২ করিন্হীয় 9 - Chakma Bible

¹ গোজেন মানুচ্চুনোত্যে দান দিবার্ যে কাম্ চলের্ সে পৌইদ্যেনে তমা ইধু লিগিবার অবুচ্চ্যই কনঅ দরকার নেই,

² কিয়া এ কামানত্ তমার আয়োজর্ কধা মত্তুন্ জানা আঘে। মুই তমারে নিইনে ম্যাসিডোনিয়া মানুচ্চুনো ইধু ইয়েন কোইনে দেমাগ্ গরংগে, গেলদে বঝরত্তুন্ ধুরি আখায়ার্ মানুচ্চুনে, অত্তাৎ তুমি এ দানুনোত্যে যুক্কোল্ ওই আঘ। তমার্ এ আওজ্‌চান তারার্ বেচ্‌ ভাগ্ মান্‌জ্যরে জাগেই তুল্ল্যে।

³ মুই এ ভেইয়ুনোরে পাধাঙর্ যেন এ পৌইদ্যেনে তমারে নিইনে আমার্ যে দেমাগ্ সিয়েন তারা ইধু সত্য বিলিনে প্রমাণ অয়, আর মুই যেধোক্ক্যেন গুরি কোইয়োং সেধোক্ক্যেন গুরি যেন ঘেচ্চ্যেকগুরি তুমি যুক্কোল্ থেই পারঅ।

⁴ সিয়েন ন-অলে ম্যাসিডোনিয়ার মানুচ্চুনে যুনি মঅ সমারে যেইনে দেগন্-দে, তুমি যুক্কোল্ নয় সালে তমা উগুরে আমার্ এদক্ বিশ্বেজত্যে আমি লাজেবং।

⁵ সেনত্যে মুই এ ভেইয়ুনোর্ আগে তমা ইধু যেবাত্যে কোজোলি গরানা দরকার মনে গুরিলুং, যেন তুমি যে দাঙর্ দান দিবাত্যে এগেম্ গোজ্জ্য সিয়েনর্ বেবস্থা তারা আগেদি গুরিনে থোই পারন্। ইয়েন্দোই তমাত্তুন্ জোর্ গুরিনে আমার্ কিজু আদায় গরা ন-পুরিবো, বরং তুমি যিয়েন দিবা সিয়েন দান ইজেবে আগেত্তুন্ ধুরি যুক্কোল্ থেবা।

দান গরানা পৌইদ্যেনে উপদেচ্‌

⁶ মনত্ রাগেয়ো, যে কম্ বিজি সিদে তে কম্ ফসল কাবিবো আর যে বেশ্ বিজি সিদে তে বেশ্ ফসল কাবিবো।

⁷ পত্তিজনে মনে মনে যিয়েন থিক্ গুরি থোইয়্যে তে যেন্‌ সিয়েন দে। কেঅ যেন মনত্ দুঘে ন-দে, কিয়া যে হুজি মনে দে গোজেনে তারে কোচ্‌পায়।

⁸ তমারে বেক্কানিন্দি দোয়্যে গুরিবার খেমতা গোজেনর্ আঘে, যেনে তমাত্তুন্ যিয়েনি দরকার সিয়েনি বেক্কানি নিত্য তমার থায়; আর সিয়েনর্ ফলে যেন তুমি বেক্‌ গম্ কামানিত্যে খুলো আঢে দান গুরি পারঅ।

⁹ পবিত্র বোইবোত্ লেগা আঘে, তে মন্ খুলো গুরিনে নাঢা মানুচ্চুনোরে দান গোজ্জ্যে; তার্ গম কামানি উমরত্যে থিদেবর্।

¹⁰ যিবে চাষাবলাবোত্যে বিজি আর হানাত্যে রুটি যোগেই দে তে তমারে সিদিবাত্যে বীজ্-অ যোগেব আর তার্ পরিমাণান্ বাড়েই দিবো। আর তে তমার্ গম কামর্ ফল বোউত্ দিবো।

¹¹ তুমি বেক্কানিন্দি থাগোয়্যে অবা যাতে তুমি খুলো আঢে দান গুরি পারঅ, আর সিয়েন্দোই আমা মাধ্যমে গোজেনরে ভালেদি জানা অবঅ।

¹² তমার্ এ কামর ফলে যে বানা গোজেন মানুচ্চুনোর অভাব পূরোণ অবঅ সিয়েন নয়; গোজেন উগুরে বোউত্ মান্‌জ্যে ভালেদি জানেবাক্।

¹³ তুমি যে বিশ্বেজি, তমার্ এই দান্ গরানাগানে সিয়েন প্রমাণ গুরিবো, আর সিয়েন দেগিনে তারা গোজেনরে বাঈনী গুরিবাক্, কিয়া তুমি খ্রীষ্ট পৌইদ্যেনে গম্ হবরান্ বিশ্বেজ্ গুরিনে তার্ বাধ্য ওইয়ো আর তুমি খুলো আঢে তারারে আর অন্য বেক্কুনোরে দান গোজ্জ্য।

¹⁴ গোজেনত্তুন্ তুমি যে বোউত্ দোয়্যে পেইয়ো সিয়েনত্যে তারা পুরো মনান্দোই তমাত্যে তবনা গুরিবাক্।

¹⁵ যে দানর্ কধা ভাষালোই ফগদাং গরা ন-যায় গোজেনর্ সেই দানত্যে তার্ ভালেদি ওক্‌।