২ করিন্হীয় 4 - Chakma Bible

¹ এই বেবস্থাগানর্ কধা জানিবার ভারান্ গোজেনে দোয়্যে গুরিনে আমারে দিয়্যে বিলিনে আমি আজা ন-আরেই।

² মান্‌জ্যে গুমুরোত্ যেদক্কানি লাজ্ গরেদে বাবোত্যে কাম্ গরন সিয়েনি আমি এক্কুবারে ন-গুরিই। আমি কনঅ কামত্ ছলনা ন-গুরিই, গোজেন কধানিত্ কনঅ ভুলোর্ ভেজাল্ ন-দিই। আমি বরং গোজেনর্ সত্যগান্ ফগদাং গুরিনে তা মুজুঙোত্ বেক্‌ মানুচ্চুনোর্ বিবেগ ইধু নিজোরে মানি লোইয়্যে বিলিনে তুলি ধুরিই।

³ আমা গম্ হবরান্ যুনি ঢাক্যা থায় সালে যিগুনে ভস্ত ওই যাদন্ সিগুনো ইধু ঢাক্যা থায়।

⁴ অবিশ্বেজি মানুচ্চুনোর মনানি এ যুগোর্ দেবেদাগুনে কান্ গুরি দুয়োন যেন তারা গম্ হবরর্ পহ্‌রান্ ন-দেগন্। এ গম্ হবরানত্ খ্রীষ্টর্ মহিমাগান্ ফুদি উঠ্যে; আর এ খ্রীষ্টই অলঅ গোজেনর্ অবিকল্ ফগদাং।

⁵ আমি দঅ নিজো পৌইদ্যেনে প্রচার ন-গুরির্, বরং প্রচার গুরির্, যীশু খ্রীষ্টই প্রভু আর যীশুত্যে আমি তমার্ চাগর্ ওইয়্যেই।

⁶ আমি এ কধানি প্রচার গুরির্, কিয়া যে কোইয়্যে, “আন্ধারত্তুন্ পহ্‌র ওক্”, সেই গোজেনে আমা রিবেঙত্ জ্বোল্ল্যে, যেন তার্ মহিমাগান্ বুঝিবার পহ্‌রান ফগদাং পায়। এই মহিমাগান্ খ্রীষ্টর্ মুয়োনত্ আঘে।

মাত্ত্যা পিলেত্ থোইয়্যে ধন

⁷ মাত্তর্ এই ধন মাত্ত্যা পিলেত্ থুয়ো ওইয়্যে; আর আমিই সেই মাত্ত্যা পিলাগুন্। মাত্ত্যা পিলেত্ সিয়েন থুয়ো ওইয়্যে যেন মান্‌জ্যে বুঝি পারন্ যে, এ অসাধারণ দাঙর্ খেমতাগান আমা নিজোত্তুন্ ন-এজে বরং গোজেনত্তুনই এচ্চ্যে।

⁸ বেক্কানিত্তুন্ আমা উগুরে চাপ্ পরের্, তো আমি ভাঙি ন-পুরির্। বুদ্ধি-নেইয়্যে অলেয়ো আমি পুরোপুরি আজা নেইয়্যে ন-ওর্;

⁹ অত্যেচারিত অলেয়ো গোজেনে আমারে ন-ছাড়ের্; মাদিত্ আযার্ মারিলেয়ো আমি ভস্ত ন-ওর্।

¹⁰ আমি নিত্য প্রভু যীশুর্ মরণান্ আমা কিয়্যেত্ ভুগিনে লোই বেড়ের্, যেন আমা কিয়্যে ভিদিরে যীশুর্ জিংকানিগান্অ ফগদাং অয়।

¹¹ আমি যিগুনে বাঁজি আঘিই আমারে নিত্য যীশুত্যে মরণ আঢত্ তুলি দিয়্যে অর্, যেন আমার্ মরণর্ অধীন কিয়্যেত্ যীশুর জিংকানিগান্‌অ ফগদাং অয়।

¹² সেনত্যে আমা ভিদিরে মরণানে কাম্ গরের্ মাত্তর্ তমা ভিদিরে জিংকানিগানে কাম্ গরের্।

¹³ পবিত্র বোইবোত্ লেগা আঘে, “মুই বিশ্বেজ্ গোজ্জ্যং বিলিনে কধা কোইয়োং।” এই একই বাবোত্যে বিশ্বেজর্ মনভাব্‌পোই আমিয়ো বিশ্বেজ্ গুরিই বিলিনে কধা কোর্,

¹⁴ কিয়া আমি কোই পারিই, যিবে প্রভু যীশুরে জেদা গোজ্জ্যে তে তা সমারে আমারেয়ো জেদা গুরিবো আর তমা সমারে আমারেয়ো নিজো মুজুঙোত্ আঝির্ গুরিবো।

¹⁵ বেক্কানি তমার্ উপকারত্যে ওইয়্যে, যেন গোজেনর্ যে দোয়্যে ভালোক্কুন্ মান্‌জ্য উগুরে ঢালি দিয়্যে ওইয়্যে সেই দোয়্যেনত্যে ভালোকজনে গোজেনরে আরঅ বেশ্ গুরি ভালেদি জানান্ আর এবাবোত্যেগুরি গোজেনর্ বাঈনী অয়।

বিশ্বেজ্ গুরিনে জিংকানি কাদানা

¹⁶ ইয়েনত্যে আমি আজা ন-আরেই। যুনিয়ো আমা বারেদি কিয়্যেগান ক্ষয় ওই যার্ তো আমা ভিদিরে মানুচ্চো দিনে দিনে নুয়ো ওই উদের্।

¹⁷ ইক্কিনে আমি কয়েক দিনোত্যে যে সামান্য দুঘ্ ভুগির্ সিয়েনর্ ফলে আমি উমরত্যে মহিমাগান্ পেবং। এ মহিমাগান্ এদক্ বেশ্ যে, সিয়েন মাবা ন-যায়।

¹⁸ যিয়েন দেগা যায় আমি সিয়েন ইন্দি ন-চেইর্, বরং যিয়েন দেগা ন-যায় সিয়েন ইন্দি রিনি চেইর্। যিয়েন দেগা যায় সিয়েন কয়েক দিনোত্যে, মাত্তর্ যিয়েন দেগা ন-যায় সিয়েন উমরত্যে।