২ বংশধর 9 - Chakma Bibleশলোমন ইদু শিবা দেজর রাণী 1 শিবা দেজর্ রাণী শলোমনর্ সুনাঙ্ শুনিনে তারে আগাত্যে প্রশ্ন পুযোর্ গুরিনে পোরোক্ষ্যে গুরিবাত্তে যিরূশালেমত্ এলঅ। তে ভালোক্কুন্ মানুচ্ আর উট লোইনে শলোমন ইদু লুমিলো। উদো পিদোত্ এলদে তুম্বাজ্ মজলা, ভালোক্কানি সোনা আর মণি-মুক্তো। তে শলোমন ইদু এইনে তা মনত্ যিয়েনি যিয়েনি এলঅ সিয়েনি বেক্কানি তারে কলঅ। 2 শলোমনে তার্ বেক্ প্রশ্নগানির জোব্ দিলো; শলোমনর্ কনঅ কিচ্ছু এদক্ আগাত্যে ন-এলঅ যিয়েনি তে তারে বুঝেইনে কোই ন-পারে। 3 শিবার রাণী শলোমনর্ জ্ঞান আর তার্ বানেয়্যে রাজঘরান্ চেলঅ। 4 তে আরঅ দেগিলোদে তা টেবিলোর্ হানাগানি, তার্ কামগুরিয়্যেগুনোর্ থেবার জাগায়ানি, দোল্ কাবড়-চুগোড়্ উজ্যে তার্ সেবাগুরিয়্যেগুনোরে, তার্ পানীয় ভাগ গুরিদিয়্যেগুনোরে আর সে সিড়িগান, সে সিড়ি গানন্দি তে লগেপ্রভুর ঘরত্ উদিদোগোই। ইয়েনি দেগিনে তে আমক্ ওই গেলঅ। 5 তে রাজারে কলঅ, “মঅ দেজত্ থাগদে তঅ কামত্ আর জ্ঞান পৌইদ্যেনে যে হবরানি মুই শুন্যং সিয়েনি সত্য। 6 মাত্তর্ ইদু এইনে নিজো চোগেন্দি ন-দেগানা সং মুই সে কধানি বিশ্বেজ্ ন-গরঙ্। ঘেচ্চেকগুরি তর্ জ্ঞানর্ অদ্দেক্অ মরে কুয়া ন-অয়। যে হবরান্ মুই পেয়োং তঅ গুণান্ সিত্তুন্অ বেশ্। 7 তঅ মানুচ্চুনে কদক্ সুগী! যিগুনে নিত্য তঅ লগে থান্ আর তঅ জ্ঞানর্ কধানি শুনোন্ তর্ সে কামগুরিয়্যেগুনে কদক্ ভাগ্যত্তে! 8 তর্ গোজেন্ লগেপ্রভুর বাঈনী ওক্, যিবে তঅ উগুরে হুজি ওইনে তরে তা সিংহাসনত্ বোজেয়্যে যেনে তুই তর্ গোজেন লগেপ্রভুর ওইনে রাজাগিরি গুরি পারচ্। ইস্রায়েলীয়গুনোরে তে কোচ্পায় আর তারারে থিদেবর্ গুরিবাত্তে চায় বিলিনে তে সুবিচের্ আর ন্যায় রোক্ষ্যেত্তে তরে রাজা বানেয়্যে।” 9 তে রাজারে চের্ আজার পাঁচশ বাওত্তুর্ কেজি বেশ্ সোনা, ভালোক্কানি তুম্বাজ্ মজলা আর মণি-মুত্তো দিলো। শিবার রাণী রাজা শলোমনরে যে বাবোত্যে মজলা দিয়্যে সে বাবোত্যে মজলা আর কনদিন্অ দেজত্ দেগা ন-যায়। 10 ইয়েনিবাদে হীরম আর শলোমনর্ যে মানুচ্চুনে ওফীরত্তুন্ সোনা আনিদাক্ তারা চন্দন গাজ্ আর মণি-মুক্তোয়ো আনিদাক্। 11 রাজা সে বেক্ চন্দন গাজ্চুন্দোই লগেপ্রভুর ঘরর্ আর রাজঘরর্ সিড়ি আর গান গেইয়্যেগুনোত্তে বীণা আর হার্মনি বানেল। এর্ আগেন্দি এদক্ চন্দন গাজ্ যিহূদা দেজত্ কনদিন্অ দেগা ন-যায়। 12 শিবার রাণী যিয়েন্ আওজ্ গুরিদো আর চেদঅ রাজা শলোমনে সিয়েনি বেক্কানি তারে দিলো। রাণী তাত্তেই যিয়েনি আন্যে তাত্তুন্ বেশ্ তে তারে দিলো। সে পরেন্দি রাণী তা মানুচ্চুনোরে লোইনে নিজোর্ দেজত্ ফিরি গেলঅ। রাজা শলোমনর্ সয়-সাগোজ্যে 13 পত্তি বজর্ শলোমন ইদু যে সোনানি এদঅ সিয়েনির ভরান্ এলদে পেরায় ছাব্বিশ টন। 14 ইগুনে বাদেয়ো বণিক আর বেপারীগুনে সোনা আনিদাক্ আর আরবর বেক্ রাজাগুনে আর দেজর্ শাজন্গুরিয়্যেগুনে শলোমন ইদু সোনা আর রূবো আনিদাক্। 