২ বংশধর 36 - Chakma Bible1 যেরেন্দি দেজর্ মানুচ্চুনে যোশিয়োর্ পুয়ো যিহোয়াহসরে নেযেইনে যিরূশালেমত্ তা বাবর্ জাগানত্ রাজা বানেলাক্। যিহূদার রাজা যিহোয়াহস 2 যিহোয়াহসে তেইশ বজর্ বয়জত্ রাজা ওইয়্যে আর তিন মাস যিরূশালেমত্ রাজাগিরি গোজ্যে। 3 মিসরর রাজা নখো যিরূশালেমত্ তারে সিংহাসনত্তুন্ সোরেই দিইনে যিহূদার উগুরে পেরায়্ চের্ টন্ রূবো আর ঊনচোল্লিশ কেজি সোনা কর্ বোজেল। 4 মিসরর রাজা যিহোয়াহসর এক্কো ভেই ইলীয়াকীমরে যিহূদা আর যিরূশালেম উগুরে রাজা বানেল আর ইলীয়াকীমোর নাঙানর্ বদলে যিহোয়াকীম রাগেল। নখো যিহোয়াহসরে ধুরিনে মিসরত্ নেযেল। যিহূদার রাজা যিহোয়াকীম 5 যিহোয়াকীমে পোজোশ বজর্ বয়জত্ রাজা ওইয়্যে আর এগার বজর্ যিরূশালেমত্ রাজাগিরি গোজ্যে। তা গোজেনে লগেপ্রভুর চোগেদি যিয়েনি ভান্ন্যেই তে সিয়েনি গুরিদো। 6 বাবিলোর রাজা নবুখদ্নিৎসরে তারে আক্রমণ গুরিনে বাবিলোত্ নেযেবাত্তে তারে পিদোলর্ শিগোল্লোই বানিলো। 7 নবুখদ্নিৎসরে লগেপ্রভুর ঘরত্তুন্ পযাপিরানিয়ো বাবিলোত্ নেযেইনে তার্ মন্দিরোত্ রাগেল। 8 যিহোয়াকীমোর অন্য বেক্ কামর্ কধানি আর তে যেদক্কানি জঘন্য কাম্ গোজ্যে আর তার্ বিরুদ্ধে যিয়েনি পাহ্ যেইয়্যে সিয়েনি বেক্কানি “ইস্রায়েল আর যিহূদার রাজাগুনোর বিজগ” নাঙে বোইবোত্ লেগা আঘে। সে পরেন্দি তার্ পুয়োবো যিহোয়াখীনে তার্ জাগানত্ রাজা অলঅ। যিহূদার রাজা যিহোয়াখীনে 9 যিহোয়াখীনে আদার বজর বয়জত্ রাজা ওইয়্যে আর তিন মাস দশ দিন যিরূশালেমত্ রাজাগিরি গোজ্যে। লগেপ্রভুর চোগেদি যিয়েনি ভান্ন্যেই তে সিয়েনিই গুরিদো। 10 বজরর্ শেজত্ রাজা নবূখদ্নিৎসরে মানুচ্ পাদেইনে তারে আর তা লগে লগেপ্রভুর ঘরর্ মংগা পযাপিরানিয়ো বাবিলোত্ নেযেল, আর যিহোয়াখীনোর কুত্তো সিদিকিয়রে যিহূদা আর যিরূশালেমর রাজা বানেল। যিহূদার রাজা সিদিকিয় 11 সিদিকিয় এগোজ্ বজর্ বয়জত্ রাজা ওইয়্যে আর এগার বজর্ যিরূশালেমত্ রাজাগিরি গোজ্যে। 12 তার্ গোজেন লগেপ্রভুর চোগেদি যিয়েনি ভান্ন্যেই তে সিয়েনি গুরিদো। তে ভাববাদী যিরমিয়, যিবে লগেপ্রভুর্ কধা কদঅ, তা মুজুঙোত্ নিজোরে চিগোন্ ন-গুরিলো। 13 ইয়েনিবাদে রাজা নবূখদ্নিৎসর, যিবে গোজেনর নাঙে তারে শমক্ খাবেয়্যে, তার্ বিরুদ্ধে তে উল্লোমি গুরিলো। তে একগেয়েমি গুরিনে আর নিজো মনান্ দর গুরিনে ইস্রায়েলর গোজেন লগেপ্রভুর ইন্দি ন-ফিরিলো। 