ধর্মগুরুগুনোরে তুমি ডাগি আনঅ। চেবা যেনে কনজনে বাদ ন-পড়ন্, কিত্তে বাল দেবেদার নাঙে মুই এক্কো দাঙর্ এ্যমান উৎসর্বর বেবস্থা গুরিবাত্তে যাঙর্। সেক্কে কনজনে যুনি ন-এজন্ সালে তারে মারে ফেলা অবঅ।” মাত্তর্ এলে যেহূ বাল দেবেদার পূজোগুরিয়্যেগুনোরে ভস্ত গুরিবাত্তে এ বুদ্ধিগান গোজ্যন্। 20 যেহূ কলঅ, বাল দেবেদার নাঙে এক্কো সভা ডাগা ওক্। সেনত্তে সে কধাগান মানুচ্চুনে ফগদাঙ্ গুরি দিলাক্। 21 যেহূ সেক্কে ইস্রায়েলর বেক্ জাগানিত্ হবর্ পাদেল। সেক্কে বাল দেবেদার বেক্ পূজোগুরিয়্যেগুনে এইনে আঝিল্ অলাক্, কনজনে বাদ ন-পলাক্। তারা বাল দেবেদার মন্দিরোত্ সমানার পরেন্দি এন্ কাদাকাত্যে অলঅ, মন্দিরোর্ এক কিত্তেত্তুন্ ধুরি অন্য কিত্তেন্দি সং মান্জ্যে সয়-সাগজ্যে অলাক্। 22 সেক্কে যেহূ পোজাক্-চুগিদার্বোরে কলঅ, “বাল দেবেদা পূজোগুরিয়্যে বেক্কুনোত্তে পোজাক্ আন।” সেক্কে তে তারাত্তে পোজাক্ নিগিলেনেই আনিলো। 23 সে পরেন্দি যেহূ আর রেখবর পুয়ো্ যিহোনাদবে বাল দেবেদার মন্দিরোত্ সুমিলাক্। যেহূ বাল দেবেদার পূজো গুরিয়্যেগুনোরে কলদে, “তুমি গমে ডালে তোগেই চঅ যেনে লগেপ্রভুর চাগরুনো ভিদিরে কনজনে ইয়োত্ তমা ভিদিরে ন-থান্, বানা বাল দেবেদার পূজো গুরিয়্যেগুনে থেবাক্।” 24 সেক্কে তারা য়েমানডালি আর পূজ্যে-উৎসর্বর অনুষ্ঠান গুরিবাত্তে গেলাক্। যেহূ আশিজন মান্জ্যরে ইয়েন্ কোইনে উজিয়ার্ গুরি দিইনে বারেন্দি থিয়্যেই রাগেল, “মুই তোমা আঢত্ যিগুনোর্ ভারান্ দুয়োঙর্ তারাত্তুন্ একজনরেয়ো যুনি কনজনে ধেই যেবাত্তে দে সালে ধেই যেইয়্যে মানুচ্চোর্ পরাণানর বদলে তা পরাণান্ যেবঅ।” 25 যেহূ পূজ্যে-উৎসর্বর অনুষ্ঠানান্ থুম্ গরানার্ লগে লগে চুগিদার আর সেনাপতিগুনোরে উগুম দিলো, “তুমি ভিদিরে সুমিনে তারারে মারে ফেলঅ; একজন্অ যেনে ধেই যেই ন-পারন্।” সেক্কে তারা লাম্বা ছুড়িলোই তারারে কাবি ফেলেলাক্। চুগিদার আর সেনাপতিগুনে মরাকিয়্যেগানি মন্দিরোর্ বারেন্দি ফেলেই দিইনে ভিদিরে ঘরত্ গেলাক্। 26 বাল দেবেদার মন্দিরত্তুন্ পূজোর্ পাত্তরুন্ তারা নিগিলেই আনিনে পড়িলাক্। 27 সে পরেন্দি তারা বাল দেবেদার পূজোর্ পাত্তর্বো ভাঙি দিলাক্ আর মন্দিরান্ ভাঙি ফেলেলাক্। মানুচ্চুনে সেক্কেত্তুন্ ধুরি এজঅ সং সিয়েনরে আঘাছাল্ ইজেবে বেবহার গুরি এত্তন্। 28 এধোক্ক্যেন্ গুরিনে যেহূ ইস্রায়েলর ভিদিরে বাল দেবেদার পূজো বেন্ গুরি দিলো। 29 মাত্তর্ নবাটর পুয়ো যারবিয়ামে ইস্রায়েলরে দিইনে যেদক্কানি পাপ গোরেয়্যে সিয়েনিত্তুন্ তে সুরি ন-এজে। সিয়েনি অলঅ বৈথেল আর দানত্ সোনার্ গোরু ছগুনোরে পূজো গরানা। 30 লগেপ্রভু যেহূরে কলঅ, “মঅ চোগেন্দি যিয়েনি গম্ সিয়েনি গুরিনে তুই গম্ গোজ্যস্ আর আহাবর বংশর উগুরে মুই যিয়েনি গুরিবাত্তে চেইয়োং সিয়েনিয়ো তুই গোজ্যস্, সেনত্তে চের্ পুরুষ সং তর্ বংশধরুনে ইস্রায়েলর সিংহাসনত্ বুজি পারিবাক্।” 31 তো যেহূ পুরো মনান্ দিইনে ইস্রায়েলর গোজেন লগেপ্রভুর রীদি-সুদোমানি মানি চলানার পৌইদ্যেনে উজিয়ার্ ন-অলঅ। যারবিয়ামে ইস্রায়েলরে দিইনে যেদক্কানি পাপ গোরেয়্যে সিয়োত্তুন্ তে সুরি ন-এলঅ। 32-33 সে অক্তত্তুন্ ধুরি লগেপ্রভু ইস্রায়েল দেজর দুযিগান্ চিগোন্ গরা ধুরিলো। হসায়েলে ইস্রায়েলীয়গুনোর দেজর্ যর্দন গাঙর্ পূগেন্দি বেক্ জাগানিত্ তারারে ওদেই দিয়্যে ধুরিলো। সে জাগায়ান্ অলঅ অর্ণোন কিজিঙোর্ কায় অরোয়র সং পুরো গিলিয়দ আর বাশন দেজছান্। ইয়েন্ এলদে গাদ, রূবেণ আর মনঃশির চাগালাগান্। 34 যেহূর অন্য বেক্ কামর্ কধানি আর যুদ্ধোত্ তার জিদেনার্ কধানি “ইস্রায়েলর রাজাগুনোর বিজগ” নাঙে বোইবোত্ লেগা আঘে। 35 যেরেন্দি যেহূ তা পূরোণি মানুচ্চুনোর্ ইদু গেলগোই আর তারে শমরিয়াত্ গোর্ দিয়্যে অলঅ। তা জাগানত্ তা পুয়ো যিহোয়াহসে রাজা অলঅ। 36 যেহূ শমরিয়াত্ আটেশ্ বজর ইস্রায়েলর উগুরে রাজাগিরি গোজ্যে। |
Copyright © 2021 Bangladesh Bible Society
Bangladesh Bible Society