২ করিন্হীয় 1 - Chakma Bible

¹ মুই পৌল গোজেনর্ আওজে খ্রীষ্ট যীশুর এক্কো প্রচারক্ ওইয়োং। মুই আর আমা বিশ্বেজি ভেই তীমথিয় করিন্থ শঅরর্ গোজেন মন্ডলী আর আখায়া রেজ্যর্ গোজেনর্ বেক্‌ মানুচ্চুনো ইধু এ চিধিগান্ লেগঙর্।

² আমা বাবা গোজেন আর আমা প্রভু যীশু খ্রীষ্ট তমারে দোয়্যে গোরোক্ আর শান্তি-দান গোরোক্।

সান্তনা দিয়্যে গোজেন

³ আমা প্রভু যীশু খ্রীষ্টর্ গোজেন আর বাবার্ বাঈনী ওক্‌। তেয়ই দোয়্যে-মেয়্যের্ বাব্; তেয়ই বেক্‌ সান্তনার্ গোজেন।

⁴ আমার্ বেক্‌ দুঘোত্ তে সান্তনা দান গরে, যেন তাত্তুন্ পেইয়্যে সান্তনা আমি অন্যগুনোর্ দুঘোত্অ দি পারিই।

⁵ খ্রীষ্ট ধোক্ক্যেন গুরি আমি যেবাবোত্যে বোউত্ দুঘ্ সোজ্জ্য গুরির্ সেবাবোত্যেগুরি তা মাধ্যমে বোউত্ সান্তনা পেইর্।

⁶ আমি যে দুঘ্ ভুগ্ গুরির্ সিয়েনি তমার সান্তনা আর উদ্ধোর নাঙেই গুরির্। আমি যে সান্তনা পেই সিয়েনি তমার্ সান্তনার্ নাঙে পেই। যেক্কে তুমি আমা ধোক্ক্যেন গুরি একই দুঘ্ ভোগ্ গুরিবে সেক্কে এ সান্তনাগান সেই দুঘ্‌‌কানি সমারে সোজ্জ্য গত্তে সাহায্য গুরিবো।

⁷ তমা পৌইদ্যেনে আমার্ থির্ বিশ্বেজ্ আঘে, কিয়া তুমি যেধোক্ক্যেন আমার্ দুঘোর্ ভাগী সেধোক্ক্যেন আমার্ সান্তনার্‌‌অ ভাগী।

⁸ এশিয়া রেজ্যত্ আমি যে দুঘোত্ পোজ্জ্যেই, আমি চেই সিয়েন যেন তুমি কোই পারঅ। সিয়েনত্ সোজ্জ্যর্ বারেদি এমন্‌ চাপ্ আমা উগুরে পোজ্জ্যে, বাঁজিবার্ আজা আমি ছাড়ি দিয়্যেই।

⁹ আমি মনে গোজ্জ্যেই, এবেরা আমি খামাক্কায় মুরি যেবং। মাত্তর্ এ অবস্থাগান আমার্ ইয়েনত্যে ওইয়্যে যেন আমি নিজো উগুরে নির্ভর ন-গুরিনে গোজেন, যিবে মরাগুনোরে জেদা গুরি তুলে, তা উগুরে নির্ভর গুরিই।

¹⁰ এক দর্‌‌গরেপারা মরণর্ আঢত্তুন্ তে আমারে রোক্ষ্যে গোজ্জ্যে আর এজঅ গরের্। আমি তা উগুরে এ আজাগান রাগেই যে, তে নিত্য আমারে রোক্ষ্যে গরানাত্ থেবঅ।

¹¹ আর তুমিয়ো আমাত্যে তবনা গুরিনে আমারে সাহায্য গোজ্জ্য। সালে ভালোক্ জনর্ তবনা গরানার্ ফলে আমি যে আশিদ্‌বাদ পেবং সিয়েনর্ কারনে আমাত্যে ভালোক্‌জনে গোজেনরে ভালেদি জানেবাক্।

পৌলর্ সল্লা বদলানা

¹² আমি যিয়েনত্যে দেমাগে ফুলি উদিই সিয়েন এই-আমা বিবেগ্‌‌‌কানিয়ে এ সাক্ষ্যগানি দেত্তে যে, গোজেনর্ দিয়্যে পবিত্রতালোই আর সরলতায় আমি বেক্ মানুচ্চুনো ইধু, বিশেষ গুরি তমা ইধু জিংকানি কাদেয়্যেই। সেই জিংকানিগানি আমি জগদ জ্ঞানর্ পরিচালনায় ন-কাদেই বরং গোজেনর্ দোয়্যেই পরিচালনায় কাদেয়্যেই।

