২ বংশধর 4 - Chakma Bibleতবনা-ঘরর্ সাজগুজ্ আর পযাপিরা 1 শলোমনে কুড়ি আত্ লাম্বা, কুড়ি আত্ পাদাজ্যে আর দশ আত্ অজল্ এক্কো পিদোল ডালিপূজো বানেল। 2 সে পরেন্দি তে পিদোল্ ছাজিচাজাই ঢালিনে পানি রাগেবাত্তে এক্কো গুল্ গুরিনে দাঙর্ পিলে বানেল। পিলেবোর এক কিত্তেত্তুন্ সোজাসুজি অন্য কিত্তেন্দি মাপ্পো এলদে দশ আত্, গভীনান্ পাচ্ আত্ আর ডাক্ক্যে চেরোকিত্তে মাবে ত্রিশ আত্। 3 পিলেবোর বারেন্দি কাজাগান তলে পত্তি আঢ জাগানত্ দোশচুয়ো গুরিনে দ্বিসুর্ গোরুর আরুক্ এলাক্। যে ছাজিচাজাই পিলেবো বানা ওইয়্যে সে সাজানার্ ভিদিরেন্দি গোরুগুনোর্ আরুক্কানি এলঅ বিলি বেক্কানে মিলিনে এক্কো জিনিস অলঅ। 4 পিলেবো বারবো পিদোল গোরু পিদি উগুরে বোজেয়্যে এলঅ। সিগুনোর্ তিন্নো উত্তোরেন্দি মু, তিন্নো পোজিমেন্দি মু, তিন্নো দোগিণেন্দি মু আর তিন্নো পূগেন্দি মূ এলাক্ আর তারার্ পিজেন্দিগান্ এলদে ভিদিরে মোক্ক্যে। 5 পিলেবো এলদে চের্ আঙুল্ দাদঅ। তা মুয়োন্ এক্কান্ কদরা মুয়োন ধোক্ক্যেন্ এলঅ আর লিলি ফুলোর্ কুরি ধোক্ক্যেন্ বারেন্দিগান্ উল্ল্যেয়্যে এলঅ। সিয়েনত্ ছয়ষট্টি আজার কেজি পানি ধুরিদো। 6 তে দোশ্চুয়ো গাবালা বানেল আর পাচ্ছুয়ো রাগেল দোগিণেন্দি আর পাচছুয়ো রাগেল উত্তোরেন্দি। সিগুনো ভিদিরে পূজ্যে-উৎসর্বর জিনিসছানি ধুয়োদাক্, মাত্তর্ ধর্মগুরুগুনে নিজোর্ আত্-টেঙানি ধুয়োনার্ কামত্ বেবহার গুরিদাক্ দাঙর্ পিলেবো। 7 যেধোক্ক্যেন কুয়া ওইয়্যে সেধোক্ক্যেন্ তে দোশছুয়ো সোনার চেরাগটগ্ বানেইনে তবনা-ঘর ভিদিরে দোগিণেন্দি পাচ্ছুয়ো আর উত্তোরেন্দি পাচ্ছুয়ো রাগেল। 8 ইয়েনি বাদেয়ো তে দশছান্ টেবিল বানেইনে তবনা-ঘরঅ ভিদিরে দোগিণেন্দি পাচ্ছান্ আর আর উত্তোরেন্দি পাচ্ছান্ রাগেল। তে একশততুয়ো সোনার চেরাগ্অ বানেল। 9 তে ধর্মগুরুগুনোত্তে এক্কান্ উদোন্ যুক্কোল্ গুরিলো; সে পরেন্দি আর এক্কান্ দাঙর্ উদোন যুক্কোল্ গুরিনে তাত্তেই দোর্ বানেল আর দোরানি পিদোল্লোই বেড়েই দিলো। 10 তে দাঙর্ পিলেবো উদোন দোগিণে-পূগো কোণাত্ রাগেল। 11 ইয়েনিবাদে হীরামে বেক্ পিলেগুন্, লুয়োর্ হাদিগান আর চেরাগ্ বানেল। এধোক্ক্যেন গুরিনে তে গোজেন ঘরর্ যে কামানি রাজা শলোমনত্তে আঢত্ নেযেয়্যে সিয়েনি থুম্ গুরিলো। সিয়েনি অলঅ: 12 দ্বিবে খুদো; খুদোবো উগুরে গুল্ গুরি দ্বিবে মাঢা; সে মাঢা উগুরেগান্ সাজেবাত্তে দ্বিসুর্ আরুগোকাম্ গোজ্যে পাগেয়্যে শিগোল্; 13 সে শিগোলানিত্তে চেরশত্ ডালোম-খুদোবো উগুরে মাঢাবোর্ গুল্ গুরি কট্টাবো সাজেবাত্তে পত্তি সুর্ শিগলত্তে দ্বিসুর্ ডালোম; 14 গাবালা আর সিয়েনি বোজেবার বাক্সগুন; 15 দাঙর্ পিলেবো আর তা তলেন্দি বারবুয়ো গোরু; 16 পিলে, লুয়োর্ হাদিগান আর য়েরা তুলিবার্ কাদা চামেচ্ছান। লগেপ্রভুর ঘরত্তে হীরামে যেদক্কানি জিনিস রাজা শলোমন উগুমে বানেয়্যে সিয়েনি এলদে জোল্জোল্যে পিদোলর। 17 রাজা সিগুনোরে যর্দনর সং জাগাত্ সুক্কোৎ আর সর্তনর সংমোধ্যে এক্কান্ জাগাত্ মাদিত্ ঢালিনে বানেল। 18 এদক্কানি জিনিস শলোমনে এদক্ বেশ্ বানেয়্যেদে যে, পিদোল্ কত্তমান্ সিয়েন হবর্ পাহ্ ন-যায়। 19 গোজেন ঘরর্ যেদক্কানি পযাপিরা শলোমনে বানেয়্যে সিয়েনি অলদে: সোনার ডালিপূজো; মুজুঙো-রুটি রাগেবার টেবিলানি; 20 যেধোক্ক্যেন কুয়া ওইয়্যে সেধোক্ক্যেন্ দাঙর্ সুদ্ধো-সাংগ জাগানি মুজুঙোত্ জ্বালেবাত্তে খাটি সোনার চেরাগ থগ্ আর সিগুনোর চেরাগ্কুন্; 21 খাটি সোনার ফুল, চেরাগ আর চিম্টিগান; 22 বুদ্দিবো কাজেবার্ খাটি সোনার চিম্টিগান, খাটি সোনার বাজোন্, লুয়োর্ হাদিগান আর আগুন রাগেবার পিলেবো; আর ভিদিরে গুরিবোর, অত্তাৎ দাঙর্ সুদ্ধো-সাংগ জাগানর্ দোরানত্তে আর তবনা-ঘরর্ আজল্ গুদিবোর্ দোরানত্তে সোনার কব্জা। এ দোরানি সোনালোই বেড়েই দিয়্যে ওইয়্যে। |
Copyright © 2021 Bangladesh Bible Society
Bangladesh Bible Society