২ বংশধর 33 - Chakma Bibleযিহূদার রাজা মনঃশি 1 মনঃশি বার বজর বয়জত্ রাজা ওইয়্যে আর যিরূশালেমত্ পাচ্পান্ন বজর্ রাজাগিরি গোজ্যে। 2 লগেপ্রভু ইস্রায়েলীয়গুনো মুজুঙোত্তুন্ যিদুক্কুন্ জাদরে ধাবেই দিয়্যে তারা ধোক্ক্যেন জঘন্য কাম্ গুরিনে তে লগেপ্রভুর চোগেন্দি যিয়েনি ভান্ন্যেই সিয়েনি গুরিদো। 3 তা বাপ্পো হিষ্কিয় পূজোত্তে যেদক্কানি অজল্ জাগা ভস্ত গোজ্যে তে সিয়েনি আরঅ বানেল। ইয়েনিবাদেয়ো তে বাল দেবেদার নাঙে কয়েক্কো ডালিপূজো আর আশেরা-খুদো বানেল। তে আগাজর্ বেক্ তারাগুনোরে পূজো আর সেবা গুরিদো। 4 যে ঘরান পৌইদ্যেনে লগেপ্রভু কোইয়্যে, “মুই জিংকানিবর যিরূশালেমত্ বজত্তি গুরিম,” লগেপ্রভুর সে ঘর ভিদিরে তে কয়েক্কো ডালিপূজো বানেল। 5 লগেপ্রভুর ঘর দ্বিয়েন উদোনত্ তে আগাজর বেক্ তারাগুনোর্ নাঙে কয়েক্কো ডালিপূজো বানেল। 6 বিন্-হিন্নোম কিজিঙোত্ তা পুয়োগুনোরে তে আগুনোত্ পুড়িনে উৎসর্ব গুরিলো। যিগুনে কুলক্ষণ দেগিনে আগাম্ কধা কন্, ফু-ফা আর যাদুবিদ্যে বেবহার গুরিনে আর ভূত্তুনোর সমাজ্যে অন্ আর ভান্ন্যেই আত্মাগুনোর্ লগে মিজেন্ তে তারা লগে সল্লা গুরিদো। লগেপ্রভুর চোগেন্দি ভালোক্কানি ভান্ন্যেই কাম্ গুরিনে তে তারে অহুজি গুরিলো। 7 তে যে মূত্তিবো কাবিনে বানেইয়্যে সিবে নেযেইনে গোজেন ঘরত্ রাগেল। গোজেনে এ ঘরান পৌইদ্যেনে দায়ূদ আর তার্ পুয়ো শলোমনরে কোইয়্যেদে, “এ ঘরান্ আর ইস্রায়েলর পুরো গুট্টিগুনো ভিদিরেত্তুন্ মর্ বেঈ লোইয়্যে এ যিরূশালেমানরে মুই উমরত্তে মর্ থেবার্ জাগা বানেম্। 8 মুই ইস্রায়েলীয়গুনোরে যেদক্কানি উগুম্ দুয়োং, অত্তাৎ মোশির মাধ্যমে যেদক্কানি রীদি-সুদোম, সুদোম্ আর উগুম্ দুয়োং যুনি বানা তারা গমেডালে সিয়েনি পালান্ সালে যে দেজ্ছান মুই তমা পূরোণি মানুচ্চুনোরে দুয়োং সিয়েনিত্তুন্ তারারে আর ধাবেই ন-দিম্।” 9 যিহূদা আর যিরূশালেমর মানুচ্চুনোরে মনঃশি ভান্ন্যেই পধেন্দি নেযেল; সিয়েনত্তে লগেপ্রভু ইস্রায়েলীয়গুনো মুজুঙোত্তুন্ যিদুক্কুন্ জাদরে ভস্ত গুরি দিয়্যে তারাত্তুন্ বেশ্ তারা আরঅ ভান্ন্যেই কাম্ গরা ধুরিলাক্। 10 লগেপ্রভু মনঃশি আর তার মানুচ্চুনো লগে কধা কদঅ মাত্তর্ তারা সিয়েনি কান্ ন-পাদিদাক্। 11 সেনত্তে লগেপ্রভু তারা বিরুদ্ধে আসিরিয়ার রাজার সেনাপতিগুনো ইদু আনিলো। তারা মনঃশিরে বন্দী গুরিনে তা কিয়্যেত্ হেবা লাগেইনে পিদোল শিগোললোই বানিনে বাবিলোত্ নেযেলাক্। 12 দজাত্ পড়িনে তে তার্ গোজেন্ লগেপ্রভুর দোয়্যে ভিক্ষ্যে গুরিলো আর তার্ পূরোণি মানুচ্চুনোর্ গোজেন মুজুঙোত্ নিজোরে অমকদ চিগোন্ গুরিলো। 13 এধোক্ক্যেন গুরিনে তবনা গুরিলে লগেপ্রভুর মনান্ নরম্ অলঅ আর তা কোজোলিগান্ শুনিনে তে তারে যিরূশালেমত্ আর তার্ রেজ্যত্ ফিরেই আনিলো। সেক্কে মনঃশি বুঝি পারিলোদে, লগেপ্রভুই গোজেন। 