২ বংশধর 5 - Chakma Bible

¹ এধোক্ক্যেন গুরিনে শলোমনে লগেপ্রভুর ঘরর্‌ বেক্‌ কামানি থুম্‌ গুরিলো। সে পরেন্দি তে তা বাপ্পো দায়ূদে যেদক্কানি জিনিস লগেপ্রভুর নাঙে যুদো গুরি রাগেয়্যে সিয়েনি আনিলো। সিয়েনি এলদে সোনা, রূবো আর নানান্‌ বাবোত্যে পিলে। সিগুন্‌ তে গোজেন ঘরর ধনভান্ডালত্‌ থোই দিলো।

সাক্ষ্য-সুন্দুক্কো তবনা-ঘরত্‌ আনানা

² ইয়েন পরেন্দি শলোমনে দায়ূদ-শঅর্‌, অত্তাৎ সিয়োনত্তুন্‌ লগেপ্রভুর সুদোম-সুন্দুক্কো আনিবাত্তে ইস্রায়েলর বুড়ো নেতাগুনোরে, গুট্টির-মুরুব্বীগুনোরে আর ইস্রায়েলীয় বংশর আজল্‌ মানুচ্চুনোরে যিরূশালেমত্‌ ডাগিনে পাদেল।

³ সেক্কে সাত্‌ মাজত্‌ পরবর্‌ সময়োত্‌ ইস্রায়েলর সে বেক্‌ মানুচ্চুনে রাজা ইদু লুমিলাক্‌।

⁴ ইস্রায়েলর বেক্‌ বুড়ো নেতাগুনে লুমিলে পরেন্দি লেবীয়গুনে সুন্দুক্কো তুলি নিলাক্‌।

⁵ তারা আর ধর্মগুরুগুনে সুন্দুক্কো, মিলন-তাম্বুলান আর বেক্‌ সুদ্ধো-সাংগ পিলেগুন্‌ বুয়োই নিলাক্‌।

⁶ রাজা শলোমন আর তার্‌ কায়-কুরে এগত্তর ওইয়্যে বেক্‌ ইস্রায়েলীয়গুনে সুন্দুক্কোর্‌ মুজুঙেন্দি থেইনে এদক্‌ ভেড়া আর গোরু উৎসর্ব গুরিলাক্‌, সিগুনোরে গোণা ন-গেলঅ।

⁷ সে পরেন্দি ধর্মগুরুগুনে লগেপ্রভুর সুদোম-সুন্দুক্কো ঠিগ জাগাত, তবনা-ঘরর্‌ ভিদিরে কামারাত্‌, অত্তাৎ দাঙর্ সুদ্ধো-সাংগ জাগানত্‌ করূবপুনোর ডুয়োগানির তলে নিইনে রাগেলাক্।

⁸ সেক্কে করূবপুনোর্‌ মেল্যে ডুয়োগানর্‌ সুন্দুক্কো আর সিগুনোরে বুয়োবার লুদিক্কুন্‌ ঢাগা গেলঅ।

⁹ সুন্দুক্কোর্‌ এ লুদিক্কুন্‌ এদক্‌ লাম্বা এলাক্কে, সিগুনোর্‌ মাদাগুন্‌ ভিদিরে গুদিগুনোর্‌ মুজুঙোত্ আজল্‌ কামারাবোত্‌, অত্তাৎ সুদ্ধো-সাংগ জাগানত্তুন্‌ দেগা যেদঅ, মাত্তর্‌ সুদ্ধো-সাংগ জাগানর বারেত্তুন্‌ দেগা ন-যেদঅ। সিগুন্‌ এজঅ সিদু রোইয়োন্‌।

¹⁰ ইস্রায়েলীয়গুনে মিসর দেজত্তুন্‌ নিগিলি এজানার পরেন্দি লগেপ্রভু হোরেব মুড়োবোত্‌ তারাত্তে যেক্কে সুদোমানি থিদেবর্ গুরিলো সেক্কে মোশি যে পাত্তর ফলক্‌ দ্বিবে সুন্দুগো ভিদিরে রাগেয়্যে সে দ্বিবে বাদে আর কিচ্ছু সিবে ভিদিরে ন-এলঅ।

¹¹ সে পরেন্দি বেক্‌ ধর্মগুরুগুনে সুদ্ধো-সাংগ জাগানত্তুন্‌ বারেন্দি এলাক্‌। সে ধর্মগুরুগুনে যে কনঅ দলত্‌ অদঅ সাৎ, বেক্কুনে নিজোরে সিজি গুরিলাক্‌।

¹² যে লেবীয়গুনে গান-বাজনা গুরিদাক্‌, অত্তাৎ আসফ, হেমন, যিদূথূন আর তারার্‌ পুয়োগুনে আর তারার্‌ বংশর মানুচ্চুনে মসীনার কাবড়ানি উরিনে পূজোবোর পূগেন্দি থিয়্যেইনে জোরি, বাশি আর হারমোনি বাজাদন্‌। তারা লগে এলাক্‌ একশঅ কুড়ি জন ধর্মগুরু যিগুনে তূরী বাজাদন্‌।

¹³ ধর্মগুরুগুনে যেক্কে বারেন্দি এলাক্‌ সেক্কে তূরী বাজেয়্যেগুনে আর গানগেইয়্যেগুনে একলগে এক সুরে লগেপ্রভুর বাঈনী গুরিলাক্‌ আর তারে ভালেদি জানেলাক্‌। তূরী, জোরি আর অন্য বাজানার লগে তারা দাঙর্‌ দাঙর্‌ গুরিনে লগেপ্রভুর নাঙে এ গান্নো গেলাক্‌, “তে মংগলময়, তার্‌ কোচ্‌পানা উমরত্তে।” সে সময়োত্‌ লগেপ্রভুর ঘরান্‌ মেঘে ঢাগি গেলঅ।

¹⁴ সে মেঘত্তে ধর্মগুরুগুনে তারার্‌ সেবা-কামানি গুরি ন-পারিলাক্‌, কিত্তে লগেপ্রভুর মহিমায় গোজেন ঘরান পেলেপেলে ওই যেইয়্যে।