২ করিন্হীয় 12 - Chakma Bibleপৌলর্ বিশেষ দর্শন 1 মত্তুন্ আরঅ এক্কেনা দেমাগ্ দেগা পরের্। যুনিয়ো সিয়েনত্ কনঅ লাভ নেই তো প্রভু যেদক্কানি দর্শন মরে দেগেয়্যে আর যিয়েনি মইধু ফগদাং গোজ্জ্যে সে পৌইদ্যেনে মুই ইক্কিনে কোম্। 2 খ্রীষ্ট বিশ্বেজি এক্কো মান্জ্যরে মুই চিনোং। চৌদ্দ বজর্ আগে স্বর্গ সং তারে তুলি নেযা ওইয়্যে। সেক্কে তে তার্ কিয়্যেদি এলঅ কি ন-এলঅ সিয়েন মুই কোই ন-পারং, গোজেনে কোই পারে। 3-4 মুই হবর্ পাং, সেই মানুচ্চোরে পরম দেজত্ তুলি নেযা ওইয়্যে। তে এমন্ কধা শুন্ন্যে যিয়েনি ভাষায় ফগদাং গরা ন-যায় আর মান্জ্যরে সিয়েনি কবাত্যেয়ো দিয়্যে ন-অয়। সেক্কে তে তার্ কিয়্যেদি এলঅ কি ন-এলঅ, সিয়েন মুই কোই ন-পারং; গোজেনে কোই পারে। 5 এ মানুচ্চো পৌইদ্যেনে মুই বাড়্ গুরিম, মাত্তর্ মর্ নিজো পৌইদ্যেনে বাড়্ ন-গুরিম, বানা মর্ বল্পোজ্জ্যেগান পৌইদ্যেনে গুরিম। 6 খালিক্ যুনি মুই দেমাগ্ গুরিবাত্যে চাং সালে বেদমা কাম্ ন-গুরিম, কিয়া মুই সত্য কধা কোম্। তো মুই দেমাগ্ ন-গুরিম, কিয়া মর্ কামানি দেগিনে বা মঅ কধানি শুনিনে মান্জ্যে মরে যিয়েন মনে গরন্ সিয়েনত্তুন্ বেশ্ যেন কেঅ মরে মনে ন-গরন্। 7 ভালোক্কানি মইধু ফগদাং ওইয়্যে বিলিনে মুই যেন বাড়্বো ন-অং, সেই আজায় মরে দুঘ্ দিবাত্যে মর্ কিয়্যেগানত্ এক্কো কাদা, অত্তাৎ শদানর্ দূত দিয়্যে ওইয়্যে। 8 প্রভুরে মুই তিন বার্ কোজোলি গোজ্জ্যং যেন তে মত্তুন্ সিবে দূর্ গরে। 9 মাত্তর্ তে মরে কোইয়্যেদে, “মর্ দোয়্যেগান্ তর্ পক্ষে যদেষ্ট; কিয়া বল্পোজ্জ্যেগানর্ মাধ্যমে মর্ বলান্ পুরোপুরি গুরিনে ফগদাং অয়।” সেনত্যে মর্ বল্গোজ্জ্যেগান পৌইদ্যেনে মুই অমকদ হুজি ওইনে বাড়্ গুরিম, যেন খ্রীষ্টর্ খেমতাগান্ মঅ উগুরে থায়। 10 সেনত্যে খ্রীষ্টত্যে বল্পোজ্জ্যে, অগমানে, যন্ত্রনায়, অত্যেচারে আর দিদ্দেরি অলেয়ো মুই হুজি; কিয়া যেক্কে মুই হ্রান্ সেক্কেই মুই বোলী। করিন্থীয়গুনোত্যে পৌলর্ চিন্তে 11 মুই বেদমা ওইয়োং ঠিগ্, মাত্তর্ তুমিই মরে সিয়েন অবাত্যে বাধ্য গোজ্জ্য, কিয়া তমার্ উচিত্ এলঅ মরে নাঙ্ গিনেনা। যুনিয়ো মুই কিচ্চু নয় তো তমার্ সেই বিশেষ প্রচারগ্কুনোত্তুন্ কনঅ বাবদে চিগোন নয়। 