২ বংশধর 32 - Chakma Bibleআসিরিয়ার রাজা সন্হেরীবর উদি যানা 1 হিষ্কিয় বিশ্বেজ্ গুরিনে বেক্কানি গরানার্ পরেন্দি আসিরিয়ার রাজা সন্হেরীবে এইনে যিহূদা আক্রমণ গুরিলো। তে দেবাল-ঘিজ্যে শঅর্ আর আদামানি ঘিরিলো, ভাবিলোদে সিয়েনি তে নিজোত্তে জিদিই নিবো। 2 হিষ্কিয় চেলদে সন্হেরীবে এচ্ছ্যে আর যিরূশালেমর বিরুদ্ধে যুদ্ধো গুরিবাত্তে মনান্ ঠিগ্ গুরিলো। 3 ইয়েন্ দেগিনে তে তার্ সেনাপতিগুনোরে আর যোদ্ধাগুনোর্ লগে সল্লা গুরিনে শঅর বারেন্দি পয়নালাবোর্ পানিগান নাঢি দিবো বিলিনে ঠিগ্ গুরিলো। এ কামত্ তারা তারে বল্ দিলাক্। 4 বোউত্ মানুচ্ এগত্তর্ ওইনে বেক্ পয়নালাগুন আর দেজ ভিদিরেদি বেঈ যেইয়্যে পানি গঙারুন নাঢি দিলাক্ । তারা কোইয়োন, “আসিরিয়ার রাজাগুনে এইনে কিত্তে এদক্ পানি পেবাক্?” 5 হিষ্কিয় দেবালর বেক্ ভাঙা কট্টানি আর অজল্ চুগিদার-ঘরানি ঠিগ্ গুরিনে নিজোরে দরমর গুরিলো। ইয়েনিবাদে সে দেবাল বারেন্দি তে আর এক্কান্ দেবাল বানেল আর দায়ূদ-শঅর মিল্লো আরঅ দরমর গুরিলো। তে বোউত্ আত্যের্ আর ঢাল্ বানেল। 6 তে মানুচ্চুনো উগুরে সেনাপতিগুনোরে নেযেল আর শঅর গেদো চক্কর্বোত্ তারারে এগত্তর্ গুরিনে এ কধাগান্ কোইনে উচ্চোমি তুমি দিলো, 7 “তুমি বোলি আর সাহসী অ। আসিরিয়ার রাজা আর তার্ দাঙর্ সৈন্যদল্লো দেগিনে তুমি ন-দোরেবা বা আজা ন আরেবা, কিত্যে তা লগে যিগুনে আগন্ তারাত্তুন্অ বেশ্ যিগুনে আমা লগে আগন্ তে আরঅ দাঙর্। 8 তা লগে আগন্ বানা মান্জ্যর্ বলানি, মাত্তর্ আমারে বল্ দিবাত্তে আর আমা পক্ষেদি যুদ্ধো গুরিবাত্তে আমা লগে আগে আমা গোজেন লগেপ্রভু।” মানুচ্চুনে যিহূদার রাজা হিষ্কিয়র কধাগান শুনিনে তা কধা উগুরে বিশ্বেজ্ গুরিলাক্। 9 যেরেন্দি আসিরিয়ার রাজা সন্হেরীব আর তার্ বেক্ সৈন্যদলুনে লাখীশ জাগায়ান্ ঘিরিলাক্ আর তার্ কয়েক্কো মান্জ্যরে তে যিরূশালেমত্ পাধেই দিলাক্। তে যিহূদার রাজা হিষ্কিয়ো ইদু আর সিয়েনত্ আঝিল্ ওইয়্যে যিহূদার বেক্ মানুচ্চুনো ইদু এ কধাগান্ কোই পাদেল, 10 “আসিরিয়ার রাজা সন্হেরবে কোইয়্যেদে, ‘তুমি কুবোন উগুরে বিশ্বেজ্ গুরি আগঅ যিয়েনত্তে তুমি ঘিজ্যে অলেয়ো যিরূশালেমত্ থেবা? 11 পেত্ পরায়্ আর পানি তিরেজে তুমি মরঅ সেনত্তেই হিষ্কিয় এ কধাগান কোইনে তমারে ভুলার্, তমা গোজেন লগেপ্রভু আসিরিয়ার রাজার্ আঢত্তুন্ তমারে উদ্ধোর্ গুরিবো। 12 হিষ্কিয় নিজে কি পূজোর্ অজল্ জাগায়ানি আর ডালিপূজোগুন্ ভস্ত গুরি ন-দে? যিহূদা আর যিরূশালেমর মানুচ্চুনোরে কি তে ন-কয়, বানা এক্কো ডালিপূজো মুজুঙোত্ তারার্ উবোসনা গরা পুরিবো আর সিবে উগুরে আগর্বাট্টি জ্বালা পুরিবো? 