২ বংশধর 34 - Chakma Bibleযিহূদার রাজা যোশিয় 1 যোশিয় আস্তো বজর্ বয়জত্ রাজা ওইয়্যে আর এগত্রিশ বজর্ যিরূশালেমত্ রাজাগিরি গোজ্যে। 2 লগেপ্রভুর চোগেন্দি যিয়েনি গম্ তে সিয়েনি গুরিদো আর তার্ পূরোণি মানুচ্ দায়ূদোর পধেন্দি আদিদো; সে পথ্তানত্তুন্ ডেনে বা বাঙেন্দি ন-যেদঅ। 3 তার্ রাজাগিরির্ আস্তো বজরত্ তা বয়জছান্ কম্ থেলেয়ো তে তার্ পূরোণি মানুচ্ দায়ূদোর গোজেন আওজ্ মজিম্ আদিবাত্তে মনান্ ঠিগ্ গুরিলো। রাজাগিরির বার বজর অক্তত্ তে পূজোর্ বেক্ অজল্ জাগায়ানি, আশেরা-খুদোগুন, সাজিনে বানেয়্যে মূত্তিগুন্ আর ছাজিনে ঢাল্যে মূত্তিগুন্ যিহূদা আর যিরূশালেমত্তুন্ দূর্ গুরি দিয়্যে ধুরিলো। 4 তা মুজুঙোত্ বাল দেবেদার পূজোগুন্ ভাঙি ফেলা অলঅ; সিগুনো উগুরে যিদুক্কুন্ আগর্বাট্টি ঠগ্ এলাক্ সিগুনোরে কাবিনে কট্টা কট্টা গরা অলঅ আর আশেরা-খুদোগুন, কাবিনে বানেয়্যে মূত্তিগুন্ আর ছাজিনে ঢাল্যে মূত্তিগুন্ ভাঙিনে ধূল্যে ধোক্ক্যেন গরা অলঅ। যিগুনে সিগুনো ইদু এ্যামান্ ডালি দিদাক্ তারা গোর্য়ানি উগুরে সে ধূল্যানি ছিদি দিয়্যে অলঅ। 5 পূজোগুনো উগুরে ধর্মগুরুগুনোর আড়ুন্ পুড়ো অলঅ। এধোক্ক্যেন গুরিনে তে যিহূদা আর যিরূশালেমানরে সিজি গুরিলো। 6-7 মনঃশি, ইফ্রয়িম আর শিমিয়োন চাগালার আদামানিত্ আর শঅরানিত্ আর তার্ কায়-কুরে ভস্ত ওইয়্যে জাগায়ানি ভিদিরে, এন্ কি, নপ্তালি চাগালা সং বেক্ জাগায়ানিত্ তে বেক্ পূজোগুন্ আর আশেরা-খুদোগুন্ ভাঙি ফেলেল আর কাবিনে বানেয়্যে মূত্তিগুন্ গুড়ি গুরি ফেলেল আর ইস্রায়েলর বেক্ জাগায়ানিত্ তে বেক্ আগর্বাট্টি টগ্কুন্ কাবিনে কট্টা কট্টা গুরিলো। সে পরেন্দি তে যিরূশালেমত্ ফিরি এলঅ। 8 যোশিয়োর্ রাজাগিরির্ আদার বজর অক্তত্ তে দেজ্ আর উবোসনা-ঘরান্ সিজি গরানার্ পরেন্দি তার্ গোজেন লগেপ্রভুর ঘরান্ ঠিগ্ গুরিবাত্তে অৎসলিয়র পুয়ো শাফনরে, শঅরর শাজন্গুরিয়্যে মাসেয়রে আর যোয়াহসর পুয়ো বিজগ লিগিয়্যে যোয়াহরে পাধেই দিলো। 9 তারা দাঙর্ ধর্মগুরু হিল্কিয়ো ইদু গেলাক্ আর গোজেনর্ ঘরত্ যিদুক্কুন্ টেঙা-পোজে আনা ওইয়োন্, অত্তাৎ যিদুক্কুন্ টেঙা-পোজে রোক্ষ্যে-লেবীয়গুনে মনঃশি আর ইফ্রয়িম-গুট্টির্ মানুচ্চুনোরে আর ইস্রায়েলর বাদবাগি বেক্ মানুচ্চুনো ইত্তুন্ আর যিহূদা আর বিন্যামীন-গুট্টির বেক্ মানুচ্চুনোর্ আর যিরূশালেমর আদাম্মেগুনো ইত্তুন্ এগত্তর্ গোজ্যন্ সিগুন দাঙর্ ধর্মগুরুগুনো ইদু রাগেলাক্। 