২ রাজাবলী 1 - Chakma Bibleঅহসিয়োর উগুরে লগেপ্রভুর সাজা 1 আহাবর মরাণার পরেন্দি মোয়াব দেজছানে ইস্রায়েল বিরুদ্ধে উরুং তুলিলো। 2 অহসিয় শমরিয়াত্ তা ঘরর্ উগুরে তালাত্ গুদিবোর্ জানালাবোন্দি তলে পড়িনে দুঘ্ পেইয়্যে। সেক্কে তে কয়েকজন মান্জ্যরে ইয়েন্ কোইনে পাধেই দিলো, “তুমি যেইনে ইক্রোণর দেবেদা বাল্-সবূবর ইদু পুযোর্ গরঅ, এ দুঘ্ পেয়্যেগানত্তুন্ মুই গম্ ওই পারিম্ নাকি।” 3 মাত্তর্ লগেপ্রভুর্ দূত্তো তিশ্বীয় এলিয়রে কলঅ, “তুই যেইনে শমরিয়া রাজার পাদেয়্যে মানুচ্চুনোর্ লগে দেগা গুরিনে তারারে কঅ, ‘ইস্রায়েলত্ কি গোজেনে নেই, তুমি ইক্রোণর দেবেদা বাল্-সবূবর ইদু পুযোর্ গুরিবাত্তে যর্? 4 ইয়েনত্তে লগেপ্রভু কত্তে, যে বিচ্ছোনানত্ তুই পরি আগচ্ সিয়েনত্তুন্ তুই আর ন-উদিবে। তুই ঘেচ্ছেকগুরি মুরি যেবে।’” ইয়েন্ কোইনে এলিয় গেলঅ। 5 সে মানুচ্চুনে রাজা ইদু ফিরি এজানার্ পরেন্দি তে তারারে পুযোর্ গুরিলো, “তুমি কিত্তেই ফিরি এলা?” 6 জোবত্ তারা কলাক্, “ইক্কো মান্জ্যে আমা লগে দেগা গুরিনে কলঅ, যিবে আমারে পাদেয়্যে আমি যেনে সে রাজাবো ইদু ফিরি যেইনে কোই, লগেপ্রভু কত্তে, ‘ইস্রায়েলত্ কি গোজেন নেই, তুই ইক্রোণর দেবেদা বাল্-সবূবর ইদু পুযোর্ গুরিবাত্তে মানুচ্ পাদর্? সেনত্তে তুই যে বিচ্ছোনানত্ পরি আগচ্ সিয়েনত্তুন্ আর্ ন-উদিবে। তুই ঘেচ্ছেকগুরি মুরি যেবে।’ ” 7 রাজা তারারে পুযোর্ গুরিলো, “যে মানুচ্চো তমা লগে দেগা গুরিনে এ কধাগান কোইয়্যে তারে চাদে কেধোক্কেন্?” 8 জোবত্ তারা কলাক্, “তাহ্ কিয়্যেগান কেশ্বলা এলঅ আর কমরত্ এলঅ চাম কমর্-বিজোনি।” রাজা কলঅ, “তে অলদে তিশ্বীয় এলিয়।” 9 ইয়েন পরেন্দি রাজা ইক্কো সেনাপতি আর তার্ পঞ্চাশজন সৈন্যরে এলিয়ো ইদু পাধেই দিলো। এলিয় সেক্কে ইক্কো মুড়ো উগুরে বুয়োই এলঅ। সে সেনাপতিবো এলিয়ো ইদু উদিনে কলঅ, “ও গোজেন মানুচ্, রাজা তরে লামি এবাত্তে কোইয়্যে।” 10 জোবত্ এলিয় সে সেনাপতিবোরে কলঅ, “মুই যুনি গোজেন মানুচ্ অং সালে আগাজত্তুন্ আগুন্ লামি এইনে যেনে তরে আর তর্ পঞ্চাশজন সৈন্যরে পুড়ি ফেলায়।” সেক্কে আগাজত্তুন্ আগুন্ পড়িনে সে সেনাপতি আর তার পঞ্চাশজন সৈন্যরে পুড়ি ফেলেল। 11 এ কধাগান শুনিনে রাজা আর ইক্কো সেনাপতি আর তার্ পঞ্চাশজন সৈন্যরে এলিয়ো ইদু পাধেই দিলো। সে সেনাপতিবো এলিয়রে কলঅ, “ও গোজেন মানুচ্, রাজা তরে ইক্কিনে লামি এবাত্তে কোইয়্যে।” 12 জোবত্ এলিয় কলঅ, “মুই যুনি গোজেন মানুচ্ অং সালে আগাজত্তুন্ লামি এইনে যেনে তরে আহ্ তঅ পঞ্চাশজন সৈন্যরে পুড়ি ফেলায়।” সেক্কে আগাজত্তুন্ গোজেন আগুনান্ পুড়িনে তারে আর তাহ্ পঞ্চাশজন সৈন্যরে পুড়ি ফেলেল। 13 ইয়েন পরেন্দি রাজা আর ইক্কো সেনাপতি আর তার্ পঞ্চাশজন সৈন্যরে পাধেই দিলো। এ তিন লম্বর সেনাপতিবো উগুরে উদিনে এলিয়ো মুজুঙোত্ মাঢা নিগিরিনে কোজোলী গুরি কলঅ, “ও গোজেন মানুচ্, তুই দোয়্যে গুরি আমা পঞ্চাশজন চাগর পরাণানি রোক্ষ্যে গর্। 14 চাহ্, আগাজত্তুন্ আগুন পড়িনে পত্তম্ দ্বিজন সেনাপতি আর তারার্ বেক্ সৈন্যগুন পুড়ি গেলাক্। মাত্তর্ এবেরা তুই মঅ পরাণান্ রোক্ষ্যে গর্।” 15 সেক্কে লগেপ্রভু দূত্তো এলিয়রে কলঅ, “তুই তাহ্ সমারে তলে যাহ্, তারে ন-দোরেচ্।” সেনত্তে এলিয় তাহ্ সমারে লামিনে রাজার্ ইদু গেলঅ। 16 তে রাজারে কলঅ, “লগেপ্রভু এ কধাগান কোইয়্যে, ‘পুযোর্ গুরিবাত্তে ইস্রায়েলত্ কি কনঅ গোজেন্ নেই, তুই ইক্রোণর দেবেদা বাল্-সবূবোর ইদু মানুচ্ পাদেয়োচ্? তুই এ কামান্ গোজ্যস্ বিলিনে তুই যে বিচ্ছোনানত্ পুরি আগচ্ সিয়েনত্তুন্ আর ন-উদিবে। তুই ঘেচ্ছেকগুরি মুরি যেবে।’” 17 এলিয়োরে দিইনে লগেপ্রভু যে কধাগান কোইয়্যে সে বাবোত্যে গুরি অহসিয় মুরি গেলঅ। অহসিয়োর্ কনঅ পুয়ো ন-এলঅ বিলিনে তা জাগানত্ যোরামে রাজা অলঅ। যিহূদার রাজা যিহোশাফটর পুয়ো যিহোরামর রাজাগিরির্ দ্বি বজরত্ তে রাজা ওইয়্যে। 18 অহসিয়োর অন্য বেক্ কাম কধানি “ইস্রায়েলর রাজাগুনোর বিজগ” নাঙে বোইবোত্ লেগা আঘে। |
Copyright © 2021 Bangladesh Bible Society
Bangladesh Bible Society