২ যোহন 1 - Chakma Bible

যোহনর দ্বিলম্বর্ চিধি

¹ গোজেনে যিবেরে বেঈ লোইয়্যে সেই মিলেবো আর তা পুয়ো-ছাগুনো ইধু সেই বুড়ো নেতাবো মুই এ চিধিগান লেগঙর্। গোজেনর্ সত্যগানত্যে মুই তমারে বেক্কুনোরে কোচ্‌পাং। বানা যে মুই তমারে কোচ্‌পাং সিয়েন নয়, মাত্তর্ যিগুনে গোজেনর্ সত্যগান হবর্ পেইয়োন সিগুনে বেক্কুনে তমারে কোচ্‌পান।

² যে সত্যগান আমা মনভিদিরে আঘে আর উমরত্যে আমা সমারে থেবঅ সেই সত্যগানত্যে আমি তমারে কোচ্‌পেই।

³ বাবা গোজেন আর সেই বাবার্ পুয়ো যীশু খ্রীষ্টত্তুন্ সত্য আর কোচ্‌পানালোই দোয়্যে, মেয়্যে আর সুগ-শান্দিগান আমা সমারে থেবঅ।

সত্য আর কোচ্‌পানা

⁴ বাবা আমারে যে উগুমানি দিয়্যে সেই ধগে তর্ কয়েক্কো পুয়ো-ছা গোজেনর্ সত্যর্ পধেদি চলদন্ দেগিনে মুই ভারী হুজি ওইয়োং।

⁵ আমি যেন একজন আরেকজনরে কোচ্‌পেই, ইয়েনই অলঅ তইধু মর্ কোজোলি। কোচ্‌পেইয়্যে বোন্নো, মুই যিয়েন লেগঙর্ সিয়েন কনঅ নুয়ো উগুম নয়, বরং এ উগুমান আমি পৌইল্যাত্তুন্ ধুরি পেইয়্যেই।

⁶ কোচ্‌পানাগান অলঅ গোজেনর্ উগুম মজিম্ চলানা। তুমি পৌইল্যাত্তুন্ ধুরি যে উগুমানর্ কধা শুনি এচ্চ্য সেবাবোত্যেগুরি তুমি কোচ্‌পানার্ পধেদি চলঅ।

⁷ জগদত্ এমন বোউত্ মানুচ্ নিগিল্লোন যিগুনে ছলনা গুরি বেড়ান। যীশু খ্রীষ্ট যে মানুচ্‌ ওইনে এচ্চ্যে তারা সিয়েন স্বিগের্ ন-গরন। এবাবোত্যে মানুচ্চুনে ছলনাগুরিয়্যে আর খ্রীষ্টর্ শত্রু।

⁸ তুমি সজাক্ থাগঅ, যেনে তমার কামর্ ফল ন-আরেইনে তুমি বক্‌শিজোর্ বেক্কান পেই পারঅ।

⁹ যিগুনে খ্রীষ্টর্ দিয়্যে শিক্ষ্যে ন-পালান্ আর সেই শিক্ষ্যেলোই থিদেবর্ ন-থান তারা মনভিদিরে গোজেনে নেই। মাত্তর্ যে সেই শিক্ষ্যেলোই থির্ গুরি থায় তা মনভিদিরে বাবে আর পুয়োবো দ্বিয়োজনে আঘন্।

¹⁰ কেঅ যুনি তমা ইধু এইনে সেই শিক্ষ্যে ন-দুয়োন্ সালে তমা ঘরত্ তারে মানি ন-লোইয়ো আর ভালেদিয়ো ন-জানেয়ো।

¹¹ যে তারে ভালেদি জানায় তে তার্ ভান্ন্যেই কামর্‌অ ভাগ লয়।

¹² যুনিয়ো তমা ইধু মর্ ভালোক্কানি কধা লিগিবার্ এলঅ তো কাগোজ্ আর কালিলোই সিয়েনি লিগিবাত্যে ন-চাং। তাত্তুন্ মুই তমা ইধু যেইনে মুজুঙোমুজুঙি ওইনে কধা কবার্ আজা গরং, যেন আমার হুজিগান ভুরি যায়।

¹³ গোজেনর্ বেঈ লোইয়্যে তঅ বোনুনোর্ পুয়ো-ঝিগুনে তরে ভালেদি জানাদন্।