২ করিন্হীয় 13 - Chakma Bible

শেজ্ বারত্ উজিয়ার গরানা

¹ মুই এই তিন বার্ তমা ইধু এজঙর্‌। পবিত্র বোইবোত্ লেগা আঘে, “দুই বা তিনজন সাক্ষীর্ কধালোই এই বেক্ বেপারানি সত্য বিলিনে প্রমাণ অয়।”

² দ্বি-বারত্ মুই যেক্কে তমা ইধু এলুং সেক্কে যিগুনে আগে পাপ গোজ্জ্যন্ তারার্ আর অন্য বেক্কুনোরে মুই উজিয়ার্ গোজ্জ্যং। ইক্কিনে মুই আজির্ ন-থেইনেয়ো আরঅ তমারে উজিয়ার্ গুরিনে কঙর্, মুই যেক্কে আরঅ এইম্ সেক্কে কাররে রেহাই ন-দিম,

³ কিয়া খ্রীষ্ট যে আমা মাধ্যমে কধা কর্ সিয়েনর্ প্রমাণ তুমি চর্। তে তমা পৌইদ্যেনে মন্‌মরা নয়, বরং তার খেমতাগান্ তে তমা ইধু দেগায়।

⁴ তারে মেরা মেরা অবস্থায় ক্রুশোত্ দিয়্যে ওইয়্যে ঠিগ্, মাত্তর্ গোজেনর্ খেমতালোই তে জেদা আঘে। আমি তা লগে মিজেইনে মেরা ওইয়্যেই, মাত্তর্ তমাত্যে গোজেনর্ খেমতালোই তা লগে আমি জেদা থেবং।

⁵ তুমি নিজোরে পোরোক্ষ্যে গুরি চঅ তুমি ঘেচ্চ্যেক্ গুরি খ্রীষ্টরে বিশ্বেজ্ গোজ্জ্য নাকি। তুমি নিজোরে তোলেই চঅ। তুমি কি ন-বুঝো, খ্রীষ্ট যীশু তমা রিবেঙত্ আঘে? খালিক্ তোলেই চানার্ পরেদি তুমি যুনি ভেজাল্যে বিলিনে ধরা ন-পরঅ।

⁶ মাত্তর্ মুই আজা গরং তুমি বুঝি পারিবা যে, আমি খাটি বিলিনে প্রমাণ ওইয়্যেই।

⁷ আমি গোজেন ইধু তবনা গুরিই যেন তুমি কনঅ ভান্ন্যেই কাম্ ন-গরঅ। অন্যগুনে যেন আমারে খাটি বিলিনে মনে গরন্ সেনত্যে আমি যে ইয়েন মাগির্ সিয়েন নয়। আমি চেই, তারা আমারে খাটি বিলিনে মনে ন-গুরিলেয়ো তুমি যেন যিয়েন গম্ সিয়েনই গরঅ।

⁸ সত্যর্ বিরুদ্ধে আমার কনঅ খেমতা নেই মাত্তর্ সত্যর্ পক্ষে আঘে।

⁹ যেক্কে আমি মেরা মেরা ওই আর তুমি বোলী অ সেক্কে আমি হুজী ওই। আর আমি তবনা গুরিই যেন তুমি বেক্কানি ঠিগ্ ওইনে খাটি অ।

¹⁰ ইয়েনত্যে মুই ন-থেবার্ সময়োত্ মুই তমা ইধু ইয়েনি লেগেঙর্, যেন লুমিলে পরেদি প্রভু মরে যে অধিকারান্ দিয়্যে সিয়েন দরমর গুরি বেবহার গরা ন-পড়ে। সে অধিকারানর্ উদ্দেচ্চ্য অলঅ তমারে উগুরে তুলোনা, তমারে ক্ষতি গরানা নয়।

শেজর্ ভালেদি

¹¹ ভেইলগ্, এবেরা বিদেয়। তুমি তমার বেক্কানি ঠিগ্ গুরিনে খাটি অ। মঅ কধানি মনযোগ্ দুয়ো, তমার এক্কুই মনভাব ওক্‌, আর তুমি সুগে-শান্দিয়্যে থাগঅ। সালে কোচ্‌পেইয়্যে আর শান্তির্ গোজেনে তমা লগে থেবঅ।

¹² কোচ্‌পানার্ মনভাব্‌পোই তুমি একজন আরেক জনরে ভালেদি জানেয়ো।

¹³ গোজেনর্ বেক্‌ মানুচ্চুনে তমারে ভালেদি জানাদন্।

¹⁴ আমার্ প্রভু যীশু খ্রীষ্টর্ দোয়্যে, গোজেনর্ কোচ্‌পানা আর পবিত্র আত্মালোই উদো লো-লি তমার্ বেক্কুনোর্ রিবেঙত্ থোক্।