২ বংশধর 7 - Chakma Bibleউবোসনা-ঘর থিদেবর্ গরানা 1 শলোমনর্ তবনাগান থুম্ অলে স্বর্গত্তুন্ আগুন্ লামি এইনে পূজ্যে আর অন্য উৎসর্বর জিনিসছানিরে পুড়ি ফেলেল আর উবোসনা-ঘরান লগেপ্রভুর্ মহিমায় পরিপূরণ অলঅ। 2 সেনত্তেই ধর্মগুরুগুনে সিয়েনত্ সোমেই ন-পারিলাক্। 3 আগুনান্ লামি এত্তে দেগিনে আর তবনা-ঘর উগুরে লগেপ্রভুর মহিমা দেগিনে বেক্ ইস্রায়েলীয়গুনে পাত্তর্লোই বান্যে উদোনত্ আদু পাড়ি পড়িনে লগেপ্রভুরে তারার্ মন ভোক্তি জানেলাক্ আর ইয়েন্ কোইনে তারে নাঙ্ গিনিলাক্, “তে মংগলময়; তার্ কোচ্পানাগান্ উমরত্তে।” 4 সে পরেন্দি রাজা আর বেক্ মানুচ্চুনে লগেপ্রভুর মুজুঙোত্ উৎসর্বর অনুষ্ঠানান্ গুরিলাক্। 5 রাজা শলোমনে বেঈশ আজার গোরু আর এক লাখ্ কুড়ি আজার ভেড়া ছাগল উৎসর্ব গুরিলো। ইঙিরিনে রাজা আর বেক্ মানুচ্চুনে গোজেন ঘরান্ থিদেবর্ গুরিলাক্। 6 ধর্মগুরুগুনে তারা জাগানত্ যেইনে থিয়্যেলাক্ আর লেবীয়গুনেয়ো লগেপ্রভুর নাঙে বাজেবাত্তে বাজানাগুন্ লোইনে তারা জাগানত্ যেইনে থিয়্যেলাক্। লেবীয়গুনোর মুজুঙো-মুজুঙি থিয়্যেইনে ধর্মগুরুগুনে তারার্ তূরীগুন্ বাজেলাক্ আর ইস্রায়েলীয়গুনে বেক্কুনেই থিয়্যেই রলাক্। লেবীয়গুনোর এ বাজানাগুন্ রাজা দায়ূদে লগেপ্রভুর বাঈনী গুরিবাত্তে বানেয়্যে আর সিগুন যেক্কেনে বাজেদাক্ তে লগেপ্রভুরে নাঙ্ গিনিনে কদঅ, “তার্ কোচ্পানাগান্ উমরত্তে।” 7 শলোমনে লগেপ্রভুর ঘর মুজুঙেন্দি উদোন সংমোধ্যেগান লগেপ্রভুর নাঙে যুদো গুরি রাগেল আর সিয়েনত্ তে পূজ্যে-উৎসর্বর অনুষ্ঠান গুরিলো আর উদোলোলি-উৎসর্বর তেলানি উৎসর্ব গুরিলো, কিত্তে পিদোলর্ যে পূজোবো তে বানেয়্যে সিবে পূজ্যে-উৎসর্বর আর শোজ্য-উৎসর্বর জিনিসছানিত্তুন্ আর তেলানিত্তুন্ চিগোন্ এলঅ। 8-9 সে অক্তত্ শলোমনে আর তা লগে বেক্ ইস্রায়েলীয়গুনে, অত্তাৎ হমাৎ চাগালাত্তুন্ মিসরর্ শুগুনো গাঙান্ সং বেক্ চাগালাত্তুন্ এচ্ছ্যে মানুচ্চুনোর্ এক্কো দাঙর্ দল্ সাত দিন ধুরিনে ডালিপূজো উৎসর্বর অনুষ্ঠানর পরব্ পালন গুরিলাক্। আস্তো দিনোত্ তারা এক্কো তেম্মাং ডাগিলাক্ আর আরঅ সাত দিন সং পরপ্পো পালন গুরিলাক্। 10 সাত মাজর্ তেইশ দিনোত্ রাজা মানুচ্চুনোরে যার্ যার্ ঘরত্ পাধেই দিলো। দায়ূদ, শলোমন আর তা মানুচ্ ইস্রায়েলীয়গুনো উগুরে লগেপ্রভু যেদক্কানি ভালেদি গোজ্যে সিয়েনিত্তে তারা হুজি ওইনে ফিরি গেলাক্। লগেপ্রভু শলোমনরে দেগা দিলো 11 লগেপ্রভুর ঘর আর রাজঘর বানেবাত্তে শলোমনর্ মনত্ যিয়েনি গুরিবার আওজ্ এলঅ সিয়েনি বেক্কানি তে গমেডালে থুম্ গুরিলো। 