২ করিন্হীয় 10 - Chakma Bible

নিজোর্ কামর্ পক্ষে পৌল

¹ খ্রীষ্টর্ চিদে আর দোয়্যেলু মনর্ কধা ইদোত্ রাগেইনে মুই পৌল নিজেই তমারে কোজোলি গরঙর্। মান্‌জ্যে কন্, মুই যেক্কে তমা কুরে থাং সেক্কে নাকি দোরে দোরে কাদাং, মাত্তর্ যেক্কে ন-থাং সেক্কে সাহসী অং।

² যিগুনে মনে গরন্ আমি সাধারন মান্‌জ্য ধোক্ক্যেন জিংকানি কাদের্, তারার্ বিরুদ্ধে যেত্তমান সাহস্ দেগানা মুই দরকার্ বিলিনে মনে গরং, মুই চাংগে যেন মুই এজানার্ পরেদি সেত্তমান্ সাহচ্‌ মত্তুন্ দেগা ন-পরে।

³ যুনিয়ো আমি লো-য়েরালোই মানুচ্ তো আমি যে যুদ্ধো গুরির্ সিয়েন লো-য়েরার্ যুদ্ধো নয়।

⁴ সাধা-সিধে মান্‌জ্যে যেদক্কানি আত্যের্‌লোই যুদ্ধো গরন্ আমি সিয়েনিলোই যুদ্ধো ন-গুরির্, মাত্তর্ গোজেনর্ খেমতালোই আমার্ দরমর দেবাল ঘিজ্যে আত্যেরানি ভাঙি ফেলেই পারে।

⁵ আমি মান্‌জ্যর্ মিজে যুক্তিগানি বর্‌‌বাদ গুরিই আর গোজেনরে জানিবার পধত্ মানা ইজেবে যেদক্কানি চিন্তে দেমাগ্ গুরিনে ভস্ত গুরিই; আর মনর্ পত্তি চিন্তেরে বন্দী গুরিনে খ্রীষ্টর্ বাধ্য গুরিই।

⁶ যেক্কে তুমি পুরোপুরি বাধ্যতায় এবা সেক্কেয়ো যিগুনে অবাধ্য থেবাক্ তারারে আমি সাজা দিবাত্যে যুক্কোল্ অবং।

⁷ তুমি দঅ বারেদি চেঙেরাগান দেগর্। কেঅ যুনি নিজোরে খ্রীষ্টর্ বিলিনে বিশ্বেজ্ গরে তো ইয়েন্অ তার্ চিন্তে গরানা উচিত যে, তে যেবাবোত্যেগুরি খ্রীষ্টর্ সেবাবোত্যেগুরি আমিয়ো খ্রীষ্টর্ মানুচ্।

⁸ প্রভু আমারে যে অধিকারান্ দিয়্যে সেই অধিকারানর্ উদ্দেচ্চ্য অলঅ তমারে গঠন গরানা, তমারে ক্ষোতি গরানা নয়। যুনিয়ো মুই এ অধিকারান্ নিইনে কিজু বাড়্ গুরি থাং তো সিয়েনত্যে মুই লাজ্ ন-পেইম্।

⁹ মর্ এ কধানিত্যেই মনে ন-গোজ্জ্য যে, মুই চিধির্ মাধ্যমে তমারে দর্ দেগাঙর্।

¹⁰ কনঅ কনঅ মান্‌জ্যে কন্, “তা চিধিয়ানি মনান্ ঝাগেরেই দে আর সিয়েনি খেমতাবলায়ো ঠিগ্, মাত্তর্ তে কায়কুরে থেলে দেগা যায়, তে বল্‌‌নেইয়্যে আর তার্ কধানি শুনেদে ধোক্ক্যেন্ এমন্ কিচ্চু নয়।”

¹¹ এবাবোত্যে মান্‌জ্যে বুঝোদোক্ যে, আমি ন-থেইনে আমা চিধির্ মাধ্যমে যে কধানি কোর্, আঝির্ অলে পরেদি ঠিগ্ সিয়েনই গুরিবোং।

¹² তমা ভিদিরেত্তুন্ কেঅ কেঅ নিজোর্ নাঙ্ ফুদেবাত্যে চান্। আমি তারার্ দলত্ নিজোরে ফেলেবাত্যে বা তারা সমারে নিজোরে তুলোনা গুরিবাত্যে সাহচ্‌ ন-গুরিই। কি মূর্খ তারা। কিয়া তারা নিজে যিয়েন গম্ মনে গরন্, সিয়েন সমারে নিজোরে তুলোনা গরন্ আর সিয়েন্দোই নিজোরে বিচের্ গরন্।

¹³ মাত্তর্ যেত্তমান্ দেমাগ্ গরানা উচিত্ সিয়েনর্ বারেদি আমি দেমাগ্ ন-গুরিবোং, বরং গোজেনে আমা কামর্ যে দুজিগান্ ঠিগ্ গুরি দিয়্যে সিয়েন ভিদিরে থেইনে দেমাগ্ গুরিবোং; আর সেই দুযিগান ভিদিরে তুমিয়ো আঘ।

¹⁴ সেনত্যে তমা কধা কোইনে যেক্কে আমি দেমাগ্ গুরিই সেক্কে দুযির্ বারেদি কিচ্চু ন-কোই। যুনি আমি তমা ইধু ন-যেদং সালে আমার্ এবাবোত্যে দেমাগ্ গরানা দুযির্ বারেদি যেদঅ। মাত্তর্ আমি খ্রীষ্ট পৌইদ্যেনে গম্ হবর্ প্রচার গত্তে গত্তে তমা ইধুয়ো যেইয়্যেই।

¹⁵ সিয়েনবাদে অন্যগুনোর্ কামানিলোইয়ো আমি দেমাগ্ ন-গুরির্-যুনি গুরিদোং সালে সিয়েন দুযির্ বারেদি যেদঅ। আমি এ আজাগান্ গুরির্ যে, তমার্ বিশ্বেজ্ বাড়ানার্ লগে লগে আমি তমা ভিদিরে আরঅ বোউত্ কাম্ গুরি পারিবোং।

¹⁶ সেক্কে তমাত্তুন্ যেইনে আরঅ দূরোর্ জাগানিত্-অ গম্ হবর্ প্রচার গুরি পারিবোং। ইয়েনত্যে কেঅ কোই ন-পারিবাক্ যে, অন্য মান্‌জ্যে যিয়েনত্ কাম্ গোজ্জ্যন্ তারার্ সিধুগোর্ কামানিত্যে আমি দেমাগ্ গুরির্।

¹⁷ মাত্তর্ পবিত্র বোইবোর্ কধা মজিম্, “যে দেমাগ্ গরে তে প্রভুরে নিইনে দেমাগ্ গোরোক্”;

¹⁸ কিয়া নিজোর্ নাঙ্ ফুদেবাত্যে কেঅ গম্ বিলিনে প্রমাণ ন-অয়, বরং প্রভু যিবেরে নাঙ্ গিনে তেয়ই গম্ বিলিনে প্রমাণ অয়।