10 সে পরেন্দি সে টেঙা-পোজেগুন্ লগেপ্রভুর ঘর কামত্ চেইচিদিবাত্তে যে মানুচ্চুনোরে নেযা ওইয়্যে তারা আঢত্ দিয়্যে অলঅ। চেইচিদিয়্যেগুনে উবোসনা-ঘরান্ তুনিবাত্তে আরঅ ঠিগ্-ঠাগ্ গুরিবাত্তে মিস্ত্রিগুনো আঢত্ টেঙা দিলাক্, 11 অত্তাৎ যিহূদার রাজাগুনে যে ঘরানি ভস্ত গুরিবাত্তে দুয়োন্ সিয়েনিত্তে তারা কাবিল্ মিস্ত্রি আর রাজমিস্ত্রিগুনোরে টেঙা দিলাক্ যেনে তারা দোল্ গুরিনে কাপ্যে পাত্তর্ আর ঘর্ জোড়া দিবাত্তে আর দার্বোত্তে গাজ্ কিনি পারন্। 12 সে মিস্ত্রিগুনে বিশ্বেজ্গুরিনে কাম্ গোজ্যন্। তারারে চেইচিদিবাত্তে তারা উগুরে এলদে যহৎ আর ওবদিয় নাঙে মরারি-বংশর দ্বিজন লেবীয় আর কহাৎ-বংশর সখরিয় আর মশুল্লম আর যে লেবীয়গুনে গমেডালে বাজ্না বাজেই পারিদাক্ তারা। 13 ইগুনে বুদি বুয়োইয়্যে মানুচ্চুনো উগুরে কাম ভাড়ান্ এলঅ আর নানান্ কামত্ নেযেয়্যে কাম্য মানুচ্চুনোর্ বেক্কুনোরে চেইচিদিদাক্। লেবীয়গুনো ভিদিরে কেউ কেউ এলাক্কে লিগিয়্যে, মুরুব্বী আর চুগিদার। রীদি-সুদোম বোই পাহ্ গেলঅ। 14 তারা যেক্কে লগেপ্রভুর ঘরত্ আন্যে টেঙা-পোজেগুন্ নিগিলেই আনদন্ সেক্কে ধর্মগুরু হিল্কিয় মোশির মাধ্যমে দিয়্যে লগেপ্রভুর রীদি-সুুদোম বোইবো পেলঅ। 15 হিল্কিয় সেক্কে রাজার লিগিয়্যে শাফনরে কলঅ, “লগেপ্রভুর ঘরত্ মুই রীদি-সুদোম বোইবো পেইয়োং।” ইয়েন্ কোইনে তে শাফনরে সে বোইবো দিলো। 16 শাফনে সে বোইবো রাজা ইদু নেযেইনে তারে কলঅ, “তঅ কামগুরিয়্যেগুনো উগুরে যে কামর্ ভারান্ দিয়্যে ওইয়্যে তারা সিয়েনি বেক্কানি গোজ্যন্। 17 লগেপ্রভুর ঘরত্ যে টেঙা-পোজেগুন্ এলাক্ তারা সিগুন্ নিগিলেনে চেইচিদিয়্যে আর কামর্ মানুচ্চুনো উগুরে দুয়োন্।” 18 সেক্কে লিগিয়্যে শাফনে এ কধাগান রাজারে জানেল, “ধর্মগুরু হিল্কিয় মরে এক্কো বোই দিয়্যে।” ইয়েন্ কোইনে শাফনে সিয়েন্ রাজারে পোড়েই শুনেল। 19 রাজা রীদি-সুদোমর্ কধানি শুনিনে নিজোর্ কাবড়্-চুগোরানি ফাদিলো। 20 তে হিল্কিয়, শাফনর পুয়ো অহীকাম, মীখায়ের পুয়ো অব্দোন, শাফন আর রাজার কাবিদ্যঙ্ অসায়রে এ উগুমান্ দিলো, 21 “যে বোইবো পাহ্ যেইয়্যে সিবে ভিদিরে কি লেগা আঘে সিবে তুমি যেইনে মর্ আর ইস্রায়েল আর যিহূদার বাদবাগি মানুচ্চুনোত্তে লগেপ্রভুরে পুযোর্ গর্। আমা পুরোণি মানুচ্চুনে লগেপ্রভুর কধানি ন-পালান্ আর এ বোইবোত্ যিয়েনি লেগা আঘে সেই মজিম কাম্ ন-গরে বিলিনে তার্ জদবদে রাগ্কান আমা উগুরে পোজ্যে।” 22 সেক্কে হিল্কিয় আর রাজা যিগুনোরে হিল্কিয়োর লগে পাদেয়্যে তারা এ পৌইদ্যেনে কধা কবাত্তে মিলে-ভাববাদী হুল্দা ইদু গেলাক্। হুল্দা এলদে কাবড়-চুগোড়্ চুগি দিয়্যে শল্লুমোর মোক্। শল্লুমে অলদে হস্রহের নাদিন্, অত্তাৎ তোখতর পুয়ো। তে যিরূশালেমর দ্বিলম্বর ভাগত্ বজত্তি গুরিদো। 