13 অন্য দেজর্ বেক্ জাদ্তুনো উগুরে মুই আর মর্ পূরোণি মানুচ্চুনে যিয়েনি গোজ্যন্ সিয়েনি কি তুমি হবর্ পঅ? সে জাদ্তুনোর্ দেবেদাগুনে কি আমা আঢত্তুন্ তারা দেজছান্ উদ্ধোর্ গুরি পাজ্যন্? 14 যে জাদ্তুনোরে মর্ পূরোণি মানুচ্চুনে ভস্ত গুরি ফেলেয়োন্ তারার্ বেক্ দেবেদাগুনো ভিদিরে কন্না মঅ আঢত্তুন্ তার্ মানুচ্চুনোরে উদ্ধোর্ গুরি পাজ্যে? সালে কেধোক্ক্যেন গুরিনে তমা গোজেনে মঅ আঢত্তুন্ তমারে উদ্ধোর্ গুরিবো? 15 ইক্কিনে তুমি হিষ্কিয়রে এধোক্ক্যেন গুরিনে তমার্ ছলনা গুরিবাত্তে আর ভুলেই রাগেবাত্তে ন-দুয়ো। তুমি তারে বিশ্বেজ্ ন-গোজ্য, কিত্তে কনঅ জাদর্ বা কনঅ রেজ্যর্ দেবেদায় মর্ বা মর্ পূরোণিমানুচ্চুনোর্ আদত্তুন্ তা মানুচ্চুনোরে উদ্ধোর্ গুরি ন-পারন্। সালে ইয়েন্ যে কত্তমান্ সত্য, তমা দেবেদাগুনে মঅ আঢত্তুন্ তমারে উদ্ধোর্ গুরি ন-পারিবাক্।’ ” 16 সন্হেরীব মানুচ্চুনে গোজেন লগেপ্রভু আর তা চাগর্ হিষ্কিয়োর বিরুদ্ধে আরঅ বোউত্ কধা কলাক্। 17 ইয়েনিবাদেয়ো সন্হেরীবে ইস্রায়েলর গোজেন লগেপ্রভুরে অগমান গুরিবাত্তে চিদিগানত্ তা বিরুদ্ধে এ কধাগান লিগিলো, “অন্য দেজর্ জাদ্তুনোর্ দেবেদাগুনে যেধোক্ক্যেন গুরিনে মঅ আঢত্তুন্ তারা মানুচ্চুনোরে উদ্ধোর্ ন-গরন্, ঠিগ্ সেধোক্ক্যেন গুরিনে হিষ্কিয়োর গোজেনেয়ো মঅ আঢত্তুন্ তা মানুচ্চুনোরে উদ্ধোর্ ন-গুরিবো।” 18 সন্হেরীবোর মানুচ্চুনে ইব্রীয় কধান্দি রঅ ছাড়িনে সে কধাগান কুয়ো ধুরিলাক্, যেনে যিরূশালেমর যে মানুচ্চুনে দেবাল উগুরে এলাক্ তারা অমকদ দোরান্ আর আসিরিয়ার মানুচ্চুনে শঅরান্ গজক্ গুরি নেযেই পারন্। 19 তারা মান্জ্যর্ আদে বানেয়্যে পিত্থিমীর বেক্ জাদর্ দেবেদাগুনো পৌইদ্যেনে যিয়েনি কোইয়োন্ যিরূশালেমর গোজেন পৌইদ্যেনেয়ো সেধোক্ক্যেন কলাক্। 20 সেনত্তেই রাজা হিষ্কিয় আর আমোসর পুয়ো ভাববাদী যিশাইয় তবনার্ মাধ্যমে স্বর্গর গোজেন ইদু কানাকুদি গরা ধুরিলাক্। 21 সেক্কে লগেপ্রভু এক্কো স্বর্গদূতোরে পাধেই দিলো যিবে আসিরিয়ার রাজার তাম্বুলো ভিদিরেত্তুন্ বেক্ যোদ্ধাগুরিয়্যেগুনোরে, নেতাগুনোরে আর সেনাপতিগুনোরে পুরোপুরি গুরিনে ভস্ত গুরি ফেলেল। সেক্কে সন্হেরিবে লাজে নিজো দেজত্ ফিরি গেলঅ। তে তার্ দেবেদাবোর্ মন্দিরোত্ যানার্ পরেন্দি তার্ কয়েক্কো পুয়ো তারে মারে ফেলেল। 22 এধোক্ক্যেন গুরিনে লগেপ্রভু আসিরিয়ার রাজা সন্হেরীব আর অন্য বেক্কুনো আঢত্তুন্ হিষ্কিয়রে আর যিরূশালেমর মানুচ্চুনোরে রোক্ষ্যে গুরিলো। তে বেক্কানিন্দি তারারে দোলেডালেই রাগেল। 