২ করিন্হীয় 2 - Chakma Bible

¹ সেনত্যে মুই মনে মনে ঠিগ্ গুরিলুং, আরঅ তমারে দুঘ্ দিবাত্যে তমা ইধু ন-যেম্,

² কিয়া তমারে যুনি মুই দুঘ্ দুয়োং সালে মরে হুজি গুরিবো কন্না? যিগুনোরে মুই দুঘ্ দিম্ সেই তুমি বাদে মরে হুজি গুরিবার্ যে আর কেঅ নেই।

³ যেক্কে মুই যেম্ সেক্কে যিগুনোত্তুন্ মর্ হুজি পেবার্ কধা সিগুনোত্তুন্ মুই যেন দুঘ্ ন-পাং, সেনত্যে মুই এ কধাগান্ লেখ্যং। তমা উগুরে মর্ এ বিশ্বেজ্‌‌‌চান আঘে যে, মুই যিয়েনত্ হুজি পাং তুমিয়ো সিয়েনত্ হুজি পঅ।

⁴ বোউত্ দুঘ্ আর মনত্ দুঘে চোগো পানিলোই মুই তমা ইধু লেখ্যং। তমারে দুঘ্ দিবাত্যে মুই ন-লেগং, বরং তমা উগুরে মর্ কোচ্‌পানা যে কত্তমান্ গভীন্ সিয়েন জানেবাত্যে লেখ্যং।

অন্যেয় গুরিয়্যেবোরে ক্ষেমা গরানা

⁵ কেঅ যুনি মরে দুঘ্ দি থায় সালে কধাগান্ কড়া গুরি ন-কোইনে বানা ইয়েনই কোম্ যে, তে বানা মরে দুঘ্ নঅ দে, মাত্তর্ কিজু পরিমাণে তমারে বেক্কুনোরে দুঘ্ দিয়্যে।

⁶ তমাত্তুন্ বেশ্ ভাগ্ মান্‌‌‌‌জ্যে মিলিনে তারে যে সাজা দুয়ো সিয়েনই তার্ যগাজ্যে ওইয়্যে।

⁷ তুমি বরং ইক্কিনে তারে ক্ষেমা গরঅ আর সান্তনা দুয়ো, যেন অমকদ দুঘোত্ তে আজা ন-আরায়।

⁸ সেনত্যে মুই বিশেষ গুরিনে তমারে কোজোলি গরঙর্, তারে যে তুমি কোচ্‌পঅ সিয়েন প্রমাণ গুরি দেগঅ।

⁹ মুই তোলেই চেবার্ চেইয়োং তুমি বেক্কানি পৌইদ্যেনে বাধ্য আঘঅ কিনা, আর ইয়েনত্যে মুই তমা ইধু লেখ্যং।

¹⁰ কনঅ পৌইদ্যেনে যুনি কারেয়ো তুমি ক্ষেমা গরঅ সালে মুইয়ো তারে ক্ষেমা গরং। আর ঘেচ্চ্যেক গুরি যুনি মুই কনঅ কিজু ক্ষেমা গুরি থাং সালে খ্রীষ্ট মুজুঙোত্ তমাত্যে সিয়েন গোজ্জ্যং,

¹¹ যেন শদানে আমা উগুরে কনঅ সুযোগ-সুবিধে ন-পায়। তার্ ফন্দির্ কধা দঅ আমার্ অজানা নয়।

খ্রীষ্টর্ মাধ্যমে জিদেনা

¹² মুই ত্রোয়া শঅরত্ খ্রীষ্ট পৌইদ্যেনে গম্ হবর্ প্রচার গুরিবাত্যে যেইনে দেগিলুং, সিধু কাম্ গুরিবাত্যে প্রভু মরে এক্কো জু গুরি দিয়্যে।

¹³ মাত্তর্ তো মুই মনত্ শান্তি-ন-পাং, কিয়া মর্ বিশ্বেজি ভেই তীত সিধু ন-এলঅ। সেনত্যে ত্রোয়ার্ মানুচ্চুনোত্তুন্ বিদেয় লোইনে মুই ম্যাসিডোনিয়াত্ গেলুং।

¹⁴ গোজেনরে ভালেদি জানেই যে, আমি খ্রীষ্ট সমারে মিজেয়্যেই বিলিনে গোজেনে তার্-জিদেনার পদথ্ নিত্য আমারে চালেই নেযার্। খ্রীষ্টরে জানানা এক্কান তুম্বাজ ধোক্ক্যেন। গোজেনে তার্ জিদেনার্ পদথ্ সেই তুম্বাজ্‌চান আমা মাধ্যমে বেক্‌ জাগাইধু ছিদিই দে।

¹⁵ যিগুনে উদ্ধোর্ পাদন্ আর যিগুনে ভস্ত ওই যাদন্ তারা ইধু গোজেনর্ পক্ষে আমি ঘেচ্চ্যেকগুরি খ্রীষ্টর্ তুমবাচ্‌।

¹⁶ মাত্তর্ যিগুনে ভস্ত অদন্ তারা ইধু আমার্ তুম্বাজ্‌চান অলঅ মরণর্ বাচ্‌, যিয়েনর ফল অলঅ উমর্‌অ মরণ, আর যিগুনে উদ্ধোর্ পাদন্ তারা ইধু আমি জিংকানির বাচ্‌, যিয়েনর ফল অলঅ উমর্‌অ জিংকানি। এ কামর্ যগাজ্জ্যে কন্না?

¹⁷ নিজোর্ লাভত্যে যিগুনে গোজেনর্ কধালোই বেবসা গরন্ আমি সেবাবোত্যে মানুচ্চুনো ধোক্ক্যেন নয়; বরং খ্রীষ্ট সমারে মিজেইনে গোজেন মুজুঙোত্ গোজেনর্ পাদেয়্যে মানুচ্ ইজেবে আমি খাটি রিবেঙত্তুন্ কধা কোই।