23-24 হুল্দা তারারে কলঅ, “ইস্রায়েলর গোজেন লগেপ্রভু মরে কবাত্তে কোইয়্যেদে, মইদু যিবে তমারে পাদেয়্যে তারে যেইনে কগোই লগেপ্রভু কোইয়্যেদে, ‘যিহূদার রাজা মুজুঙোত্ সে বোইবোত্ লেখ্যে যেদক্কানি অভিশাব কধা পড়া ওইয়্যে সে বেক্ দযাগানি মুই এ জাগানত্ আর তা মানুচ্চুনো উগুরে আনিম্। 25 তারা মরে ছাড়িনে দেব্-দেবেদাগুনোর্ নাঙে আগর্বাট্টি্ জ্বালেয়োন্ আর তারার্ আদে বানেয়্যে বেক্ মূত্তিগুন্দোই মরে মনান্ জাগুলুক্ গুরি দুয়োন্। সেনত্তেই এ জাগায়ানর্ উগুরে মর্ রাগ্কান মুই ঢালি দিম্ আর সে রাগর্ আগুনান্ মারা ন-যেবঅ।’ 26 লগেপ্রভুর ইদু পুযোর্ গুরিবাত্তে যিবে তমারে পাদেয়্যে সে যিহূদার্ রাজারে কবাদে, ইস্রায়েলর গোজেন লগেপ্রভু কোইয়্যেদে, 27 ‘এ জাগায়ান্ আর তা মানুচ্চুনো বিরুদ্ধে মুই যিয়েনি কোইয়োং সিয়েনি শুনিনে তঅ মনান্ সিয়েন্দোই সাড়া দিয়্যে আর মঅ মুজুঙোত্ তুই নিজোরে চিগোন্ গোজ্যস্ আর তঅ পোজাক্কান্ ফাদিনে মইদু কানাকুদি গোজ্যস্। তুই ইয়েনি গোজ্যস্ বিলিনে মুই লগেপ্রভু তর্ তবনাগান্ শুন্যং। 28 সেনত্তে মুই যাদিমাদি তরে তর্ পূরোণি মানুচ্চুনো ইদু নেযেম্ আর তুই সুগে শান্দিয়্যে গোরান্ পেবে। এ জাগায়ান উগুরে আর যিগুনে ইদু বজত্তি গত্তন্ তারা উগুরে মুই যেদক্কানি দজা আনিম্ তঅ চোখ্কুনে সিয়েনি ন-দেগিবাক্।’ ” তারা হুল্দার জোব্পান লোইনে রাজা ইদু ফিরি গেলাক্। 29 সেক্কে রাজা মানুচ্ পাধেইনে যিহূদা আর যিরূশালেমর বেক্ বুড়ো নেতাগুনোরে এগত্তর্ গুরিলো। 30 তে যিহূদা আর যিরূশালেম মানুচ্চুনোরে, ধর্মগুরু আর লেবীয়গুনোরে আর গণ্যমান্য মুরুব্বী বেক্ মানুচ্চুনোরে লোইনে লগেপ্রভুর ঘরত্ গেলাক্। লগেপ্রভুর ঘরত্ সুদোম যে বোইবো পাহ্ যেইয়্যে সিবের্ বেক্ কধানি তে তারা ইদু পোড়েই শুনেল। 31 রাজা তার্ নিজোর্ জাগানত্ থিয়্যেইনে লগেপ্রভুর পধেন্দি আদিবাত্তে আর বেক্ মনান্-পরাণান্ দিইনে তার্ বেক্ উগুমানি, সুদোম্ আর হুকুমানি মানি চলিবাত্তে, অত্তাৎ এ বোইবো ভিদিরে লেখ্যে সুদোমর্ বেক্ কধানি পালেবাত্তে লগেপ্রভুর মুজুঙোত্ শমক্ খেলঅ। 32 সে পরেন্দি তে যিরূশালেম আর বিন্যামীনোর আঝিল্ ওইয়্যে বেক্ মানুচ্চুনোরে সে একই শমক্ খাবেল। যিরূশালেমর মানুচ্চুনে গোজেনর, তারার্ পূরোণি মানুচ্চুনোর গোজেনর সুদোমানি পালেবাত্তে আরাম্ভ গুরিলাক্। 33 যোশিয় ইস্রায়েলীয়গুনোর গজক্ গোজ্যে বেক্ দেজ্ছানিত্তুন্ জঘন্য মূত্তিগুন্ দূর্ গুরি দিলো আর ইস্রায়েলত্ আঝিল্ ওইয়্যে বেক্কুনোরে দিইনে তে তারার্ গোজেন লগেপ্রভুরে সেবা গুরিল। যেদকদিন তে বাঁজি এলঅ সেদকদিন মানুচ্চুনে তারার্ পূরোণি মানুচ্চুনোর্ গোজেন লগেপ্রভুর পধেন্দি চোল্যন্। |
Copyright © 2021 Bangladesh Bible Society
Bangladesh Bible Society