15 রাজা শলোমনে পিদেয়্যে সোনালোই দ্বিশত্ দাঙর্ ঢাল বানেল। পত্তি ঢালত্ সাত কেজি আসতোশত্ গ্রাম সোনা লাগিলো। 16 পিদেয়্যে সোনালোই তে তিনশত্ চিগোন্ ঢালঅ বানেল। সিয়েনির পত্তিগানত্ সোনা লাগিলোদে তিন কেজি নয়শঅ গ্রাম। তে সিয়েনি লেবানন-ঝার-ঘরত্ রাগেল। 17 ইয়েনি পরেন্দি রাজা এ্যদো দাদর্ এক্কান্ দাঙর্ সিংহাসন বানেইনে খাটি সোনালোই সিয়েন্ বেড়েই দিলো। 18 সে সিংহাসন সিড়িগানর ছঅগান পোইদ্যে এলঅ আর তা লগে লাগেয়্যে এলদে টেঙ্ রাগেবার্ এক্কান্ সোনার্ আসন। বুজিবার্ জাগানর্ দ্বিকিত্তেন্দি আঢ্ থবার্ এলঅ আর আঢ্তানি থবার্ ডাগেন্দি এলদে থিয়্যেই রোইয়্যে সিংহমূত্তি। 19 সে ছঅগান্ পোইদ্যের্ পত্তিগানর দ্বিকিত্তেন্দি এক্কান্ গুরিনে বেক্কানিয়ে বারবুয়ো সিংহমূত্তি এলঅ। অন্য কনঅ রেজ্যত্ এধোক্ক্যেন সিংহাসন কনদিন্অ ন-বানান্। 20 শলোমন পানীয়র বেক্ পিলেগুন্ এলাক্কে সোনার আর লেবানন-ঝার-ঘরর্ বেক্ পিলেগুন্অ এলাক্কে খাটি সোনালোই বানেয়্যে। শলোমন সময়োত্ রূবোর্ সেধোক্ক্যেন কনঅ দাম ন-এলঅ। 21 রাজার্ কদক্কানি দাঙর্ দাঙর্ জাহাজ হীরম মানুচ্চুনোর লগে নেযেইনে তর্শীশোত্ যেদাক্। পত্তি তিন বজর্ পর পর সে তর্শীশ-জাহাজছানিয়ে সোনা, রূবো, এ্যদো দাত্, বান্দর্ আর বেবুন লোইনে ফিরি এদাক্। 22 রাজা শলোমনে পিত্থিমীর অন্য বেক্ রাজাগুনোত্তুন্ তাগোয়্যে আর জ্ঞানী ওই উদিলো। 23 গোজেনে শলোমন মনানত্ যে জ্ঞানান্ দিয়্যে সে জ্ঞানবলা কধানি শুনিবাত্তে পিত্থিমীর্ বেক্ দেজর্ রাজাগুনে তা লগে দেগা গুরিবাত্তে চেট্ট্যা গুরিদাক্। 24 যিগুনে এদাক্ তারা পত্তিজনে কিজু না কিজু বক্শিজ্ আনিদাক্। সিয়েনি ভিদিরে এলদে সোনা-রূবোর্ পিলে, কাবড়-চুগোড়, আত্যের্, তুম্বাজ্ মজলা, ঘোড়া আর খচ্চর। বজরর্ পর বজর এ বাবোত্যে চলিদো। 25 ঘোড়া আর রথ রাগেবাত্তে শলোমনর্ চের্ আজার ঘর এলঅ। তার্ বার আজার ঘোড়াবাহিনী এলাক্; তারারে তে রথ রাগেবার্ শঅরানিত্ আর যিরূশালেমত্ নিজো ইদু রাগেদ। 26 তে ইউফ্রেটিস গাঙত্তুন্ পলেষ্টীয়গুনোর্ দেজ্ছান আর মিসরর দুযি সং বেক্ রাজাগুনো উগুরে রাজাগিরি গুরিদো। 27 রাজা যিরূশালেমত্ রূবোগানরে গুরিলো পাত্তর ধোক্ক্যেন গুণি ন-পুড়েইয়্যে আর এরস গাজ্চুনোরে গুরিলো তলেদি মুড়োমুড়ি চাগালার্ গোজেয়্যে ডোমোর্ গাজঅ ধোক্ক্যেন ভালোক্কুন্। 28 শলোমন ঘোড়াগুন মিসর আর অন্য বেক্ দেজছানিত্তুন্ আনা অদঅ। শলোমনর্ মরাণা 29 শলোমনর্ অন্য বেক্ কামানির কধানি পৌইল্যাত্তুন্ ধুরি থুম্ সং ভাববাদী নাথনর লেগাত্, শীলোনীয় অহিয়র আগাম কধাত্ আর নবাটর পুয়ো যারবিয়াম পৌইদ্যেনে “ইদ্দো দর্শকর দর্শন” নাঙে বোইবোত্ লেগা আঘে। 30 শলোমনে যিরূশালেমত্ চোল্লিশ বজর ধুরিনে পুরো ইস্রায়েল জাদ্তো উগুরে রাজাগিরি গোজ্যে। 31 সে পরেন্দি তে তার্ পূরোণি মানুচ্চুনো ইদু গেলগোই; তারে তা বাবঅ দায়ূদো শঅরত্ গোর্ দিয়্যে অলঅ। সে পরেন্দি তার্ পুয়ো রহবিয়ামে তা জাগানত্ রাজা অলঅ। |
Copyright © 2021 Bangladesh Bible Society
Bangladesh Bible Society