12 পরেন্দি এক্ রেদোত্ লগেপ্রভু শলোমনরে দেগা দিইনে কলঅ, মুই তর্ তবনাগান শুন্যং আর উৎসর্বর অনুষ্ঠানান্ গুরিবাত্তে ঘর ইজেবে মত্তে মুই এ জাগায়ান বেঈ লোইয়োং। 13 যেক্কেনে মুই আগাজছান্ নাঢি দিম্ আর ঝড় ন-পুরিবো, বা দেজ্ছান ভস্ত গুরিবাত্তে পুগ্যুক্কুনোরে উগুম দিম্, বা মঅ মানুচ্চুনো ভিদিরে ভানা পাধেই দিম্, 14 সেক্কে মঅ মানুচ্চুনে, যিগুনোরে মর্ মানুচ্ বিলিনে ডাগন্ তারা যুনি নম্র ওইনে তবনা গরন্ আর মর্ মেইয়্যে চান্ আর ভান্ন্যেই পধত্তুন্ ফিরোন্, সালে স্বর্গত্তুন্ সিয়েনি শুনিনে মুই তারার্ পাপ্পানি খেমা গুরিম্ আর তারার্ দেজ অবস্থাগান্ ফিরেই দিম্। 15 এ জাগানত্ যে তবনা গরা অবঅ সিয়েন উগুরে মঅ চোগকুন্ আর কানান খুলো থেবঅ। 16 এ উবোসনা-ঘরান্ মুই বেঈ লোইনে উমরত্তে মর্ থেবার্জাগা ইজেবে মঅ নাঙে যুদো গোজ্যং। ইয়েন উগুরে আমিঝে মঅ চোগকুন্ আর মনান্ থেবঅ। 17 তঅ বাবে দায়ূদে যেধোক্ক্যেন গুরিনে চলিদো তুই যুনি সেধোক্ক্যেন গুরিনে মঅ মুজুঙোত্ চুলিদে আর মর্ বেক্ উগুমানি, সুদোমানি আর হুকুমানি পালন গর্ 18 সালে মুই তর্ রাজসিংহাসনান্ থিদেবর্ গুরিম্, কিত্তে মুই তঅ বাব দায়ূদোর ইদু শমক্ খেইনে কোইয়োং, ইস্রায়েল উগুরে শাজন্ গুরিবাত্তে তঅ বংশত্ মান্জ্যর অভাব ন-অবঅ। 19 “মাত্তর্ তুমি যুনি মঅ পথ্তানত্তুন্ সুরি যগোই আর যেদক্কানি সুদোম আর উগুম মুই তমারে দুয়োং সিয়েনি ছাড়িনে অন্য দেব-দেবেদাগুনোরে সেবা আর পূজো গরঅ, 20 সালে মুই মর্ যে দেজ্চান তমারে দুয়োং সিয়েনত্তুন্ শিঙোর্ সুদ্ধো উগুরে ফেলেম্ আর মঅ নাঙে যে উবোসনা-ঘরান্ যুদো গোজ্যং সিয়েন্ মঅ চোগো মুজুঙোত্তুন্ দূর্ গুরি দিম্। সেক্কে বেক্ জাদ্তুনো ইদু মুই সে ঘরানরে ঈচ্ গরানা আর তামাজার্ কান্ড গুরি তুলিম্। 21 এ উবোসনা-ঘরান্ ইক্কিনে এদক্ দাঙর্ অলেয়ো সেক্কে যিগুনে সিয়েন কায়-কুরেন্দি যেবাক্ তারা উঘুরি উদিনে পুযোর্ গুরিবাক্, ‘কিত্তেই লগেপ্রভু এ দেজ্ছান আর এ তবনা-ঘরান উগুরে এধোক্ক্যেন গুরিলো?’ 22 ইয়েনর্ জোবত্ লগেপ্রভু কবদে, ‘ইয়েনর্ কারনান অলঅ, যিবে তারার্ পূরোণি মানুচ্চুনোরে মিসর দেজত্তুন্ নিগিলেই আন্যে সে পূরোণি মানুচ্চুনোর গোজেন লগেপ্রভুরে তারা ছাড়ি যেইয়োন। তারা দেব-দেবেদাগুনো ইন্দি যেইনে তারারে পূজো আর সেবা গোজ্যন; সেনত্তেই তে তারা উগুরে এ অমংগলান আন্যে।’” |
Copyright © 2021 Bangladesh Bible Society
Bangladesh Bible Society