২ করিন্হীয় 11 - Chakma Bibleপৌল আর ভন্ড প্রচারগ্কুন্ 1 মুই চাং তুমি মর্ এক্কেনা বেদমা কামানি সোজ্জ্য গরঅ। খালিক্, তুমি দঅ সোজ্জ্য গরর্। 2 মুই তমাত্যে মঅ মনত্ গোজেনর্ দিয়্যে এক গভিন্ জ্বালায় জ্বলঙর্, কিয়া মুই বানা এক্কো জামেইয় সমারে, অত্তাৎ খ্রীষ্ট সমারে তমার্ মেলা পৌইদ্যেনে ঠিগ্ গুরি রাগেয়োং, যেন সতী মোগ্ ইজেবে তাইধু তমারে তুলি দি পারং। 3 মাত্তর্ মর্ দর্ লাগেত্যে, সেই সাপ্পো তার্ পাজি বুদ্ধি খাদেইনে যেধোক্ক্যেন্ গুরি হবারে ভুলেয়্যে সেধোক্ক্যেন গুরি খ্রীষ্ট উগুরে খাটি আর মন ভোক্তিত্তুন্ কেঅ অয়ত তমারেয়ো ভুলেইনে নেযেব। 4 যে যীশুর্ কধা আমি প্রচার গোজ্জ্যেই কেঅ যেক্কে তারে বাদে অন্য কনঅ যীশুর্ কধা তমা ইধু প্রচার গরে, বা যে পবিত্র আত্মাগানরে তুমি পেইয়ো তারে বাদে যুদো কনঅ বাবোত্যে আত্মা যেক্কে তুমি পঅ, বা যে গম্ হবরান তুমি মানি লোইয়ো সিয়েনত্তুন্ যুদো কনঅ বাবোত্যে গম্ হবর্ যেক্কে তুমি পঅ, সেক্কে দঅ দেগঙত্তে হুজি ওইনে সিয়েনি বেক্কানি মানি লঅ। 5 মাত্তর্ মত্তুন্ দঅ মনে ন-অয় যে, মুই কন্ কিত্যেদি সেই “বিশেষ” প্রচারগ্কুনোত্তুন্ পিজেদি পড়ি আগং। 6 যুনিয়ো মুই গমেডালে কধা কোই ন-পারং তো মর্ যদেষ্ট জ্ঞান আঘে আর সিয়েন বেক্কানিন্দি তমা ইধু ফগদাং গোজ্জ্যং। 7 গোজেনর্ দিয়্যে গম্ হবর্ কধা মুই এনেবাদে তমা ইধু প্রচার গুরিনে নিজোরে তলে ফেল্ল্যং যেন তমারে দাঙর্ গুরি দেগেই পারং। ইয়েনত্ কি মুই পাপ গোজ্জ্যং? 8 তমারে সেবা গুরিবাত্যে মুই অন্য মন্ডলীত্তুন্ সাহায্য লোইয়োং, কধ গেলে তারারে লুদেয়োং। 9 তমা ইধু থেবার্ অক্তত্ যেক্কে মর্ অভাব ওইয়্যে সেক্কেয়ো মুই কারঅ লবাদোস্যে ন-অং, কিয়া যে ভেইয়ুনে ম্যাসিডোনিয়াত্তুন্ এচ্চ্যন্ সিগুনে মর্ অভাব্পান পূরোণ গোজ্জ্যন। কনঅ পৌইদ্যেনে মুই তমার্ কাঙেলেত্যে ন-অং আর ন-য়ো ওম্। 10 মইধু খ্রীষ্টর্ যে সত্যগান্ আঘে সে ধগে মুই কংগে, আখায়া রেজ্যর্ কনঅ জাগাত মর্ এ দেমাগ্ গরানাগান্ কেঅ বন্ধ গুরি ন-পারিবাক্। 11 কিত্যে মুই এ কধাগান্ কঙর্? তমারে কোচ্ ন-পাং বিলিনে না কি? গোজেনে কোই পারেদে যে, মুই তমারে কোচ্পাং। 12 যিগুনে তারার্ দেমাগ বেপার্লোই নিজোরে আমার সং সং বিলিনে দেগেবাত্যে চান্ তারা যেন সে জু-বো ন-পান্ সেনত্যে মুই যিয়েন গরঙর্ সিয়েন গরানাত্ থেম্। 13 আসলে সেবাবোত্যে মানুচ্চুনে দঅ ভন্ড প্রচারক আর দগাবাজ্। নিজোরে খ্রীষ্টর্ প্রচারক বিলিনে দেগেবার আজায় তারা নিজোরে বুদুলি ফেলান্। 14 ইয়েনত্ আমক্ অবার্ কিচ্চু নেই, কিয়া শদানেয়ো নিজোরে পহ্রত্ জদবদে স্বর্গদূত্ বিলিনে দেগেবার্ আজায় নিজোরে বুদুলি ফেলায়। 15 সালে যিগুনে শদানর্ সেবা গরন্ তারা যুনি নিজোরে বুদুলি ফেলেইনে দেগান্, তারা ন্যায়র্ সেবা গত্তন্ সালে সিয়েনত্ আমক্ অবার্ কি আঘে? তারার্ কামর্ যিয়েন পাওনা জেরেদি তারা সিয়েনই পেবাক্। প্রচারক ইজেবে পৌলর্ দুঘ্ পানা 16 মুই আরঅ কং, কেঅ যেন মরে বেদমা মনে ন-গরে। খালিক্ যুনি তুমি সেবাবোত্যে মনে গুরি থাগঅ সালে বেদমা ইজেবে মরে মানি লঅ, যেন মুই এক্কেনা দেমাগ্ গুরি পারং। 