23 ভালোক্জনে যিরূশালেমত্ লগেপ্রভুর নাঙে বক্শিজ্ আনিলাক্ আর যিহূদার রাজা হিষ্কিয়োত্তে মংগা বক্শিজ্ আনিলাক্। সেক্কেনে সে অক্তত্তুন্ ধুরিনে বেক্ জাদর্ মানুচ্চুনে তারে ভারী সর্মান গরা ধুরিলাক্। হিষ্কিয়োর বাড়্বো অনা, কামত্ ফলানা আর মরাণা 24 সে অক্তত্ হিষ্কিয় পিড়েত্ পড়িনে মুরিবার্ অক্ত অলঅ। হিষ্কিয় লগেপ্রভু ইদু তবনা গরানার্ পরেন্দি তে জোব্ দিলো আর তারে এক্কান্ আমক্ অবার্ চিহ্নো দিলো। 25 মাত্তর্ হিষ্কিয়ো মনত্ বাড়্বো গরানাগান্ দেগা দিলো। তা উগুরে যে বাবোত্যে বর্ দিয়্যে ওইয়্যে সেই মজিম্ তে কাম্ ন-গরে; সেক্কে তা উগুরে আর যিহূদা আর যিরূশালেম উগুরে লগেপ্রভুর রাগ্ অলঅ। 26 সেক্কে হিষ্কিয় তা মনর্ বাড়্বো গরানার্ কধানি বুঝি পারিনে নিজোরে তলে গুরিলো আর যিরূশালেম মানুচ্চুনেয়ো সেধোক্ক্যেন গুরিলাক্। সেনত্তে হিষ্কিয়োর সময়োত্ লগেপ্রভুর রাগ্কান তারা উগুরে লামি ন-এলঅ। 27 হিষ্কিয়োর বোউত্ ধন-সোম্বোত্তি আর সর্মান এলঅ। তার্ সোনা-রূবো, মণি-মুক্তো, তুম্বাজ্ মজলা, ঢাল আর নানান্ বাবোত্যে মংগা পযাপিরা রাগেবাত্তে তে ধনভান্ডাল্ বানেল। 28 ইয়েনিবাদেয়ো তে সোজ্য, নূয়ো আংগুর-রস আর তেল রাগেবাত্তে ভান্ডাল-ঘর বানেল আর নানান্ বাবোত্যে এ্যামান্ আর ছাগল-ভেড়া থেবার্ ঘরঅ বানেল। 29 তে নিজোত্তে ভালোক্কানি আদাম আর শঅর্ বানেল। তার্ গোরু-ছাগল-ভেড়া ভালোক্কুন্ অলাক্, কিত্তে গোজেনে তারে বোউত্ ধন দিয়্যে। 30 হিষ্কিয় গীহোন পয়নালাবো উগুরেদি মুয়োন্ নাঢি দিইনে দায়ূদ-শঅর পোজিমেন্দি পানিগান্ নেযেল। তে তার্ বেক্ কামানিত্ ফোলেয়্যে। 31 দেজত্ যে আমক্ অবার্ চিহ্নোগান্ দেগা ওইয়্যে সে পৌইদ্যেনে পুযোর্ গুরিবাত্তে যেক্কে বাবিলো নেতাগুনে দূত পাদেয়োন সেক্কে গোজেনে তারে জগা চেবাত্তে তারে ছাড়ি গেলগোই, যেনে তা মনত্ কি আঘে সিয়েন্ ফগদাঙ্ অয়। 32 হিষ্কিয়োর অন্য বেক্ কামর্ কধানি আর তার্ গোজেন ভোক্তির্ কাম পৌইদ্যেনে আমোসর পুয়ো ভাববাদী যিশাইয়র দর্শন বোইবোত্ আর “যিহূদা আর ইস্রায়েলর রাজাগুনোর বিজগ” নাঙে বোইবোত্ লেগা আঘে। 33 যেরেন্দি হিষ্কিয় তার্ পূরোণি মানুচ্চুনো ইদু গেলগোই আর দায়ূদোর বংশধরুনোর গোর জাগান উগুরে তারে গোর্ দিয়্যে অলঅ। তে মুরিবার্ অক্তত্ যিহূদার বেক্কুনে আর যিরূশালেমর মানুচ্চুনে তারে সর্মান দেগেলাক্। তার্ পুয়ো মনঃশি তা জাগানত্ রাজা অলঅ। |
Copyright © 2021 Bangladesh Bible Society
Bangladesh Bible Society