14 পরেন্দি তে দায়ূদ-শঅর বারেন্দি দেবালান্ কিজিঙো ভিদিরে গীহোন পয়নালাত্তুন্ ওফল মুড়োবো ঘিরিনে পোজিমেন্দি মাছ-গেট্টোত্ সুমিবার্ পথ্তান্ সং আরঅ অজল্ গুরি বানেইনে দরমর গুরিলো। যিহূদার দেবাল-ঘিজ্যে বেক্ আদামানি আর শঅরানিত্ তে সেনাপতিগুনোরে নেযেল। 15 তে লগেপ্রভু ঘরত্তুন্ দেব-দেবেদাগুনোর্ মূত্তিগুনোরে দূর্ গুরি দিলো। তে যিরূশালেমত্ আর লগেপ্রভুর ঘরর্ মুড়োবো উগুরে যিদুক্কুন্ ডালিপূজো বানেয়্যে সিগুনোরে দূর্ গুরি দিলো। সিগুনোরে লোইনে তে শঅর বারেন্দি ফেলেই দিলো। 16 সে পরেন্দি তে লগেপ্রভুর ডালিপূজোবো আরঅ ঠিগ্ গুরিলো আর সিবে উগুরে উদোলোলি আর কৃতজ্ঞতা -উৎসর্বর অনুষ্ঠান গুরিলো। তে যিহূদার মানুচ্চুনোরে উগুম দিলো যেনে তারা ইস্রায়েলীয়গুনোর গোজেন লগেপ্রভুরে সেবা গরন্। 17 মানুচ্চুনে সেক্কেয়ো পূজোর্ অজল্ জাগায়ানিত্ এ্যামান্ উৎসর্ব গুরিদাক্, তো তারা সিয়েনি গুরিদাক্ বানা তারার্ গোজেন লগেপ্রভুর নাঙে। 18 মনঃশির অন্য বেক্ কামর্ কধানি, তা গোজেন ইদু তার্ তবনাগান আর ইস্রায়েলর গোজেন লগেপ্রভুর নাঙে দেক্কোন্দেগুনে তারে যে কধাগান কোইয়োন্ সিয়েনি বেক্কানি “ইস্রায়েলর রাজাগুনোর বিজগ” নাঙে বোইবোত্ লেগা আঘে। 19 তার্ তবনাগানর কধানি, তার্ কোজোলিগান্দোই গোজেন মনান্ নরম অনার্ কধাগান, তার্ বেক্ পাপ্পানি আর অবিশ্বেজর্ কধানি আর তে নিজোরে গোজেন মুজুঙোত্ চিগোন্ গুরিবার আগেন্দি পূজোর্ যেদক্কানি অজল্ জাগা বানেয়্যে আর আশেরা-খুদো আরে কাবিনে লেখ্যে মূত্তি থিদেবর্ গোজ্যে সে বেক্ কধানি দেগিয়্যেগুনোর্ বোইয়োত্ লেগা আঘে। 20 পরেন্দি মনঃশি তার্ পূরোণি মানুচ্চুনো ইদু গেলগোই আর রাজঘরত্ তারে গোর্ দিয়্যে অলঅ। তা জাগানত্ তার্ পুয়ো আমোনে রাজা অলঅ। যিহূদার রাজা আমোন 21 আমোনে বেইশ্ বজর্ বয়জত্ রাজা ওইয়্যে আর যিরূশালেমত্ দ্বিবজর রাজাগিরি গোজ্যে। 22 তা বাপ্পো মনঃশি ধোক্ক্যেন তে লগেপ্রভুর চোগেন্দি যিয়েনি ভান্ন্যেই সিয়েনি গুরিদো। মনঃশি যিদুক্কুন্ মূত্তি কাবিনে বানেইয়্যে আমোনে তারারে পূজো গুরিদো আর তারা ইদু এ্যামান্ উৎসর্ব গুরিদো। 23 মাত্তর্ তা বাপ্পো মনঃশি ধোক্ক্যেন তে লগেপ্রভুর মুজুঙোত্ নিজোরে চিগোন্ ন-গরে; তে পাপ্ গরা ধুরিলো। 24 আমোনর কাম্গুরিয়্যেগুনে তা বিরুদ্ধে কুজুরোমি গুরিনে রাজঘরদই তারে খুন্ গুরিলাক্। 25 মাত্তর্ যিগুনে রাজা আমোন বিরুদ্ধে কুজুরোমি গোজ্যন্ দেজর্ মানুচ্চুনে তারারে বেক্কুনোরে মারে ফেলেলাক্ আর তারা তার্ পুয়ো যোশিয়রে তা জাগানত্ রাজা বানেলাক্। |
Copyright © 2021 Bangladesh Bible Society
Bangladesh Bible Society