17 মুই ইক্কিনে যিয়েন কঙর্ সিয়েন প্রভুর্ উগুম মজিম ন-কঙর্, মাত্তর্ নিজো পৌইদ্যেনে দেমাগ্ গুরিবাত্যে যেইনে বেদমা ধোক্ক্যেন কঙর্। 18 মান্জ্যে যিয়েন নিইনে দেমাগ্ গরন্, ভালোক জনে যেক্কে সিয়েন্দোই দেমাগ্ গত্তন্ সেক্কে মুইয়ো ন-গুরিম কিত্ত্যে? 19 তুমি জ্ঞানী বিলিনে হুজি ওইনে বেদমাগুনোরে সোজ্জ্য গরঅ। 20 বানা সিয়েন নয়, যুনি কেঅ তমারে চাগর্ বানায়, তমারে বেক্কুনোরে ভস্ত গরে, তমারে ফালত্ ফেলায়, তমার্ গিরোজ্ অয় বা তমারে চুগোড়্ মারে, তুমি সিয়েনিয়ো সোজ্জ্য গরঅ। 21 মুই লাজেইনে হাম্ কাঙর্, ইয়েনি বেক্কানি পৌইদ্যেনে আমি তমা উগুরে দর্ দর্ ভাব এলং। যিয়েনিলোই অন্যগুনে বাড়্ গরদে সাহস গরন্ মুইও সিয়েনিলোই বাড়্ গরদে সাহস গরং; এ কধাগান মুই বেদমা ধোক্ক্যেন কঙর্। 22 যিগুনে দেমাগ্ গরন তারা কি ইব্রীয়? আমিয়ো সেধোক্ক্যেন। তারা কি ইস্রায়েলীয়? মুইয়ো সেধোক্ক্যেন। তারা কি অব্রাহামর্ গুট্টি? মুই সেধোক্ক্যেন। 23 তারা কি খ্রীষ্টর্ সেবাগুরিয়্যে? মুই আরঅ বেচ্ গুরি সেধোক্ক্যেন। মনত্ রাগেয়ো, মুই মাঢা-খারাব মান্জ্য ধোক্ক্যেন কধা কঙর্। খ্রীষ্টর্ সেবা গুরিবাত্যে যেইনে মুই তারাত্তুন্ বোউত্ বেশ্ কাম গোজ্জ্যং, আরঅ ভালোক্ বার জেল্ কাট্ট্যং, আরঅ ভালোক্ বার পিদে খেইয়োং, ভালোক্ বার মরণ মুয়োত্ পোজ্জ্যং। 24 যিহূদীগুনো আঢত্ পাঁচ বার মুই উনচল্লিচ্চো চাবুগোর্ বারি খেইয়োং, 25 বেত্ দিইনে তিন বার মরে মারা ওইয়্যে। এক বার মরে পাত্তর্ মারা ওইয়্যে। তিন বার মঅ জাহাজ্চান ডুবো ওইয়্যে। এক দিন আর এক রেত্ মুই সাগর পানিত্ এলুং। 26 মুই বোউত্ দেশ্ ঘুজ্জ্যং। বান্, দাগেত্, নিজো জাদর্ মানুচ্ আর অযিহূদীগুনোত্যে মুই দজাত্ পোজ্জ্যং। সিয়েন বাদে শঅরত্, ধূল্যেচর-চাগালাত, সাগরত্ আর ভন্ড ভেইয়ুনো ইধুয়ো মুই দজাত্ পোজ্জ্যং। 27 খ্রীষ্টর্ সেবা গুরিবাত্যে যেইনে মুই দুঘোত্অ জদবদে কাম গোজ্জ্যং। মুই ভালোক্ রেত্ জাগি রোইয়োং, পেট পরায় আর পানি তিরেজে দুঘ্ পেইয়োং, উবোস্ থেইয়োং, জারে আর কাবর-চুগরর্ অভাবে দুঘ্ পেইয়োং। 28 বারেদি এ বেপারানি বাদেয়ো বেক্ মন্ডলীগুনোত্যে পত্তি দিন মঅ উগুরে চিন্তের্ চাপ্ পরের্। 29 কেঅ বল্পোজ্যে অলে মুই কি তার্ বল্পোজ্যেগানর্ ভাগি ন-অং? কারঅ কারনে কেঅ পাপত্ পড়িলে মুই কি মনত্ জ্বালা ন-পাং? 30 যুনি মত্তুন্ বাড়্ গরা পরে সালে মুই মর্ বল্-পোজ্জ্যেগান্দোই বাড়্ গুরিম। 31 আমা প্রভু যীশু খ্রীষ্টর্ গোজেন আর বাপ্, যিবে উমরত্যে বাঈনী পেবার্, তে কোই পারে মুই মিজে কধা ন-কঙর্। 32 দামেস্কত্ রাজা আরিতার বেঈ লোইয়্যে শাসন গুরিয়্যেবো মরে ধুরিবাত্যে দামেস্কীয়গুনোর্ শঅরান্ চুগি দিবার্ উগুম দিয়্যে। 33 মাত্তর্ দেবাল ভিদিরে যে জানালা এলঅ সিয়েন্অ ভিদিরেদি মরে খারাঙত্ গুরিনে লামেই দিয়্যে ওইয়্যে, আর এবাবোত্যে গুরি মুই তা আঢত্তুন্ ধেই যেইয়োং। |
Copyright © 2021 Bangladesh Bible Society
Bangladesh Bible Society