¹³ তুমি যিয়েন পড়ি পারঅ বা বুঝি পারঅ সিয়েনর্ বারেদি আর অন্য কিজু আমি তমা ইধু ন-লিগির্।

¹⁴ মুই এ আজাগান্ গরং, তুমি যেবাবোত্যে গুরি কিজু আমারে বুঝি পাজ্জ্য, সেবাবোত্যে গুরি পুরোপুরি বুঝি পারিবা যে, প্রভু যীশুর্ এবার্ দিনোত্ তুমি যেবাবোত্যে গুরি আমার্ দেমাগ বিষয় অবা সেবাবোত্যে আমিয়ো তমাত্যেই বাড়্ গুরি পারিবোং।

¹⁵ এ কধাগান যে সত্য সিয়েন কোই পারিনে মুই আগেই তমা ইধু যেম্ বিলিনে থিগ্ গোজ্জ্যং, যেন্‌ তুমি দ্বিবার আশিদ্‌বাদ পেই পারঅ।

¹⁶ মুই ঠিগ্ গোজ্জ্যংগে যে, ম্যাসিডোনিয়া যেবার্ পধত্ তমা লগে দেগা গুরিনে যেম্ আর ম্যাসিডোনিয়াত্তুন্ আরঅ তমা ইধু ফিরি এম্, যেন তুমি মরে যিহূদিয়াত্ পাদেবার্ বেবস্থা গুরি পারঅ।

¹⁷ তুমি কি মনে গরঅ মুই কনঅ তামাশার্ মনভাব্‌পোই ইয়েনি ঠিগ্ গোজ্জ্যং? সাধারণ মানুচ্‌ যেবাবোত্যেগুরি একই সময়োত্ অয় আরঅ নয় কন্, মুই কি সেবাবোত্যেগুরি কনঅ কিজু ঠিগ্ গরং?

¹⁸ গোজেন বিশ্বেজ্‌বলা, এ কধাগান্ যেধোক্ক্যেন সত্য সেধোক্ক্যেন ইয়েন্অ সত্য যে, তমা ইধু আমা কধানি একই সময়োত্ অয় আর নয় ন-অয়।

¹⁹ যিবের্ কধা সীলবান, তীমথিয় আর মুই তমা ইধু প্রচার গোজ্জ্যেই সেই যীশু খ্রীষ্ট, গোজেনর্ পুয়ো, একই সময়োত্ অয় আর নয়;

²⁰ তে নিত্য “অয়”। গোজেনর্ বেক্ এগেমানি খ্রীষ্টর্ মাধ্যমে “অয়” ওই উদে। সেনত্যে গোজেনর্ বাঈনী গুরিবাত্যে খ্রীষ্টর্ মাধ্যমে আমি “আমেন” কোই।

²¹ যিবে খ্রীষ্ট লগে আমারে আর তমারে এগত্তর্ গুরিনে দরমর গুরি থিয়্যেই রাগেয়্যে তে অলঅ গোজেন।

²² অত্তাৎ তার্ নিজোর্ সোম্বোত্তি ইজেবে তে আমারে সীল্‌‌মহ্‌‌র গুরি থোইয়্যে; আর যিয়েনি আমারে দিবো তার্ পত্তম ভাগ্ ইজেবে তে আমা রিবেঙত্ পবিত্র আত্মারে দিয়্যে।

²³ মঅ জিংকানিগানর্ নাঙে শমক্ হেইনে মুই গোজেনরে সাক্ষী রাগেইনে কঙর্, সাজাত্তুন্ তমারে রেহাই দিবাত্যে মুই করিন্থ শঅরত্ ফিরি ন-যাং।

²⁴ গিরোজ ধোক্ক্যেন গুরি আমি যে তমার্ বিশ্বেজ্ উগুরে আঢ্ দির্ সিয়েন নয়, বরং তুমি যেন হুজী অ সেনত্যে তমা সমারে কাম্ গরঙর্; কিয়া বিশ্বেজে তুমি দরমর গুরি থিয়্যেই আঘঅ।