12 বোউত্ ধৈজ্জ্য ধুরিনে তমা ইধু নানান্ বাবোত্যে মহৎ আর আমক্ অবার্ কাম গুরিনে মুই নিজোরে এক্কো প্রচারক বিলিনে প্রমাণ গোজ্জ্যং। 13 অন্য মন্ডলীত্তুন্ তুমি কনঅ বাবদে চিগোন নয়; বানা এক্কান পৌইদ্যেনে তুমি চিগোন, আর সিয়েন অলঅ ইয়েন, মুই তমার্ লবাদোস্যে ন-অং। এ ভুলানত্যে মরে ক্ষেমা গরঅ। 14 মুই ইক্কিনে এই তিন বার তমা ইধু যেবাত্যে যুক্কোল্ ওই আঘং। মুই তমার্ লবাদোস্যে ন-ওম্, কিয়া মুই তমার্ কনঅ কিজু পেবাত্যে ন-চাং, তমারে পেবাত্যে চাং। পুয়ো-ছাগুনে যে তারার্ মা-বাবত্যে টেঙা-পৌইজ্যে জোমেবাক্ সিয়েন নয়, বরং পুয়ো-ছাগুনোত্যে টেঙা-পৌইজ্যে থুবোনা মা-বাব্পুনোর্ উচিত। 15 মুই অমকদ হুজি ওইনে তমাত্যে বেক্কানি খরচ্ গুরিম আর নিজোরেয়ো দি দিম্। যুনি মুই তমারে বেশ্ কোচ্পাং সালে কি তুমি মরে কম্ কোচ্পেবা? 16 যাওক্, মুই তমার্ লবাদোস্যে ন-অং, মাত্তর্ অয়ত কেঅ সিয়েনত্ কিজু কবাক্, মুই চালাক্ বিলিনে ছলনা গুরি তমারে ভুলেয়োং। 17 মুই যিগুনোরে তমা ইধু পাধেয়োং তারার্ কারঅ মাধ্যমে কি তমারে ঠোগেয়োং? 18 মুই তীতরে যেবাত্যে কোজোলি গোজ্জ্যং, আর তা সমারে সেই ভেইবোরেয়ো পাধেয়োং। তীতে কি তমারে থোগেয়্যে? কনদিন্অ নয়! মুই আর তীতে কি একই মনভাব্পোই একই কাম ন-গুরিই? 19 তমার্ কি মনে অয়, এ চিধিগানর্ মাধ্যমে আমি তমা ইধু নিজোর্ পক্ষে কধা কোর্? খ্রীষ্ট সমারে মিজেইনে আমি গোজেন মুজুঙোত্ কধা কোর্। কোচ্পেইয়্যে ভেইয়ুন, তমারে উগুরেদি তুলিবাত্যে আমি ইয়েনি কোর্। 20 মত্তুন্ দর্ লাগের্, মুই যেক্কে তমা ইধু এম্ সেক্কে মুই তমারে যেধোক্ক্যেন দেগিবাত্যে চাং অয়ত সেধোক্ক্যেন্ ন-দেগিম্, আর তুমিয়ো মরে যেধোক্ক্যেন্ দেগিবাত্যে চঅ সেধোক্ক্যেন ন-দেগিবা। মত্তুন্ দর্ লাগেত্তে, তমা ভিদিরে কোল্-কোজ্যে, ইংসে, মেজাজ দেগানা, দলাদুলি, নিন্দে, পর কধালোই তেম্মাং, বাড়্ গরানা আর ঝাগুলুগ্ থেবঅ। 21 মত্তুন্ দর্ লাগেত্তে, মুই যেক্কে আরঅ তমা ইধু যেম্ সেক্কে মঅ গোজেনে তমা মুজুঙোত্ মরে লাজত্ ফেলেব, আর যিগুনে আগে পাপ গোজ্জ্যন্ অদচ তারার্ অসিজিগানি, বেভিচের্ আর জঘন্য কামত্তুন্ মনানি ন-ফিরেন্, তারার্ বেক্কুনোত্যে মুই দুঘ্ পেম্। |
Copyright © 2021 Bangladesh Bible Society
Bangladesh Bible Society