14 ইয়েনিবাদেয়ো ধর্মগুরুগুনোর্ বেক্ নেতাগুনে আর মানুচ্চুনে অন্য জাদ ধোক্ক্যেন বজং অভ্যেস্ গুরি চলিনে জদবদে পাপ গুরিলাক্ আর লগেপ্রভু যিরূশালেমত্ তার্ যে ঘরানরে নিজোর্ নাঙে যুদো গোজ্যে সিয়েন্ অসিজি গুরিলো। যিরূশালেমর পতন অনা 15 ইস্রায়েলীয়গুনোর পূরোণিমানুচ্চুনোর গোজেন লগেপ্রভু বার্ বার্ মানুচ্ পাদেইনে তারারে উজিয়ার্ গুরিদো, কিত্যে তার্ মানুচ্চুনোর্ আর তার্ থেবার্ ঘরানি উগুরে তার্ দোয়্যে-মেইয়্যে এলঅ। 16 মাত্তর্ গোজেনর পাদেয়্যে মানুচ্চুনোরে তারা ঘিনেদাক্, তা কধানি তুচ্ছো গুরিদাক্ আর তার্ ভাববাদীগুনোরে ঠাট্টা-তামাজা গুরিদো। যেরেন্দি লগেপ্রভুর রাগ্কান তার্ মানুচ্চুনোর্ বিরুদ্ধে জাগি উদিলো; তারার্ রোক্ষ্যে পেবার্ আর কনঅ পথ ন-এলঅ। 17 তারার্ বিরুদ্ধে লগেপ্রভু বাবিলোর রাজারে লোই আনিলো। সে রাজাবো উবোসনা-ঘরত্ তারার্ গাবুজ্যেগুনোরে মারে ফেলেল আর গাবুজ্যে-গাবুরী, বুড়ো বা বয়স ওইয়্যে কাররে দোয়্যে-মেইয়্যে ন-দেগেল। গোজেনে তারারে বেক্কুনোরে সে রাজাবোর্ আঢত্ তুলি দিলো। 18 বাবিলোর রাজাবো গোজেনর ঘরর চিগোন্-দাঙর্ বেক্ পযাপিরানি আর ধন-সোম্বোত্তিগানি আর রাজা আর তার্ কাম্গুরিয়্যেগুনোর্ ধন-সোম্বোত্তিগানি বাবিলোত্ নেযেল। 19 তা মানুচ্চুনে গোজেনর ঘরান্ পুড়ি দিলাক্ আর যিরূশালেম দেবালান্ ভাঙি ফেলেলাক্। তারা সে জাগার্ বেক্ দাঙর্ দাঙর্ ঘরানি পুড়ি দিলাক্ আর বেক্ মংগা পযাপিরানি বর্বাত্ গুরি ফেলেলাক্। 20 যিগুনে মরণর্ আদত্তুন্ রোক্ষ্যে পেইয়োন্ তারারে তে বাবিলোত্ নেযেল, আর পারস্য-রেজ্যগান্ খেমতাত্ ন-এযানা সং তারা নবূখদ্নিৎসর আর তার্ গুট্টিগুনোর্ চাগর্ ওই থেলাক্। 21 এ অক্তত্ ইস্রায়েল দেজচানে তার্ জিরেবার্-বজরত্ জিরেল। যিরমিয়োর মাধ্যমে কোইয়্যে লগেপ্রভুর কধা সত্তুর্ বজর্ পূরোণ ন-অনা সং তারার্ দেজর্ বেক্ ভূইয়ানি এনেবাদে থেইনে জিরেল। 22 যিরমিয়োর মাধ্যমে কোইয়্যে লগেপ্রভুর কধাগান্ পূরণ অবাত্তে পারস্যের রাজা কোরসর রাজাগিরির্ পত্তম্ বজরত্ লগেপ্রভু কোরসর মনানত্ এন্ আওজ্ দিলো যিয়েনত্তে তে তার্ পুরো রেজ্যত্ মুয়োন্দি আর লেখ্যেগুরিনে এ ফগদাঙান্ গুরিলো: 23 “পারস্যের রাজা কোরসে এই কধাগান কোইয়্যেদে, ‘স্বর্গর গোজেন লগেপ্রভু পিত্থিমীর পুরো রেজ্যগান্ মরে দিয়্যে আর যিহূদা দেজর্ যিরূশালেমত্ তাত্তেই এক্কান্ ঘর্ বানেবাত্তে মরে নেযেয়্যে। তা মানুচ্চুনো ভিদিরে, অত্তাৎ তমা ভিদিরে যে যিয়েনত্ যেবাত্তে চায় তে সিয়েনত্ যোক্ আর তার্ গোজেন লগেপ্রভু তা লগে থোক্।’ ” |
Copyright © 2021 Bangladesh Bible Society
Bangladesh Bible Society