২ করিন্হীয় 3 - Chakma Bible

নুয়ো বেবস্থা

¹ আমি এ বেক্‌ কধানি কোইনে কি আরঅ নিজোর্ বাঈনী গরানা আরাম্ভ গুরির্? কনঅ কনঅ মান্‌জ্যর্ যেধোক্ক্যেন দরকার ওই থায়, আমার্-অ কি সেবাবোত্যে তমা ইধু বা তমাত্তুন্ বাঈনী পেবার্ চিধির্ দরকার ওই পোজ্জ্যে? কনদিন্‌অ নয়।

² আমা রিবেঙ ভিদিরে লেগা তুমি দঅ আমার চিধি। সেই চিধির্ কধা বেক্কুনে কোই পারন্ আর বেক্কুনে সিয়েন পোজ্জ্যন্।

³ তুমিই যে খ্রীষ্টর্ লেগা চিধি আর আমার্ কামর ফল সিয়েন গমেডালে দেগা যার্। এ চিধি কালিলোই লেগা ন-অয় বরং জেদা গোজেনর্ আত্মালোই লেগা ওইয়্যে। ইয়েন কনঅ পাত্তর্ আরুগ্ উগুরে লেগা ন-অয়, মান্‌জ্যর রিবেঙ উগুরে লেগা ওইয়্যে।

⁴ খ্রীষ্টর্ মাধ্যমে গোজেন উগুরে এবাবোত্যে ঘেচ্চ্যেকগুরি বিশ্বেজ্‌চান আমার ওইয়্যে।

⁵ মাত্তর্ সিয়েনর্ অত্তগান ইয়েন নয় যে, আমার্ নিজোত্তুন্ কনঅ কিজু গুরিবার্ খেমতা আঘে বিলিনে আমি দাবী গুরি পারিই, বরং আমার সেই যোগ্যতাগান্ গোজেনত্তুন্ এজে।

⁶ এক্কান নুয়ো বেবস্থার্ কধা জানিবাত্যে তেয়ই আমারে যোগাজ্জ্যে গুরি তুল্ল্যে। এ বেবস্থাগান্ অক্ষরে অক্ষরে আইন-কানুন্ পালানার্ বেপার নয়, মাত্তর্ পবিত্র আত্মার পরিচালনায় মনর্ বাধ্যতার্ বেপার; কিয়া আইন-কানুনে মরণ আনে, মাত্তর্ পবিত্র আত্মাগানে জিংকানি দান গরে।

⁷ পাত্তরত্ লেগা যে বেবস্থাগানর্ ফলে মরণান্ এজে সেই বেবস্থাগান দিবার্ সময়োত্ গোজেনর্ মহিমাগান ফগদাং ওইয়্যে। সেক্কে মোশির মুয়োন্অ গোজেনর্ মহিমালোই জ্বোল্‌জোল্ল্যে ওইয়্যে। সেই জ্বোল্‌জোল্ল্যেগান যুনিয়ো লারে লারে কুমি যার্ তো ইস্রায়েলীগুনে মোশির মুয়ো ইন্দি রিনি চেই ন-পারন্।

⁸ যুনি এ বেবস্থাগানর্ ফলে এদক মহিমাভরা ওই পারে, সালে পবিত্র আত্মার্ কামর ফল কি আরঅ মহিমাভরা ন-অবঅ?

⁹ যে বেবস্থাগান্দোই মান্‌জ্যরে দুষী বিলিনে থির্ গরা অয় তার্ কামান যুনি এদক্ মহিমাভরা, মাত্তর্ যে বেবস্থাগান্দোই মান্‌জ্যরে নিদ্দুজি বিলিনে মানি লুয়ো অয় তার্ কামান্ আরঅ কত্তমান্ বেশ্ মহিমাভরা!

¹⁰ আর ঘেচ্চ্যেকগুরি, যিয়েন আগে মহিমাভরা এলঅ, আসলে ইক্কিনে সিয়েনর্ কনঅ মহিমা আরঅ বোউত্ বেশ্।

¹¹ যিয়েন থুম্ ওই যার্ সিয়েন যেক্কে এদক্ মহিমাভরা এলঅ সেক্কে যিয়েন উমরত্যে থায় সিয়েন আরঅ কত্তমান্ বেশ্ মহিমাভরা।

¹² আমার্ এবাবোত্যে আজা আঘে বিলিনে আমি খুলোখুলি গুরি কধা কোই।

¹³ আমি মোশি ধোক্ক্যেন নয়, কিয়া মোশি তা মুয়োন্ ঢাগি দিয়্যে যেন তার্ মুয়োন জ্বোল্‌‌‌‌জোল্ল্যেগান্ কুমি যেইয়্যে সিয়েন ইস্রায়েলীয়গুনে ন-দেগন্।

¹⁴ মাত্তর্ সেই মানুচ্চুনোর্ মনানি দরঅ ওইয়্যে। সেনত্যে এজঅ যেক্কে সেই পুরোণি বেবস্থার্ কধা পড়া অয় সেক্কে তারার্ রিবেঙ উগুরে সেই একই বাবোত্যে পদ্দা থেই যায়, কিয়া বানা খ্রীষ্ট সমারে এগত্তর্ ওইনে সেই পদ্দাগান্ সুরি যায়।

¹⁵ মাত্তর্ এজঅ মোশির রীদি-সুদোমর্ বোইয়ুন পড়িবার অক্তত্ ইস্রায়েলীগুনোর্ রিবেঙত্ সেই পদ্দানত্ ঢাক্যে থায়।

¹⁶ মাত্তর্ তারা ভিদিরেত্তুন্ কেঅ যেক্কে প্রভু ইন্দি ফিরোন্ সেক্কে সেই পদ্দাগান্ সুরি যায়।

¹⁷ এই প্রভুই অলঅ পবিত্র আত্মা; আর যিয়েনত্ প্রভুর আত্মা সিয়েনত্ স্বাধীনতা।

¹⁸ ইয়েনত্যে আমি যিগুনে খ্রীষ্ট সমারে মিজেয়্যেই, আমি বেক্কুনে খুলো মুয়োদি আনাত্ দেখ্যে ফোটু ধোক্ক্যেন গুরি প্রভুর মহিমাগান্ দেগদে দেগদে নিজেয়ো মহিমায় বাড়ি উদিনে বুদুলি যেইনে তা ধোক্ক্যেন ওই যের্। প্রভুর, অত্তাৎ পবিত্র আত্মার্ খেমতালোই ইয়েন অয়।