২ করিন্হীয় 6 - Chakma Bible

¹ গোজেন সমারে কাম গুরিয়্যে ইজেবে আমি তমারে এ কোজোলিগান্ গুরির্, তুমি যেক্কে গোজেনর্ দোয়্যে পেইয়ো সেক্কে সিয়েন বিফল্ অবাত্তে ন-দুয়ো।

² গোজেনে পবিত্র বোইবোত্ কোইয়্যেদে, “যগাজ্যে গুরি মুই তঅ কধা শুন্ন্যং আর পাপত্তুন্ উদ্ধোর্ পেবার্ দিনোত্ মুই তরে সাহায্য গোজ্জ্যং।” চাহ্, ইক্কিনে যগাজ্জ্যে সময়, এইচ্চ্যে উদ্ধোর্ পেবার্ দিন।

প্রচারক পৌলর্ সেবা কামর্ প্রমাণ

³ খ্রীষ্টত্যে আমি যে কাম্ গুরিই সিয়েনর যেন বদ্‌‌নাঙ্ ন-অয় সেনত্তে আমি এমন্‌ কিজু ন-গুরির্ যিয়েনর কারনে কেঅ কনঅ বাবদে মনত্ দুঘ্ ন-পান্।

⁴ তাত্তুন্ বরং বেক্কানি পৌইদ্যেনে গোজেনর্ সেবাগুরিয়্যে বিলিনে আমি নিজোরে প্রমাণ গুরিই। অত্যেচার্, দযা আর দুঘোত্ বোউত্ ধৈজ্জ্য ধুরিনে আমি এ প্রমাণান্ দির্।

⁵ কদক্ আমারে পিদে ওইয়্যে, কদক্ জেলোত্ দিয়্যে ওইয়্যে, কদক্ দাংগা-হাংগামা আমা উগুরেদি যেয়্যে, কদক্ কাম গোজ্জ্যেই, কদক্ রেত্ আমি ঘুম্ ন-যেইনে কাদেয়্যেই আর কদক্‌‌বার্ ন-হেইনে থেইয়্যেই।

⁶ ইয়েনিবাদে আমার্ গম্ জিংকানিগানিলোই, আমার্ জ্ঞান, সোজ্জ্যগুণ আর দোয়্যেলোই, পবিত্র আত্মালোই, আমার দোল্ কোচ্‌পানালোই,

⁷ সত্যগান্ ফগদাঙত্যে আর গোজেনর্ খেমতালোই আমি প্রমাণ দিত্তে যে, আমি গোজেনর্ সেবাগুরিয়্যে। আরঅ দ্বি আঢে ন্যায়র্ অাত্যের্ তুলি লোইনে আমি প্রমাণ গুরিত্তে, আমি গোজেনর্ সেবাগুরিয়্যে।

⁸ মান্‌জ্যে আমারে সর্মান গোত্তোক্ বা অসর্মান গোত্তোক্, আমা পৌইদ্যেনে গম্ কোদোক্ বা ভান্ন্যেই কোদোক্, আমি প্রমাণ গুরিত্তে, আমি গোজেনর্ সেবাগুরিয়্যে। মান্‌‌জ্যে আমারে পাজি কন্, মাত্তর্ আসলে আমি সত্যর্ পধেদি চুলির্।

⁹ মান্‌জ্যে আমারে চিনিবাত্যে ন-চান্, মাত্তর্ বেক্কুনে আমারে চিনোন্। আমি মরেদে ধোক্ক্যেন্ ওর্, তো বাঁজি আঘিই। আমারে মার্‌‌ধোর্ গরা অর্, তো মারে ফেলা ন-অর্।

¹⁰ আমি বোউত্ দুঘ্ পেইর্, তো আমার মনানি নিত্য হুজীয়ে ভরা। আমি নিজে নাঢা, তো আমি ভালোক্ জনরে থাগোইয়্যে গুরির্। আমার কিচ্চু নেই, তো আমি বেক্কানির্ অধিকারী। এবাবোত্যেগুরি আমি প্রমাণ গুরির্ যে, আমি গোজেনর্ সেবা গুরিয়্যে।

¹¹ করিন্থীয় বিশ্বেজিগুন্, আমি তমা ইধু খুলোখুলি গুরি কধা কোইয়্যেই আর তমা ইধু আমা মনানি পুরোপুরিগুরি মিলি ধোজ্জ্যেই।

¹² আমি আমার মনানি তমাত্যে মেলি থোইয়্যেই, মাত্তর্ তুমি তমার্ মনানি আমা বিরুদ্ধে বন্ধ গুরি থোইয়ো।

¹³ মর্ পুয়ো ইজেবে মুই তমারে কঙর্, আমি যেধোক্ক্যেন গুরি তমাত্যে আমা মনানি মেলি থোইয়্যেই তুমিয়ো সেধোক্ক্যেন গুরি তমা মনানি আমাত্যে মেলি দুয়ো।

অবিশ্বেজিগুনো সমারে ন-মিজেইয়ো

¹⁴ তুমি অবিশ্বেজিগুনো সমারে এক জুঙোলত্ কানাগান্ ন-পাত্য। ন্যায়র্ সমারে অন্যেয়র্ মিজেনাগান কিত্যে? পহ্‌র আর আন্ধার ভিদিরে কি মিজেনা আঘে?

¹⁵ খ্রীষ্ট সমারে বলীয়ালর্, অত্তাৎ শদানর্ মিল্ বা কুধু? গোজেনর্ মানুচ্ ইজেবে বিশ্বেজির্ যে অধিকার সিয়েনত্ অবিশ্বেজির্ ভাগ্‌কান কি?

¹⁶ আর গোজেনর্ থেবার্ ঘরানত্ মূর্ত্তির জাগায়ান্ কুধু? আমি দঅ জেদা গোজেনর্ থেবার্ ঘর। পবিত্র বোইবোত্ গোজেনে কোইয়্যেদে, “মুই মঅ মানুচ্চুনো ইধু বজত্তি গুরিম, আর তারা সমারে আঢাউদো গুরিম। মুই তারার্ গোজেন ওম্, আর তারা মর্ নিজোর্ মানুচ্ অবাক্।”

¹⁷ গোজেনে আরঅ কোইয়্যেদে, “ইয়েনত্যে তুমি অবিশ্বেজিগুনো ভিদিরেত্তুন্ নিগিলি এজঅ আর ফারগ্ অ। কনঅ অসিজি জিনিস ন-ধোজ্জো, সালে মুই তমারে মানি লোম্।”

¹⁸ ইয়েন বাদে “বেগত্তুন্ খেমতাবলা গোজেনে কয়, ‘মুই তমার্ বাপ্ ওম্ আর তুমি মর্ পুয়ো-ছা অবা ’ ”